प्रधानमंत्री नरेंद्र मोदी ह भारत बर प्रधानमंत्री विद्यालय योजना पीएम-श्री म देसभर म साढ़े चौदा हजार स्कूल ल उन्नत बनाये जाय के घोषणा करीन हे। श्री मोदी ह कीहिन कि पीएम-श्री विद्यालय देस के मॉडल स्कूल बनही, जउन राष्ट्रीय शिक्षा नीति के मूल भावना के मुताबिक होही। प्रधानमंत्री ह कीहिन कि ओमन ल पूरा भरोसा हवय कि ए स्कूल ले देस के लाखो पढ़ईया लईका ल फायदा मिलही। एमा पढ़ई के नवा तरीका म जोर दे जाही।
राज्य मंत्रिमंडल ह प्रदेस के अनुसुचित जाति, अनुसूचित जनजाति अउ पिछड़ा वर्ग के कल्याण अउ विकास बर आने आने विभाग के गठन करे के फैसला लेहे । आज रायपुर म होय राज्य मंत्रिमंडल के बइठका म बस्तर अउ सरगुजा संभाग बर बारा हजार चार सौ नवासी शिक्षक के पद म भर्ती करे के मंजूरी दे गेहे। एमा छै हजार दू सौ पच्यासी सहायक शिक्षक, पांच हजार सात सौ बहत्तर शिक्षक अउ चार सौ बत्तीस पद व्याख्याता के हवय। एखर संगेसंग मंत्रिमंडल ह शिक्षा विभाग के स्कूल म काम करइया अतिथि शिक्षक मन ल हरएक बछर बर दू बोनस अंक अउ अधिकतम दस बोनस अंक देके फैसला करे हे।
मंत्रिमंडल ह अधिसूचित अनुसूचित क्षेत्र बस्तर, सरगुजा अउ बिलासपुर संभाग के कोरबा अउ गौरेला-पेण्ड्रा-मरवाही जिला म तृतीय अउ चतुर्थ श्रेणी के जिला स्तरीय के संग संभाग स्तरीय पद म नियुक्त मनखे मनके प्रतिनियुक्ति, स्थानांतरण, संविलियन, संलग्नीकरण, जिला अउ संभाग के बाहिर नइ करे जाय के निर्णय लीन।
उंहें कृषि अउ ओखर ले जुड़े उद्यानिकी, मछली पालन अउ पशुपालन ले संबंधित विभाग के कामकाज ल एके जगा ले चलाय बर नवा रायपुर म कृषि भवन बनाय के मंजूरी दे गेहे। लघु जल विद्युत परियोजना के स्थापना बर विभागीय नीति दू हजार बारा म बढ़वार के प्रस्ताव के अनुमोदन करे गेहे। संगेसंग लोक निर्माण विभाग म सहायक मानचित्रकार के तैंतालिस पद म नियुक्ति बर जारी चयन सूची के एक बछर तक प्रभावी रेहे के बेरा ल शिथिल करे के मंजूरी दे गेहे।
मंत्रिमंडल ह आजादी के अमृत महोत्सव म छत्तीसगढ़ के संस्कृति म आधारित लघु फिल्म अउ स्वतंत्रता के पचहत्तर बछर अउ अवइया पच्चीस बछर म नवा भारत के निर्माण संबंधी डॉक्यूमेंट्री बनाय के मंजूरी दे गीस । मंत्रिमंडल ह छत्तीसगढ़ म स्थानीय अउ पारंपरिक खेल ल बढ़ावा दे खातिर नवा पहल करे हे। एसो ले छत्तीसगढ़िया ओलंपिक खेल के आयोजन करे जाही ।
राष्ट्रीय स्वयं सेवक संघ के सर संघचालक डॅाक्टर मोहन भागवत अपन आठ दिवसीय दउरा म आज रायपुर पहुंचीन । डॅाक्टर भागवत ये दउरान भारतीय वनवासी कल्याण आश्रम सेवा भारती विश्व हिंदू परिषद, अखिल भारतीय विद्यार्थी परिषद अउ भारतीय मजदूर संघ के संगठन प्रमुख ले गोठबात करत काम के समीक्षा करही। डॅाक्टर भागवत अवइया दस ले बारा सितंबर तक रायपुर म राखे गे आर.एस.एस. ले जुड़े अनुसांगिक संगठन के प्रमुख अधिकारी मनके समन्वय बइठका म संघरही।
बइठका म सर कार्यवाह दत्तात्रेय होसबाले समेत संघ के पांचों सह सर कार्यवाह अउ आने पदाधिकारी सामिल होही। ये बइठका म संगठन के आने-आने कामकाज म गोठबात करे जाही अउ अवइया चुनाव ल देखत रणनीति बनाय जाही। बइठका म पर्यावरण, परिवार प्रबोधन जइसन विसय म घलो गोठबात होही। उंहे संगठन कोति ले राजनीतिक प्रस्ताव घलो पारित करे जाही।
एति भारतीय जनता पार्टी के राष्ट्रीय अध्यक्ष जगत प्रकाश नड्डा नौ सितंबर के छत्तीसगढ़ दउरा म रायपुर पहुंचही । संघ के प्रस्तावित बइठका म श्री नड्डा सामिल होही। राष्ट्रीय अध्यक्ष के दउरा ल लेके प्रदेस भर के कार्यकर्ता मन म उछाह हवय अउ उंखर अगवानी बर जोरदरहा तियारी होवत हे।
केंद्रीय सूचना अउ प्रसारण मंत्रालय ह जिन्गा इंडिया बर ऑनलाईन मोबाइल गेम्स ले एक डिजिटल लर्निंग अनुभव बनाय हे। पत्र सूचना कार्यालय रायपुर के निदेशक कृपाशंकर यादव ह रायपुर म पत्रकार मनले गोठबात करत कीहिन कि ये मोबाइल खेल ले लोगन ल भारत के आजादी के महत्ता के बात अउ देस के महान स्वतंत्रता सेनानी के संबंध म सुघ्घर बात बताना हे।
श्री यादव ह बताइन कि आजादी क्वेस्ट ऑनलाईन मोबाइल गेम के एक मनोरंजक अउ शिक्षा वाले सीरीज हे। जेखर उद्देश्य हरय खेल ले खिलाड़ी मन ल भारत के स्वतंत्रता सेनानी मनके वीरता के संबंध म अउ जादा जानकारी दे खातिर एक मंच देवाना। ये बेरा म पत्र सूचना कार्यालय रायपुर के उप निदेशक सुनील कुमार तिवारी ह बताइन कि हीरोज ऑफ भारत एप ल हिंदी अउ अंग्रेजी दूनो भाषा म डाउनलोड करे जा सकथे।
उंहें केंद्रीय संचार ब्यूरो प्रादेशिक कार्यालय रायपुर के कार्यालय प्रमुख शैलेष फाये ह बताइन कि राष्ट्रीय पोषण माह म केंद्रीय संचार ब्यूरो रायपुर अउ क्षेत्रीय कार्यालय बिलासपुर, जगदलपुर कोति ले आने-आने किसम के जागरूकता कार्यक्रम के आयोजन करे जाही।
अग्निपथ योजना म महिला सैन्य पुलिस रैली म सामिल होय बर पंजीयन के काली आखरी तारीख हे। अभ्यर्थी मन ल ज्वाइन इंडियन आर्मी वेबसाईट म काली सात सितंबर तक ऑनलाईन पंजीयन कराना जरूरी हवय। खबर के मुताबिक छत्तीसगढ़ अउ मध्यप्रदेश क अग्निपथ योजना म महिला सैन्य पुलिस रैली अवइया उन्नीस ले बाईस अक्टूबर तक जबलपुर मध्यप्रदेश म राखे जाही। ए बारे म अउ जादा जानकारी बर फोन नंबर – शून्य सात छह एक दू छह शून्य सात छह तीन सात म संपर्क करे जा सकथे।
राजधानी रायपुर म आज पोषण जागरूकता बर साइकिल रैली निकाले गीस। रैली ल महिला अउ बाल विकास मंत्री अनिला भेडिया ह हरिहर झंडी दिखाके रवाना करीन। ये बेरा म ओमन कीहिन कि प्रदेस म कुपोषण ले मुक्ति बर चलाये जात मुख्यमंत्री सुपोषण अभियान के बने नतीजा मिले हे। ओमन यहू कीहिन कि कुपोषण मुक्ति बर लोगन के मदद जरूरी हे। जेखर ले प्रदेस बहुते जल्दी सुपोषित हो सकय।
खबर के मुताबिक शहर के मरीन ड्राइव ले निकले ये रैली म सही पोषण देश रोशन अउ गढ़बो सुपोषित छत्तीसगढ़ के संदेस दे गीस। ये रैली शहर के आने-आने रद्दा ले होवत मरीन ड्राइव म ही आके सिरइस।
राष्ट्रीय अनुसूचित जनजाति आयोग अउ अखिल भारतीय आयुर्विज्ञान संस्थान – एम्स रायपुर के संयुक्त तत्वावधान म काली सात सितंबर के स्वतंत्रता संग्राम म जनजाति नायक मनके योगदान – विसय म एक दिवसीय कार्यशाला राखे जाही। एखर संगेसंग आजादी के अमृत महोत्सव म एक प्रदर्शनी घलो लगही। ये प्रदर्शनी म अस्सी ले जादा पोस्टर बनाके आदिवासी मनके आजादी के आंदोलन अउ भारत के विकास म योगदान ल देखाय जाही।
सुकमा जिला म एक लाख रूपिया के इनामी महिला माओवादी संग तीन झन आत्मसमर्पण करे हे। ये महिला माओवादी ह नक्सल अभियान के अतिरिक्त पुलिस अधीक्षक किरण चव्हाण के आगू आत्मसमर्पण करीस। बताय जात हे कि एखर मन उपर आने-आने माओवादी घटना म सामिल रेहे के आरोप हे।
– अश्विनी कुमार त्रिपाठी ह राष्ट्रीय ताप विद्युत निगम-एनटीपीसी नवा रायपुर म कार्यकारी निदेशक के अतिरिक्त प्रभार के संग क्षेत्रीय कार्यकारी निदेशक के रूप म पदभार संभालीन।
– स्कूल शिक्षा मंत्री डॅाक्टर प्रेमसाय सिंह ह राज्य शिक्षक पुरस्कार बछर दू हजार बाईस म चुने गे अड़तालिस झिन शिक्षक मनके नाव के घोषणा करीन हे।
– स्वास्थ्य मंत्री टी.एस. सिंहदेव ह रायपुर के पंडित जवाहर लाल नेहरू स्मृति चिकित्सा महाविद्यालय म काली राखे गे कार्यक्रम म महाविद्यालय के सेवा निवृत्त प्राध्यापक मन ल सम्मानित करीन।
अउ
– कोरिया जिला म हाथी के दल ह मनेंद्रगढ़ वनमंडल के गुड़रपारा क्षेत्र म दू ठिन घर ल तोड़फोड के संगेसंग फसल ल घलो नकसान पहुंचाय हे।