कोविड-टीका
आजादी के अमृत महोत्सव के तहत केन्द्र सरकार डहार ले पाछु पन्द्रह जुलाई ले तीस सितंबर तक पचहत्तर दिन बर कोविडरोधी ऐहतियाती टीका मुफ्त लगाय के बिसेस अभियान चलाय जावत हे। काली ए अभियान के आखिरी दिन हरय। एला देखत स्वास्थ्य मंत्रालय ह देसभर म पात्र लाभार्थी मन ले अपन तीर के सरकारी केन्द्र मन म जाके ऐहतियाती टीका लगवाय के अपील करे हे।
इही बीच, छत्तीसगढ़ म घलो मुफ्त बूस्टर डोज लगाय बर प्रदेस के स्वास्थ्य विभाग डहार ले सरलग अभियान चलाय जावत हे। काली राजनांदगांव म घलो बूस्टर डोज लगाय बर प्रसासन ह बिसेस इंतजाम करे हे। राजनांदगांव के कलेक्टर डोमन सिंह ह जिला के जम्मों पात्र लोगन मन ले कोविड के मुफ्त बूस्टर डोज लगवाय के अपील करीन हे।
प्रमुख रक्षा अध्यक्ष-अनिल चौहान
केन्द्र सरकार ह रिटायर लेफ्टिनेंट जनरल अनिल चौहान ल अवइया प्रमुख रक्षा अध्यक्ष-सीडीएस नियुक्त करे हे। ओमन प्रभार ग्रहण के तारीख ले सैन्य विभाग सचिव के रूप घलो काम करही। करीबन चालीस बछर के अपन कैरियर म लेफ्टिनेंट जनरल अनिल चौहान ह सेना के आने-आने पद म काम करे हे। खबर के मुताबिक पाछु बछर आठ दिसंबर के हेलीकॉप्टर दुर्घटना म जनरल बिपिन रावत के मउत के बाद ले प्रमुख सेना अध्यक्ष के पद खाली रिहीस।
भाड़ा नियंत्रण कानून
राज्य सरकार ह अचल संपत्ति के मालिक अउ किरायेदार मनके बीच विवाद ल जल्दीच निपटाय बर छत्तीसगढ़ भाड़ा नियंत्रण कानून ल नगर निगम के संगेसंग नगर पालिका अउ नगर पंचायत क्षेत्र म घलो लागू करे के फइसला करे हे। ए संबंध म अधिसूचना घलो प्रकाशित कर दे गेहे। राज्य सरकार के ए फइसला ले भू-स्वामी अउ किरायेदार के बीच विवाद ल निपटाय म अब भाड़ा नियंत्रण कानून के लाभ नगर पालिका अउ नगर पंचायत मन ल घलो मिलही।
राज्यपाल-स्काउट गाईड
राज्यपाल अनुसुईया उइके ह किहीन हे कि भारत स्काउट अउ गाईड संस्था ह लइका मन म अनुशासन अउ राष्ट्रीयता के भावना जगाय म अहम भूमिका निभाय हे। काली राजभवन म राखे गे भारत स्काउट अउ गाईड छत्तीसगढ़ के राज्य अलंकरण समारोह म राज्यपाल ह किहीन कि ए संस्था ले जुड़े विद्यार्थी मन म मानव सेवा के भावना घलो बिसेस रूप ले देखे बर मिलथे। समारोह म राज्यपाल ह उत्कृष्ट स्काउट-गाईड के अलावा सर्वश्रेष्ठ रोवर अउ रेंजर ल प्रसस्ति पत्र देके सम्मानित करीन। सम्मान पवइया म स्काउट गाईड के प्रशिक्षण अधिकारी मन घलो सामिल रिहीन।
ट्रेन रद्द
दक्षिण पूर्व मध्य रेलवे ह रैक के अभाव के सेती आज अउ काली पुणे हावड़ा एक्सप्रेस, साउथ बिहार एक्सप्रेस अउ सालीमार-एलटीटी एक्सप्रेस गाड़ी ल रद्द कर देहे। बिलासपुर रेलवे जोन ले मिले खबर के मुताबिक रेलवे प्रसासन डहार ले बुनियादी ढांचा विकास बर रायगढ़ अउ झारसुगुड़ा के बीच चौथा लाइन के काम करे जावत हे। उहें, रायगढ़ के तीर ईब स्टेशन ल चौथा लाइन ले जोड़े के काम घलो चलत हे। एखर सेती पुणे-हावड़ा आजाद हिन्द एक्सप्रेस, साउथ बिहार एक्सप्रेस अउ सालीमार-एलटीटी एक्सप्रेस ल रद्द करे गेहे।
मल्टीमीडिया चित्र प्रदर्शनी
केन्द्रीय संचार ब्यूरो के प्रादेशिक कार्यालय डहार ले डोंगरगढ़ के मां बम्लेश्वरी मंदिर परिसर म मल्टीमीडिया चित्र प्रदर्शनी के दूसर दिन आज भासन, निबंध अउ प्रश्नोत्तरी समेत आने-आने स्पर्धा के आयोजन करे गीस। आज राजनांदगांव जिला पंचायत के अध्यक्ष गीता घासी साहू ह माईपहुना के रूप म मौजूद रिहीन। ए मउका म ओमन आम लोगन ल केन्द्र सरकार के योजना के जादा ले जादा लाभ लेके अपील करीन। कारीकरम म राजनांदगांव जिला पंचायत के सभापित अशोक देवांगन अउ सदस्य राजेश श्यामकर ह घलो अपन विचार राखीन।
केन्द्रीय संचार ब्यूरो रईपुर कार्यालय के प्रमुख शैलेष फाये ह बतईन कि ए तीन दिन वाले प्रदर्सनी के दउरान आने-आने स्पर्धा के विजेता मन ल काली समापन समारोह म पुरस्कार अउ प्रमाण पत्र दे जाही।
आईईडी विस्फोट-जवान शहीद
बीजापुर जिला म प्रेसर बम के चपेट म आय ले सीआरपीएफ के एक जवान सहीद होगे हे। सहीद जवान सत्यपाल सिंह हरियाणा के रोहतक के निवासी रिहीन। जिला के पुलिस अधीक्षक ह बतईन कि ए घटना पामेड़ थाना क्षेत्र के चिंतावगु नंदियां के तीर होईस। ओमन बतईन कि सीआरपीएफ के जवान मन तलाशी अभियान म निकले रिहीस। लहुटत बेरा एक झिन जवान के पांव ह प्रेसर बम पड़ गे अउ विस्फोट होगे। विस्फोट के बाद ए जवान मउकाच म सहीद होगे।
दुर्ग-हत्या
दुरूग जिला के कुम्हारी थाना क्षेत्र के कपसदा बाड़ी म काली रतिहा अज्ञात मनखे मन ह एकेच परिवार के चार झिन के हत्या कर दीन। जिला के पुलिस अधीक्षक डॉक्टर अभिषेक पल्लव ह बतईन कि आरोपी मन ह पति-पत्नी अउ उंखर दू झिन लइका के टंगिया मारके हत्या करे हे। घटना के सिकार परिवार के मुखिया भोलाराम यादव ओड़िसा के रहवइया रिहीस। ओमन कपसदा म किराया के बाड़ी म रहत रिहीन। पुलिस ह घटना जघा ले मउत होय पति-पत्नी अउ ओखर चौदह अउ आठ बछर के लइका के सव बरामद कर लेहे। पुलिस डहार ले फॉरेंसिक टीम के मदद ले आरोपी मनके सुराग हासिल करे के कोसिस करे जावत हे।
अरूण साव-जनचौपाल
प्रदेस भाजपा अध्यक्ष अउ बिलासपुर के सांसद अरूण साव ह अपन बिलासपुर स्थित सरकारी आवास म कार्यकर्ता अउ आम लोगन मन ले भेंट करे बर जनचौपाल लगईन। ए मउका म बड़ संख्या म बिलासपुर क्षेत्र के लोगन मन ह श्री साव ले मिलके ओमन ल अपन परेसानी अउ मांग के जानकारी दीन। श्री साव ह ए मांग म तुरते कार्रवाई करे बर अधिकारी मन ले गोठबात करीन।
बस्तर-दशहरा
बस्तर दशहरा के दउरान हरेक दिन होवइया रसम के संगेसंग आने-आने सांस्कृतिक कारीकरम के आयोजन करे जावत हे। इही कड़ी म काली ले जगदलपुर के टाउन क्लब मैदान म पांच दिवसीय सांस्कृतिक कारीकरम के सुरूवात होईस। कारीकरम के सुभारंभ बस्तर के सांसद अउ बस्तर दशहरा समिति के अध्यक्ष दीपक बैज ह करीन। कारीकरम म देस के आने-आने राज्य के कलाकार मन ल घलो बलाय गेहे। ए मउका म बस्तर के सांसद दीपक बैज ह कहीन कि बस्तर दशहरा परब सामाजिक सद्भाव अउ समरसता के प्रतीक आय। कारीकरम ल बस्तर के कलेक्टर चंदन कुमार ह घलो संबोधित करीन।
राज्योत्सव
छत्तीसगढ़ राज्य स्थापना दिवस म हर बछर होवइया राज्योत्सव ए बखत एक ले तीन नवंबर तक रईपुर के साईंस कॉलेज मैदान म आयोजित करे जाही। राज्योत्सव के दउरान राज्य अलंकरण समारोह के संगेसंग आने-आने सांस्कृतिक कारीकरम घलो होही। प्रदेस के मुख्य सचिव अमिताभ जैन ह राज्योत्सव के तैयारी के संबंध म काली बड़का अधिकारी मनके बइठका लीन। मुख्य सचिव ह जम्मों विभाग के अधिकारी मन ले किहीन कि राज्य अलंकरण समरोह म देवइया सम्मान अउ पुरस्कार के जानकारी पन्द्रह अक्टूबर तक सामान्य प्रशासन विभाग ल अनिवार्य रूप ले देवाय जाय।
ग्रैंड मास्टर्स चेस टूर्नामेंट
रईपुर म पाछु उन्नीस सितंबर ले आयोजित चीफ मिनिस्टर ट्रॉफी इंटरनेशनल ग्रैंड मास्टर्स शतरंज टूनामेंट के खिताब जर्जिया के ग्रैंड मास्टर पेनसुलिया लेवन ह जीत लेहे। ओमन रूस के ग्रैंड मास्टर्स सवचेंको बोरिस ल हराके ए खिताब जीतीन। दस दिन तक चलइया ए प्रतियोगिता म भारत के आने-आने राज्य के संगेसंग विदेस ले आय खिलाड़ी मन भाग लीन।
अउ अब थोरकुन समाचार सार म –
– अवइया एक अक्टूबर के अंतर्राष्ट्रीय वृद्धजन दिवस के मउका म समाज कल्याण विभाग डहार ले रईपुर के इंडोर स्टेडियम म राज्य स्तरीय समारोह के आयोजन करे जाही।
– प्रदेस के आदिम जाति अउ अनुसूचित जाति विकास विभाग ह युवा कैरियर निर्माण योजना के तहत इच्छुक विद्यार्थी मन ले बारह अक्टूबर तक आवेदन मंगाय हे।
अउ
– भिलाई के कल्याण महाविद्यालय के एनसीसी छात्र मन डहार ले जल स्त्रोत के सफाई बर पुनीत सागर अभियान सुरू करे गेहे।