मुख्यमंत्री भूपेश बघेल छै अक्टूबर ले गोधन न्याय योजना के तहत आठ करोड़ तेरा लाख रूपिया के राशि ऑनलाइन जारी करही। ये राशि पशुपालक, ग्रामीण, गौठान ले जुड़े महिला समूह अउ गौठान समिति मनके खाता म डाले जाही। खबर के मुताबिक गोधन न्याय योजना के तहत राज्य म अब तक हितग्राही मन ल तीन सौ बंयालिस करोड़ इकतालिस लाख रूपिया के भुगतान करे जा चुके हे।
केंद्रीय सूचना अउ प्रसारण मंत्रालय ह एक घांव फेर परामर्श जारी करके मीडिया ले ऑनलाइन सट्टेबाजी मंच मनके विज्ञापन प्रकाशित करे ले बांचे बर केहे हे।
परामर्श म केहे गेहे कि कुछ विदेशी ऑनलाईन सट्टेबाजी मंच मन ह टीवी चैनल म अपन विज्ञापन बर समाचार वेबसाईट मनके उपयोग शुरू कर देहे। मंत्रालय ह निजी उपग्रह टेलिविजन चैनल अउ ऑनलाईन सामग्री प्रसारित करने वाला ओटीटी मंच मन ल परामर्श जारी करत कीहिन कि देश के अधिकतर भाग मन म जुआ खेलना प्रतिबंधित हे। ये युवा अउ लईका सहित सबो झन बर वित्तीय अउ सामाजिक आर्थिक खतरा पैदा करत हे।
उंहे दुर्ग पुलिस ह महादेव अउ रेड्डी अन्ना ऑनलाइन सट्टा ऐप ले जुड़े बैंक खाता के करीब एक करोड़ रूपिया फ्रीज कर देहे। मिले जानकारी के अनुसार पुलिस ह अब तक ए मामला म पंद्रा आरोपी मन ल गिरप्तार करे हे।
केन्द्रीय सूचना अउ प्रसारण राज्यमंत्री डॉक्टर एल. मुरूगन ह सुविश्वसनीय अउ सच्ची खबर मन बर आकाशवाणी अउ दूरदर्शन के सराहना करीन हे। ओमन किहीन कि प्रसार भारती के दूनो संगठन ह सरकारी कल्याणकारी योजना मनके बारे म जानकारी के प्रसार के संगेसंग भारतीय संस्कृति अउ इतिहास अउ राष्ट्र के मूल्य के बारे म जागरूकता पैदा करे म प्रभावी भूमिका निभाय हे। डॉक्टर मुरूगन आज नई दिल्ली म ग्लोबल न्यूज फोरम ल संबोधित करत हुए किहीन कि कोविड महामारी के दउरान फर्जी खबर अउ गलत सूचना फैलाय के बड़ा खतरा रिहीस, लेकिन आकाशवाणी अउ दूरदर्शन ह ए मिथक ल दूर करे म महत्वपूर्ण भूमिका निभाय हे।
ये अवसर म प्रसार भारती के मुख्य कार्यकारी अधिकारी मयंक कुमार अग्रवाल ह किहीन कि आकाशवाणी अउ दूरदर्शन ह लोक प्रसारण के उच्चतम मानक ल बनाय रखे हे। आकाशवाणी समाचार सेवा प्रभाग महानिदेशक डॉक्टर वसुधा गुप्ता अउ सूचना अउ प्रसारण मंत्रालय के वरिष्ठ अधिकारी मन घलो ये अवसर म उपस्थित रिहीन।
प्रदेश म आगामी छै अक्टूबर ले छत्तीसगढ़िया ओलंपिक के आयोजन करे जाही। एखर तैयारी लगभग पूरा कर ले गेहे। ये ओलंपिक म गिल्ली-डंडा, पिट्ठूल, लंगड़ी दौड़ जइसे चौदा ठन पारंपरिक खेल मनके मुकाबला होही
छत्तीसगढ़िया ओलंपिक बर छै स्तर निर्धारित करे गेहे। एमा गांव म पहला स्तर राजीव युवा मितान क्लब के होही। उहें दूसरइया स्तर जोन हे, जेमा आठ राजीव युवा मितान क्लब ल मिलाके एक क्लब होही। फेर विकासखंड नगरीय क्लस्टर, जिला, संभाग अउ अंतिम म राज्य स्तर म खेल प्रतियोगिता मनके आयोजित करे जाही। राज्य स्तर के मुकाबला अठाईस दिसंबर ले छै जनवरी तक होही।
भारतीय रेल ह पांच सौ मेल एक्सप्रेस रेलगाड़ी मन ल सुपरफास्ट गाड़ी म बदल देहे। एखर अलावा पैंसठ जोड़ी रेलगाड़ी मन ल सुपरफास्ट श्रेणी म जोड़ दे गेहे। रेल मंत्रालय ह अपन वेबसाइट म रेलगाड़िया एक नजर में नाम से जारी नवा समय-सारिणी म ये जानकारी देहे। मंत्रालय ह बताइन कि चौरासी प्रतिशत मेल एक्सप्रेस रेलगाड़ी मन समय म चलत हे।
भारतीय जनता पार्टी के प्रदेस अध्यक्ष अरूण साव ह किहीन कि गौ-माता के रक्षा बर भाजपा आंदोलन करही। ओमन गांव म गाय अउ भैंसा मनके मउत ल दुर्भाग्यजनक बतईन। जांजगीर-चांपा जिला के पामगढ़ क्षेत्र के मेहंदी गांव म एक ठिन कारीकरम म श्री साव ह कांग्रेस सरकार म राज्य म अपराध बढ़े के आरोप लगईन। ओमन किहीन कि राज्य सरकार गाय मनके रक्षा करे म असफल रेहे हे।
छत्तीसगढ़ विधानसभा के पूर्व नेता प्रतिपक्ष धरमलाल कौशिक ह कीहिन हे कि शरीर के रक्षा अउ ओला निरोगी रखे बर मनखे ल सदैव प्रयास करना चाही। गांधी जयंती के उपलक्ष्य म बिल्हा के दगोरी गांव म आयोजित निशुल्क स्वास्थ्य शिविर म ओमन कीहिन कि शरीर ल स्वस्थ रखे बर समय-समय म चिकित्सा जांच घलो करावत रहना चाही। तीन हजार ले जादा ग्रामीण मन ये स्वास्थ्य शिविर के लाभ लीन । ए दउरान पौधरोपण घलो करे गीस।
शारदेय नवरात्र के आखिरी दिन आज प्रदेस म महानवमी मनाय जात हे। आज सिद्धिदात्री के रूप म मां दुर्गा के पूजा-अर्चना करे जात हे। राजधानी रायपुर म जगह-जगह कन्याभोज अउ भंडारा के आयोजन करे जात हे। काली जंवारा विसर्जन के संग पूजा पंडाल मन म विराजे देवी प्रतिमा मनके विसर्जन के सिलसिला सुरू हो जही।
इही बीच, राजभवन म घलो महानवमीं के अवसर म पूजा-अर्चना करे गीस। ए दउरान राज्यपाल अनुसुईया उइके ह कन्याभोज घलो करईन।
विजयादशमीं के पर्व काली मनाय जाही। ए मउका म राजधानी म अलग-अलग जगह मन म रावण, कुंभकर्ण अउ मेघनाद के पुतला के दहन करे जाही। आधा दर्जन ले जादा जगह मन म बड़े स्तर म दशहरा उत्सव मनाय जाही। कई जगह म रावण दहन ले पहिली रामलीला के मंचन घलो करे जाही। राजधानी रायपुर के डब्लयूआर.एस. कॉलोनी म कोरोना काल के बाद दशहरा उत्सव ल लेके विशेष तैयारी करे जात हे।
ए बखत एक सौ दस फीट के रावण अउ सत्तर-सत्तर फीट के कुभकरण अउ मेघनाथ के पुतला बनाय गेहे। रावण दहन ले पहिली सांस्कृतिक कारीकरम के अलावा आतिशबाजी घलो करे जाही। कार्यक्रम म रामायण धारावाहिक के राम अभिनित पात्र अरूण गोविल अउ माता सीता के अभिनय करइया दीपिका चिखलइया विशेष अतिथि के रूप म होही। एखर अलावा रावणभाटा मैदान म सत्तर फीट के रावण बनाये जात हे।
राज्यपाल अनुसुईया उइके अउ मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह दशहरा पर्व के अवसर म प्रदेसवासी मन ल बधाई अउ सुभकामना दीन। ओमन प्रदेश के सुख अउ समृद्धि के कामना घलो करीन।
इही बीच पचहत्तर दिन तक चलइया विश्व प्रसिद्ध बस्तर दशहरा पर्व म आज जोगी उठाई अउ मावली परघाव विधान के रस्म अदा करे जाही। एखर पहिली काली बीते रतिहा दंवेवाड़ा ले मावली माता अउ मां दंतेश्वरी के डोली अउ छत्र ल फूल से सुसज्जित वाहन ल जगदलपुर लाये गीस।
कोंडागांव कलेक्टर दीपक सोनी ह जिला म सहायक शिक्षक मनके पदोन्नति आदेश ल निरस्त कर देहे। संगेसंग जिला पंचायत के मुख्य कार्यपालन अधिकारी के अध्यक्षता म तीन सदस्यीय जांच समिति के गठन करे गेहे। कलेक्टर ह जांच समिति ल शीघ्र प्रतिवेदन प्रस्तुत करे के निर्देश देहे। समिति डहार ले प्रतिवेदन प्राप्त होय के बाद शिक्षक मनके पदोन्नति के आदेश जारी करे जाही।
– गुजरात के गांधीनगर म आयोजित छत्तीसवां राष्ट्रीय खेल म छत्तीसगढ़ के खिलाड़ी मनके लगातार बेहतर प्रदर्शन जारी हे। इही कड़ी म काली होय तलवारबाजी प्रतियोगिता म पुरूष वर्ग ह कांस्य पदक प्राप्त करीस।
– सक्ती जिला के डडई गांव म ट्रक के चपेट म आय ले पिता-पुत्र गंभीर रूप ले घायल होगे, जेला अस्पताल म भर्ती कराय गेहे। जिहां इलाज के दउरान पिता के मउत होगे।
– जांजगीर-चांपा जिला के अकलतरा के बीईओ ल वेतन भुगतान म अनियमितता बरते के आरोप म निलंबित कर दे गेहे।
अउ
– कोरबा जिला के पाली थाना क्षेत्र म दीवार ढहे ले तीन झिन सगे भाई मनके मउत होगे। मिले जानकारी के अनुसार एक ठिन घर के अंगना म खेलत तीन झिन लईका मनके उपर अचानके दीवार गिरे ले उंखर घटना स्थल म ही मउत होगे।