धान खरीदी
प्रदेस म पंजीकृत किसान मन ले समर्थन मूल्य म धान खरीदी अवइया एक नवंबर ले करे जाही। एखर तैयारी पूरा होगे हवय। समर्थन मूल्य म धान बेचे बर किसान मन ह कृषि विभाग के किसान पोर्टल के माध्यम ले इकतीस अक्टूबर तक अपन पंजीयन करा सकत हे। ए बछर करीबन पंचानवे हजार नवा किसान मन ह पंजीयन कराय हे। पंजीकृत किसान मन ल धान बेचे बर टोकन दे जावत हे। प्रदेस म लगभग ढाई हजार उपार्जन केन्द्र बनाय गे हवय। ए बखत एक सौ दस लाख मीटरिक टन धान खरीदी के लक्ष्य राखे गे हवय।
मुख्यमंत्री भूपेश बघेल ह आज धान खरीदी के तैयारी के समीक्षा करीन। ओमन अधिकारी मन ल निरदेसित करीन कि धान बेचइया मन ल उपार्जन केन्द्र म कोनों प्रकार के परेसानी नइ होना चाही। प्रदेस के कतकोन जघा म बरसा के सेती धान कटई के काम सुरू नइ हो पाय हे। किसान मन ल धान सुखा के लाय बर प्रेरित करे जाय, जेखर ले ओमन ल धान बेचे म तकलीफ झन होवय।
उहें, पंजीकृत किसान मन ल धान बेचे बर घर बइठे ऑनलाइन टोकन के सुविधा दे जावत हे। एखर बर एनआईसी डहार ले एंड्रायड ऐप ‘‘टोकन तुंहर हाथ‘‘ बनाय गे हवय। एखर मदद ले पंजीकृत किसान मन ह उपार्जन केन्द्र म दे गे बेरा म धान बेचे बर टोकन ले सकही। पंजीकृत किसान मन डहार ले उपार्जन केन्द्र म अवइया सात दिन तक टोकन ले जा सकत हे।
धान उपार्जन व्यवस्था की मॉनिटरिंग अउ सूचना के आदान-प्रदान बर मार्कफेड मुख्यालय म राज्य स्तरीय नियंत्रण कक्ष बनाय गे हवय। नियंत्रण कक्ष के टेलीफोन नंबर – शून्य सात सात एक दो चार दो पांच चार पांच शून्य हवय। एखर संचालन बर अधिकारी-कर्मचारी मनके ड्यूटी लगाए गे हवय।
सूर्यकांत तिवारी-सरेंडर
मनी लॉड्रिंग मामला म फरार आरोपी सूर्यकांत तिवारी ह आज रईपुर के एडीजे कोर्ट म सरेंडर कर देहे। मजिस्ट्रेट अजय सिंह राजपूत के स्पेशल कोर्ट म ओमन ह आत्मसमर्पण करीन। सूर्यकांत तिवारी के खिलाफ प्रवर्तन निदेशालय-ईडी डहार ले मनी लॉड्रिंग मामला म जांच करे जावत हे। मनी लॉड्रिंग मामला म आईएएस अधिकारी समीर बिश्नोई अउ दूसर दू झिन आरोपी मन ल विशेष न्यायालय डहार ले चौदह दिन के न्यायिक अभिरक्षा म जेल भेजे गे हवय।
खबर के मुताबिक कुछेक दिन पहिली कोयला, रेत अउ सराब कारोबारी मन संघरा छत्तीसगढ़ के तीन झन आईएएस अधिकारी मनके घर म ईडी डहार ले छापा मारे गे रिहीस।
आयोग, मंडल-नियुक्ति
मुख्यमंत्री भूपेश बघेल ह राज्य शासन के आने-आने आयोग, निगम, मंडल, बोर्ड अउ प्राधिकरण के अध्यक्ष अउ उपाध्यक्ष संघरा दूसर खाली पद म नियुक्ति करे हे। राज्य सासन डहार ले ए संबंध म आदेस जारी कर दे गेहे। एमा प्रमुख रूप ले अनुसूचित जाति आयोग म अध्यक्ष पद म के.पी. खांडे, औषधि पादप बोर्ड म उपाध्यक्ष पद म गुरू खुशवंत गोसाई, श्रम कल्याण मंडल के उपाध्यक्ष पद म केशव बंटी हरमुख, जीव-जन्तु कल्याण बोर्ड के अध्यक्ष पद म विद्याभूषण शुक्ला, दिव्यांगजन सलाहकार बोर्ड के अध्यक्ष पद म मोहन लालवानी, चर्मकार शिल्पकार बोर्ड के अध्यक्ष तरुण बिजौर अउ लौह शिल्पकार बोर्ड के अध्यक्ष पद म लोचन विश्वकर्मा अउ उपाध्यक्ष पद म विष्णु विश्वकर्मा के नियुक्ति करे गेहे।
राज्योत्सव/आदिवासी नृत्य महोत्सव
छत्तीसगढ़ के तेईसवां स्थापना दिवस एक नवंबर के मनाय जाही, जेखर तियारी जोरदरहा चलत हे। ए मउका म रईपुर के साईंस कॉलेज मैदान म एक ले तीन नवंबर तक राज्योत्सव अउ राष्ट्रीय आदिवासी नृत्य महोत्सव के कारीकरम चलही। एक नवंबर के बिहनिया आदिवासी नृत्य महोत्सव के सुभारंभ होही अउ इही दिन संझाकुन राज्य अलंकरण दे जाही।
खबर के मुताबिक राष्ट्रीय आदिवासी नृत्य महोत्सव म भारत के चौदह सौ कलाकार के संगेसंग मोजांबिक, मंगोलिया, टोंगो, रशिया, इंडोनेशिया, मालदीव, सर्बिया, न्यूजीलैंड अउ इजिप्ट के सौ जनजातीय कलाकार मन भाग लीहीं। ए दउरान दू श्रेणी म प्रतियोगिता होही। विजेता मन ल बीस लाख रूपिया के पुरस्कार दे जाही। महोत्सव के माध्यम ले राष्ट्रीय-अंतर्राष्ट्रीय स्तर म जनजातीय कलाकार मनके कला के घलो परख होही। महोत्सव म संगोष्ठी के घलो आयोजन राखे गेहे। कारीकरम स्थल के सेंट्रल एरिया म जनजातीय लोककला अउ शिल्प उपर आधारित शिल्पग्राम बनाय जाही।
मन की बात
प्रधानमंत्री नरेन्द्र मोदी काली बिहनिया ग्यारह बजे आकाशवाणी ले मन की बात कारीकरम म अपन बिचार साझा करही। कारीकरम के प्रसारण आकाशवाणी अउ दूरदर्शन के जम्मों नेटवर्क, आकाशवाणी समाचार के वेबसाइट अउ न्यूज ऑन एआईआर मोबाइल ऐप म करे जाही। आकाशवाणी समाचार, दूरदर्शन समाचार, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल म घलो ए कारीकरम ल सीधा प्रसारित करे जाही। आकाशवाणी ले हिन्दी प्रसारण के तुरते बाद क्षेत्रीय भाखा मन म घलो मन की बात के प्रसारण होही।
सिंगल यूज प्लास्टिक
छत्तीसगढ़ म सिंगल यूज प्लास्टिक के उपयोग ल सिराय बर बड़े स्तर म जन-जागरूकता अभियान चलाय जाही। मुख्य सचिव अमिताभ जैन के अगुवई म बनाय गे टास्क फोर्स के बइठका म आने-आने औद्योगिक संस्थान अउ विभाग मन ल सिंगल यूज प्लास्टिक के विकल्प खोजे बर अउ देस के दूसर राज्य म चलत व्यवहारिक तरीका ल अपन राज्य म घलो लागू करे के संभावना तलाशे बर निरदेस दे गे हवय।
मुख्य सचिव ह सिंगल यूज प्लास्टिक के उपयोग के संबंध म केन्द्र सरकार के निरदेस के अनुसार योजना म अमल करे बर किहीन हे। एमा सबो सासकीय कार्यालय मन ल घलो सिंगल यूज प्लास्टिक ले मुक्त करे बर कार्रवाई करे जाही। जिला स्तर म बने टास्क फोर्स डहार ले एखर उपर निगरानी करे जाही। एखर अलावा संभागीय मुख्यालय म बिहाव के हॉल अउ कैटेर्स मन ल चिन्हांकित करके प्लास्टिक के बदला दोना-पत्तल के उपयोग ल बढ़ावा दे जाही।
जिले की चिट्ठी
प्रादेशिक समाचार एकांश आकाशवाणी रईपुर डहार ले प्रसारित होवइया कारीकरम ‘‘जिले की चिट्ठी‘‘ जेखर प्रसारण हर इतवार संझा छह बजे तीस मिनट म होथे। एखर प्रसारण बेरा ल थोरकुन बदले गे हवय। ए कारीकरम के प्रसारण काली रतिहा नौ बजे ले नौ बजके पांच मिनट तक करे जाही। ए कारीकरम छत्तीसगढ़ सबो आकाशवाणी केन्द्र मन ह एके संघरा रिले करही। ए बार के अंक म ‘‘बलौदाबाजार-भाटापारा‘‘ जिला के गतिविधि के बारे म जानकारी दे जाही।
कौशल विकास-पुरस्कार
छत्तीसगढ़ राज्य कौशल विकास प्राधिकरण म चलत मुख्यमंत्री कौशल विकास योजना ल रोजगार आधारित निःशुल्क कौशल प्रसिक्षण दे बर राष्ट्रीय स्तर म स्कॉच सिल्वर अवॉर्ड दू हजार बाईस ले सम्मानित करे गेहे। मुख्यमंत्री भूपेश बघेल अउ कौशल विकास मंत्री उमेश पटेल ह कौशल विकास प्राधिकरण ल ए उपलब्धि बर बधाई दीन हे।
प्रदेस मुख्यमंत्री कौशल विकास योजना म अभी तक चार लाख अड़सठ हजार ले जादा युवा मन ल प्रशिक्षण दे गे हवय, जेमा ले करीबन दू लाख पचपन हजार युवा मन ल नियोजित करे गेहे अउ वर्तमान म दू हजार सात सौ ले जादा युवा मन ट्रेंनिग लेवत हे।
सिंहदेव-झूलाघर
राजधानी रईपुर के डॉक्टर भीमराव अंबेडकर अस्पताल म स्टाफ के लइका मन बर झूला घर बनाय जाही। झूलाझर के संगेच लइका मन बर प्लेइंग जोन घलो बनाय जाही। तीन पाली म एखर बर स्टाफ घलो राखे जाही।
स्वास्थ्य अउ चिकित्सा शिक्षा मंत्री टी.एस. सिंहदेव के अगुवई म रईपुर के पंडित जवाहरलाल नेहरू स्मृति चिकित्सा महाविद्यालय अउ डॉक्टर भीमराव अंबेडकर स्मृति अस्पताल के स्वशासी समिति के सामान्य परिषद के बइठका ए फइसला करे गीस। स्वास्थ्य मंत्री ह बइठका म कोरोना संक्रमित मरीज मनके पहिचान बर मेडिकल कॉलेज म आरटी-पी.सी.आर. जांच के संख्या बढ़ाय बर घलो निरदेस दीन हे।