मुख्यमंत्री ह प्रदेस के सरकारी अधिकारी-करमचारी मन ले हड़ताल ल खतम करके काम म लहुटे के अपील करे हे। ओमन अपन ट्वीट संदेस म किहीन कि हड़ताल के सेती आम लोगन मन ल परेसानी होवत हे। मुख्यमंत्री ह किहीन कि राज्य के वित्तीय संसाधन ल देखत अवइया बेरा म कर्मचारी मनके हित म फइसला ले जाही।
जानबा के मुताबिक प्रदेस के अधिकारी-करमचारी मन ह केन्द्र सरकार के करमचारी मन जइसन महंगाई अउ आवास भत्ता देके मांग ल लेके बाईस अगस्त ले अनिश्चितकालीन हड़ताल करत हे।
केन्द्रीय मंत्रिमंडल-दाल आपूर्ति
केन्द्रीय मंत्रिमंडल के आर्थिक कार्यसमिति ह राज्य अउ केन्द्रसासित प्रदेस मन ल कम भाव म चना के दार दे बर मंजूरी दे देहे। ए दार आने-आने कल्याणकारी योजना मन म परयोग करे जाही। ए दार ल आपूर्ति मूल्य समर्थन योजना अउ मूल्य स्थिरीकरण कोष ले बिसाय गे भंडार ले करे जाही। समति ह मूल्य समर्थन योजना के तहत राहेर, उरीद अउ मसूर के दार के खरीदी के सीमा ल पच्चीस प्रतिसत ले बढ़ाके चालीस प्रतिसत कर देहे।
नया जिला-शुभारंभ
मुख्यमंत्री भूपेश बघेल ह दू अउ तीन सितंबर के प्रदेस के नवा बने तीन जिला के सुभारंभ करही। जेमा मोहला-मानपुर-अंबागढ़ चौकी, सारंगढ-बिलाईगढ़ के संगेसंग खैरागढ़-छुईखदान-गंडई सामिल हे।
मुख्यमंत्री ह दू सितंबर के मोहला के मिनी स्टेडियम म राखे गे कारीकरम म छत्तीसगढ़ के नवा उनतीसवां जिला बने मोहला-मानपुर-अंबागढ़ चौकी के सुभारंभ करही। त उहें, तीन सितंबर के सारंगढ़ के खेलभाठा मैदान म राखे गे कारीकरम म तीसवां जिला सारंगढ-बिलाईगढ़ के सुभारंभ करही। इही दिन मुख्यमंत्री ह खैरागढ़ स्थित राजा फतेह सिंह खेल मैदान म राखे गे कारीकरम म इकतीसवां जिला खैरागढ़-छुईखदान-गंडई के सुभारंभ करही।
ट्रेन-बहाल
रेलवे ह हावड़ा ले छूटइया हावडा़-पुणे आजाद हिन्द एक्सप्रेस अउ पुणे ले छूटइया पुणे-हावड़ा आजाद हिन्द एक्सप्रेस रेलगाड़ी ल थोरिक दिन बर बंद करे घोसना करे गे रिहीस, जेला हटा दे गेहे। अब ए रेलगाड़ी ह आज ले चार सितंबर तक अपन बेरा म चलही। संगेसंग चार सितंबर के हावड़ा अउ अहमदाबाद ले छूटइया हावडा़-अमहदाबाद-हावड़ा एक्सप्रेस ह घलो अपन बेरा म चलही।
जानबा के मुताबिक दक्षिण पूर्व मध्य रेलवे म नागपुर रेलमंडल के राजनांदगांव-कलमना रेलखंड के बीच नॉन इंटरलॉकिंग के काम चलत हे, जेखर सेती उनतीस अगस्त ले छह सितंबर तक कतकोन ट्रेन के अवई-जवई ल रद्द कर दे गेहे। उहें, कोनों-कोनों रेलगाड़ी के बेरा म बदलाव करे गेहे।
केन्द्रीय सचिव-छत्तीसगढ़
केन्द्रीय पर्यावरण, वन अउ जलवायु परिवर्तन मंत्रालय के संयुक्त सचिव नीलेश कुमार शाह ह प्रदेस के तीन दिन के दउरा म काली धमतरी जिला के कतकोन गांव के दउरा करीन। ए दउरान ओमन नगरी विकासखंड के बनबगौद अउ बासीखई गांव म चेक डैम के संगेसंग डोकाल गांव म अमृत सरोवर के तहत बनाय गे तरिया के निरीक्षण करीन।
ए दउरान गांव के लोगन मन बतईन कि पहिली अक्टूबर-नवंबर महीना म फसल पाके के बेरा पानी के कमी होवत रिहीस। फेर अब चेक डेम बने ले ए परेसानी के हल होगे हे।
भाजपा-आरोप
भारतीय जनता पार्टी केे प्रदेस प्रवक्ता अउ पूर्व मंत्री केदार कश्यप ह राज्य सरकार उपर बस्तर फाइटर्स के भर्ती प्रक्रिया म गड़बड़ी के आरोप लगाय हे। ओमन किहीन कि ए भर्ती प्रक्रिया म जादा अंक पवइया अभ्यर्थी मनके जघा कम अंक पवइया अभ्यर्थी मन ल चुने गेहे। ओमन किहीन कि इहे के युवक मनके जघा म बाहरी लोगन मनके भर्ती करे गेहे। ओमन पूरा भर्ती प्रक्रिया के स्वतंत्र एजेंसी ले जांच करा के दोसी मनखे उपर कार्रवाई करे के मांग करे हे।
गणेश चतुर्थी
छत्तीसगढ़ के संगेसंग देसभर म आज गणेश चतुर्थी के परब भक्तिभाव अउ उछाह के संग मनाय जात हे। बुद्धि विवेक अउ सौभाग्य-समृद्धि के प्रतीक भगवान गणेश के उत्सव आज ले सुरू होके ग्यारह दिन तक चलही।
राज्य सरकार डहार ले कोरोना संक्रमण ले बचाव बर जारी दिसा-निरदेस म छूट मिले के बाद गणेश उत्सव म जोरदरहा उछाह देखे जात हे। प्रदेस के जम्मों शहर के संगेसंग गांव-गतौरी मन म घलो भगवान गणेश के मूर्ति मन ल बईठाय जात हे। जघा-जघा ढोल-नगाड़ा के संग ‘‘गणपति बप्पा मोरया‘‘ के जयकारा के संग लोगन मन म उछाह देखे जात हे। बाजार मन म घलो भीड़ बाढ़ गेहे। लइका, जवान, सियान जम्मो वर्ग म श्रद्धा के संग खुसी देखे जात हे।
राज्यपाल अनुसुईया उइके ह प्रदेस के लोगन मन ल गणेश चतुर्थी के सुभकामन दे हवय। राज्यपाल ह ए मउका म राजभवन म गोबर ले बने भगवान गणेश के मूर्ति ल बइठाय हे। जानबा के मुताबिक दुरूग जिला के कामधेनू विश्वविद्यालय डहार ले एसो गाय के गोबर ले बने भगवान गणेश के प्रतिमा बनाय गेहे।
फर्जी माओवादी-गिरफ्तार
गरियाबंद जिला के पुलिस ह एक झिन महिला के संग छह फर्जी माओवादी मन ल गिरफ्तार करे हे। पुलिस ह आरोपी मनके तीर ले तीन नग एयरगन, वॉकीटॉकी, माओवदी वर्दी अउ माओवादी पर्चा बरामद करे हे।
जानबा के मुताबिक पकड़े गे आरोपी मन राजिम अउ छुर्रा के रहइया हरय। उहें, महिला अरोपी ह रईपुर के मोवा के रहइया हरय। बताय जात हे कि मामला के मास्टरमाइंड आत्मसमर्पित माओवादी हरय। पकड़े गे ए आरोपी मन ह खुड़ियाडीह गांव के सरपंच ले फिरौती के रूप म पांच लाख रूपिया के मांग करे रिहीन।
अउ अब पेस हे मौसम के हाल…
प्रदेस म काली कोनों-कोनों जघा म गरज-चमक के संग हल्का ले मध्यम बरसा होय के संभावना हे। मौसम विभाग ले मिले जानबा के मुताबिक मानसून द्रोणिका हिमालय के तराई म अभी बने हे, जेखर सेती प्रदेस म काली एक-दू जघा म बरसा के संग गाज घलो गिर सकथे।
ऐति, बीजापुर जिला म होय जोरदरहा बरसा के सेती राष्ट्रीय राजमार्ग क्रमांक-एक सौ तिरसठ म बीजापुर-गीदम रद्दा म पेड़ के गिरे ले अवई-जवई परभावित होय हे।
अउ अब थोरकुन समाचार सार म –
– मुख्यमंत्री ह प्रदेस के जैन धर्म के अनुयायी मन ल पर्युषण परब के सुभकामना दे हवय।
– जशपुर जिला के पंडरापाठ म गाज गिरे ले छह साल के एक झिन नोनी के मउत होगे।
– कांकेर जिला के रहइया भाई-बहिनी मन ल नौकरी देवाय के नाम म भिलाई के युवक मन उपर पन्द्रह लाख रूपिया के ठगी करे के मामला सुपेला पुलिस ह दर्ज करे हे। ए मामला म दू झिन आरोपी मन ल गिरफ्तार कर ले गेहे।
– खैरागढ़ के रहइया दू झिन मनखे मन ले अज्ञात आरोपी मन ह आज भिलाई तीन थाना के पेट्रोल पंप के तीर ले डेढ़ लाख रूपिया लूट लीन।
– दुरूग जिला के मैत्रीबाग म काली सफेद नर शेर के मउत होगे। मैत्री बाग म बछर दू हजार तेरह म जनमे ए नर शेर ल कैंसर के बीमारी होगे रिहीस, जेखर इलाज बिसेसज्ञ डॉक्टर मन करत रिहीन। फेर, ए शेर ल बचाय नइ जा सकीस।
– जांजगीर-चांपा जिला के बलौदा क्षेत्र के रसौटा गांव म खनिज विभाग के अधिकारी मन ले मारपीट करे के मामला म पुलिस ह दू झिन आरोपी मन ल गिरफ्तार करे हे।
– इही जिला के एक ठिन आने घटना म शिवरीनारायण पुलिस ह दस किलो गांजा के संग दू झिन माईलोगिन के संग तीन झिन आरोपी मन ल गिरफ्तार करे हे।
– बिलासपुर जिला के रतनपुर पुलिस अउ क्राईम ब्रांच के टीम ह चंदन तस्करी के मामला म तीन झिन लोगन मन ल गिरफ्तार करे हे। इखर तीर ले करीबन तेईस किलो चंदन के लकड़ी जब्त करे गेहे।
अउ
– धमतरी जेल म एक झिन कैदी फांसी लगाके आत्महत्या कर लीस। ए कैदी ल छेड़खानी के मामला म एक साल के सजा होय रिहीस।