कलेक्टर-एसपी-कॉन्फ्रेंस-01
मुख्यमंत्री भूपेश बघेल के अगुवई म आज ले दू दिवसीय कलेक्टर-एसपी कान्फ्रेंस सुरू होईस। ए बेरा म मुख्यमंत्री ह जम्मों जिला कलेक्टर अउ पुलिस अधीक्षक मन ल कानून व्यवस्था अउ सूचना तंत्र ल मजबूत बनाय के निरदेस दीन। कान्फ्रेंस के सुरूवात म पुलिस महानिदेशक अशोक जुनेजा ह राज्य म अपराध के स्थिति अउ चिटफंड कंपनी उपर करे गे कार्रवाई के जानकारी दीन। एमा मुख्यमंत्री ह निरदेस दीन कि चिटफंड कंपनी म जल्दी कार्रवाई करय। संगेसंग अइसन कंपनी के चल-अचल संपत्ति के कोर्ट कोति ले कुर्की के कार्रवाई करे जाय। मुख्यमंत्री ह राज्य म आने पड़ोसी राज्य ले अवइया नसीला जिनीस उपर कड़ा निगरानी राखे अउ एखर तस्करी ल जड़ ले खतम करे बर किहीन। ओमन किहीन कि नसीला जिनीस के तस्करी करइया मनके खिलाफ कड़ा कार्रवाई करे जाय। मुख्यमंत्री ह अवैध सराब के मिले सिकईत ल गंभीरता ले लेवत ओखर उपर तुरते रोक लगाय बर किहीन। उहें, ऑनलाइन जुआ उपर कड़ा ले कड़ा कार्रवाई करे के निरदेस दीन। श्री बघेल ह माईलोगिन अउ लइका मन ले जुड़े अपराध म कड़ा कार्रवाई करे के बात किहीन।
उहें, अनुसूचित जाति, जनजाति के खिलाफ अपराध म पीड़ित मनखे ल सहायता रासि जल्दी देवाय अउ चाकूबाजी जइसन घटना म तुरते कार्रवाई करे के निरदेस दीन। ओमन पुलिस अधीक्षक ले किहीन कि अइसन घटना प्रदेस म झन होवय अउ अपराधी मन संग जीरो टॉलरेंस के नीति अपनाय के संगेसंग पुलिस अधीक्षक खुद रतिहा कुन गश्त म निकलय।
कलेक्टर-एसपी-कॉन्फ्रेंस-02
मुख्यमंत्री ह यहू किहीन कि माईलोगिन के खिलाफ अपराध ल रोके बर राज्य म जल्दीच महिला गश्त पीसीआर वाहन के सुरूवात करे जाही। श्री बघेल ह प्रदेस म माओवादी मनके खिलाफ चलत अभियान के समीक्षा करीन। ओमन किहीन कि पाछु कुछ बछर म माओवादी घटना म कमी आय हे। माओवाद परभावित क्षेत्र मन म रद्दा बनाय के काम करीबन पूरा होगे हे। ओमन बतईन कि माओवाद परभावित भीतरी क्षेत्र मन म करीबन पांच सौ ले जादा मोबाइल टावर ल फोर-जी म बदले जात हे। अधिकतर जघा ल मोबाइल कनेक्टिविटी ले जोड़े गेहे। श्री बघेल ह माओवाद प्रभावित क्षेत्र म कैम्प के संग शिक्षा, रोजगार अउ स्वास्थ्य सुविधा देवाय के निरदेस दीन।
मुख्यमंत्री-निर्देश
मुख्यमंत्री भूपेश बघेल ह सरकारी अस्पताल मन म इलाज के बेरा मउत होय लोगन के सव ल ससम्मान उंखर घर तक लेगे बर जरूरत के मुताबिक सव वाहन राखे के निरदेस दीन हे। ए संबंध म मुख्यमंत्री ह जम्मों जिला कलेक्टर मन ल निरदेस जारी कर देहे। निरदेस म केहे गेहे कि सबो जिला कलेक्टर, स्वास्थ्य विभाग, स्वयं सेवी संस्था ले मिलजुल के पर्याप्त संख्या म सव वाहन के व्यवस्था करय, जेखर ले मृतक अउ उंखर परिवार वाले मन ल ससम्मान उंखर घर तक अमराय के बेवस्था हो सकय।
मेधावी छात्र-जॉयराइड सम्मान
प्रदेस म पहिली घांव कक्षा दसवीं अउ बारहवीं के प्रावीण्य सूची म जघा बनइया एक सौ पच्चीस झिन छात्र-छात्रा मन ल आज राजधानी रईपुर म हेलीकॉप्टर ले जॉयराइड कराय गीस। एमा कक्षा दसवीं के नब्बे अउ कक्षा बारहवीं के पैंतीस झिन छात्र-छात्रा मन हेलीकॉप्टर म घुमे के मजा लीन।
खबर के मुताबिक मुख्यमंत्री भूपेश बघेल ह भेंट मुलाकात कारीकरम के बेरा पांच मई के घोसना करे रिहीन कि ए बखत कक्षा दसवीं अउ बारहवीं के टॉपर विद्यार्थी मन ल हेलीकॉप्टर ले सैर कराय जाही। इही घोसना म आज ए लइका मन ल हेलीकॉप्टर म घुमाय गीस।
इही बीच, मुख्यमंत्री काली स्वामी आत्मानंद मेधावी छात्रवृत्ति प्रोत्साहन योजना म दसवीं अउ बारहवीं के प्रावीण्य सूची म जघा बनइया एक सौ पच्चीस झिन छात्र-छात्रा मनके सम्मान करही। एमन ल डेढ़-डेढ़ लाख रूपिया अउ प्रसस्ति पत्र दे जाही। उहें, मेरिट म पहिली स्थान पवइया विद्यार्थी ल गोल्ड मेडल अउ दूसर जघा पाय विद्यार्थी ल सिल्वर मेडल दे जाही।
वायुसेना स्थापना दिवस
भारतीय वायुसेना आज अपन स्थापना अउ सेवा के नब्बे बछर पूरा करत हे। वायुसेना दिवस समारोह आज चंडीगढ़ म बैंड मार्च अउ परेड के संग सुरू होईस। वायुसेना प्रमुख एयर चीफ मार्शल विवेक राम चौधरी ह किहीन कि भारतीय वायुसेना ह कठिन परिश्रम, धैर्य अउ अनुभव ले ए उपलब्धि पाय हे। ओमन किहीन कि अग्निपथ योजना ले वायुसेना म वायु सैनिक के नियुक्ति सबो बर चुनौती हरय। फेर, ए भारतीय युवा मनके क्षमता आगू लाय अउ एला राष्ट्र सेवा म लगाय के मउका हे। श्री चौधरी ह किहीन क हरेक अग्निवीर ल कौशल अउ जानकारी देवाय बर वायुसेना ह अपन प्रशिक्षण म फेरबदल करे हे। एसो दिसंबर म तीन हजार अग्निवीर के सुरूवाती प्रसिक्षण सुरू करे जाही। ओमन किहीन कि अवइया बछर ले महिला अग्निवीर मन ल सामिल करे म विचार करे जात हे।
वायुसेना दिवस के मउका म उपराष्ट्रपति जगदीप धनखड़ अउ प्रधानमंत्री नरेन्द्र मोदी ह वायुसेना कर्मचारी, पूर्व सैनिक अउ उंखर परिवार वाले मन ल सुभकामना दीन हे।
प्रदर्शनी-शुभारंभ
मुख्यमंत्री भूपेश बघेल ह राजधानी रईपुर के न्यू सर्किट हाउस म राखे गे कलेक्टर अउ एसपी कान्फ्रेंस म प्रदेस के रूरल इंडस्ट्रीयल पार्क-रीपा अउ गौठान म बनत उत्पाद के लगाय प्रदर्सनी के उद्घाटन करीन। ए प्रदर्सनी के उद्देश्य हरय कलेक्टर कान्फ्रेंस म आने-आने जिला ले आय अधिकारी मन ल रीपा अउ गौठान म बनत उत्पाद के संभावना ल अपन जिला म घलो प्रेरित करना। प्रदर्सनी म महासमुंद, रईपुर, कोंडागांव, बस्तर, बेमेतरा, दंतेवाड़ा अउ कांकेर जिला म तैयार करे गे जिनीस ल देखाय गेहे।
धान खरीदी
राज्य म एक नवंबर म समर्थन कीमत म धान बिसाय जाही। ए संबंध म काली मंत्रिमंडलीय उप समिति के बइठका राखे गीस। खाद्य मंत्री अमरजीत भगत के अगुवई म होय बइठका म किसान मनके पंजीयन व्यवस्था, धान बिसाय अउ कस्टम मिलिंग बर जरूरत के मुताबिक बारदाना देवाय के संबंध म गोठबात करे गीस। राज्य म एसो एक सौ दस लाख मीटरिक टन धान बिसाय के लक्ष्य राखे गेहे।
जंगल-सफारी
मुख्यमंत्री भूपेश बघेल ह काली वन्यप्राणी संरक्षण सप्ताह के मउका म राखे गे कारीकरम म नंदनवन जंगल सफारी नवा रईपुर के शेरनी कृति के तीन झिन सावक के नावकरण अरपा, पैरी अउ शबरी के नाव म करीन हे। ए बेरा म श्री बघेल ह दस ठिन नवा बाड़ा के लोकार्पण करीन। एला मिलाके जंगल सफारी म अब अट्ठाईस ठिन बाड़ा होगे हे।
आयुष्मान पखवाड़ा
प्रदेस म पाछु तेईस सितंबर ले सुरू होय काली सिरा गे। ए बेरा म काली ले ऑनलाइन आयुष्मान जागरूकता प्रश्नोत्तरी के आयोजन करे जात हे। इक्कीस अक्टूबर तक चलइया ए प्रश्नोत्तरी म प्रदेस के पांच जिला – दंतेवाड़ा, सुकमा, नारायणपुर, कोरिया अउ गौरेला-पेण्ड्रा-मरवाही के कक्षा नौवीं ले बारहवीं तक के पढ़ईया लइका मन भाग ले सकही। प्रश्नोत्तरी म आयुष्मान योजना ले जुड़े सवाल पूछे जाही, जेखर जवाब विद्यार्थी मन वेब लिंक ले दे सकत हे। सही जुवाब दे म विद्यार्थी ल सहभागिता प्रमाण पत्र वाट्सऐप नंबर म ऑनलाइन दे जाही।
अउ अब थोरकुन समाचार सार म –
– छत्तीसगढ़ पर्यावरण संरक्षण मंडल कोति ले प्रदेस म बने काम करइया तीन ठिन इको क्लब स्कूल ल इनाम मिलही। एखर बर अवइया ग्यारह अउ बारह अक्टूबर के रईपुर म इको बाल मेला अउ सर्वश्रेष्ठ इको क्लब चयन प्रतियोगिता राखे जाही।
– स्कूल शिक्षा विभाग कोति ले आज आठ झिन प्राचार्य मनके तबादला आदेस जारी करे गेहे। उहें, तीन ग्रंथपाल मनके तबादल घलो होय हे।
– जिला रोजगार अउ स्व-रोजगार मागदर्शन केन्द्र रईपुर कोति ले निजी क्षेत्र म रोजगार के मउका देवाय बर अवइया दस अक्टूबर के जुन्ना पुलिस मुख्यालय परिसर म प्लेसमेंट कैम्प लगाय जाही।
– भूतपूर्व सैनिक कल्याण निधि ले रईपुर, धमतरी, महासमुंद, बलौदाबाजार अउ गरियाबंद जिला के भूतपूर्व सैनिक मनके लइका मन बर कक्षा दसवीं अउ बारहवीं बर पन्द्रह अक्टूबर अउ स्नातक कक्षा बर पन्द्रह नवंबर तक ऑनलाइन अरजी मंगाय गेहे।
अउ
– जांजगीर-चांपा जिला के सेन्द्री गांव काली रद्दा दुर्घटना म तीन बछर के लइका के मउत के बाद गुस्साय गांव के लोगन मन चक्काजाम करीन, जउन आज चौदह घंटा बाद सिरईस। पुलिस ह चार झिन के खिलाफ मामला दर्ज करे हे।