भेंट-मुलाकात
मुख्यमंत्री भूपेश बघेल ह अधिकारी मन ले केहे हंवय कि पावर प्लांट ले निकलइया राख के बने ढंग ले बेवस्था करे जाय। भेंट मुलाकात कारीकरम म मुख्यमंत्री ह आज सक्ती जिला के हसौद जाके उहां अधिकारी मन संग समीक्षा बइठका लीन। ए दउरान मुख्यमंत्री ह सक्ती के कलेक्टर ल प्लांट मालिक मनके संग बइठका लेके पर्यावरण ल ठीकठाक बनाय के बेवस्था करे के निरदेस दीन। बइठका म मुख्यमंत्री ह किसान मनके समस्या के निपटारा करे, खराब रद्दा ल सुधारे, सेमरिया म पुलिया बनाय बर अधिग्रहित बत्तीस झिन किसान मनके भूईंया के मुआवजा देके काम ल करे अउ जउन गौठान समिति मन म सही ढंग ले कामकाज नइ होवत हे, ओला भंग करे बर किहीन।
मुख्यमंत्री ह किहीन कि किसान अउ ग्रामीण मनके समस्या ल दूर करे बर ग्राम पंचायत स्तर म शिविर लगाके नामांकन, बंटवारा अउ खतौनी के प्रकरण ल मउकाच म सुलझाय जाय। एखर पहिली, हसौद म पत्रकार मन ले गोठबात म मुख्यमंत्री ह किहीन कि प्रदेस म एक नवंबर ले सुरू होवइया समर्थन मूल्य म धान खरीदी ल देखत बोरा मनके बने ढंग ले बेवस्था करे गेहे। ओमन बतईन कि सत्रह अक्टूबर के राजीव गांधी किसान न्याय योजना, गोधन न्याय योजना अउ राजीव गांधी ग्रामीण भूमिहीन कृषि मजदूर न्याय योजना के तहत उन्नीस सौ करोड़ रूपिया के रासि हितग्राही मन ल दे जाही।
भेंट मुलाकात कारीकरम म मुख्यमंत्री ह आज सक्ती जिला के गांव पिहरीद घलो गीन। इहां माओवादी मुठभेड़ म सहीद होय सब इंस्पेक्टर दीपक भारद्वाज के घर जाके उंखर माता-पिता ले मिलीन अउ सहीद जवान ल श्रद्धांजलि दीन। ए मउका म मुख्यमंत्री ह पिहरीद हाईस्कूल के नाव ल दीपक भारद्वाज के नाव म राखे के घोसना करीन।
ईडी-गिरफ्तारी
केन्द्रीय जांच एजेंसी-ईडी ह आज आईएएस अधिकारी समीर बिश्नोई के संगेसंग सुनील अग्रवाल अउ लक्ष्मी तिवारी ल गिरफ्तार करे हे। ए तीनों झिन ल गिरफ्तार करे के बाद ईडी के टीम ह उंखर मनके स्वास्थ्य परीक्षण करवईन, जेखर बाद तीनों झिन ल बिसेस अदालत म पेस करे गीस। ईडी कोति ले एमन ल तीन दिन के रिमांड देके मांग करे जात हे। उहें, रायगढ़ के कलेक्टर रानू साहू ह ईडी ल चिट्ठी लिखके के केहे हे कि ओमन इलाज बर रईपुर ले बाहिर रिहीन अउ अब ईडी के पूछताछ म पूरा मदद करही। ईडी के टीम ह जांच करे बर कोरबा अउ रायगढ़ कलेक्ट्रेट घलो पहुंचीन।
जानबा के मुताबिक दू दिन पहिली कोयला, रेती अउ सराब कारोबारी मनके संगेसंग प्रदेस के तीन झिन आईएएस अधिकारी मनके इहां ईडी ह छापा मारे रिहीन।
भेंडिया-समीक्षा
समाज कल्याण मंत्री अनिला भेंडिया ह आज विभागीय बइठका म गैर हाजिर उप संचालक बेलार मिंज बेक ल निलंबित करे के संगेसंग काम म लापरवाही बरतइया सुकमा, कोंडागांव अउ महासमुंद जिला के तीन झिन अधिकारी मन ल कारण बताओ नोटिस जारी करे हे।
समाज कल्याण मंत्री ह आज नवा रईपुर म विभागीय अधिकारी मनके समीक्षा बइठका लेके योजना मनके कामकाज म लापरवाही मिले उपर कार्रवाई करे के चेतावनी दीन। ओमन किहीन कि जरूरतमंद मन ल बेरा म सामाजिक सहायता योजना के लाभ मिलना चाही। दिव्यांग अउ उभयलिंगी समुदाय मन ल पहिचान पत्र देवाय खातिर हर पन्द्रह दिन म सिविर लगाय के बात घलो किहीन।
अकबर-ईको बाल मेला
वन अउ पर्यावरण मंत्री मोहम्मद अकबर ह कीहिन हे कि पर्यावरण ल बचाना जम्मों लोगन मनके भागीदारी हे। श्री अकबर ह छत्तीसगढ़ पर्यावरण संरक्षण मंडल डहार ले रायपुर म राखे गे दू दिन के राज्य स्तरीय इको बाल मेला म सामिल होइन। ए मउका म ओमन प्रदेश के बढ़िया इको क्लब मन ल ईनाम दीन। ओमन कीहिन कि पर्यावरण ल ठीकठाक राखे बर हम जम्मों झिन ल अपन जिम्मेवारी समझना हे।
सीआरपीएफ-डीजी सुकमा
केन्द्रीय रिजर्व पुलिस बल-सीआरपीएफ के महानिदेशक एस.एल. थाउसन अउ अतिरिक्त महानिदेशक नितिन अग्रवाल ह आज माओवाद परभावित सुकमा जिला के एल्मागुंडा कैम्प पहुंचीन। इहां ओमन सीआरपीएफ के जवान मन ले मिलके माओवादी अभियान के बारे म जानबा लीन। ओमन एल्मागुंडा म पुलिस अउ सीआरपीएफ के अधिकारी मनके संग बइठका घलो लीन। ए मउका म आईजी छत्तीसगढ़ सेक्टर साकेत कुमार सिंह, आईजी कोबरा अउ एएसपी नक्सल ऑपरेशन किरण चौहान बइठका म सामिल होईन। काली सुकमा म उच्च स्तरीय बइठका होही, जेमा सीआरपीएफ डीजी के संग छत्तीसगढ़ के पुलिस महानिदेशक अशोक जुनेजा के संगेसंग बड़का अधिकारी मन घलो सामिल होही।
नेहरू युवा केन्द्र-स्वच्छता अभियान
स्वच्छ भारत अभियान के तहत एक ले इकतीस अक्टूबर तक पूरा देस म बिसेस सफाई अभियान चलाय जात हे। इही मउका म आज नेहरू युवा केन्द्र रईपुर डहार ले नवापारा नगर स्थित गुलाब गार्डन म सफाई अभियान चलाय गीस, जेमा नेहरू युवा केन्द्र ले जुड़े पचहत्तर झिन सदस्य मन ह प्लास्टिक कचरा, पानी के बोलत अउ डिस्पोजल थैली मन ल सकेल के तय करे गे जघा म फेंकीन।
ए मउका म नेहरू युवा केन्द्र रईपुर के उप निदेशक हेमेन्द्र सिंह ह युवा मन ले अपील करीन कि ओमन वातावरण ल साफ-सुथरा बनाय बर अपन जिम्मेवारी के बने ढंग ले पालन करय।
हाउसिंग बोर्ड बैठक
रायपुर जिला म हाउसिंग बोर्ड परियोजना मन बर जल्दीच जमीन मनके आबंटन करे जाही। एखर बर कलेक्टर डॅाक्टर सर्वेश्वर नरेंद्र भूरे ह कामकाज म तेजी लाये के निर्देश देहे। आज रायपुर म हाउसिंग बोर्ड अउ राजस्व अधिकारी मनके समन्वय बइठका म बोर्ड के अध्यक्ष कुलदीप जुनेजा ह घलो सामिल होइन। बइठका म आने आने आवासीय परियोजन मन बर भूमि आबंटन, नामांतरण अउ सीमांकन उपर गोठबात करे गीस। बइठका म कलेक्टर ह भूमि आबंटन के प्रकरण म आये रूकावट ल जल्दी ठीकठाक करे के निर्देश राजस्व अधिकारी मन ल दीन।
छत्तीसगढ़िया ओलंपिक
प्रदेस के खेल मन ल विदेस म पहिचान दिलाय के उद्देश्य ले ए बेरा छत्तीसगढ़ म छत्तीसगढ़िया ओलंपिक चलत हे, जेमा एक सौ सत्तर नगरीय निकाय क्षेत्र म छह ले ग्यारह अक्टूबर तक होय पहिली चरण म एक लाख ले जादा प्रतिभागी मन ह आने-आने खेल प्रतियोगिता म भाग लीन। दूसर चरण बर दू हजार सात सौ पच्चीस टीम अउ व्यक्तिगत खेल मन म दू हजार चौरासी प्रतिभागी मन ल चुने गेहे। ए जम्मों प्रतिभागी मन जोन स्तर म पन्द्रह ले बीस अक्टूबर तक होवइया प्रतिस्पर्धा म भाग लीहीं।
जानबा के मुताबिक छत्तीसगढ़िया ओलंपिक म गिल्ली डंडा, पिट्ठूल, संखली, लंगड़ी दउड़, कबड्डी, खो-खो अउ रस्साकसी जइसन चौदह ठिन खेल के मुकाबला होवत हे।
अउ अब थोरकुन समाचार सार म –
– रायपुर कलेक्ट्रेट परिसर के मुख्य दरवाजा के तीर छत्तीसगढ़ महतारी के मूर्ति लगाये जाही। ए बारे म कलेक्टर ह ओ जगा म जाके निगम के अधिकारी मन ल काम सुरू करे के निर्देश दीन।
– रायपुर जिला म करीबन पांच करोड़ उनसठ लाख रूपिया के गड़बड़ी करे के मामला म यूनियन बैंक के मुख्य खजांची ल पुलिस ह गिरप्तार कर लेहे।
– रायपुर जिला के राखी पुलिस ह एनआरडीए के सहायक प्रबंधक ले जबरिया वसूली के मामला म चार झिन फर्जी पत्रकार मनल गिरप्तार करे हे
– दुर्ग जिला के रोजगार केंद्र म बेसमेंट कैंप के आयोजन काली करे जाही। जेमा एक हजार एक सौ पांच पद मन म भर्ती करे जाही।
– इही जिला म भारतीय थल सेना म अग्निवीर अउ नर्सिंग असिस्टेंट के भर्ती रैली के आयोजन एक ले तेरा दिसंबर तक रविशंकर स्टेडियम म करे जाही।
– प्रदेश म पंद्रह अक्टूबर के विश्व हाथ धुलाई दिवस मनाये जाही। ए मउका म ग्राम पंचायत स्तर म कतकोन कारीकरम होही
अउ
– कौशल विकास प्राधिकरण डहार ले कोंडागांव जिला म सुरक्षा कर्मी भर्ती बर बारा ले बीस अक्टूबर तक पंजीयन शिविर लगाये गेहे। संगेसंग जनपद पंचायत अउ लाईवलीहुड कॉलेज मन म घलो पंजीयन करे जात हे।