राज्य म अवइया एक नवंबर ले समर्थन मूल्य म धान खरीदी शुरू करे जाही। ए घोषणा मुख्यमंत्री भूपेश बघेल ह करीन। एखर बर प्रदेस म बड़ स्तर म तैयारी शुरू कर दे गेहे। धान खरीदी के दउरान किसान मन ल कोनो प्रकार के परसानी न हो एखर बर सबो धान खरीदी केंद्र मन म जरूरी इंतजाम करे के निर्देश अधिकारी मन ल दे गेहे । राज्य म फिलहाल धान उपार्जन बर नवा किसान मनके पंजीयन के काम चलत हे, जउन इकतीस अक्टूबर तक चलही। ए साल पंजीकृत किसान मनके संख्या पच्चीस लाख ले उपर पहुंचे के अनुमान हे।
भेंट-मुलाकात कार्यक्रम
भेंट-मुलाकात कार्यक्रम के तहत मुख्यमंत्री भूपेश बघेल ह बालोद जिला के डौण्डीलोहारा विधानसभा क्षेत्र म आज एक सौ उनसठ करोड़ रूपिया के लागत के आने-आने निर्माण काम के लोकार्पण अउ भूमिपूजन करीन। ए विकास काम म आदिवासी बालक-बालिका, सड़क निर्माण अउ स्कूल भवन के उन्नयन कार्य शामिल हे।
उंहे मुख्यमंत्री ह दल्लीराजहरा म आने आने समाज के प्रमुख अउ सामाजिक संगठन के प्रतिनिधि मंडल ले मुलाकात करीन। ए मउका म ओमन दल्लीराजहरा म सौ बिस्तर वाला अस्पताल अउ लाइब्रेरी बनाय बर तीस लाख रूपिया के मंजूरी दीन।
भाजपा प्रवेश
प्रदेश म कांग्रेस, बहुजन समाज पार्टी अउ जनता कांग्रेस छत्तीसगढ़ के कई नेता मन ह आज भारतीय जनता पार्टी म प्रवेश करीन। बतादन कि भाजपा म प्रवेश करइया अधिकांश नेता बागी रीहिन, जेमन ह घर वापसी करीन। रायपुर म आयोजित भाजपा प्रवेश कार्यक्रम म पार्टी के राष्ट्रीय उपाध्यक्ष डॅाक्टर रमन सिंह, प्रदेश अध्यक्ष अरूण साव अउ छत्तीसगढ़ सह-प्रभारी नितिन नबीन समेत कई आने बड़का नेता मन मौजूद रीहिन।
भाजपा म प्रवेश करइया प्रमुख नेता म बसपा के पूर्व विधायक कामदा जोल्हे, बालोद कांग्रेस के पूर्व जिलाध्यक्ष अभिषेक शुक्ला अउ रायगढ़ के पूर्व विधायक विजय अग्रवाल शामिल हे।
भाजपा सेवा पखवाड़ा
भारतीय जनता पार्टी डहार ले प्रधानमंत्री नरेंद्र मोदी के जन्मदिवस के बेरा म छत्तीसगढ़ के संग देशभर म सेवा पखवाड़ा मनाये जात हे। इही कड़ी म भाजपा जिला इकाई डहार ले मुंगेली म स्वास्थ्य परीक्षण शिविर के आयोजन करे गीस। जेमा दू सौ मरीज मन अपन स्वास्थ्य परीक्षण कराइस अउ ओमन ल दवाई घलो दे गीस। कार्यक्रम म प्रदेश भाजपा अध्यक्ष अउ सांसद अरूण साव, विधायक पुन्नूलाल मोहले के संग आने आने जनप्रतिनिधि मौजूद रीहिन। ए बेरा म आज जिला भाजपा कार्यालय म रक्तदान शिविर के आयोजन घलो करे गीस।
कांग्रेस सम्मेलन
जांजगीर अउ जैजेपुर म कांग्रेस पार्टी के सम्मेलन आयोजित करे गीस। ए दउरान जैजेपुर म पार्टी कार्यकर्ता मन ह रैली निकालिन अउ कांग्रेस के प्रदेश प्रभारी पी.एल. पुनिया, प्रदेश अध्यक्ष मोहन मरकाम अउ नगरीय प्रशासन मंत्री शिव डहरिया के स्वागत करीन। ए मउका म पार्टी नेता मन ह कार्यकर्ता मनके आह्वान करीन कि ओमन अवइया विधानसभा चुनाव म जीत बर अभी ले तैयारी शुरू कर देवय।
उंहें जांजगीर म मीडिया ले बात करत श्री पुनिया ह कीहिन कि कार्यकर्ता मनले चर्चा करे जात हे यदि संगठन म कोनो प्रकार के कमी हवय त ओला दूर करे के प्रयास करे जात हे।
पीआईबी-वार्तालाप
केंद्र सरकार के जन कल्याणकारी योजना के प्रचार-प्रसार ल बढ़ावा देक उद्देश्य ले पत्रकार मन बर अंबिकापुर म मीडिया कार्यशाला वार्तालाप के आयोजन करे गीस।
पत्र सूचना कार्यालय रायपुर डहार ले आयोजित ए कार्यक्रम के मुख्य अतिथि केंद्रीय जनजातीय कार्य मंत्रालय के राज्य मंत्री रेणुका सिंह रीहिन। ए मउका म श्रीमती सिंह ह केंद्र सरकार के योजना अउ प्रधानमंत्री डहार ले देगे पांच संकल्प के बारे म पत्रकार मन ल जानकारी दीन। ओमन ह पत्रकार मनले आह्वान करीन कि ए योजना के प्रचार प्रसार म महत्वपूर्ण योगदान देवय, जेखर ले हितग्राही शासकीय योजना के लाभ ले सकय।
कार्यशाला म पत्र सूचना कार्यालय रायपुर के निदेशक कृपाशंकर यादव ह जिला, ग्रामीण अउ आदिवासी अंचल के पत्रकार मन ल केंद्र सरकार के आने-आने जन कल्याणकारी योजना ले मिलने वाला लाभ ले अवगत कराइन।
स्वच्छ अभियान
भारतीय रेलवे डहार ले स्वच्छ रेल-स्वच्छ भारत के तहत स्वच्छता पखवाड़ा के आयोजन करे जात हे। दू अक्टूबर तक चलइया ए पखवाड़ा के दउरान दक्षिण पूर्व मध्य रेलवे रायपुर मंडल के सबो स्टेशन अउ ट्रेन मन म आने-आने कार्यक्रम के आयोजन करे जात हे। ए दउरान प्रमुख रूप ले रेलवे स्टेशन परिसर यात्री प्रतिक्षालय अउ शौचालय के साफ सफाई करे जात हे।
जांजगीर चांपा जिला के शिवरीनारायण म स्वच्छ भारत मिशन इंडियन स्वच्छता लीग के तहत स्कूली विद्यार्थी आम लोगन मन ल स्वच्छता बर जागरूक करत हे। इही कड़ी म विद्यार्थी मनके संग जनप्रतिनिधि अउ शासकीय अधिकारी मन ह मेला ग्राउण्ड अउ चौपाटी के साफ-सफाई करीन।
लम्पी स्कीन रोग
राज्य म जानवर के लंपी स्किन रोग के अब तक कोनो भी मामला आगू नइ आय हे। दूसर राज्य मन म जानवर मन म ए बीमारी होय के बाद छत्तीसगढ़ म घलो पशु चिकित्सा विभाग पाछू एक महीना ले सतर्क हे अउ ओमन गांव म घूमके जानवर मनके लंपी रोग ले बचाव के उपाय जानवर के पालक मन ल बतावत हे। एखर संग सीमावर्ती राज्य ले लगे गांव मन म चेक पोस्ट लगाके निगरानी रखे जात हे। ए गांव मन म पशु मेला लगाये बर घलो रोक लगा दे गेहे।
राष्ट्रीय पोषण अभियान
दुर्ग जिला के कृषि विज्ञान केंद्र अंजोरा म राष्ट्रीय पोषण अउ वृक्षारोपण अभियान के संग ड्रोन डहार ले नैनो यूरिया छिड़काव प्रदर्शन कार्यक्रम के आयोजन करे गीस। कार्यक्रम के मुख्य अतिथि दाउ वासुदेव चंद्राकर कामधेनु विश्वविद्यालय के कुलपति डॅाक्टर एन.पी. दक्षिणकर रीहिन।
अपन संबोधन म ओमन ह कीहिन कि सुपोषित भारत अभियान पाछू पांच बछर ले आयोजित करे जात हे अउ परिवार के अच्छा पोषण बर साल भर सब्जी-भाजी अउ मौसमी फल खाना जरूरी हे। डॅाक्टर दक्षिणकर ह एखर उपलब्धता बर बाड़ी म पोषण वाटिका ल बढ़ावा देके जरूरत बताइन।
बैडमिंटन स्पर्धा
राजधानी रायपुर म आज ले मुख्यमंत्री ट्रॅाफी इंडिया इंटरनेशनल बैडमिंटन चैलेंज के शुरूआत होइस। ए स्पर्धा पच्चीस सितंबर तक चलही। अंतर्राष्ट्रीय स्तर के चैलेंज स्पर्धा म भारत के अलावा ग्यारा आने आने देश के बैडमिंटन खिलाड़ी भाग लीही। ए प्रतियोगिता म पुरूष अउ महिला वर्ग के पांच सौ ले जादा खिलाड़ी मन शामिल होही।
ए दउरान पुरूष एकल, पुरूष युगल, महिला एकल, महिला युगल अउ मिश्रित युगल मुकाबला खेले जाही। ए प्रतियोगिता म पुरस्कार राशि पंद्रह हजार अमेरिका डॅालर तय करे गेहे। स्पर्धा के आयोजन मोवा स्थित आई स्पोर्ट्स बैडमिंटन एरिना म करे जात हे।
आयोजक मंडल के अनुसार पहिली बार छत्तीसगढ़ म अंतराष्ट्रीय स्तर के बैडमिंटन स्पर्धा होवत हे।
सूरजपुर जिला के प्रतापपुर थाना क्षेत्र के खजूरी गांव म आकाशीय बिजली के चपेट म आय ले दू झन मनखे के मउत होगे। उंहे तीन आने लोगन मन घायल होगे।
उंहें मुंगेली जिला के लोरमी म खुड़िया चौकी तीर खेत के रखवाली करत युवक के आकाशीय बिजली गिरे ले मउत होगे।
ठगी गिरप्तार
राजधानी रायपुर म पोस्ट ऑफिस म रकम जमा कराय के नाव म करीब बीस करोड़ रूपिया के ठगी के मामला म सामिल फरार महिला आरोपी कोर्ट म आत्मसमर्पण कर देहे। मामला आगू आय के बाद ए महिला पाछू पंद्रह महीना ले फरार रीहिस।
जानबा के मुताबिक ए महिला अउ ओखर पति के संग एक आने आरोपी ह खुद ल पोस्ट ऑफिस के एजेंट बताके सौ ले जादा लोगन मनले रकम जमा करवाइस अउ उंहे फर्जी दस्तावेज दीन। सिकायत मिले के बाद रायपुर के सरस्वती नगर थाना म महिला के संग तीन लोगन मनके खिलाफ मामला दर्ज करके जांच सुरू करे गे रीहीस।