विश्व पर्यटन दिवस-मुख्यमंत्री
आज विश्व पर्यटन दिवस हरय। ए मउका म राजाधानी रईपुर म छत्तीसगढ़ पर्यटन मंडल डहार ले राष्ट्रीय संगोष्ठी के आयोजन करे गीस। ए सम्मेलन ल संबोधित करत मुख्यमंत्री भूपेश बघेल ह किहीन कि छत्तीसगढ़ म पर्यटन के विकास बर इहां के संस्कृति अउ उन्मुक्त जीवन के संगेसंग प्रदेस के ऐतिहासिक महत्व के बारे म दुनिया ल बताय के जरूरत हवय। ओमन किहीन कि राज्य सरकार छत्तीसगढ़ के पर्यटन ल दुनिया के नक्सा म लाने बर सरलग कोसिस करत हे।
ए मउका म मुख्यमंत्री ह राजीव गांधी मितान क्लब के सदस्य मन ल पर्यटन संबंधी प्रसिक्षण देवाय के बात किहीन। ओमन किहीन कि भगवान श्रीराम ह अपन वनवास के जादा बेरा छत्तीसगढ़ म गुजारे रिहीन अउ इहे उंखर मां कौशल्या घलो राहत रिहीन।
ए मउका म राज्य के पर्यटन मंत्री ताम्रध्वज साहू ह किहीन कि कोरोना संकट के बिसम परिस्थिति के बावजूद पाछु दू बछर म इहां आदिवासी पर्यटन परिक्षेत्र तैयार करे गीस। संगेसंग राम वनगमन परिपथ म घलो काम सुरू करे गेहे।
उहें, मुख्यमंत्री आज विश्व पर्यटन दिवस म राखे गे आने-आने कारीकरम म सामिल होईन। ओमन प्रदेस म पर्यटन ल बढ़ावा देके उद्देश्य ले टाइगर बॉय चेंदरू के मूर्ति के अनावरण करीन। पर्यटन मंडल डहार ले चेंदरू अउ टेंबू टाइगर के चित्र के उपयोग स्मृति चिन्ह के रूप म करे जाही। ए मउका म मुख्यमंत्री ह लइका मनके कॉमिक्स अउ आने पत्रिका प्रकासित करइया प्रकासन समूह डहार ले तैयार करे गे टाकिंग कॉमिक्स के विमोचन घलो करीन। ए कॉमिक्स म लइका मन कहानी पढ़े के बजाय सुन सकथे। कारीकरम के दउरान पर्यटन के विस्तार बर छत्तीसगढ़ पर्यटन मंडल अउ भारतीय रेलवे खान-पान अउ पर्यटन निगम आई.आर.सी.टी.सी. के बीच एक ठिन समझौता म दस्तखत करे गीस।
मूंग, उड़द, अरहर-खरीदी
प्रदेस म समर्थन मूल्य म धान खरीदी जइसन अब दलहन फसल के खरीदी घलो समर्थन मूल्य म करे जाही। ए संबंध म केन्द्रीय कृषि अउ कृषक कल्याण मंत्रालय ह राज्य सरकार के प्रस्ताव ल मंजूरी दे देहे। मूंग अउ उड़द के खरीदी छह हजार छह सौ रूपिया प्रति कुंटल के दर ले अउ अरहर के खरीदी सात हजार सात सौ पचपन रूपिया प्रति कुंटल के दर ले करे जाही। एखर बर किसान मनके पंजीयन करे जावत हे। राज्य सरकार ह मूंग, उड़द अउ अरहर के खरीदी ल प्रोत्साहित करे के उद्देश्य ले मंडी शुल्क अउ कृषक कल्याण शुल्क के भुगतान ले छूट देके के घोसना घलो करे हे।
आधिकारिक जानकारी के मुताबिक प्रदेस म समर्थन मूल्य म मूंग अउ उड़द के खरीदी सत्रह अक्टूबर ले सोलह दिसंबर तक करे जाही। उहें, अरहर के खरीदी अवइया बछर तेरह ले बारह मई तक होही। चालू खरीफ मौसम म तीन सौ बहत्तर मीटरिक टन मूंग अउ छह हजार एक सौ अस्सी मीटरिक टन उड़द के संगेसंग छह हजार तीन सौ बयालीस मीटरिक टन अरहर के खरीदी के लक्ष्य राखे गेहे।
उद्यानिकी फसल-ऋण
प्रदेस म उद्यानिकी फसल लेवइया किसान मन ल तीन लाख रूपिया तक के ब्याज मुक्त ऋण दे जाही। ए संबंध म राज्य सरकार ह अधिसूचना जारी कर देहे। ए ऋण मुख्य रूप ले मछली पालक के संगेसंग उद्यानिकी फसल लेवइया समूह अउ समिति ल दे जाही। जारी अधिसूचना के मुताबिक किसान मन लेवइया ब्याज के प्रतिपूर्ति के भुगतान राज्य सासन डहार ले सहकारी बैंक अउ समिति मन ल अनुदान के रूप म करे जाही।
आयुष्मान भारत डिजिटल मिशन
आयुष्मान भारत डिजिटल मिशन म सबले जादा अस्पताल मन ल जोड़े के मामला म छत्तीसगढ़ ल राष्ट्रीय पुरस्कार ले सम्मानित करे गेहे। उहें, ए योजना म प्रदेस के नौ हजार ले जादा सरकारी अस्पताल मनके पंजीयन होगे हे। केन्द्रीय स्वास्थ्य मंत्री डॉक्टर मनसुख मंडाविया ह नई दिल्ली म राखे गे ‘आरोग्य मंथन‘ कारीकरम म प्रदेस ल ए उपलब्धि बर पुरस्कार दीन। प्रधानमंत्री जन आरोग्य योजना म माईलोगिन मनके इलाज म घलो छत्तीसगढ़ देस म सबले आगू हवय। ए योजना म इलाज के लाभ लेवइया कुल हितग्राही म अंठावन प्रतिसत माईलोगिन हवय।
मुख्यमंत्री भूपेश बघेल अउ स्वास्थ्य मंत्री टी.एस. सिंहदेव ह ए उपलब्धि बर स्वास्थ्य विभाग के अधिकारी अउ कर्मचारी समेत स्वास्थ्य सेवा ले जुड़े जम्मों झिन ल बधाई अउ सुभकामना दीन हे।
क्षेत्रीय प्रशिक्षण सम्मेलन
राष्ट्रीय सांख्यिकी कार्यालय डहार ले असमाविष्ट क्षेत्र के उद्यम के वार्षिक सर्वेक्षण बर क्षेत्रीय प्रशिक्षण सम्मेलन आज ले रईपुर म सुरू होगे हे। राष्ट्रीय सांख्यिकी कार्यालय के रईपुर म पदस्थ उप महानिदेशक रोशनलाल साहू ह ए तीन दिन के प्रशिक्षण सम्मेलन के उद्घाटन करीन। ए मउका म श्री साहू ह किहीन कि देस के सकल घरेलू उत्पाद म असमाविष्ट क्षेत्र के उद्यम के महत्वपूर्ण योगदान हवय।
ए मउका म पत्र सूचना कार्यालय के उप निदेशक सुनील कुमार तिवारी ह किहीन कि ए सर्वेक्षण ले मिले आंकड़ा के आधार म केन्द्र अउ राज्य सरकार डहार ले विकास ले जुड़े नीति अउ कारीकरम तैयार करे जाथे।
माओवादी समाचार
बीजापुर जिला म आवापल्ली क्षेत्र के टेकमेटला के जंगल म सुरक्षा बल अउ माआवोदी मनके बीच होय मुठभेड़ म एक झिन माओवादी घायल होगे। सुरक्षा बल के जवान तलाशी अभियान म निकले रिहीस, तभेच उहां माओवादी मनके मौजूद होय के खबर मिलीस। मुठभेड़ म घायल माओवादी रायगड़ा मिलिशिया दल के सदस्य बताय जात हे।
ओति, कांकेर म आठ लाख रूपिया के इनामी माओवादी ह आज पुलिस के आगू आत्मसमर्पण कर दीन। ए मउका म बस्तर रेंज के पुलिस महानिरीक्षक सुंदरराज पी. अउ कांकेर रेंज के डीआईजी बालाजी राव अउ कांकेर पुलिस अधीक्षक शलभ सिन्हा मौजूद रिहीन।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा परब के तहत काली संझा जोगी बिठाई के रस्म अदा करे गीस। ए मउका म बस्तर के सांसद अउ बस्तर दशहरा समिति के अध्यक्ष दीपक बैज समेत मांझी, चालकी अउ स्थानीय प्रतिनिधि अउ श्रद्धालु बड़ संख्या म मौजूद रिहीन।
एखर पहिली, इतवार के काछनगादी के रस्म निभाय गीस। एमा आठ बछर के बालिका ल विधि-विधान करके झूला म झुलाके बस्तर दशहरा मनाय के अनुमति ले गीस। आज बस्तर दशहरा म फूलरथ परिक्रमा के रस्म अदा करे जावत हे।
मल्टीमीडिया चित्र प्रदर्शनी
केन्द्रीय संचार ब्यूरो के प्रादेशिक कार्यालय डहार ले काली ले डोंगरगढ़ के बम्लेश्वरी मंदिर परिसर म मल्टीमीडिया चित्र प्रदर्शनी लगाय जाही। राजानांदगांव के सांसद संतोष पांडेय ए प्रदर्सनी के सुभारंभ करही। उहें, डोंगरगढ़ के विधायक भुनेश्वर बघेल कारीकरम के पगरइति करही। तीन दिन तक चलइया ए प्रदर्सनी म पाछु आठ बछर के दउरान केन्द्र सरकार डहार ले सेवा, सुशासन अउ गरीब कल्याण के क्षेत्र म करे गे आने-आने काम मनके चित्र के माध्यम ले प्रदर्सित करे जाही। ए प्रदर्सनी बिहनिया ग्यारह बजे ले रतिहा आठ बजे तक आम लोगन मन बर खुल्ला रइही। संगेसंग आजादी के अमृत महोत्सव म केन्द्रित चित्रकला, निबंध लेखन, भासन प्रतियोगिता अउ प्रश्नमंच के आयोन घलो करे जाही।
दुर्घटना
प्रदेस आज तीन आने-आने दुर्घटना म चार झिन लोगन के मउत होगे। उहें, चौदह झिन लोगन घायल होगे हे।
रईपुर-जगदलपुर राष्ट्रीय राजमार्ग म भानपुरी के तीर बस ह सड़क किनारे के बिजली खंभा ले टकरा गे। ए दुर्घटना म रईपुर एम्स के एक स्वास्थ्यकर्मी के मउत होगे। उहें, चौदह झिन लोगन घायल होगे।
ओति, धमतरी जिला के खैरझिटी गांव म ट्रेक्टर के चपेट म आय ले फटफटी म बइठे दू झिन नोनी मनके मउकाच म मउत होगे।
उहें, रईपुर-बिलासपुर राष्ट्रीय राजमार्ग के सलगांव के तीर आज सड़क किनारे खड़े ट्रक ल एक दूसर ट्रक ह टक्कर मार दीस। एखर बाद ट्रक के केबिन म आगी लगे ले ओमा बइठे ड्राईवर के मउकाच म मउत होगे।
मानसून विदाई
देस म मानसून के विदाई बर परिस्थिति अनुकूल होय लगे हे। अवइया दू-तीन दिन म देस के उत्तर-पश्चिमी राज्य मन ले मानसून के बिदाई के घोसना हो सकथे।
इही बीच, मौसम वैज्ञानिक के मुताबिक ए बेरा बंगाल के खाड़ी अउ ओखर तीर-तखार के उपरी हवा म एक चक्रीय चक्रवाती घेरा बने हे, जेखर परभाव ले प्रदेस म काली एक-दू जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। उहें, प्रदेस म एक-दू जघा म गाज गिरे के चेतावनी घलो दे गेहे।