किसान सम्मान निधि
प्रधानमंत्री नरेंद्र मोदी ह आज प्रत्यक्ष लाभ अंतरण के माध्यम ले प्रधानमंत्री किसान सम्मान निधि के तहत किसान मन ल 16 हजार करोड़ रूपिया के बारहवां किस्त जारी करीन। नई दिल्ली म प्रधानमंत्री किसान सम्मान सम्मेलन दू हजार बाईस के उद्घाटन करत श्री मोदी ह कीहिन कि ए योजना किसान मनके जीवन म बदलाव लाये के पहल हे।
प्रधानमंत्री ह कीहिन कि यूरिया उत्पादन अउ तरल नैनो यूरिया के क्षेत्र म देश ल आत्मनिर्भर बनाय के दिशा म काम करे जात हे। ओमन ह कीहिन कि नैनो यूरिया कृषि बर सस्ता पड़ही अउ आज ले यूरिया ल भारत नाम ले बेचे जाही।
ए मउका म प्रधानमंत्री ह रसायन अउ उर्वरक मंत्रालय के छै सौ प्रधानमंत्री किसान समृद्धि केंद्र मनके उद्घाटन करीन । एखर तहत देश म उर्वरक खुदरा दुकान ल चरणबद्ध तरीका ले प्रधानमंत्री किसान समृद्धि केंद्र म बदले जाही। ओमन ह कीहिन कि प्रधानमंत्री भारतीय जन उर्वरक परियोजना- एक राष्ट्र एक उर्वरक – के घलो शुभारंभ करीन।
न्याय योजना भुगतान
एति मुख्यमंत्री भूपेश बघेल ह घलो राज्य के तीन महत्वाकांक्षी योजना के हितग्राही मन ल अठारा सौ छियांसठ करोड़ रूपिया ले जादा के राशि के ऑनलाइन भुगतान करीन। ए योजना म राजीव गांधी किसान न्याय, गोधन न्याय अउ राजीव गांधी ग्रामीण भूमिहीन कृषि मजदूर न्याय योजना शामिल हे।
मंत्रिमंडल निर्णय 01
राज्य मंत्रिपरिषद ह धान के खेती वाले क्षेत्र म आने आने फसल लेवइया किसान मन ल दस हजार रूपिया के मदद देके अनुमति दीन। मुख्यमंत्री भूपेश बघेल के अध्यक्षता म आज रायपुर स्थित उंखर निवास कार्यालय म आयोजित मंत्रि परिषद के बइठका म कतकेन जरूरी निर्णय ले गीस। एखर अनुसार अक्टूबर, नवंबर अउ दिसंबर महीना म प्रधानमंत्री गरीब कल्याण अन्न योजना के पात्रता के समकक्ष राज्य योजना के राशनकार्ड धारक मन ल अतिरिक्त खाद्यान्न देके निर्णय ले गीस। उंहें अक्टूबर माह के नियमित मासिक अनाज निर्धारित उपभोक्ता दर म अउ नवंबर, दिसंबर महीना म राज्य योजना के राशनकार्ड धारक मन ल मासिक पात्रता के चांउर निशुल्क देके फैसला घलो करे गीस।
एखर अलावा बइठका म खरीफ विपणन बछर दू हजार बाईस-तेईस म समर्थन मूल्य म धान अउ मक्का के उपार्जन अउ कस्टम मिलिंग के नीति के निर्धारण करे गीस। जेखर तहत राज्य म अवइया एक नवंबर ले इकतीस जनवरी तक समर्थन मूल्य म धान के खरीदी करे जाही। अइसने मक्का के खरीदी अवइया एक नवंबर ले अठाईस फरवरी तक करे जाही।
उंहे पाछू बछर के जइसे ए बछर घलो खरीफ सीजन म किसान मन ल राजीव गांधी किसान न्याय योजना के तहत आदान सहायता के राशि दे जाही। एखरे संग खरीफ सीजन ले गन्ना फसल के पंजीयन अउ गिरदावरी के आधार म राजीव गांधी किसान न्याय योजना म सम्मिलित कर आदान सहायता राशि देके निर्णय ले गीस।
मंत्रिमंडल निर्णय 02
मंत्रिपरिषद ह राज्य म नेशनल टॉाजिट पास सिस्टम-एनटीपीएस ल लागू करे बर वनोपज नियम दू हजार एक म संशोधन के प्रारूप के अनुमोदन करे गीस। उंहें उच्च शिक्षा के क्षेत्र म राज्य के सकल प्रवेश अनुपात बढ़ाय अउ राज्य के पिछड़ा अउ अति पिछड़ा क्षेत्र के युवा मनके गुणवत्ता मूलक शिक्षा के सुविधा उपलब्ध कराय सार्वजनिक अउ निजी साझेदारी ले उच्च शिक्षण संस्थान स्थापित करे बर प्रस्तावित नीति के प्रारूप के अनुमोदन घलो करे गीस।
ए बइठका शुरू होय के पहिली मंत्रिपरिषद के सदस्य मन ह दिवंगत विधानसभा उपाध्यक्ष स्वर्गीय मनोज मंडावी ल श्रद्धांजलि अर्पित करीन। मंत्रिपरिषद के सबो सदस्य अउ अधिकारी मन ह दू मिनट के मौन रखीन। मुख्यमंत्री ह श्री मंडावी ल याद करत कहिन कि हमन एक बहुत अच्छा साथी ल खो देन। उंखर सामाजिक क्षेत्र म बड़ योगदान रेहे हे। उंखर जाना सबो बर अपूरणीय क्षति हे।
अरहर मूंग उड़द खरीदी
धान खरीदी के बाद अब राज्य सरकार समर्थन मूल्य म अरहर, मूंग अउ उड़द फसल घलो खरीदही। मुख्यमंत्री भूपेश बघेल आज प्रदेश के उपार्जन केंद्र मन म ए फसल के खरीदी के शुभारंभ करीन।
ए बेरा म मुख्यमंत्री ह कीहिन कि समर्थन मूल्य म खरीदी ले किसान मनके आय बाढ़ही अउ किसान मन ह अब जादा मूल्य मिलही संगेसंग अरहर, मूंग अउ उड़द के फसल घलो बेच सकही।
ए बछर उड़द अउ मूंग के उपार्जन आज ले अवइया सोला दिसंबर तक अउ अरहर के उपार्जन अवइया तेरा मार्च ले बारा मई के अवधि म करे जाही। ए योजना के तहत शासन डहार ले पंजीकृत किसान मनले अरहर चार कुंटल, मूंग दू कुंटल अउ उड़द तीन कुंटल प्रति एकड़ के दर ले समर्थन मूल्य म खरीदे जाही। पंजीयन के आखरी तारीख इकतीस अक्टूबर हे।
राजस्व अनुविभाग/तहसील उद्घाटन
मुख्यमंत्री भूपेश बघेल ह आज प्रदेश के नवा बने दस राजस्व अनुविभाग अउ पच्चीस तहसील के उद्घाटन करीन। रायपुर म आयोजित वर्चुअल कार्यक्रम ले श्री बघेल ह नवा अनुविभाग तिल्दा, नेवरा, बागबाहरा, मालखरौदा, धमधा, बलरामपुर, राजपुर, भरतपुर, खड़गवां, भोपालपट्नम अउ भैरमगढ़ के उद्घाटन करीन। अब प्रदेश म कुल एक सौ आठ अनुविभाग अउ दू सौ सत्ताईस तहसील होही।
उंहें मुख्यमंत्री ह नामांकन प्रक्रिया ल सरल करत तैयार करे गे ऑनलाईन नामांतरण पोर्टल के नवा वर्जन के शुभारंभ करीन। नवा वर्जन म पक्षकार मनके प्रकरण दर्ज होय म हर पेशी के तारीख अउ आदेश पारित होय के तारीख के संग अभिलेख दुरूस्ती होय के सूचना एसएमएस ले दे जाही।
न्याय योजना भुगतान
एति मुख्यमंत्री भूपेश बघेल ह घलो राज्य के तीन महत्वाकांक्षी योजना के हितग्राही मन ल अठारा सौ छियांसठ करोड़ रूपिया ले जादा के राशि के ऑनलाइन भुगतान करीन। ए योजना म राजीव गांधी किसान न्याय, गोधन न्याय अउ राजीव गांधी ग्रामीण भूमिहीन कृषि मजदूर न्याय योजना शामिल हे
डॅाक्टरी पुस्तक
डॅाक्टरी के पढ़ाई अब हिंदी म घलो हो सकही। एखर बर हिंदी माध्यम के तीन पुस्तक तैयार कर ले गेहे । भोपाल म आयोजित ए कार्यक्रम म गृहमंत्री अमित शाह ह काली ए पुस्तक मनके विमोचन करीन। श्री शाह ह कीहिन कि ए भारतीय भाषा के सशक्तिकरण के क्षेत्र म जरूरी कदम हे । ओमन ह बताइन कि जल्दी ही अनुसंधान के क्षेत्र म घलो हमन अपन भाषा म काम करबो।
कांग्रेस अध्यक्ष चुनाव
अखिल भारतीय कांग्रेस कमेटी के नवा अध्यक्ष चुने बर आज छत्तीसगढ़ के संग देशभर म मतदान होइस । बीहनिया दस बजे ले मतदान शुरू होइस, जेन मंझनियां चार बजे तक चलीस। अध्यक्ष पद बर पार्टी नेता मल्लिकार्जुन खड़गे अउ शशि थरूर के बीच मुकाबला हे।
ए चुनाव बर छत्तीसगढ़ म मुख्यमंत्री भूपेश बघेल के संग कुल तीन सौ बारा मतदाता हे। प्रदेश म कुल तीन सौ डेलिगेट्स ह अपन वोट डालीन । एमा मतदाता मन म राज्य के निर्वाचन अधिकारी हुसैन दलवई घलो शामिल हे। उंहे छत्तीसगढ़ के छै डेलिगेट्स आने आने राज्य मनले मतदान करीन। पांच मतदाता अनुपस्थित रीहिन। जबकि एक मतदाता के मउत होगे।
ए चुनाव बर रायपुर स्थित राजीव भवन म मतदान केंद्र बनाय गे रीहिस। चुनाव मतपत्र ले कराये गीस। एखर बर मतगणना बुधवार के कराय जाही उही दिन परिणाम घलो घोषित करे जाही।
एल्युमिनियम ट्रेन स्टील रैक
देश म पहिली बार मालगाड़ी के डिब्बा एलुमिनियम ले बनाय गेहे। एखर उपयोग देशभर म सबले पहिली बिलासपुर रेलमंडल म करे जाही। केंद्रीय रेलमंत्री अश्विनी वैष्णव ह काली भुवनेश्वर रेलवे स्टेशन ले हरी झण्डी दिखाके ये ट्रन ल बिलासपुर बर रवाना करीन। ए स्टील रैक म एक सौ अस्सी टन ले जादा माल परिवहन के क्षमता हे अउ एखर रीसेल वैल्यू घलो अस्सी प्रतिशत ले जादा हे। आधुनिक तकनीक ले बने ए मालगाड़ी के रैक म पहिली ले कम इंधन लागही। एला मेक इन इंडिया के तहत बनाय गेहे।
माओवादी समाचार
बीजापुर जिला के तर्रेम थाना क्षेत्र के चिनागेलूर गांव म माओवादी मनके संग मुठभेड़ म सुरक्षा बलके एक जवान घायल होगीस। जेखर इलाज बासागुड़ा के अस्पताल म चलत हे। बस्तर आई.जी. सुंदरराज पी. ह बताइन कि सुरक्षा बलके एक दल गश्त म निकले रीहिस। इही दउरान माओवादी मन ह हमला कर दीन।
उंहें कांकेर जिला के अंतागढ़ ब्लॉक स्थित चारगांव म माओवादी मन ह दू चारपहिया के संग पांच ठिन गाड़ी म आगी लगा दीन।