काली शिक्षक दिवस हरय। ए मउका म राष्ट्रपति द्रौपदी मुर्मू शिक्षा के क्षेत्र म सुघ्घर सेवा देवइया छियांलिस झिन शिक्षक मन ल राष्ट्रीय शिक्षक पुरस्कार ले सम्मानित करही। ए समारोह नई दिल्ली के विज्ञान भवन म होही। पुरस्कार झोकइया म छत्तीसगढ़ के राजधानी रायपुर के सासकीय प्राथमिक स्कूल पंडित सखाराम दुबे के सहायक शिक्षिका ममता अहार घलो सामिल हे। सुश्री अहार पाछू बीस बछर ले लोक संगीत के माध्यम ले लईका मन ल पढ़ावत हे।
उंहे कालीच राजभवन म राज्य स्तरीय शिक्षक सम्मान समारोह होही। राज्यपाल अनुसुइया उइके ए समारोह म प्रदेस के साठ झिन शिक्षक मन ल सम्मानित करहीं। एमा ले छप्पन झिन शिक्षक मन ल राज्य शिक्षक सम्मान अउ चार झिन शिक्षक मन ल प्रदेस के महान साहित्यकार मनके नाव वाले स्मृति पुरस्कार ले सम्मानित करे जाही । समारोह म राज्य शिक्षक पुरस्कार बर चुने गे शिक्षक मन ल इक्कईस-इक्कईस हजार रूपिया अउ प्रशस्ति पत्र दे जाही। संगे प्रदेस के महान विभूति मनके स्मृति म देवइया पुरस्कार ले सम्मानित होवइया शिक्षक मन ल पचास-पचास हजार रूपिया अउ प्रशस्ति पत्र दे जाही।
समारोह के पगरैती मुख्यमंत्री भूपेश बघेल करहीं। उंहें विशिष्ट अतिथि स्कूल शिक्षा मंत्री डॅाक्टर प्रेमसाय सिंह टेकाम अउ संसदीय सचिव द्वारकाधीश यादव होही। राज्यपाल अनुसुइया उइके, मुख्यमंत्री भूपेश बघेल अउ स्कूल शिक्षा मंत्री डॅाक्टर प्रेमसाय सिंह टेकाम ह शिक्षक दिवस के मउका म सबो गुरूजन अउ प्रदेसवासी मन ल बधाई अउ सुभकामना दीन हे।
प्रधानमंत्री-शिक्षक बातचीत
इही बीच प्रधानमंत्री नरेंद्र मोदी शिक्षक दिवस के मउका म काली नई दिल्ली म अपन आवास म राष्ट्रीय शिक्षक पुरस्कार विजेता मनले गोठबात करही। शिक्षक मन ल राष्ट्रीय पुरस्कार के उद्देश्य देश के अइसन बेहतरीन शिक्षक मनके सहराय के लाइक काम के बड़ई अउ उंखर सम्मान करना हे।
जउन मन अपन समर्पण अउ कड़ा मेहनत ले न केवल स्कूल शिक्षा के गुणवत्ता म सुधार करीन हे, भलुक अपन विद्यार्थी मनके जीवन ल घलो सुघ्घर बनाइन हे। ए बछर देसभर ले छियांलिस झिन शिक्षक मन ल तीन चरण के पारदर्शी ऑनलाईन प्रक्रिया के माध्यम ले पुरस्कार बर चुने गेहे।
केंद्रीय गृहमंत्री-संबोधन
केंद्रीय गृह मंत्री अमित शाह ह सबो राज्य ले जेल मन म सुरक्षा अउ सहूलियत बढ़ाय उपर ध्यान देके आग्रह करीन हे। श्री शाह ह हरएक राज्य ले सुघ्घर जेल प्रबंधन बर बछर दू हजार सोला म प्रधानमंत्री नरेंद्र मोदी सरकार के आदर्श जेल संहिता ल अपनाय के आग्रह करीन।
श्री शाह ह आज अहमदाबाद म छठवां अखिल भारतीय जेल प्रतियोगिता के शुभारंभ बाद जनसमूह ल संबोधित करत रीहिन। ओमन जेल ल आधुनिक बनाय अउ अइसन कैदी मन ल समाज म वापस लाये बर जोर दीन, जउन आदतन अपराधी नइ हवय।
गृहमंत्री ह कीहिन कि अदालत के जइसन देस के सबो जेल मन म वीडियो कॅान्फ्रेंस के सुविधा बनाये के आवश्यकता हे। श्री शाह ह कैदी मनके कल्याण बर जेल परिसर म लाइब्रेरी, ट्रेनिंग सेंटर, अस्पताल अउ मानसिक स्वास्थ्य केंद्र बनाये उपर घलो जोर दीन।
कांग्रेस रैली
देस म बाढ़त महंगाई के खिलाफ अखिल भारतीय कांग्रेस कमेटी के आरो ले आज नई दिल्ली के रामलीला मैदान म हल्ला बोल रैली राखे गे रीहिस। ए रैली म मुख्यमंत्री भूपेश बघेल अउ प्रदेश कांग्रेस अध्यक्ष मोहन मरकाम के संगे प्रदेस के पार्टी पदाधिकारी अउ कार्यकर्ता मन घलो सामिल होइन। ए मउका म मुख्यमंत्री ह कीहिन कि केंद्र सरकार के विफल आर्थिक नीति के सेती महंगाई ह सरलग बाढ़त हे अउ देस म महंगाई अउ बेरोजगारी ले लोगन हलाकान हे। ओमन उम्मीद जताइन कि रैली बाद सरकार ह एखर जानबा लेके लोगन मन ल महंगाई ले राहत दीही। इही बीच भारतीय जनता पार्टी के प्रदेस इकाई ह केहे हे क मुख्यमंत्री भूपेश बघेल अउ कांग्रेस ल महंगाई उपर गोठियाय के कोनो नैतिक अधिकार नइ हे। मुख्यमंत्री ह जब तक ले केंद्र सरकार के बरोबर पेट्रोल डीजल के दाम म कटौती नइ करही तब तक उंखर गोठ के कोनो मतलब नइ हे।
मन की बात
प्रधानमंत्री नरेंद्र मोदी ह अवइया पच्चीस सितंबर के आकाशवाणी ले प्रसारित होवइया मन की बात कार्यक्रम बर लोगन मनले विचार अउ सुझाव साझा करे के आग्रह करे हे। ये मासिक रेडियो कार्यक्रम के तिरानवां कड़ी होही ।
सुनइया मन नमो ऐप या माईजीओवी ओपन फोरम म अपन विचार साझा कर सकत हे, संगे टोल फ्री नंबर 1 8 0 0-1 1-7 8 0 0 म घलो डायल कर अपन संदेस हिंदी या अंग्रेजी म रिकॉर्ड करा सकत हे । फोन लाइन तेईस सितंबर तक खुला रइही। लोगन मन 1 9 2 2 म मिस्ड कॉल घलो दे सकत हे अउ एसएमएस लिंक मिले म सोझे प्रधानमंत्री ल अपन सुझाव दे सकत हे।
भाजपा बैठक
भारतीय जनता पार्टी दुर्ग संभाग के बइठका जिला भाजपा कार्यालय राजनांदगांव म राखे गे रीहिस। ए बइठका म प्रधानमंत्री आवास योजना म गड़बड़ी अउ योजना ल लागू करे म लेटलतीफी ल लेके राज्य सरकार के खिलाफ अभियान चलाये के निर्णय ले गीस।
बइठका म किसान मनके समस्या ल मुख्य रूप ले रणनीति घलो बनाये गीस। संगे अवइया सतरा सितंबर ले दू अक्टूबर तक प्रधानमंत्री नरेंद्र मोदी के जनमदिन ल सेवा पखवाड़ा के रूप म मनाये के निर्णय ले गीस। उंहे अवइया पच्चीस सितंबर के पंडित दीनदयाल उपाध्याय के जयंती मनाये उपर घलो गोठबात होइस। एखर संगे दू अक्टूबर के राष्ट्रपिता महात्मा गांधी अउ पूर्व प्रधानमंत्री लाल बहादुर शास्त्री के जयंती ल पार्टी ह शक्ति केंद्र स्तर म मनाये के निर्णय लेहे।
बइठका म राष्ट्रीय संगठन सह महामंत्री शिव प्रकाश, भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमन सिंह, सांसद संतोष पांडेय अउ विजय बघेल के अलावा छै ठिन जिला के पार्टी पदाधिकारी अउ बड़का नेता मन सामिल होइन।
राम वनगमन पथ
छत्तीसगढ़ म भगवान राम के नौ ठिन मूर्ति लगही। एखर सुरूआत राजधानी रायपुर ले लगे गांव चंदखुरी ले हो चुके हे। इंहा इंक्यावन फीट उंच भगवान राम के मूर्ति स्थापित करे गेहे। अब भगवान राम वनगमन पथ म तय करे गे आठ ठिन जगा मन म घलो भगवान राम के पच्चीस-पच्चीस फीट उंच मूर्ति लगाए जाही। अवइया डेढ़ महीना म राजिम, शिवरीनारायण अउ सरगुजा जिला के रायगढ़ म मूर्ति स्थापित करे जाही।
हाथी आतंक
कोरबा जिला म हाथी मनके माचे अतलंग ह थिराय के नाव नइ लेवत हे। सोला झिन हाथी मनके दल ह कटघोरा वनमंडल के बाद अब कोरबा वनमंडल म अमा गेहे। मिले जानकारी मुताबिक बालके रेंज म अजगर बहार परिक्षेत्र के गांव डोंगाघाट म हाथी मनके दल ह फसल ल नकसान पहुंचावत हे। फेर वन विभाग ह हाथी मन ल खेदे म लगे हवय। विभाग डहार ले हाका पराके लोगन मन ल सावचेत रेहे बर केहे गेहे। क्षेत्र म हाथी मनके किंजरई ले गंवई के मनखे मन म डर-दहशत के माहौल हे।
डायरिया प्रकोप
सरगुजा जिला के बतौली विकासखंड के गांव सेदम म डायरिया ले बारा झिन ले जादा मनखे मन बीमार होगीन। गंभीर रूप ले बीमार छै झिन मनखे ल बतौली के सामुदायिक स्वास्थ्य केंद्र म भर्ती कराय गेहे उंहे आने लोगन मनके इलाज गांवे म अस्थाई अस्पताल बनाके करे जात हे।
स्वास्थ्य मंत्री टी.एस. सिंहदेव ह स्वास्थ्य अमला ल प्रभावित जगा मन म कैम्प लगाके जांच अउ इलाज के बेवस्था करे के निर्देश देहे। स्वास्थ्य मंत्री के निर्देश म मुख्य चिकित्सा अउ स्वास्थ्य अधिकारी डॅाक्टर पी.एस. सिसोदिया सहित जिला के विशेष चिकित्सा के टीम गांव सेदम म शिविर लगाके हरएक घर म मरीज मनके जांच करत हे।