‘‘हमर बेटी-हमर मान‘‘
राज्य सरकार ह बेटी मनके सुरक्षा, उंखर सम्मान अउ ओमन ल जरूरी सेवा देवाय खातिर ‘‘हमर बेटी-हमर मान‘‘ अभियान सुरू करही। मुख्यमंत्री ह आज ट्वीट के माध्यम ले ए अभियान के बारे म जानबा दीन। ओमन किहीन कि जउन समाज म बेटी मन ह सुरक्षित रहिथे, ओ समाज ह बहुते आगू बढ़थे। ए अभियान म राज्य के महिला पुलिस मन ह जम्मों जिला के स्कूल-कालेज मन म जाके बेटी मन ल उंखर कानूनी अधिकार, गुड टच, बैड टच, यौन शोषण, साइबर क्राइम, सोशल मीडिया क्राइम ले बचाव अउ अधिकार के बारे म जानबा दीहीं अउ संगेसंग माईलोगिन अउ नोनी मनके जादा भीड़ वाले जघा म पुलिस के स्पेशल महिला पेट्रोलिंग लगाय जाही। ‘‘हमर बेटी-हमर मान‘‘ अभियान बर हेल्पलाइन के एक ठिन मोबाइल नंबर घलो जारी करे जाही।
राज्यपाल-बस्तर प्रवास
राज्यपाल अनुसुईया उइके ह किहीन हे कि हमन ल दिव्यांगजन मनके प्रति संवेदनशील होके उंखर विकास अउ समाज म ओमन ल आगू लाय के काम करना चाही। बस्तर प्रवास के दउरान काली राज्यपाल ह जगदलपुर स्थित महावीर भवन म राखे गे निःशुल्क दिव्यांग सहासता शिविर के समापन कारीकरम म सामिल होईन। ए मउका म ओमन दिव्यांगजन मन ल व्हीलचेयर, ट्राई साइकिल अउ कृत्रिम अंग बांटीन। राज्यपाल ह दिव्यांगजन मनके मदद अउ उंखर समस्या के निपटारा बर ब्लॉक मन म दिव्यांग सेवा सिविर के आयोजन करे के निरदेस जिला कलेक्टर ल दीन।
उहें, राज्यपाल ह आज कोंडागांव के संगेसंग केशकाल विकासखंड के गांव धनोरा के लोगन मन ले मिलीन अउ चित्रकोट म कुडुक समाज के प्रतिनिधिमंडल मन ले घलो मुलाकात करीन।
स्कूल-सावित्री बाई फूले
प्रदेस के जम्मों प्राथमिक अउ माध्यमिक स्कूल मन म समाज सुधारक सावित्री बाई फूले के फोटू लगाय जाही। ए बारे म लोक शिक्षण संचालक ह जम्मों जिला सिक्षा अधिकारी मन ल निरदेस दे हवय। निरदेस म केहे गेहे कि जउन स्कूल मन म फोटू लगाय जा चुके हे, ओ स्कूल के सूची भेजे जाय।
जानबा के मुताबिक मुख्यमंत्री ह राजनांदगांव जिला के गंडई म सावित्री बाई फूले के जयंती के मउका म जम्मों प्राथमिक अउ माध्यमिक स्कूल मन म उंखर फोटू लगाय अउ उंखर बारे म पाठ्यक्रम म सामिल करे के घोसना करे रिहीन।
स्वच्छ भारत मिशन-पुरस्कार
स्वच्छ भारत मिशन-ग्रामीण म बढ़िया काम करे के सेती छत्तीसगढ़ ल चार ठिन राष्ट्रीय पुरस्कार दे जाही। ए पुरस्कार राष्ट्रपति द्रौपदी मुर्मू ह दू अक्टूबर के नई दिल्ली म होवइया कारीकरम म दीहीं।
केन्द्रीय पेयजल अउ स्वच्छता मंत्रालय के स्वच्छ सर्वेक्षण-ग्रामीण म ईस्ट जोन म बढ़िया काम करइया राज्य म छत्तीसगढ़ ल पहिली जघा मिले हे। उहें, बढ़िया प्रदर्सन करइया जिला के ईस्ट जोन म दुरूग ल दूसरा अउ बालोद जिला ल तीसरा स्थान मिले हे। ओडीएफ प्लस म दीवार लेखन प्रतियोगिता म सेंट्रल जोन म छत्तीसगढ़ ल तीसर स्थान मिले हे।
मुख्यमंत्री ह ए सफलता उपर स्वच्छ भारत मिशन-ग्रामीण के राज्य टीम ल बधाई देहे।
हाईकोर्ट-अवमानना नोटिस
रायपुर शहर म रोक लगे के बाद घलो जोरदरहा आवाज म धुमाल-डीजे बजाय के मामला म छत्तीसगढ़ उच्च न्यायालय ह कलेक्टर डॉक्टर सर्वेश्वर नरेन्द्र भूरे अउ पुलिस अधीक्षक प्रशांत अग्रवाल ल अवमानना नोटिस जारी करके जवाब मांगे हे। ए मामला के सुनवाई आज न्यायमूर्ति पी.सेम कोशी अउ पी.पी. साहू के युगलपीठ ह करीन।
जानबा के मुताबिक रईपुर म रोक लगे के बाद धुमाल-डीजे बजाय के मामला म नागरिक संघर्ष समिति ह बिलासपुर हाईकोर्ट म अवमानना याचिका दायर करे रिहीन।
मुख्य सचिव-धान खरीदी समीक्षा
प्रदेस म एक नवंबर ले समर्थन मूल्य म किसान मन ले धान बिसाय जाही। मुख्य सचिव अमिताभ जैन ह काली वीडियो कान्फ्रेंसिंग के माध्यम ले अधिकारी मनके बइठका लेके धान खरीदी के तियारी के समीक्षा करीन। बइठका म मुख्य सचिव ह राज्य के जम्मों उपार्जन केन्द्र मन म बोरा मनके सही ढंग ले व्यवस्था करे के निरदेस दीन। संगेसंग किसान मनके पंजीयन, धान के रकबा, गिरदावरी, कस्टम मिलिंग, धान परिवहन वित्तीय व्यवस्था के संगेसंग अउ आने जिनीस उपर गोठबात होईस। एसो एक सौ दस लाख मीटरिक टन धान बिसाय के लक्ष्य राखे गेहे। धान खरीदी बर नवा किसान मनके पंजीयन इकतीस अक्टूबर तक होही।
ट्रेन परिचालन
दक्षिण पूर्व मध्य रेलवे के बिलासपुर रेलमंडल के रायगढ़-झारसुगुड़ा सेक्शन चौथा लाइन म कामकाज के सेती उनतीस सितंबर तक ए रद्दा म चलइया गाड़ी मन परभावित होही। जेमा पच्चीस सितंबर के मुंबई-हावड़ा दुरंतो एक्सप्रेस रद्द रइही। त उहें, हावड़ा-अहमदाबाद एक्सप्रेस ल झारसुगुड़ा अउ रायगढ़ के बीच पैसेंजर रेलगाड़ी जइसन चलाय जाही।
अइसने, पश्चिम रेलवे के राजकोट रेलमंडल के सिंधावदर-कनकोट-खोराना-बिलेश्वर सेक्सन म दोहरीकरण के काम करे जाही, जेखर सेती काली चौबीस सितंबर के हापा-बिलासपुर एक्सप्रेस अउ छब्बीस सितंबर के बिलासपुर-हापा एक्सप्रेस रद्द रइही।
ऐति, रेल यात्री मनके सुविधा ल ध्यान म राखत रेल प्रसासन ह रद्द होय हावड़ा-मुंबई गीतांजली एक्सप्रेस ल आज ले सुरू कर देहे।
उहें, रेलवे कोति ले नवरात्रि के दउरान डोंगरगढ़ जवइया दर्शानार्थी मन बर छब्बीस सितंबर ले चार अक्टूबर तक एक्सप्रेस रेलगाड़ी मन ल घलो इहां रोके जाही।
रेलवे-स्वच्छता पखवाड़ा
भारतीय रेलवे डहार ले सोलह सितंबर ले दू अक्टूबर तक स्वच्छ रेल-स्वच्छ भारत के तहत स्वच्छता पखवाड़ा के आयोजन करे जात हे। ए दउरान दक्षिण पूर्व मध्य रेलवे रईपुर मंडल के जम्मों स्टेशन मन म रोजे थीम आधारित कारीकरम चलत हे। इही कड़ी म काली स्वच्छ पटरी थीम उपर आधारित कारीकरम के आयोजन रईपुर मंडल के प्रमुख स्टेशन – रईपुर, भिलाई पावर हाउस, भाटापारा अउ दुरूग स्टेसन परिसर म करे गीस। ए दउरान लोगन मन ल साफ-सफई के बारे म बताय गीस।
बीएसपी-कोयला
भिलाई इस्पात संयंत्र म विशाखापट्टनम ले होवत विदेस ले आय कोयला ले भरे दू ठिन रैक ह इस्पात संयंत्र पहुंच गेहे। संयंत्र प्रबंधन ले मिले जानबा के मुताबिक संयंत्र म कोयला के कमी ल देखत पांच ठिन रैक ल विदेस ले मंगाय गेहे। बीएसपी प्रबंधन ह वायर रॉड मिल अउ बार एंड रॉड मिल म उत्पादन ल बंद कर दे रिहीस। अब एला एक घांव फेर सुरू करे जाही।
ग्रामीण मौत
बीजापुर अउ नारायणपुर जिला के सात ठिन गांव मन म पाछु कुछ महीना के दउरान उनचालीस लोगन मनके अज्ञात बीमारी ले मउत के सिकायत गांव के लोगन मन ह जिला प्रशासन ले करे हे। लोगन मन बतईन कि बीजापुर जिला के मर्रामेटा म बारह, पेन्टा म तीन, पीडियाकोट म सात, बड़ेपल्ली म सात अउ नारायणपुर जिला के रेकावाया म दस झिन लोगन के मउत होय हे।
ए बारे म बीजापुर कलेक्टर ह बतईन कि मउत के कारण के पता लगाय बर परभावित गांव मन म मेडिकल टीम भेजे जात हे। एखर पहिली, सुकमा जिला के रेगड़गट्टा म चौव्वन झिन लोगन के मउत चार साल के दउरान होय रिहीस हे। ए जानबा स्वास्थ्य मंत्री ह विधानसभा म घलो दे रिहीस।
अउ अब थोरकुन समाचार सार म –
– प्रदेस के रईपुर अउ बिलासपुर के आयुवेर्दिंक चिकित्सा कॉलेज मन म हर सुक्रवार के मानसिक रोग जइसन समस्या ले पीड़ित लोगन मन बर बिसेस ओपीडी चलाय जात हे।
– छत्तीसगढ़ लोक सेवा आयोग डहार ले भृत्य परीक्षा ह पच्चीस सितंबर के प्रदेस के अट्ठाईस परीक्षा केन्द्र मन होही। ए परीक्षा बर दू लाख पच्चीस हजार ले जादा अभ्यर्थी मन अरजी करे हे।
– रईपुर के पुरानी बस्ती म हस्तरेखा देखे के नाव म पचहत्तर लाख रूपिया के ठगी के मामला आगू आय हे। पुलिस ह आरोपी मन ल खोजत हे।
– गरियाबंद जिला पुलिस ह महिला स्व-सहायता समूह के पइसा म पांच लाख रूपिया के गबन करे के मामला म माइक्रो फाइनेंस कंपनी के एक झिन करमचारी ल महासमुंद ले गिरफ्तार करे हे।
अउ
– भिलाई म बोनस के मांग ल लेके सीटू के आह्वान म आज सेल करमचारी मन ह बोरिया गेट के आगू धरना-प्रदर्शन करीन।