प्रधानमंत्री ह किहीन की उंखर सरकार हा विज्ञान आधारित विकास के दिशा म काम करत हे अउ बछर दु हजार चौदह ले विज्ञान अउ प्रौद्योगिकी के क्षेत्र म निवेस म बढ़वार होय हे। श्री मोदी ह कीहिन कि आज के नवा भारत जय जवान, जय किसान, जय विज्ञान अउ जय अनुसंधान के संग आगू बाढ़त हे।
आरएसएस बैठक
राष्ट्रीय स्वयंसेवक संघ क अखिल भारतीय समन्वय बइठका आज ले राजधानी रायपुर म शुरू होगे हे। श्री जैनम मानस भवन म आयोजित तीन दिन के बइठका के शुभारंभ सर संघचालक डॅाक्टर मोहन भागवत अउ सर कार्यवाह दत्तात्रेय होसबाले ह करीन। बइठका म राष्ट्रीय स्वयं सेवकसंघ ले प्रेरित छत्तीस ठिन संगठन के प्रमुख पदाधिकारी मन भाग लेवत हे।
बइठका म वर्तमान राष्ट्रीय अउ सामाजिक परिदृश्य, शिक्षा, सेवा, आर्थिक मुद्दा अउ राष्ट्रीय सुरक्षा ले जुड़े मुद्दा मन उपर गोठबात करे जात हे। एखरे संग गौ-सेवा, ग्राम विकास, पर्यावरण, कुटुम्ब प्रबोधन, सामाजिक समरसता जइसन विसय ल आगू बढ़ाय उपर घलो विचार-विमर्श करे जाही।
बइठका म संघ के सह सरकार्यवाह डॅाक्टर कृष्ण गोपाल, डॅाक्टर मनमाहन वैद्य, अरूण कुमार, मुकुंदा अउ रामदत्त चक्रधर समेत आने-आने पदाधिकारी मन सामिल होवत हे।
गौवंश मोबाइल चिकित्सा
प्रदेस म गौवंश ल सुघ्घर चिकित्सा देवाय के उद्देश्य ले मुख्यमंत्री गौवंश मोबाइल चिकित्सा योजना के शुरूआत करे जाही। पहिली चरण म हरएक जिला म एक या दू ठिन चिकित्सा वाहन ले ये योजना शुरू करे जाही। चरणबद्ध कार्यक्रम के तहत ए योजना उपर काम करे जाही।
बतादन कि प्रदेश के लोगन मन ल सुघ्घर स्वास्थ्य सुविधा देवाय बर विकासखंड ले लेके जिल मुख्यालय तक सर्व सुविधायुक्त अस्पताल के संगेसंग मुख्यमंत्री स्लम स्वास्थ्य योजना अउ मुख्यमंत्री हाट बाजार क्लिनिक योजना चलाये जावत हे। अइसने अब पशुधन के बने स्वास्थ्य बर घलो मोबाइल चिकित्सा वाहन के उपयोग करे जाही।
गणेश विसर्जन
राजधानी रायपुर समेत प्रदेसभर म गणेश प्रतिमा मनके विसर्जन चालू होगे हे। लोगन मन बाजा-गाजा के संग गणपति बप्प ल अवइया बछर म जल्दी आय बर नेवता के सग विदाई देवत हे। मूर्ति के विसर्जन बर महादेवघाट म विसर्जन कुंड बनाये गेहे। उंहें रायपुर म काली ग्यारा सितंबर के रतिहा नौ बजे ले विसर्जन झांकी निकाले जाही। शारदा चौक म नगर निगम डहार ले झांकी मन ल नंबर दे जाही। एखर बाद झांकी शारदा चौक ले निकल के जयस्तंभ चौक, मालवीय रोड, सिटी कोतवाली चौक, सदर बाजार, कंकाली पारा चौक, पुरानी बस्ती थाना, लाखे नगर चौक, सुंदर नगर, रायपुरा अंडरब्रिज ले होत महादेवघाट पहुंचही।
झांकी बर यातायात पुलिस ह पूरा बेवस्था कर लेहे। ए बेरा ए रद्दा म भारी वाहन मनके अवई जवई बंद रीही । कई ठिन रद्दा म दुपहिया अउ चारपहिया गाड़ी बर रास्ता बदल दे गेहे।
इही बीच आज ले पितृपक्ष घलो शुरू होगे हे। अवइया पंद्रह दिन तक दिवंबत पुरखा मनके आत्मा के शांति बर श्राद्ध अउ तर्पण करे जाही।
माओवादी आत्मसमर्पण
माओवादी मनके झारखंड रिजनल कमेटी के सदस्य ह अपन पत्नि संग बीजापुर पुलिस के आगू आत्मसमर्पण करे हे। ए माओवादी उपर करीबन दस लाख रूपिया क इनाम घोषित रहिस हे। ए माओवादी ह पाछू तेरा बछर ले माओवादी संगठन म सक्रिय रीहिस अउ एखर खिलाफ आने-आने हिंसक वारदात म सामिल रेहे के आरोप हे।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत के अंक राष्ट्रीय पोषण माह उपर केन्द्रित रही। एखर तहत महिला अउ बाल विकास विभाग के संचालक दिव्या उमेश मिश्रा ले विशेष भेंटवार्ता प्रसारित करे जाही। एखर प्रसारण आकाशवाणी केंद्र रायपुर ले काली रविवार ग्यारा सितंबर के होही। एला छत्तीसगढ़ के जम्मों आकाशवाणी केन्द्र एके संगरा रिले करही। ये कार्यक्रम काली बिहनिया साढ़े नौ बजे मीडियम वेव नौ सौ इक्यासी किलोहर्ट्ज म सुने जा सकत हे।
जिले की चिट्ठी
आकाशवाणी समाचार डहार ले काली संझा छह बजके पैंतीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘बस्तर‘‘ जिला के गतिविधि मनके बारे म जानकारी दे जाही।
अमृत महोत्सव साइकिल रैली
नेहरू युवा केंद्र संगठन अउ छत्तीसगढ़ राज्य एड्स नियंत्रण समिति डहार ले आजादी के अमृत महोत्सव अउ अंतर्राष्ट्रीय युवा दिवस के मउका म एचआईवी एड्स जागरूकता उपर काली ग्यारा सितंबर के राजधानी रायपुर म साइकिल रैली के आयोजन करे जाही। ए रैली बीहनिया ग्यारा बजे कलेक्टोरेट परिसर ले रवाना होके मेक इन इंडिया चौक ले होत तेलीबांधा पहुंचही।
जाजगीर-अभिव्यक्ति ऐप
जांजगीर-चांपा जिला म करीबन साढ़े चार हजार लोगन मन अभिव्यक्ति ऐप डाउनलोड करे हे। ए मामला म जांजगीर-चांपा जिला ह जम्मों प्रदेस म पहिली स्थान म हे। पुलिस अधीक्षक विजय अग्रवाल ह बताइन कि पाछू कुछ दिन ले स्कूल-कॉलेज मन म पुलिस टीम कोति ले अभिव्यक्ति ऐप डाउनलोड कराए जावत ह। ए ऐप के माध्यम ले ऑनलाइन सिकायत दर्ज कराए जा सकथे, जेखर बाद पुलिस तुरते अलर्ट होथे अउ समस्या के निदान करथे।
अउ अब थोरकुन समाचार सार म –
– भारतीय पुरातत्व सर्वेक्षण के पूर्व महानिदेशक अउ पद्म विभूषण ले सम्मानित प्रोफेसर बी.बी. लाल के आज निधन होगे। प्रोफेसर लाल ह आने-आने एतिहासिक महत्व के जगा म खुदाई करवाय रीहिन।
– व्यापम कोति ले वैज्ञानिक पद मन बर भर्ती परीक्षा काली बीहनिया दस बजे ले मंझनियां सवा एक बजे तक रायपुर शहर के तय परीक्षा केंद्र मन म आयोजित कराये जाही।
– रायपुर जिला सैनिक कल्याण डहार ले भूतपूर्व सैनिक मनके लइका मन बर विशेष निधि ले छात्रवृत्ति योजना के तहत शैक्षणिक बछर दू हजार बीस-इक्कीस बर बीस अक्टूबर तक आवेदन मंगाए गेहे।
अउ
– कोंडागांव जिला म चौदा सिंतबर तक चलइया साक्षरता सप्ताह के तहत साक्षरता दिवस के मउका म जिला स्तरीय साक्षरता संगोष्ठी के आयोजन करे गीस। उंहे जिला के सबो स्कूल मन म प्रभातफेरी अउ रैली घलो निकाले गीस।