मन की बात
प्रधानमंत्री नरेन्द्र मोदी ह किहीन हे कि भारत ह सौर ऊर्जा ले बिजली पैदा करइया सबले बड़का देस म सामिल होगे हे। आकाशवाणी ले मन की बात कारीकरम म प्रधानमंत्री ह किहीन कि जम्मों विश्व ह सौर ऊर्जा ल भविष्य के रूप म देखत हवय।
ओमन किहीन कि भारत ह अंतरिक्ष के क्षेत्र म घलो जोरदरहा कमाल देखावत हे अउ पूरा दुनिया ह सफलता ल देख के अचरज म हवय। प्रधानमंत्री ह किहीन कि भारत ह एके संग छत्तीस ठिन सेटेलाइट अंतरिक्ष म भेजे हे अउ ए सफलता देवारी तिहार के एक दिन पहिली मिलीस। ए प्रक्षेपण के संगेसंग भारत ह अंतरिक्ष के वैश्विक वाणिज्यिक बाजार म मजबूत खिलाड़ी बनके आगू आय हे। एखर ले अंतरिक्ष के क्षेत्र म भारत बर अवसर के नवा रद्दा खुले हे।
प्रधानमंत्री ह स्टूडेंट पावर के घलो उल्लेख करत किहीन कि युवा मनके सक्ती ह भारत ल अउ ऊंचाई तक ले जाही।
प्रधानमंत्री ह पर्यावरण के बारे म किहीन कि देस म अइसन लोगन के कमी नइ हे, जउन मन ह पर्यावरण के रक्षा बर अपन जिनगी खपा देथे। प्रधानमंत्री ह किहीन कि मिशन लाइफ घलो थोरिक दिन पहिली सुरू करे गे रिहीस। ए ह पर्यावरण संरक्षण बर एक ठिन बढ़िया कारीकरम हरय।
प्रधानमंत्री ह किहीन कि आज देस के कतकोन जघा म छठ परब मनाय जात हे। ए परब ह एक भारत-श्रेष्ठ भारत के बड़का उदाहरण हरय। मन की बात कारीकरम म प्रधानमंत्री ह किहीन कि सरदार वल्लभ भाई पटेल के जयंती के मउका म काली एकता दिवस मनाय जाही अउ आठ नवंबर के गुरू पर्व मनाय जाही।
सिकलसेल प्रबंधन केन्द्र
मुख्यमंत्री भूपेश बघेल ह किहीन हे कि प्रदेस म जल्दीच राष्ट्रीय स्तर के सिकलसेल रिसर्च सेंटर बनाय जाही। आज वीडियो कान्फ्रेंसिंग के माध्यम ले प्रदेस के अट्ठाईस जिला मन म सिकलसेल प्रबंधन केन्द्र के उद्घाटन करत ओमन किहीन कि सिकलसेल के समस्या के प्रभावी रूप ले मुकाबला करे बर स्वास्थ्य अउ परिवार कल्याण विभाग डहार ले जम्मों मेडिकल कॉलेज अस्पताल अउ सबो जिला अस्पताल मन म नवीन सिकल सेल प्रबंधन के स्थापना करे जात हे। ए विधि ले जांच एकदम सरल होही अउ मितानिन मन घलो जांच कर सकही।
मुख्यमंत्री ह ए मउका म डिजिटल कार्ड वितरण योजना के सुभारंभ घलो करीन।
मुख्यमंत्री-प्रतिनिधिमंडल
मुख्यमंत्री ह किहीन हे कि प्रदेस म आरक्षित वर्ग मन ल कोनों प्रकार के नकसान उठाय बर नइ पड़य। ओमन किहीन कि जरूरत पड़ही त आदिवासी मनके आरक्षण के मुद्दा ल लेके विधानसभा के बिसेस सत्र घलो बुलाय जाही। मुख्यमंत्री ह सर्व आदिवासी समाज के प्रतिनिधि मन ले मिले के दउरान किहीन कि राज्य सरकार ह आदिवासी मनके हित अउ ओमन ल आगू लाय म हर समय आगू रिही। मुख्यमंत्री ह बतईन कि आरक्षण के बारे म अध्ययन भ्रमण बर आदिवासी समाज के विधायक अउ समाज प्रमुख मनके संयुक्त दल ल तमिलनाडु भेजे जाही।
ऐति, छत्तीसगढ़ भाजपा ह राज्य सरकार उपर प्रदेस के जाति मन ल आपस म लड़ाय के आरोप लगाय हे। आज रईपुर के एकात्म परिसर म मीडिया ले गोठबात म भाजपा नेता मन ह किहीन कि छत्तीसगढ़ उच्च न्यायालय म बत्तीस प्रतिसत आरक्षण के खिलाफ मुख्य पक्षकार के.पी. खाण्डे ल राज्य अनुसूचित जाति आयोग के अध्यक्ष बनाय गेहे। उहें, ओबीस समाज ल सत्ताईस प्रतिसत आरक्षण देके मामला म विरोध करइया कुणाल शुक्ला ल कबीर शोधपीठ के अध्यक्ष बनाय गेहे। ए नियुक्ति ल देख के राज्य सरकार के बिचार ल समझे जा सकथे।
पुनिया-प्रेसवार्ता
अखिल भारतीय कांग्रेस कमेटी के छत्तीसगढ़ प्रभारी पी.एल. पुनिया ह किहीन हे कि कांग्रेस कार्यकर्ता मन म जोस अउ उछाह हवय। ओमन राज्य सरकार के नीति अउ सफलता ल लोगन मन तक पहुंचाय बर तैयार हवय। अपन छत्तीसगढ़ प्रवास के दउरान बस्तर दउरा ले लहुटे के बाद रईपुर विमानतल म पत्रकार मन ले गोठबात करत किहीन कि आदिवासी मनके हित के रक्षा बर राज्य सरकार ह पूरा परयास करत हे। आरक्षण के मुद्दा उपर राज्य सरकार ह नियम के मुताबिक फइसला लीहीं।
धान खरीदी
प्रदेस म समर्थन मूल्य म धान बिसाय के काम एक नवंबर ले सुरू हो जही। एखर बर विभागीय स्तर म तैयारी पूरा कर ले गेहे। ए बारे म खाद्य मंत्री ह किहीन कि किसान मन ल धान ल सूखा के लाय बर जागरूक करे जाही। एखर ले किसान मन ल धान बेचे म कोनों प्रकार के परेसानी झन होवय। धान खरीदी बर एसो घलो प्रति एकड़ पन्द्रह कुंटल के मात्रा तय करे गेहे। अइसने ढाई एकड़ तक के रकबा वाले किसान मन ल एक बार टोकन दे जाही। पांच एकड़ तक के किसान मन ल दू बार अउ पांच एकड़ ले जादा रकबा वाले किसान मन ल तीसर टोकन जारी करे के पहिली पूर्व नोडल अधिकारी ले जांच कराय बर पड़ही। पड़ोसी राज्य अउ पड़ोसी जिला मन ले अवइया धान के अवैध परिवहन ल रोके बर आने-आने जघा म चेकपोस्ट तैयार करे गेहे।
जानबा के मुताबिक एसो मोटा धान दू हजार चालीस रूपिया प्रतिकुंटल अउ पतला के संगेसंग सरना धान दू हजार साठ रूपिया प्रतिकुुंटल के समर्थन मूल्य म खरीदे जाही।
त उहें, पंजीकृत किसान मन ल धान बेचे बर घर बइठे ऑनलाइन टोकन के सुविधा दे जात हे। एखर बर एनआईसी डहार ले एंड्रायड ऐप ‘‘टोकन तुंहर हाथ‘‘ बनाय गेहे।
वल्लभ भाई पटेल-जयंती
देस के पहिली गृहमंत्री अउ लौह पुरूष भारतरत्न सरदार वल्लभभाई पटेल के काली जयंती हरय, जेला राष्ट्रीय एकता दिवस के रूप म मनाय जाथे। ए मउका म काली प्रदेस के जिला मन म एकता दउड़ राखे गेहे। राजधानी रईपुर म काली बिहनिया कलेक्ट्रेट चउक ले तेलीबांधा चउक तक एकता दउड़ होही। ए दउड़ म लोगन मनके संगेसंग जनप्रतिनिधि, खिलाड़ी, स्कूल-कालेज के छात्र एनसीसी केडेट्स, एनएसएस के स्वयंसेवक, नेहरू युवा केन्द्र के स्वयंसेवक, राजीव मितान क्लब के सदस्य के संगेसंग अधिकारी-करमचारी मन घलो सामिल होही।
ऐति, सूरजपुर जिला पुलिस डहार ले पुलिस झंडा दिवस अउ राष्ट्रीय एकता दिवस के तहत पाछु इक्कीस अक्टूबर ले कतकोन कारीकरम करे जात हे। आज रामानुजनगर थाना के पुलिस मन ह एकता दउड़ के आयोजन करीन, जेमा लइका अउ युवा मन ह भाग लीन। ए कारीकरम काली इकतीस अक्टूबर तक चलही।
राज्यपाल अनुसुईया उइके ह सरदार वल्लभभाई पटेल के जयंती म ओमन ल नमन करे हे।
दुर्घटना
प्रदेस म पाछु चौबीस घंटा के दउरान होय आने-आने सड़क दुर्घटना म छह झिन लोगन के मउत होगे। त उहें, चार झिन लोगन घायल होगे हे।
राजनांदगांव पीटीएस के तीर एक ठिन कार के अनते-तनते होके रूख ले टकराय ले ए घटना म बाप-बेटा के मउत होगे। उहें, उंखर बहू गंभीर रूप ले घायल होगे। इही जिला के खैरागढ़ रद्दा म तिलई गांव के तीर मालवाहक गाड़ी के चपेट म आय ले सइकिल म जावत दू झिन लइका के मउत होगे।
ओति, कोंडागांव जिला के फरसगांव थाना क्षेत्र के बोरगांव राष्ट्रीय राजमार्ग म ट्रेक्टर के चपेट म आय ले फटफटी म बइठे एक झिन मनखे के मउत होगे अउ एक झिन नोनी घायल होगे हे।
ऐति, जांजगीर-चांपा जिला म अज्ञात वाहन के चपेट म आय ले फटफटी सवार एक झिन मनखे के मउत होगे। उहें, एक झिन आने मनखे घायल होगे।
अउ अब थोरकुन समाचार सार म –
– राज्यपाल अनुसुईया उइके अउ मुख्यमंत्री भूपेश बघेल ह प्रदेस के लोगन मन ल लोक आस्था के परब छठ के बधाई अउ सुभकामना दे हवय।
– मुख्यमंत्री ह आज रईपुर स्थित अपन निवास कार्यालय म दाऊ वासुदेव चंद्राकर के पुण्यतिथि के मउका म ओमन ल श्रद्धासुमन अर्पित करीन।
अउ
– राष्ट्रीय स्तर के जाने-माने लेखक, चिंतक अउ कॉलमिस्ट डॉक्टर राजू पांडेय के आज रायगढ़ म निधन होगे।