उंहे, मुख्यमंत्री ह खैरागढ़ म होईस कारीकरम म खैरागढ़-छुईखदान-गंडई जिला के सुभारंभ करीन। जिहां ओमन कलेक्टोरेट अउ पुलिस अधीक्षक कार्यालय के उद्घाटन कर लोगन मन ल बधई दीन। ए मउका म मुख्यमंत्री ह खैरागढ़ म 364 करोड़ रूपिया के आने-आने विकास कार्य के भूमिपूजन करीन अउ संगेसंग आने-आने योजना मनके तहत् हितग्राही मन ल करीबन 37 लाख रूपिया के जीनिस घलो बांटीन।
महिला कर्मचारी-अवकाश
केन्द्र सरकार के महिला कर्मचारी मन ल जनम के तुरंत बाद या प्रसव के दउरान लइका के मउत होय म साठ दिन के बिसेस छुट्टी मिलही। कार्मिक अउ प्रसिक्षण विभाग ह ए बारे म आदेस जारी कर देहे। मंत्रालय ह बतईन कि लइका के जनम के पहिली या जनम के तुरंत बाद मउत होय ले महिला ल मानसिक आघात होय के स्थिति ल देखत ए फइसला ले गे हवय।
कोरबा मेडिकल कॉलेज सीट
कांकेर अउ महासमुंद के नवा मेडिकल कालेज ल 100-100 ठिन सीट के मान्यता मिले के बाद नेशनल मेडिकल कमीशन डहार ले कोरबा के नवा मेडिकल कालेज ल घलो शैक्षणिक सत्र दू हजार 22-23 म एम.बी.बी.एस के 100 ठिन सीट खातिर मान्यता देदे गे हवय। कमीशन डहार ले ए संबंध म कालेज के डीन ल लेटर ऑफ इंटेन्ट जारी करे गे हवय।
कोरबा मेडिकल कालेज म घलो शैक्षणिक सत्र दू हजार 22-23 ले पढ़ई सुरू हो जही। राज्य शासन डहार ले कोरबा मेडिकल कालेज ल दे गे संसाधन अउ सुविधा मनके मुल्यांकन अउ पर्यवेक्षण के बाद नेशनल मेडिकल कमीशन ह उंहा 100 ठिन सीट बर मान्यता दे हवय।
चिक्त्सि शिक्षा मंत्री टी.एस.सिंहदेव ह कोरबा समेत प्रदेश के तीन ठिन नवा मेडिकल कालेज ल मान्यता मिले म कीहिन के शासकीय मेडिकल कालेज मन म एम.बी.बी.एस के 300 सीट बाढ़े ले अब राज्य के जादाअकन युवा मन ल डॉक्टर बने के मउका मिलही।
साक्षरता सप्ताह
प्रदेस म साक्षरता कारीकरम के वातावरण बनाय बर 8 सितंबर के अंतर्राष्ट्रीय साक्षरता दिवस अउ 8 ले 14 सितंबर तक साक्षरता सप्ताह के आयोजन करे जाही। साक्षरता सप्ताह के उद्देश्य जम्मों वर्ग के ध्यान नवभारत साक्षरता कारीकरम डहार केंद्रित करना हवय। राज्य साक्षरता दिवस प्राधिकरण के संचालक अउ सदस्य सचिव राजेश सिंह राणा ह एमा जम्मों वर्ग के सक्रिय भागीदारी करे के निर्देश जिला शिक्षा अधिकारी, जिला मिशन समन्वयक समग्र शिक्षा अउ जम्मों जिला परियोजना अधिकारी जिला मिशन प्राधिकरण ल दे हवय।
अंतर्राष्ट्रीय साक्षरता दिवस अउ साक्षरता सप्ताह के दउरान 8 सितंबर अंतर्राष्ट्रीय साक्षरता के दिन सबो शासकीय, अशासकीय अउ निजी शैक्षणिक संस्था मन म प्रभात फेरी, साक्षरता रैली के आयोजन करे जाही।
पद्म पुरस्कार-नामांकन
पद्म पुरस्कार-दू हजार तेईस बर पन्द्रह सितंबर तक नामांकन भरे जा सकथे। केन्द्रीय गृह मंत्रालय ह किहीन हे कि पद्म पुरस्कार बर सिफारिस अउ नामांकन सिरिफ राष्ट्रीय पुरस्कार पोर्टल म ऑनलाइन करे जाही। पुरस्कार मनके घोसना अवइया बछर गणतंत्र दिवस के मउका म करे जाही।
आईएनएस विक्रांत-बीएसपी
प्रधानमंत्री नरेन्द्र मोदी ह काली देस के पहिली स्वदेशी रूप ले बने एयरक्रॉफ्ट कैरियर आई.एन.एस विक्रांत ल देस के खातिर समर्पित करीन। ए एयरक्रॉफ्ट कैरियर के बने म लगईय्या बिसेस डी.एम.आर ग्रेड के स्टील के आधा ले जादा पुर्ती भिलाई इस्पात संयंत्र ह करे हवय। आई.एन.एस विक्रांत ल कोचीन शिपयार्ड म बनाय गे हवय। सेल ह नौसेना के मदद ले एखर निर्माण करीन अउ 30 हजार टन लोहा के पुर्ती करीन जेमा सब ले जादा 17 हजार टन के उत्पादन भिलाई इस्पात संयंत्र ह करे हवय।
आई.एन.एस विक्रांत ल देस खातिर समर्पित करे म बी.एस.पी प्रबंधन ह घलो खुसी मनाईस। अउ बिसेस स्टील प्लेट्स के बनईय्या इकाई ल एखर सेती बिसेस रूप ले बधई दीन। ए समारोह म बी.एस.पी के निदेशक प्रभारी अनिर्बान दास गुप्ता अउ कार्यपालक निदेशक – अंजनी कुमार उपस्थित रिहीन। ए मउका म आई.एन.एस विक्रांत के लोर्कापण अउ निर्माण ले जुड़े लघु फिलिम घलो देखाए गीस।
बीएसएफ-जागरूकता
सीमा सुरक्षा बल बी.एस.एफ कमांड मुख्यालय रायपुर के अतिरिक्त महानिदेशक आशीष गुप्ता अउ आने-आने बड़का अधिकारी मन ह केन्द्रीय विद्यालय, राखी अउ भारत माता सीनियर सेकेण्डरी स्कूल, नवा रायपुर गीन। एखर उद्देश्य सीमा सुरक्षा बल के इतिहास, बहादुरी, परम्परा, त्याग, कर्तव्य-परायणता के बारे म जानकारी देना हवय। ए मउका म ओमन पढ़ईय्या लईका अउ गुरूजी मनले गोठबात घलो करीन। अउ ओमन ह पढ़ईय्या लईका, बिसेस कर नोनी मनले बी.एस.एफ ल एक ठिन कैरियर के रूप म चुने बर घलो कीहिन। संगेसंग बी.एस.एफ म बने एक ठिन फिलिम ल घलो देखाईस। सीमा सुरक्षा बल डहार ले पढ़ईय्या लईका मन ल क्रिकेट अउ फुटबॉल खेले के जीनिस घलो दे गीस।
उंहे, भिलाई के एक ठिन प्रायवेट स्कूल म सीमा सुरक्षा बल डहार ले शिक्षक दिवस के कारीकरम करे गीस। जेमा, सीमा सुरक्षा बल के अधिकारी समेत पढ़ईय्या लईका अउ गुरूजी मन सामिल होईन।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत फीट इंडिया अभियान ले प्ररित होके हिमालय के चाटी म तिरंगा फहरईय्या भिलाई के 53 बछर के पर्वतारोही, सविता धपवाल के भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली बिहनिया 9 बजके 30 मिनट म करे जाही। एला छत्तीसगढ़ के जम्मों आकाशवाणी केन्द्र एके संघरा रिले करही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा 6 बजके 30 मिनट ले 6 बजके 35 मिनट म ‘‘जिले की चिट्ठी‘‘ कारीकरम के प्रसारण करे जाही। ए कारीकरम आकाशवाणी के रायपुर केंद्र डहार ले प्रसारित होही। जेला जम्मों केंद्र एके संघरा रिले करही। ए बखत के अंक म ‘‘बीजापुर‘‘ जिला के गतिविधि मनके बारे म जानकारी दे जाही।
संक्षिप्त समाचार
अउ अब थोरकुन समाचार सार म –
– दुरूग जिला के दाउ वासुदेव चंद्राकर कामधेनु विश्विद्यालय के कुलपति डॉ. कर्नल एन.पी दक्षिणकर ह पेमेंट गेट-वे साफ्टवेयर लान्च करीन। जेखर जरिया विश्विद्यालय म पढ़ईय्या लईका अउ आवेदक मन खातिर ऑनलाईन प्रवेश शुल्क अउ पंजीयन सुविधा उपलब्ध कराय गे हवय।
– राजनांदगांव रेलवे स्टेशन ले पुलिस ह 14 ग्राम ब्राउन शुगर के संग एक ठिन आरोपी ल गिरफ्तार करीन।
– धमतरी जिला म अर्जुनी अउ साइबर पुलिस टीम ह सेहराडबरी नाका के तीर कार ले गांजा लेगत एक आरोपी ल 51 किलो गांजा के संग गिरफ्तार कर लीन-बरामद करे गे गांजा के कीमत 10 लाख रूपिया बताय गे हवय।