राज्य अलंकरण-पुरस्कार
छत्तीसगढ़ म राज्य स्थापना दिवस के मउका म दे जाने वाला राज्य अलंकरण श्रेणी म तीन ठन नवा पुरस्कार जोड़े गेहे। ए पुरस्कार माता कौशल्या, लोक कलाकार स्वर्गीय लक्ष्मण मस्तुरिया अउ स्वर्गीय खुमान साव के नाव ले दे जाही। माता कौशल्या के मइके अउ भगवान राम के ननिहाल छत्तीसगढ़ म श्रेष्ठ रामायण मानस मंडली ल माता कौशल्या सम्मान ले अंलकृत करे जाही। अइसने, लोकगीत के क्षेत्र म लक्ष्मण मस्तुरिया पुरस्कार अउ लोकसंगीत के क्षेत्र म योगदान देवइया कला साधक मन ल खुमान साव पुरस्कार ले सम्मानित करे जाही। मुख्यमंत्री भूपेश बघेल ह प्रदेस के लोक कला साधक मनके सम्मान म ए घोसना करीन हे।
फोटोयुक्त निर्वाचक नामावली
छत्तीसगढ़ राज्य निर्वाचन आयोग के निरदेस म नगर पालिका म रिक्त पद म उप निर्वाचन बर एक जनवरी दू हजार बाईस के संदर्भ तारीख के आधार म फोटोयुक्त निर्वाचक नामावली तैयार करे के प्रक्रिया सुरू होगे हे। निर्वाचक नामावली के प्रारंभिक प्रकाशन चौदह अक्टूबर के करे जाही। इही दिन ले दावा आपत्ति घलो ले जा सकही। दावा आपत्ति के निपटारा के आखिरी तारीख छब्बीस अक्टूबर तय करे गेहे।
पहिली चरण के कारीकरम के अनुसार सात अक्टूबर तक रजिस्ट्रीकरण अधिकारी अउ सहायक रजिस्ट्रीकरण अधिकारी के नियुक्ति होही। संगेसंग प्रारंभिक प्रारूप निर्वाचक नामावली तैयार करे बर कर्मचारी मनके चयन अउ नियुक्ति करे जाही। उहें, दूसर चरण म चौदह अक्टूबर के निर्वाचन नामवली के प्रारंभिक प्रकासन करे जाही। इही दिन मान्यता प्राप्त राजनीतिक दल ल निर्वाचन नामावली दे जाही।
खबर के मुताबिक नगर पालिका उप निर्वाचन म प्रदेस के छह ठन नगरीय निकाय के छह वार्ड म उपचुनाव कराय जाही।
विजयादशमी
बुराई उपर अच्छाई के जीत के प्रतीक दशहरा तिहार ल आज छत्तीसगढ़ संघरा जम्मों देस म बड़ उछाह के संग मनाय जावत हे। ए मउका म रावण, मेघनाद अउ कुंभकर्ण के पुतला के दहन करे जाही। राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह विजयादशमी के मउका म देसवासी मन ल सुभकामना दीन हे।
उहें, राजधानी रईपुर संघरा प्रदेस के सबो जिला म दशहरा उत्सव के आयोजन करे जावत हे। राजधानी रईपुर के डब्ल्यू.आर.एस. कॉलोन म एक सौ दस फीट के रावण अउ सत्तर-सत्तर फीट के कुंभकर्ण अउ मेघनाद के पुतला के दहन करे जाही। कारीकरम म रामायण धारावाहिक राम के अभिनय करइया अरूण गोविल अउ माता सीता के अभिनय करइया दीपिका चिखलिया विशेष अतिथि होही। मुख्यमंत्री भूपेश बघेल कारीकरम के मुख्य अतिथि होही। उहें, रावणभाटा मैदान म सत्तर फीट के रावण बनाय गे हवय।
विजयादशमी के मउका म राज्यपाल अनुसुईया उइके ह राजभवन म राखे गे शस्त्र पूजा अउ हवन म सामिल होईन। ए मउका म ओमन ह किहीन कि असत्य उपर सत्य के जीत के ए तिहार ह हमन ल अहंकार अउ अधर्म के नास करे के सीख देथे।
उहें, मुख्यमंत्री भूपेश बघेल ह घलो अपन निवास म शस्त्र पूजा करके प्रदेसवासी मन ल विजयादशमी के बधाई अउ सुभकामना दीन। ओमन किहीन कि दशहरा के परब असत्य म सत्य के जीत, अंधकार म प्रकाश के जीत अउ अधर्म म धर्म के जीत के परब हे।
दशहरा के मउका म आज रईपुर, राजनांदगांव, रायगढ़ संघरा प्रदेस के आने-आने थाना, चौकी अउ शस्त्रागार म राखे शस्त्र के साफ-सफाई करके विधिविधान ले पूजा करे गीस।
बस्तर दशहरा
पचहत्तर दिन तक चलइया विश्व प्रसिद्ध बस्तर दसहरा परब म आज रतिहा भीतर रैनी के रसम अदा करे जाही। ए रसम म आठ पहिया वाले दू मंजिला विशालकाय रथ म मां दंतेश्वरी के छत्र ल राख के विधि-विधान ले परिक्रमा कराय जाथे। परिक्रमा के बाद रथ ल दंतेश्वरी मंदिर के आगू सिंह ड्योढी म रोक के ओमा ले माई के छत्र ल रथ ले उतार के मंदिर म राखे जाही अउ रथ ल सिंह ड्योढी म छोड़ दे जाही। एखर बाद ए रथ ल चोरी करके आदिवासी मन कुम्हड़ाकोट के जंगल ले जाही। एखर पहिली, बस्तर दशहरा म काली रतिहा मावली परघाव के रसम अदा करे गीस।
उहें, कोंडागांव जिला म काली बस्तर दशहरा म सामिल होय बर जिलाभर ले आय ग्राम देवी-देवता मनके छत्र डोली मन ल बिदाई दे गीस। ए कारीकरम म कोंडागांव के विधायक मोहन मरकाम, जिला पंचायत अध्यक्ष देवचंद मातलाम, प्रशासनिक अधिकारी अउ आदिवासी समाज के प्रतिनिधि मन सामिल होईन।
मोहन भागवत-संबोधन
राष्ट्रीय स्वयंसेवक संघ के प्रमुख मोहन भागवत ह माईलोगिन मन ल फइसला लेके आजादी के संग सशक्त बनाय उपर जोर दीन हे। नागपुर म दशहरा के मउका म ओमन किहीन कि समाज ल एकजुट राखे बर पुरूष अउ महिला मनके बीच समानता बीच जरूरी हे। दूनों के साझेदारी समाज के प्रगति बर जरूरी हे। ओमन किहीन कि आत्मनिर्भरता के रद्दा म आगू बढ़े बर भारत ल एक राष्ट्र के रूप म परिभाषित करइया विचार ल समझना जरूरी हे। श्री भागवत ह किहीन कि आबादी अउ संसाधन ल देखत जनसंख्या नीति बनाय के जरूरत हे। ओमन मातृभाषा म शिक्षा ल बढ़ावा दे जाय के नीति बनाय के समर्थन करीन।
छत्तीसगढ़िया ओलम्पिक
प्रदेस म काली छह अक्टूबर ले छत्तीसगढ़िया ओलंपिक के आयोजन करे जाही। एमा गिल्ली डंडा, पिट्ठूल, लंगड़ी दउड़, कबड्डी, खो-खो, रस्साकसी जइसन चौदह ठिन पारंपरिक खेल के मुकाबला होही। छत्तीसगढ़िया ओलंपिक के आयोजन के जिम्मेदारी पंचायत अउ ग्रामीण विकास अउ नगरीय अउ प्रशासन विकास विभाग ल सौंपे गेहे। ए प्रतियोगिता के समापन अवइया बछर छह जनवरी के होही।
छत्तीसगढ़िया ओलंपिक बर छह ठिन स्तर तय करे गेहे। एमा गांव में सबले पहिली स्तर म राजीव युवा मितान क्लब होही। उहें, दूसर प्रतियोगिता जोन स्तर म होही, जेमा आठ राजीव युवा मितान क्लब मन ल मिलाके एक ठिन क्लब बनाय जाही। एखर बाद विकासखंड-नगरीय क्लस्टर, जिला, संभाग अउ अंत म राज्य स्तर म खेल प्रतियोगिता आयोजित करे जाही। राज्य स्तर के प्रतियोगिता अट्ठाईस दिसंबर ले छह जनवरी तक होही।
व्यवहार न्यायालय-भूमिपूजन
छत्तीसगढ़ उच्च न्यायालय के न्यायाधीश न्यायमूर्ति दीपक कुमार तिवारी ह कोंडागांव जिला के केशकाल म बनत नवीन व्यवहार न्यायालय भवन के आज भूमिपूजन करीन। एक करोड़ उन्नीस लाख रूपिया के लागत ले ए भवन बनाय जाही।
ए मउका म न्यायमूर्ति दीपक तिवारी ह किहीन कि गरीब अउ कमजोर वर्ग के जागरूकता संघरा ओमन ल कानूनी मदद दे जाय बर पहल करे जाय। ओमन यहू किहीन कि कमजोर तबका के लोगन न्याय के उम्मीद के संग न्यायलय आथे, ओमन ल मदद देके न्याय देवाय जाय।
राष्ट्रीय खेल
गुजरात के गांधी नगर म चलत छत्तीसवां राष्ट्रीय खेल म छत्तीसगढ़ के बैडमिंटन खिलाड़ी आकर्षि कश्यप ह माईलोगिन मनके एकल सेमीफाइनल म पहुंच गे हवय।
उहें, तलवारबाजी म छत्तीसगढ़ के खिलाड़ी मन ल सेमीफाइनल मुकाबला म कांस्य पदक ले संतोष करना पड़ीस। काली होय सेमीफाइनल मुकाबला म छत्तीसगढ़ के टीम ल हार के सामना करना पड़ीस। राष्ट्रीय खेल म छत्तीसगढ़ के टीम ह तलवारबाजी म चार ठन पदक हासिल करे हे।
अउ अब थोरकुन समाचार सार म –
– रानी दुर्गावती के जयंती म मुख्यमंत्री भूपेश बघेल ह आज अपन निवास कार्यालय म उंखर चित्र म फूल चघाके ओमन ल नमन करीन।
– राष्ट्रीय पशु रोग नियंत्रण कारीकरम म प्रदेस म गाय, बैल, भैंस ल खुरपका-मुंहपका बीमारी ले बचाव बर अवइया पन्द्रह अक्टूबर तक सघन टीकाकरण अभियान चलाय जावत हे। इही कड़ी म रायगढ़ म आज पशु चिकित्सा टीकाकरण दल डहार ले घर-घर जाके पशु मन ल एफ.एम.डी. टीका लगाय गीस।
– जांजगीर-चांपा जिला के बिरहानी गांव म दुर्गा विजर्सन के बेरा हसदेव नदी म चार झिन बोहा गीन। एमा ले एक झिन मनखे के डूबे ले मउत होगे। उहें, तीन झन ल बचा ले गेहे।
अउ
– राजधानी रईपुर के खारून बेंद्री डेम म काली मंझनिया एक झिन मनखे ह बोहा गीस, जेखर सव ल पुलिस ह आज बरामद कर लेहे। ए युवक ह अपन दोस्त मन संग डैम म नहाय बर गे रिहीस, तभे पानी के बहाव तेज होय ले ओ ह डूब गीस।