एखरे संग मुख्यमंत्री के उपस्थिति म जिला के एक सौ आठ गांव मन म फ्री वाई फाई सेवा बर जिला प्रशासन अउ बीएसएनएल के बीच एमओयू म हस्ताक्षर करे गीस। कार्यक्रम म मुख्यमंत्री ह चौदा आने-आने समाज मन ल सामाजिक भवन बनाये बर भूमि के पट्टा दीन। ए मउका म उद्योग अउ जिला के प्रभारी मंत्री कवासी लखमा, सांसद दीपक बैज, बस्तर क्षत्र आदिवासी विकास प्राधिकरण के अध्यक्ष लखेश्वर बघेल घलो मौजूद रीहिन।
उंहे अपन बस्तर प्रवास के दउरान मुख्यमंत्री ह जगदलपुर म एक करोड़ पचपन लाख रूपिया के लागत ले बने संभागीय सी-मार्ट के शुभारंभ करीन। ए सी-मार्ट म आने-आने संस्था गोठान, स्व-सहायता समूह अउ कृषि उत्पादक संगठन के माध्यम ले राज्य के कृषक कामगार, शिल्पकार अउ बुनकर मन डहार ले बनाये सामग्री के बिक्री करे जाही।
हमर क्लिनिक शुभारंभ
स्वास्थ्य मंत्री टी.एस. सिंहदेव ह अंबिकापुर के गोधानपुर म प्रदेश के पहिली हमर क्लिनिक के उद्घाटन करीन। ए हमर क्लिनिक के ओपीडी म बारा प्रकार के उपचार अउ छै प्रकार के पैथॉलाजी जांच के सुविधा लोगन मन ल निशुल्क उपलब्ध कराय जाही। ओपीडी म एक चिकित्सक समेत दूसर मेडिकल स्टॉफ मौजूद रीही।
ए मउका म श्री सिंहदेव ह कीहिन कि हमर क्लिनिक योजना शहरी अउ ग्रामीण दूनों क्षेत्र म शुरू करे जात हे। एमा अब मनखे मन ल अपन मोहल्लाच म निशुल्क जांच अउ इलाज के सुविधा मिलही। ओमन बताइन कि हमर क्लिनिक म केवल ओपीडी के सुविधा रीही। भर्ती करे के जरूरत पड़े म जिला अस्पताल या मेडिकल कॉलेज म रिफर करे जाही।
आयोडिन नियंत्रण दिवस
प्रदेश म स्वास्थ्य विभाग कोति ले इक्कीस ले सत्ताईस अक्टूबर तक वैश्विक आयोडिन अल्पता विकार नियंत्रण दिवस- मनाये जाही। ए दउरान जम्मों स्वास्थ्य संस्था मन म आने-आने गतिविधि के माध्यम ले आयोडिन के कमी ले होवइया विकार अउ एखर ले बचाव के संबंध म लोगन मन ल जागरूक करे जाही। संघरा आयोडिन युक्त नमक के उपयोगिता अउ जम्मों आयु वर्ग म आयोडिन के महत्व के बारे म जानकारी दे जाही।
कार्यक्रम के राज्य नोडल अधिकारी डॅाक्टर कमलेश जैन ह बताइन कि आयोडिन अल्पता ले ग्रसित प्रदेश के बाईस जिला मन म मितानिन मन डहार ले घर म उपयोग होवइया नमक म आयोडिन स्तर के जांच सॉल्ट टेस्टिंग कीट के माध्यम ले करे जाही। जांच के परिणाम के आधार म परिवार मन ल आयोडिन युक्त नमक के इस्तेमाल अउ सही रख-रखाव अउ आयोडिन अल्पता विकार के बारे म बताय जाही।
मन की बात
प्रधानमंत्री नरेंद्र मोदी ह अवइया तीस अक्टूबर के आकाशवाणी ले प्रसारित होवइया मन की बात कार्यक्रम बर लोगन मनले विचार अउ सुझाव साझा करे के आग्रह करे हे। ये मासिक रेडियो कार्यक्रम के चौरानवां कड़ी होही ।
प्रधानमंत्री ह कीहिन हे कि लोगन मन ओ विसय उपर अपन विचार साझा करय, जेखर बारे म ओमन ल मन की बात कार्यक्रम के अगला कड़ी म बात करना चाही।
सुनइया मन नमो ऐप या माईजीओवी ओपन फोरम म अपन विचार साझा कर सकत हे, संगे टोल फ्री नंबर 1 8 0 0-1 1-7 8 0 0 म घलो डायल कर अपन संदेस हिंदी या अंग्रेजी म रिकॉर्ड करा सकत हे । फोन लाइन अठाईस अक्टूबर तक खुला रइही।
जवान घायल
कांकेर जिला म माओवादी मन डहार ले लगाये गे आईईडी विस्फोट म एक जवान घायल होगे। मिले जानकारी अनुसार बीमार जवान ल अस्पताल ले जाय बर रोड ओपनिंग पार्टी निकले रीहिस। इही दउरान कोयलीबेड़ा थाना क्षेत्र के मरकानार करा माओवादी मन कोति ले लगाये गे आईईडी म विस्फोट होगे। ए विस्फोट म बीएसएफ के एक झिन जवान घायल होगे।
बातों-बातों-में
आकाशवाणी रायपुर डहार ले प्रस्तुत कार्यक्रम ‘‘बातों-बातों-में‘‘ जेखर प्रसारण हर रविवार बीहनिया नौ बजके तीस मिनट म होथे। ए कार्यक्रम के प्रसारण समय अउ दिन म परिवर्तन करे जात हे। अब ए कार्यक्रम के प्रसारण काली आठ अक्टूबर ले हरएक शनिवार के बीहनिया दस बजके तीस मिनट ले दस बजके पैंतालिस मिनट तक करे जाही।
एखर तहत काली प्रधानमंत्री के वोकल फॅार लोकल अपील ले प्रेरित महिला स्व सहायता समूह उड़ान के संस्थापक निधि चंद्राकर ले लेगे भेंटवार्ता प्रसारित करे जाही।
एखर प्रसारण आकाशवाणी के रायपुर केन्द्र डहार ले काली आठ अक्टूबर के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
खेल पदक
छत्तीसवां राष्ट्रीय खेल म छत्तीसगढ़ के खिलाड़ी मन शानदार खेल के प्रदर्शन करत राज्य बर अब तक दू गोल्ड समेत सात पदक जीते हे।
उंहें आज होय महिला सॉफ्ट टेनिस के मुकाबला म खिलाड़ी मन राज्य बर एक अउ पदक पक्का कर लेहे। गुजरात म राखे गे राष्ट्रीय खेल म आज राज्य के महिला सॉफ्ट टेनिस टीम ह मध्यप्रदेश के दूसरा वरीयता प्राप्त टीम ल हराके सेमी फायनल म प्रवेश करीन।
उंहे छत्तीसगढ़ के आंजिक्या सिंह ह वुमेन्स पचास मीटर बेक स्ट्रोक तैराकी स्पर्धा म फायनल बर क्वालिफाई कर लीन। एखर फाइनल काली होही।
पुनिया दौरा
अखिल भारतीय कांग्रेस कमेटी के छत्तीसगढ़ प्रभारी पी.एल. पुनिया नौ अक्टूबर ले चार दिन के बस्तर प्रवास म रीही। श्री पुनिया नौ अक्टूबर के रायपुर पहुंचही ओखर बाद इही दिन कांकेर बर रवाना हो जाही। जिहां कांकेर, अंतागढ़ अउ भानुप्रतापुर विधानसभा क्षेत्र के पार्टी पदाधिकारी मनके बइठका लीहीं।
श्री पुनिया दस अक्टूबर के केशकाल, कोंडागांव, बस्तर अउ ग्यारा अक्टूबर के दंतेवाड़ा, बीजापुर विधानसभा कार्यकर्ता मनके बइठका लीही। उंहें बारा अक्टूबर के जगदलपुर, बस्तर अउ सुकमा विधानसभा के कांग्रेस पदाधिकारी मनके बइठका म भाग लीही।
दुर्घटना
राजनांदगांव जिला म आज होय सड़क दुर्घटना म तीन मनखे मनके मउत होगे। मिले जानकारी अनुसार जिला के बाघनदी थाना क्षेत्र के ग्राम सड़क चिरचारी म एक कार ह मोटर सायकिल ल टक्कर मार दीस। ए दुर्घटना म मोटर सायकिल सवार तीन लोगन मन गंभीर रूप ले घायल होगीन । जे मन ल मेडिकल कॉलेज अस्पताल ले जाय गीस। इही बीच ए मनखे ह रस्ताच म दम तोड़ दीस। जबकि दू झिन दूसर मनखे मन इलाज के दौरान मउत होगे। बताय जात हे कि मोटर सायकिल सवार तीनो झन मन सड़क चिरचारी ले अपन गांव दीवानटोला लहुटत रीहिन।
उंहे महासमुंद जिला के कोमाखान थाना क्षेत्र म पाछू रतिहा दू अलग-अलग सड़क दुर्घटना म तीन मनखे मनके मउत होगे मिले जानकारी अनुसार राष्ट्रीय राजमार्ग क्रमांक तीन सौ तिरपन म कोमाखान चौकड़ी करा होय मोटर सायकिल अउ कार के टक्कर म बाईक सवार दू मनखे मनके मउत होगे। उंहें एक ठिन दूसर घटना म मोटर सायकिल सवार युवक खड़ा ट्रक ले टकरा गीस, जेखर ले उंखर मउकाच म मउत होगे।
ओति रायपुर-मुंगेली मुख्य मार्ग म होय एक सड़क दुर्घटना म दू झिन लोगन मनके मउत होगे। जबकि एक दूसर मनखे ह गंभीर रूप ले घायल होगे, जेला जिला अस्पताल म भर्ती कराये गेहे । मिले जानकारी अनुसार मुंगेली ल रायपुर आवत बस अउ मोटर सायकिल के टक्कर होय के सेती ए दुर्घटना होगे।