केंद्रीय मंत्रिमंडल ह छत्तीसगढ़, के बारा ठिन जाति समुदाय ल अनुसूचित जनजाति के सूची म सामिल करे के मंजूरी दे देहे। राज्य के जउन बारा जाति समुदाय ल अनुसूचित जनजाति म सामिल करे के मंजूरी दे गेहे। ओखर मुताबिक भारिया, भूमिया के पर्याय के रूप म भूईंया, भूईयां, भूयां नाव मे अंग्रेजी संस्करण ल बिन बदलाव करे भरिया के रूप म भारिया के सुधार करे गेहे। उंहे पांडो के संग पंडो, पण्डो, पन्डो अउ धनवार के पर्याय के रूप म धनुहार, धनुवार, गदबा, गोंड के संग गोंड़, कौंध के संग कोंद, कोडाकू के संग कोड़ाकू अउ नगेसिया, नागासिया के पर्याय के रूप म किसान धनगढ़ के परिसोधन धांगड़ के रूप म करे गेहे।
केंद्रीय जनजातिय मामला के मंत्री अर्जुन मुण्डा ह नई दिल्ली म संवाददाता मनले गोठबात म कीहिन कि ये जाति के लोगन मांग करत रीहिन, जउन ल अब पूरा करे गेहे। ओमन कीहिन कि ये फैसला ले, ये जाति के लोगन ल वो सब्बो फायदा मिलही जउन अनुसूचित जनजाति ल मिलत हे।
खबर के मुताबिक मुख्यमंत्री भूपेश बघेल ह प्रधानमंत्री नरेंद्र मोदी ल चिट्ठी लिखके राज्य के कुछएक जाति मन ल अनुसूचित जनजाति म सामिल करे के आग्रह करे रीहिन। एखर संगेसंग मुख्यमंत्री ह प्रधानमंत्री ल अनुसूचित जनजाति के सूची म मात्रा या वर्तनी के गलती के निराकरण बर घलो प्रस्ताव भेजे हे।
पोषण माह कार्यक्रम
राष्ट्रीय पोषण माह विसय म बिलासपुर के मस्तूरी म एक दिवसीय समेकित लोक संपर्क कार्यक्रम राखे गीस। ये कार्यक्रम भारत सरकार के सूचना अउ प्रसारण मंत्रालय, केंद्रीय संचार ब्यूरो, क्षेत्रीय कार्यालय बिलासपुर, अउ महिला बाल विकास विभाग के संग आने संस्थान के मदद ले आयोजित करे गीस। कार्यक्रम के शुभारंभ बिलासपुर लोक सभा क्षेत्र के सांसद अरूण साव ह करीन। ये बेरा म ओमन लोगन ल सुपोषण के शपथ देवइन। सांसद ह कीहिन कि भारत सरकार सबो झन ल सुपोषित करे बर काम करत हे।
इही म केंद्र सरकार कोति ले लइका बर मां के गरभ ले लेके अवइया एक हजार दिन तक उचित पोषण आहार के व्यवस्था करे गेहे। श्री साव ह कीहिन कि कुपोषण ल जागरूकता ले ही खतम करना संभव हे। देश के विकास म सबो के योगदान होवय । एखर बर जरूरी हे, कि लोगन पोषण के महत्व ल समझय । कार्यक्रम के अगवई करत मस्तूरी विधायक डॅाक्टर कृष्णमूर्ति बांधी ह अपन चिकित्सकीय अनुभव ले पोषण के महत्व ल बताइन । ओमन कीहिन कि छत्तीसगढ़ म किसम-किसम के भाझी मिलथे, जउन पोषक तत्व ले भरे हे। वोमन कोन भाजी म कइसन पोषक तत्व हवय एखर जानकारी दीन। समेकित लोक संपर्क कार्यक्रम म सुपोषण संबंधी रंगोली, पेंटिंग, निबंध, छत्तीसगढ़ केंद्रित पोषण थाली प्रतियोगिता के विजेता मन ल इनाम दीन।
कार्यक्रम म केंद्रीय संचार ब्यूरो बिलासपुर के क्षेत्रीय अधिकारी डॅाक्टर प्रेमकुमार माजूद रीहिन।
भेंट-मुलाकात
मुख्यमंत्री भूपेश बघेल ह कीहिन हे कि देवारी तिहार के पहिली राजीव गांधी न्याय योजना के तीसर किस्त हितग्राही मनके खाता म जमा करा दे जाही। ये घोषणा मुख्यमंत्री ह आज भेंट -मुलाकात कार्यक्रम के दूसर चरण म रायगढ़ जिला के खरसिया विधानसभा क्षेत्र के छाल म एक ठिन कार्यक्रम म बोलत कीहिन । ये मउका म मुख्यमंत्री ह कीहिन कि खरसिया अउ छाल के बीच माड़ नदी म पूल बनाय क काम जल्दी पूरा कर ले जाही।
उंहें खरसिया ले छाल, छाल ले धरमजयगढ़ अउ छाल ले घरघोड़ा के बीच जल्दीच रद्दा बनाये के काम करे जाही। ओमन कापू उप तहसील ल तहसील के दर्जा देके संगेसंग क्षेत्र के विकास ल लेके कतकोन घोषणा करीन। मुख्यमंत्री ह लोगन ल भरोसा देवइन कि बरसा के मौसम सिराते रायगढ़ जिला के रद्दा म सुधार करे जाही।
ये मउका म मुख्यमंत्री ह दू सौ पांच करोड़ चौदा लाख रूपिया के लागत ले तेरा ठिन आने-आने विकास काम के लोकार्पण अउ शिलान्यास करीन। खरसिया दउरा के बेरा मुख्यमंत्री ह सिविल अस्पताल म ब्लड बैंक के उद्घाटन करीन। बताये जात हे कि राज्य के ये पहिली सिविल अस्पताल हरय, जिहां ब्लड बैंक के स्थापना करे गेहे।
उंहे घरघोड़ा म भेंट-मुलाकात के बेरा मुख्यमंत्री ह उंहा जिला सहकारी केंद्रीय बैंक के स्थापना अउ सामुदायिक स्वास्थ्य केंद्र के बढ़वार के संगेसंग कई ठन आने घोषणा करीन।
बिजली बिल भाजपा
भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह राज्य म बिजली बिल के दर म होवत बढ़वार ल लेके राज्य सरकार के नीति के आलोचना करीन हे। ओमन हाफ बिजली बिल वाले योजना ल कांग्रेस के चुनावी वायदा बताइन । ओमन कीहिन कि राज्य म महंगी बिजली दे जात हे। बछर भर म चार घांव बिजली के दर बढ़ाय गेहे। पूर्व मुख्यमंत्री ह बिजली के पूर्ति ल लेके घलो राज्य सरकार ल घेरीन।
उंहें एक आने सवाल के जवाब म डॅाक्टर सिंह भाजपा संगठन म प्रदेश अउ जिला स्तर म होय बदलाव ल बने बताइन। ओमन कीहिन कि झूठा वादा करइया राज्य के कांग्रेस सरकार के खिलाफ लड़ई बर भाजपा के नवा संगठन तियार हवय।
राष्ट्रीय महिला आयोग दौरा
राष्ट्रीय महिला आयोग के अध्यक्ष रेखा शर्मा आज रायपुर के छत्तीसगढ़ राज्य महिला आयोग के कार्यालय पहुंचीन अउ आयोग के काम के जानकारी लीन। श्रीमती शर्मा ह सेरीखेड़ी ग्राम पंचायत के कल्पतरू मल्टी यूटिलिटी सेंटर पहुंच के महिला स्व सहायता समूह कोति ले चलाये जात आने-आने आर्थिक गतिविधि ल देखीन, जिहां माइलोगिन मन सेनिटाइजर, फिनाइल, अगरबत्ती, बिस्कुट, साबुन बनाके आर्थिक रूप ले मजबूत बनत हे।
छत्तीसगढ़ राज्य महिला आयोग के अध्यक्ष डॅाक्टर किरणमयी नायक ह राष्ट्रीय महिला आयोग के अध्यक्ष के राजकीय गमछा अउ प्रतीक चिन्ह देके सम्मान करीन।
हिंदी दिवस
आज हिंदी दिवस हरय। बछर उन्नीस सौ उनचास म आजे के दिन संविधान सभा ह देवनागरी लिपि म हिंदी ल राष्ट्र के राजभाषा के रूप म मंजूर करे रीहिस। हिंदी विश्वभर म बोलइया भाषा म एक हे। प्रधानमंत्री नरेंद्र मोदी अउ सूचना प्रसारण मंत्री अनुराग सिंह ठाकुर ह हिंदी दिवस म लोगन ल बधाई दीन हे। प्रधानमंत्री ह एक ट्वीट म ओमन ल बधाई दीन जउन मन हिंदी ल समृद्ध अउ सशक्त बनाये बर अपन योगदान दीन।
ओमन कीहिन कि हिंदी ह विश्व म भारत ल विशेष सम्मान देहे। उंहें केंद्रीय गृहमंत्री अमित शाह ह कीहिन कि हिंदी अउ स्थानीय भाषा देश के संस्कृति के पहिचान हे। एति छत्तीसगढ़ के राज्यपाल अनुसुइया उइके अउ मुख्यमंत्री भूपेश बघेल ह प्रदेशवासी मन ल हिंदी दिवस के बधाई अउ शुभकामना दीन हे।
शिक्षक-प्रशिक्षण
प्रदेश के जम्मों जिला के स्कूल म नवा नियुक्त शिक्षक मन बर प्रशिक्षण कार्यक्रम शुरू करे गेहे। राज्य शैक्षिक अनुसंधान अउ प्रशिक्षक परिषद रायपुर कोति ले करीबन चार हजार शिक्षक मन बर सात चरण म प्रशिक्षण कार्यक्रम तियार करे गेहे।
शिक्षा के गुणवत्ता बनाये राखे बर शिक्षक मन ल ये प्रशिक्षण दे जावत हे। पहिली पारी के प्रशिक्षण कार्यक्रम के शुरूआत एस.सी.आई.आर.टी. के डायरेक्टर राजेश सिंह राणा ह करीन। ये बेरा म श्री राणा ह शिक्षक मनले आह्वान करीन । ओमन लइका मनके सर्वांगीण विकास बर प्रयास करे बर पड़ही।
बारिश
सरलग होवत बरसा के सेती गोदावरी नदी ले पानी छोड़े जाय ले सुकमा जिला के कोंटा सीमा ले लगे पड़ोसी राज्य आंध्रप्रदेश के वीरापुरम म एक घांव फिर राष्ट्रीय राज क्रमांक तीस म पानी भरा गेहे। काली संझा ए रद्दा म करीबन एक फीट उपर पानी बोहात रीहिस। गोदावरी नंदिया के जलस्तर बावन फीट के करीब पहुंच गेहे।
बताये जात हे कि कहूं जल स्तर अउ बाढ़ही त छत्तीसगढ़ के संपर्क आंध्रप्रदेश अउ तेलंगाना राज्य ले टूट जाही। एसो बरसा के सेती ए रद्दा म चौथइया घांव यातायात बाधित होवत हे। उंहे राजनांदगांव जिला म घलो शिवनाथ नदिया उफान म हे। मोंगरा, घुमरिया, अउ सूखा नाला बैराज ले सरलग पानी छोड़े जाय के सेती कतकोन जगा बाढ़ के स्थिति बन गेहे ।
नदिया म पानी के बहाव तेज होय के सेती डोंगरगांव के दर्री-मटिया एनीकट न नकसान होय हे। जेखर ले नदिया के बहाव के दिशा बदल गेहे अउ तीर तखार के खेत म पानी भर गेहे। फसल ल नकसान होय ले उंहा के किसान संसो म हे अउ प्रदर्शन घलो करीन हे। जिला प्रशासन अउ सिंचाई विभाग के बड़का अधिकारी मन मउका म पहुंच के किसान मन ल मुआवजा मिले के बात कीहिन। तब कहूं जाके किसान बात मानीन।