शिशु संरक्षण माह
प्रदेश म शिशु संरक्षण माह आज ले शुरू होगे हवय। चौदा अक्टूबर तक चलइया ये माह के दउरान नौ महीना ले पांच बछर तक के लइका मन ल विटामिन ए के खुराक दे जाही। ए दउरान छै महीना ले पांच बछर तक के लइका मन ल आई.एफ.ए. सिरप घलो पिलाये जाही।
शिशु संरक्षण माह के दउरान प्रदेश भर के छब्बीस लाख चौवांलिस हजार लईका मन ल विटामिन ए के खुराक दे जाय के लक्ष्य राखे गे हवय।
शिशु अउ बाल स्वास्थ्य कार्यक्रम के उप संचालक डॅाक्टर वी.आर. भगत ह बताइन कि राज्य म सुपोषण सुनिश्चित करे बर महिला अउ बाल विकास विभाग डहार ले आने-आने कार्यक्रम के माध्यम ले पौष्टिक आहार अउ गरम भोजन दे जाय के प्रावधान हे। शिशु संरक्षण माह के दउरान विटामिन ए अउ आई.एफ.ए सिरप पिलाये के संग लईका मनके वजन घलो ले जाही। एखर अलावा अति गंभीर कुपोषित वाले लईका मन के चिनके पोषण पुनर्वास केंद्र म इलाज बर भर्ती करे जाही।
मांडविया बैठक
केंद्रीय स्वास्थ्य मंत्री डॅाक्टर मनसुख मांडविया के अगवई म काली सबो राज्य अउ केंद्रशासित प्रदेश के स्वास्थ्य मंत्री मनके वर्चुअल बइठका होइस । जेमा छत्तीसगढ़ के स्वास्थ्य मंत्री टी.एस. सिंहदेव ह टीबी मुक्त भारत अभियान अउ रक्तदान, अमृत महोत्सव के बारे म जानकारी दीन।
ओमन बताइन कि अवइया सतरा सितंबर ले एक अक्टूबर तक देश म ये दूनो अभियान चलाये जाही। ओमन ह गैर सरकारी संगठन अउ जन समुदाय ल ये अभियान ले जोड़के जन भागीदारी बढ़ाय के आग्रह करीन। बइठका म डॅाक्टर मांडविया ह घलो मीडिया के माध्यम ले लोगन ल ए बारे म जागरूक करे बर कीहिन। ओमन बताइन कि बछर दू हजार पच्चीस तक भारत ले टीबी ल खतम करे के लक्ष्य राखे गे हवय। केंद्रीय मंत्री ह आयुष्मान भारत योजना म जादा ले जादा लोगन ल कार्ड बनाये बर जोर दीन, जेखर ले लोगन ल योजना के माध्यम ले स्वास्थ्य सुविधा मिल सकय।
मोहन भागवत चंदखुरी
राष्ट्रीय स्वयं सेवक संघ के सर संघचालक डॅाक्टर मोहन भागवत आज राजधानी रायपुर के चंदखुरी के माता कौशल्या मंदिर दर्शन बर पहुंचीन। ए मउका म संघ के प्रांत संघचालक डॅाक्टर पूर्णेन्दु सक्सेना अउ महानगर संघचालक महेश बिड़ला मौजूद रीहिन।
मन की बात
प्रधानमंत्री नरेंद्र मोदी ह अवइया पच्चीस सितंबर के आकाशवाणी ले प्रसारित होवइया मन की बात कार्यक्रम बर लोगन मनले विचार अउ सुझाव साझा करे के आग्रह करे हे। ये मासिक रेडियो कार्यक्रम के तिरानवां कड़ी होही ।
सुनइया मन नमो ऐप या माईजीओवी ओपन फोरम म अपन विचार साझा कर सकत हे, संगे टोल फ्री नंबर 1 8 0 0-1 1-7 8 0 0 म घलो डायल कर अपन संदेस हिंदी या अंग्रेजी म रिकॉर्ड करा सकत हे । फोन लाइन तेईस सितंबर तक खुला रइही। लोगन मन 1 9 2 2 म मिस्ड कॉल घलो दे सकत हे अउ एसएमएस लिंक मिले म सोझे प्रधानमंत्री ल अपन सुझाव दे सकत हे।
ट्रेन रद्द
रायपुर रेल मंडल के लखौली-आरवी ब्लॉक हट रेलखंड के बीच दोहरीकरण के काम करे गे रीहिस, जिहां रैके के अभाव के सेती कोनो-कोनो गाड़ी के अवई जवई ल रद्द करे गेहे। एमा टिटलागढ़ ले चलइया टिटलागढ़-रायपुर स्पेशल आज ले सोला सितंबर तक अउ रायपुर-टिटलागढ़ स्पेशल चौदा ले सतरा सितंबर तक रद्द रीही।
उंहें बिलासपुर ले चलइया टिटलागढ़-बिलासपुर स्पेशल सतरा सितंबर के नइ चलही। एखर अलावा पेयरिंग रैक के देरी ले चले के सेती आज बिलासपुर ले चलइया बिलासपुर-इतवारी इंटरसिटी एक्सप्रेस ल रद्द करे गेहे । उंहे इतवारी ले चलइया इतवारी-बिलासपुर शिवनाथ एक्सप्रेस घलो आज रद्द रीही।
भेंट-मुलाकात 01
भेंट-मुलाकात कार्यक्रम म मुख्यमंत्री भूपेश बघेल काली ले रायगढ़ जिला के आने-आने विधानसभा क्षेत्र मनक दउरा करत हे। ए दउरान ओमन ह लोगन ले भेंट करके उंखर समस्या ल जाने के प्रयास करत हे। संगेसंग कतकोन विकास काम के घोषणा घलो करत हे। मुख्यमंत्री ह आज लैलूंगा विधानसभा म तीन सौ तिहत्तर करोड़ रूपिया ले जादा के विकास काम के लोकार्पण अउ शिलान्यास करीन।
उंहें मुख्यमंत्री ह तमनार गांव ल उरबा होवत लैलूंगा तक अठारा किलोमीटर सड़क बनाये के अउ हमीरपुर ले बंजारी अड़बहाल तक उन्नीस किलोमीटर सड़क बनाये के घोषणा करीन। संगेसंग ओमन ह तमनार म नवीन ग्रामीण जिला सहकारी केंद्रीय बैंक के शाखा खोले के, उपकोषालय बनाय के, शासकीय कला विज्ञान अउ वाणिज्य महाविद्यालय म स्नातकोत्तर के कक्षा शुरू कराय के घोषणा करीन।
उंहे श्री बघेल ह सराइपाली गांव म उप तहसील कार्यालय खोले के, ग्राम धौराभाठा म प्राथमिक स्वास्थ्य केंद्र बर नवा भवन बनाय के अउ लैलूंगा के शासकीय कन्या प्राथमिक शाला के नाव सेठ जयदयाल सिंघानिया के नाव म करे के एलान करीन। एखर अलावा मुख्यमंत्री ह ग्राम कुंजेमुरा म शासकीय उच्चतर माध्यमिक विद्यालय म स्वामी आत्मानंद हिंदी माध्यम स्कूल शुरू करे के घलो बात कीहिन । उंहें मुख्यमंत्री ह खरसिया विधानसभा के चपलेगांव म देवारी तिहार के मउका म किसान मन ल राजीव गांधी किसान न्याय योजना म तीसरा किस्त दे जाय के घलो घोषणा करीन।
भेंट-मुलाकात 02
एखर पहिली मुख्यमंत्री ह लैलूंगा म अधिकारी मनके समीक्षा बइठका लीन। बइठका म ओमन ह अधिकारी मन ल कार्यालय म बेरा म आके बने ढंग ले शासन के योजना बर लोगन ल लाभान्वित करे के निर्देश दीन। मुख्यमंत्री ह बइठका म आम लोगन ले मिल शिकायत के आधार म एसडीएम, तहसीलदार, अउ सीएमओ ले जवाब तलब करीन।
भेंट मुलाकात कार्यक्रम म मुख्यमंत्री पंद्रह सितंबर तक रायगढ़ जिला के दउरा म रीही।
कराते चैंपियनशिप
बर्मिघंम म चलत इंग्लैंड कॉमनवेल्थ कराते चैंपियनशिप म छत्तीसगढ़ के राजनांदगांव जिला के मोनिका पाढ़ी ह रजत पदक पाय हे। जिला कराते संघ के सचिव अउ कोच मुरली सिंह भारद्वाज ह बताइन कि ए चैंपियनशिप म बीस ठन देश के पांच सौ कराते खिलाड़ी मन ह भाग ले रीहिन। छत्तीसगढ़ ले सिरिफ मोनिका पाढ़ी ल एमा भाग लेके मउका मिलिस।
अउ अब पेस हे मौसम के हाल –
अवइया चौबीस घंटा के दउरान प्रदेश म कोनो-कोनो जगा म हल्का ले मध्यम बरसा होय अउ गरज चमक के संग छींटा पड़े के संभावना हे।
मौसम विभाग के अनुसार उत्तर पश्चिम अरब सागर ले उत्तर-बांग्लादेश होवत उत्तर-छत्तीसगढ़ होवत एक ठन द्रोणिका बने हे। उंहे निम्न दाब के क्षेत्र मध्यप्रदेश के मध्य भाग म हवय। एखरे संग उपरी हवा के चक्रीय चक्रवाती घेरा घलो बने हे । एखर असर ले काली उत्तर छत्तीसगढ़ म एक दू जगा म भारी बरसा होय अउ आकासीय बिजली गिरे के संभावना हे।
इही बीच राजनांदगांव जिला म बरसा कम होय के सेती तलाब मन म पानी कमती होगे हे, जेला देखत प्रशासन ह तीनो प्रमुख जलाशय मोंगरा, घुमरिया अउ सूखा नाला ले छोड़े जावत पानी के मात्रा ल कमती कर देहे।
अउ अब थोरकुन समाचार सार म –
– अंतर्राष्ट्रीय ओजोन परत संरक्षण दिवस के मउका म छत्तीसगढ़ पर्यावरण संरक्षण मंडल डहार ले सोला सितंबर के स्कूल अउ कॉलेज म ओजोन परत सुरक्षा बर जागरूकता लाये बर भाषण अउ पोस्टर प्रतियोगिता कराये जाही।
– छत्तीसगढ़ शिक्षक पात्रता परीक्षा-टेट दू हजार बाईस बर एडमिट कार्ड जारी कर दे गेहे। अभ्यर्थी तीन ठिन लिंक के माध्यम ले अपन एडमिशन कार्ड ल डाउनलोड कर सकत हे।
– गरियाबंद जिला कलेक्टर ह राजिम तहसील म पदस्थ पटवारी पितउराम नाग के सेवा समाप्त कर देहे। पटवारी उपर आरोप हे कि ओ हा पाछू आठ बछर ले ड्यूटी ले नदारद रीहिस।
– प्रदेस म राष्ट्रीय कृमि मुक्ति दिवस म कृमि के दवई खाये ले छूटे लइका अउ किशोर मन ल काली चौदा सितंबर के मॉपअप राउंड के बेरा दवई खिलाये जाही। ये कृमिनाशक दवई स्कूल अउ आंगनबाड़ी मन म एक ले उन्नीस बछर के जम्मों लइका मन ल दे जाही।
– सुकमा जिला म आठ लाख रूपिया के एक झन इनामी माओवादी ह आज अतिरिक्त पुलिस अधीक्षक नक्सल ऑपरेशन किरण चौहान अउ सीआरपीएफ के अधिकारी मनके आगू आत्मसमर्पण करीस।