भारतीय जनता पार्टी के राष्ट्रीय अध्यक्ष जगत प्रकाश नड्डा ह किहीन हे कि छत्तीसगढ़ म कांग्रेस के सरकार बने के बाद प्रदेस म विकास ठप्प होगे हे। आज रईपुर के साईंस कॉलेज मैदान म पार्टी कार्यकर्ता मनके एक सम्मेलन ल संबोधित करत ओमन आरोप लगईन कि कांग्रेस के शासन काल म छत्तीसगढ़ म महिला मनके खिलाफ उत्पीड़न अउ अत्याचार के घटना बाढ़े हे अउ संघरा भ्रष्टाचार घलो चरम उपर पहुंच गेहे।
श्री नड्डा ह किहीन कि प्रधानमंत्री नरेन्द्र मोदी के अगुवई म केन्द्र के एनडीए सरकार ह सड़क, बिजली, स्वच्छता, महिला सशक्तिकरण समेत आने-आने क्षेत्र म अभूतपूर्व उपलब्धि हासिल करे हे। भाजपा अध्यक्ष ह कार्यकर्ता मनके आह्वान करीन कि ओमन गांव-गांव जाके लोगन मन ल ए उपलब्धि के जानकारी देवय
भाजपा अध्यक्ष श्री नड्डा ह किहीन कि भाजपा कश्मीर ले तमिलनाडु तक परिवारवाद अउ वंशवाद ले लड़त हे। भाजपा अध्यक्ष ह आरोप लगईन हे कि कांग्रेस एक अइसन पार्टी हे, जेखर कोनों विचारधारा नइ हे।
रईपुर म होय कार्यकर्ता सम्मेलन म प्रदेस के तेईस हजार बूथ ले आय पचास हजार ले जादा भाजपा कार्यकर्ता सामिल होईन। ए मउका म पार्टी के प्रदेस प्रभारी डी. पुरंदेश्वरी, पार्टी के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह, प्रदेस अध्यक्ष अरूण साव, नेता प्रतिपक्ष नारायण चंदेल समेत पार्टी के वरिष्ठ नेता अउ पदाधिकारी उपस्थित रिहीन।
नया जिला-शुभारंभ
‘मनेन्द्रगढ़-चिरमिरी-भरतपुर‘ अउ ‘सक्ती‘ आज ले छत्तीसगढ़ के नवा जिला के रूप म अस्तित्व म आ गेहे। एखरे संग प्रदेस म जिला मनके संख्या बाढ़के तैंतीस होगे हे। मुख्यमंत्री भूपेश बघेल ह आज मनेन्द्रगढ़ म नवा जिला ‘मनेन्द्रगढ़-चिरमिरी-भरतपुर‘ के उद्घाटन करीन। ए मउका म ओमन जिला बर दू सौ करोड़ तिहत्तर लाख रूपिया के विकास काम के लोकार्पण अउ भूमिपूजन करीन। उहें, मुख्यमंत्री ह कलेक्ट्रेट अउ पुलिस अधीक्षक कार्यालय के उद्घाटन करीन। ए दउरान मुख्यमंत्री के मौजूदगी म कलेक्टर पी.एस. धु्रव ह कार्यभार ग्रहण करीन।
ए मउका म श्री बघेल ह चिरमिरी के सौ बिस्तर वाला अस्पताल ल जिला अस्पताल बनाय अउ मनेन्द्रगढ़ के सिद्ध बाबा मंदिर ल पर्यटन विभाग कोति ले विकसित करे के घोसना करीन। उहें, मनेन्द्रगढ़, चिरमिरी अउ भरतपुर बर तीन-तीन करोड़ रूपिया देके घोसना घलो करीन।
उहें, मुख्यमंत्री ह आज नव बने ‘सक्ती‘ जिला के घलो सुभारंभ करीन। श्री बघेल ह कलेक्टर अउ पुलिस अधीक्षक कार्यालय के उद्घाटन करके जिला ल एक सौ तिरपन करोड़ रूपिया के आने-आने विकास कार्य के सौगात दीन।
राज्य सरकार के सामान्य प्रशासन विभाग कोति ले जारी आदेस के अनुसार नुपूर राशि पन्ना ल ‘सक्ती‘ जिला के कलेक्टर बनाय गेहे।
राष्ट्रपति-टीबी उन्मूलन
राष्ट्रपति द्रौपदी मुर्मू ह किहीन हे कि जनभागीदारी, देस ले टीबी रोग के उन्मूलन बर बहुत जरूरी हरय। ओमन देस ले दू हजार पच्चीस तक टीबी उन्मूलन के मिसन म फेर बल देह बर प्रधानमंत्री टीबी मुक्त भारत अभियान के आज वर्चुअली सुभारंभ करीन। ए मउका म ओमन किहीन कि नवा भारत के रीति-नीति टीबी उन्मूलन के क्षेत्र म घलो दिखत हे। ओमन लोगन मन ले किहीन कि बिना संकोच के टीबी के तुरते पता लगाय अउ एखर उन्मूलन करे म सहायता बर आगू आवय।
ए मउका म राष्ट्रपति ह नि-क्षय टू प्वाइंट जीरो पहल के घलो सुरूवात करीन। नि-क्षय वेबपोर्टल हरय, जउन ह उपचाराधीन टीबी मरीज मन ल समर्थन उपलब्ध कराय के इच्छुक दानदाता मन बर मंच हरय।
ए कारीकरम म छत्तीसगढ़ के राज्यपाल अनुसुईया उइके के सचिव अमृत खलखो वर्चुअल रूप ले सामिल होईन। ए मउका म उप सचिव दीपक अग्रवाल अउ माइक्रो बायोलॉजिस्ट निशांत मेश्राम घलो मौजूद रिहीन।
केन्द्रीय मंत्री-दौरा
केन्द्रीय राज्यमंत्री प्रहलाद सिंह पटेल ह किहीन हे कि लोगन मनके घर तक नल ले जल पहुंचाय के काम म छत्तीसगढ़ ह बहुत पीछे हरय। ओमन किहीन कि जल जीवन मिशन के काम म अभू तक राष्ट्रीय औसत बावन प्रतिशत ले जादा हवय। फेर, छत्तीसगढ़ म एखर आधा काम ही होय हे। ए बात केन्द्रीय राज्यमंत्री ह आज बिलासपुर म जल जीवन मिशन के समीक्षा बइठका के दउरान किहीन। श्री पटेल ह बतईन कि छत्तीसगढ़ ह नल ले हर घर तक जल पहुंचाय के लक्ष्य बछर दू हजार चौबीस तक पूरा करे के बात केहे हे। लेकिन, अभी तक के काम ल देखत एला पूरा करे म बहुत तेज गति ले काम करे के जरूरत हरय।
आरएसएस-समन्वय बैठक
राष्ट्रीय स्वयंसेवक संघ के अखिल भारतीय समन्वय बइठका काली दस सितंबर ले राजधानी रईपुर म सुरू होही। तीन दिन के ए बइठका बारह सितंबर तक चलही। ए बइठका म राष्ट्रीय स्वयंसेवक संघ के सर संघचालक डॉक्टर मोहन भागवत के संग सर कार्यवाह दत्तात्रेय होसबाले समेत संघ के पांचों सह सर कार्यवाह अउ दूसर पदाधिकारी सामिल होही।
संघ के अखिल भारतीय प्रचार प्रमुख सुनील आंबेकर ह आज रईपुर म पत्रकार मन ले चरचा करत बतईन कि अखिल भारतीय समन्वय बइठका म राष्ट्रीय स्वयंसेवक संघ ले प्रेरित छत्तीस अनुषांगिक संगठन मनके प्रमुख पदधिकारी सामिल होही। तीन दिन के दउरान ए संगठन मनके आने-आने गतिविधि, उपलब्धि अउ अवइया लक्ष्य उपर विचार-विमर्श करे जाही। ए मउका म ए संगठन के पदाधिकारी अपन अनुभव ल घलो साझा करही।
नवभारत साक्षरता कार्यक्रम
प्रदेस म नवभारत साक्षरता कारीकरम चलाय जाही, जउन ह पांच साल तक चलही। अंतर्राष्ट्रीय साक्षरता दिवस के मउका म काली आयोजित वेबिनार म मुख्यमंत्री भूपेश बघेल ह ए घोसना करीन। ओमन किहीन कि ए कारीकरम म अशिक्षित मनखे मन ल बुनियादी साक्षरता अउ अंक ज्ञान देके संग ओमन ल दूसर कुसलता के बारे म प्रसिक्षित करे जाही। एखर तहत डिजिटल साक्षरता, वित्तीय साक्षरता, कानूनी साक्षरता, चुनावी साक्षरता, कौशल विकास, बुनियादी सिक्षा, सतत् सिक्षा के संगेसंग स्वास्थ्य म स्वच्छता उपर बिसेस रूप ले जागरूक करे के काम घलो करे जाही।
सीयूईटी परीक्षा-परिणाम
राष्ट्रीय परीक्षा एजेंसी ह स्नातक पाठ्यक्रम म दाखिला बर ले गे संयुक्त विश्वविद्यालय प्रवेस परीक्षा-सी.यू.ई.टी. के परिणाम ए महीना के पन्द्रह तारीख या ओखर पहिली घोसित कर सकत हे। विश्वविद्यालय अनुदान आयोग के अध्यक्ष प्रोफेसर एम. जगदीश कुमार ह ए जानकारी दीन। ओमन जम्मों विश्वविद्यालय मन ल अपन पोर्टल तियार राखे के सलाह दीन हे, ताकि परीक्षा के नंबर के आधार म दाखिला के प्रक्रिया सुरू करे जा सकय।
माओवादी-समाचार
बीजापुर जिला म अलग-अलग थाना क्षेत्र ले सुरक्षा बल मनके टीम ह चार माओवादी मन ल गिरफ्तार करे हे। मिली जानकारी अनुसार जिला पुलिस बल अउ एसटीएफ के संयुक्त टीम ह तर्रेम अउ पामेड़ थाना क्षेत्र ले ए माओवादी मन ल विस्फोटक समान समेत गिरफ्तार करीन। ए मन उपर आने-आने माओवादी घटना म सामिल रेहे के आरोप हरय।
उहें, इही जिला के उसूर थाना क्षेत्र म आईईडी के चपेट म आय ले ए महिला घायल होगे। घायल महिला के गलगम स्थित सीआरपीएफ कैम्प म प्राथमिक उपचार करे गीस, जेखर बाद ओला बीजापुर जिला चिकित्सालय रिफर कर दे गीस। फिलहाल ओखर हालत खतरा ले बाहिर बताय गेहे।
हाथी-मौत
गरियाबंद जिला के मैनपुर क्षेत्र के सिहार गांव म हाथी के हमला ले एक ग्रामीण के मउत होगे। बताय जात हे कि एक हाथी हमन झुंड ले अलग होके सिहार गांव पहुंच गे, जिहां एक ग्रामीण उपर हमला कर दीस।
ओति, ए दिन म सोलह हाथी के दल कोरबा जिला के कटघोरा वनमंडल अंतर्गत मानगुरू पहाड़ म घूमत हे। एखर पहिली, हाथी मनके दल ह बांगो पंचायत के आश्रित ग्राम पचभैया पारा अउ चर्रा म फसल ल नुकसान पहुंचईन। उहें, हाथी मनके संख्या ल देखत वन विभाग ह गांव वाला मन ल हाथी ले सतर्क रेहे के सलाह दीन हे।