एसो किसान मन ल समर्थन कीमत म धान अउ मक्का बेचे बर एकीकृत किसान पोर्टल इकतीस अक्टूबर तक अपन पंजीयन कराय बर पड़ही। किसान पोर्टल म पंजीयन करइया किसान मनले ही समर्थन मूल्य म धान अउ मक्का बिसाय जाही।
खाद्य अउ नागरिक आपूर्ति विभाग के अधिकारी मन ह बताइन हे कि पाछू बछर समर्थन मूल्य म धान बेचइया किसान मन ल फेर ले पंजीयन के जरूरत नइ हे। उंहें चालू खरीफ मौसम म पहिली घांव समर्थन मूल्य म धान अउ मक्का बेचइया किसान मन बर किसान पोर्टल म पंजीयन कराय के काम सुरू हवय।
नवा पंजीयन के संगेसंग किसान मन ल अपन पंजीकृत फसल या फसल के रकबा म संसोधन के काम पूरा कराये बर इकतीस अक्टूबर तक के बेरा दे गेहे।
स्वच्छता ही सेवा अभियान
स्वच्छता कोति लोगन ल जागरूक करे बर प्रदेस म स्वच्छता ही सेवा अभियान आज ले शुरू होगे हे। पंचायत अउ ग्रामीण विकास मंत्री रविंद्र चौबे ह आज ये अभियान के शुभारंभ करीन। ये मउका म श्री चौबे ह जन जागरूकता बर तियार करे गे स्वच्छता रथ ल हरियर झंडी दिखाके रवाना करीन।
ये स्वच्छता रथ आज ले अवइया दू अक्टूबर तक प्रदेस के आने-आने जगा म घूमही अउ लोगन ल स्वच्छता बर जागरूक करही। ये रथ गांव-गंवई म हाट, बजार अउ आने सार्वजनिक जगा म घूमही, जिहां एके जगा म जादा ले जादा लोगन ल स्वच्छता के संबंध म जरूरी जानकारी दे जा सकय।
खबर के मुताबिक देशभर म स्वच्छता ल लेके लेगन ल जागरूक करे बर ये अभियान हर बछर पंद्रह सितंबर ले दू अक्टूबर तक चलाये जात हे। ये दउरान गांव गंवई के क्षेत्र म विशेष रूप ले साफ सफई म ध्यान दे जाही। सार्वजनिक जगा म जमा होय कूड़ा कचरा ल श्रमदान ले साफ करे जाही। उंहे अपशिष्ट जल के निपटारा बर सोकपिट बनाये जाही अउ ठोस कचरा बर कम्पोस्ट पिट बनही। अभियान म घर ले निकलइया प्लास्टिक अउ आने ठोस कचरा ल इकट्ठा करके सामूहिक श्रमदान करे जाही।
ये अभियान म ग्रामीण क्षेत्र म जरूरत के मुताबिक सामुदायिक अउ निजी शौचालय बनही, उंहें बायोगैस संयत्र के स्थापना घलो करे जात हे। ये अभियान म अभी तक प्रदेश के करीबन बंयालिस सौ गांव ल ओडीएफ माने खुला म शौच मुक्त गांव घोषित करे गेहे। स्वच्छ भारत मिशन ग्रामीण म ये बछर प्रदेस म आठ हजार गांव ल ओडीएफ बनाय के लक्ष्य राखे गेहे।
राज्यपाल आभार
छत्तीसगढ़ के राज्यपाल अनुसुइया उइके ह प्रदेस के बारा समुदाय ल अनुसूचित जनजाति के सूची म सामिल करे के फैसला बर प्रधानमंत्री नरेंद्र मोदी अउ केंद्रीय जनजाति कार्यमंत्री अर्जुन मुण्डा ल धन्यवाद दीन हे।
जइसन कि खबर दे जा चुके हे कि काली केंद्रीय मंत्रिमंडल ह अपन एक फैसला म प्रदेस के बारा ठिन जाति ल अनुसूचित जनजाति म सामिल करे के मंजूरी देहे। ए संबंध म प्रदेस के आने-आने जनजाति संगठन ह राज्यपाल ले मिलके ये जानकारी दे रीहिन कि सिरिफ मात्रा संबंधी गलती के सेती ये जाति समुदाय मन ल अनुसूचित जनजाति के दर्जा नइ मिल पात हे।
ये मामला ल देखत राज्यपाल ह पाछू बछर ग्यारा नवंबर के नइ दिल्ली म राखे गे राज्यपाल के सम्मेलन म बारा जाति के संबंध म मात्रा म गलती के मुद्दा प्रमुखता के संग उठाये गे रीहिस। राज्यपाल अनुसूइया उइके ह राष्ट्रपति द्रौपदी मुर्मू अउ प्रधानमंत्री ले होय भेंट म ए विसय म कार्रवाई करे के आग्रह करे रीहिन। राज्यपाल ह कीहिन कि केंद्रीय मंत्रिमंडल के ये फैसला ले राज्य के बारा ठिन जाति समुदाय ल अनुसूचित जनजाति ले जुड़े कतकोन योजना के फायदा मिल सकही।
नेता प्रतिपक्ष पत्रकार वार्ता
छत्तीसगढ़ विधानसभा म नेता प्रतिपक्ष नारायण चंदेल ह आरोप लगाइन हे कि प्रदेश म रोजगार के कमी के सेती आत्महत्या के मामला बाढ़त हे। आज जांजगीर म पत्रकार मनले गोठबात करत श्री चंदेल ह आरोप लगाइन कि छत्तीसगढ़ म आत्महत्या करइया किसान अउ बेरोजगार मनके घर के लोगन मन ल आर्थिक मदद बर राज्य सरकार पइसा नइ देवत हे, फेर पाछू बछर उत्तरप्रदेश म किसान आंदोलन के बेरा जान गंवइया एक किसान के परिवार वाले मन ल प्रदेश के मुख्यमंत्री ह पचास लाख रूपिया के सहायता राशि देवाय रीहिस।
श्री चंदेल ह यहू आरोप लगाइन कि प्रदेश म आने-आने राज्य के अपराधिक तत्व गैर कानूनी काम करत हे। उंहे राज्य सरकार कोयला माफिया अउ रेत माफिया जइसन कानून तोड़इया मनके खिलाफ कार्रवाई करे म नाकाम साबित होवत हे। ओमन जमीन के अवैध खरीदी-बिक्री करइया मन ल घलो राज्य सरकार कोति ले संरक्षण देके आरोप लगाइन।
हाइकोर्ट कलेक्टर नोटिस
छत्तीसगढ़ उच्च न्यायालय ह सामाजिक-आर्थिक बहिष्कार के मामला म छै जिला के कलेक्टर ल नोटिस जारी करे हे। ये नोटिस रायपुर के संगेसंग जांजगीर-चांपा, कांकेर, बलौदा-बाजार, रायगढ़, अउ धमतरी जिला के कलेक्टर ल दे गेहे। उंहे राज्य विधिक सेवा के सचिव, गृह सचिव, पुलिस महानिदेशक अउ संबंधित जिला के पुलिस अधीक्षक ल नोटिस जारी करके अदालत ह छै हप्ता के भीतरी जवाब देबर केहे हे।
खबर के मुताबिक प्रदेश म काम करइया एक सामाजिक संस्था ह हाइकोर्ट म जनहित याचिका दायर करे हे। याचिकाकर्ता कोति ले केहे गेहे कि प्रदेश के आने-आने थाना म सामाजिक प्रताड़ना अउ बहिष्कार के मामला दरज होवत हे। फेर पुलिस अउ प्रशासन के संगेसंग राज्य सरकार कोति ले ए संबंध म कार्रवाई नइ करे जात हे।
याचिका म यहू केहे गेहे कि छत्तीसगढ़ म सामाजिक बहिष्कार प्रतिशेध कानून लागू नइ हे। एखर सेती कुछएक समुदाय कोति ले सामाजिक बहिष्कार के फैसला आगू आय हे। याचिकाकर्ता ह अदालत ले मांग करे हे कि अइसन मामला म जरूरी कार्रवाई करके राज्य सरकार अउ प्रशासन ल निर्देशित करे जाय।
सिविल सर्विस परीक्षा
संघ लोक सेवा आयोग कोति ले राखे गे एसो के सिविल सर्विस मुख्य परीक्षा काली सोला सितंबर ले शुरू होवत हे। ये परीक्षा सतरा, अठारा, चौबीस, अउ पच्चीस सितंबर के ले जाही। एमा पहिली पाली के परीक्षा बीहनिया नौ बजे ले बारा बजे तक होही। उंहे, दूसर पाली म परीक्षा के बेरा मंझनियां दू बजे ले पांच बजे तक रीही। ये परीक्षा म प्रदेश भर ले पांच सौ छिहत्तर परीक्षार्थी सामिल होही।
उंहे कर्मचारी चयन आयोग कोति ले संयुक्त हायर सेकण्डरी, बारहवीं स्तरीय परीक्षा अठारा सितंबर के ले जाही। सामान्य अभ्यर्थी मन बर परीक्षा के बेरा बीहनिया ग्यारा ले बारा बजे तक रीही। उंहे दृष्टिबाधित मन बर बीहनिया ग्यारा बजे ले मंझनियां बारा बजके बीस मिनट तक तय करे गेहे।
इही बीच छत्तीसगढ़ माध्यमिक शिक्षा मंडल कोति ले प्रारंभिक शिक्षा म डिप्लोमा पाठ्यक्रम के पहिली अउ दूसर बछर के मुख्य परीक्षा के पुनर्गणना अउ पुनर्मूल्यांकन नतीजा घोषित कर दे गेहे। ये परिणाम मंडल के वेबसाईट म देखे जा सकथे।
एम्स विशेष क्लिनिक
रायपुर के अखिल भारतीय आयुर्विज्ञान संस्थान – एम्स म फेफड़ा के जटिल रोग के संगेसंग अनिद्रा संबंधी बीमारी के इलाज बर विशेष क्लिनिक शुरू करे गेहे। ये नवा क्लिनिक म मरीज के इलाज करे बर विशेष डॅाक्टर मनके सेवा देवाय जाही। उंहे ए संबंध म एम्स के निदेशक प्रोफेसर डॅाक्टर नीतिन एम. नागरकर ह बताइन कि फेफड़ा अउ अनिद्रा संबंधी रोगी मनके बाढ़त संख्या ल देखत इंखर इलाज बर एक अलग क्लिनिक सुरू करे के फैसला करे गीस हे। ये क्लिनिक हरएक बुधवार के मंझनियां ढाई बजे ले शुरू होही।
इही बीच रायपुर एम्स के निदेशक डॅाक्टर नागरकर समेत आने विशेषज्ञ डॅाक्टर मन ह काली राजनांदगांव म राखे गे निशुल्क स्वास्थ्य परीक्षण शिविर म करीबन सात सौ लोगन के जांच करीन। एक स्थानीय सामाजिक संस्था कोति ले राखे गे स्वास्थ्य शिविर म प्रदेश के पूर्व मुख्यमंत्री डॅाक्टर रमनसिंह अउ क्षेत्रीय सांसद संतोष पांडेय समेत आने जन प्रतिनिधि मौजूद रीहिन।
अउ अब थोरकुन समाचार सार म –
– मुख्यमंत्री भूपेश बघेल ह भेंट मुलाकात कार्यक्रम म आज रायगढ़ जिला के धरमजयगढ़ विधानसभा म करीबन पांच सौ सत्तर करोड़ रूपिया के आने आने विकास काम के शिलान्यास अउ लोकार्पण करीन। ये बेरा म ओमन जिला म चलत कल्याणकारी अउ विकास योजना के जानकारी लेवत अधिकारी मन संग समीक्षा बइठका लीन।
अउ
– केंद्रीय स्वास्थ्य मंत्रालय कोति ले स्वास्थ्य सेवा के गुणवत्ता परीक्षण बर प्रदेश के दू उप स्वास्थ्य केंद्र के मूल्यांकन करे गेहे। ये मूल्यांकन के आधार म मंत्रालय कोति ले तय मानक ल पूरा करइया स्वास्थ्य केंद्र ल परमाण पत्र जारी करे जात हे।