सुनइया मन ल बताइन कि अधिकारी-कर्मचारी केंद्र सरकार के कर्मचारी मनके बराबर महंगाई अउ आवास भत्ता देके मांग ल लेके ए महीना के बाईस तारीख ले अनिश्चितकालीन हड़ताल म हे। काली कर्मचारी संगठन मनके पदाधिकारी मनके मुख्य सचिव ले गोठबात बेनतीजा रीहिस।
इही, बीच भारतीय जनता पार्टी के प्रमुख प्रवक्ता अजय चंद्राकर ह कर्मचारी मनके वेतन रोक के सर्विस ब्रेक के राज्य सरकार के आदेस के विरोध करे हे। ओमन कीहिन कि प्रदेस म भाजपा के सरकार बने म ए आदेस ल रद्द कर दे जाही।ट्रेन रद्द
दक्षिण पूर्व मध्य रेलवे के राजनांदगांव-कलमला रेलखंड के बीच काचेवानी रेलवे स्टेशन ल जोड़े बर नॉन इंटरलॉकिंग के काम करे जात हे। जेखर सेती उनतीस अगस्त ले छै सितंबर तक अंठावन ट्रेन मनके परिचालन ल रद्द कर दे गेहे। उंहे कुछु गाड़ी मनके समय म बदलाव करे गेहे।
रद्द करे गे प्रमुख ट्रेन मन म शालीमार-कुर्ला एक्सप्रेस, अमृतसर-कोरबा- अमृतसर एक्सप्रेस, छत्तीसगढ़ एक्सप्रेस, मुंबई-हावड़ा मेल, अहमदाबाद-हावड़ा एक्सप्रेस, हावड़ा-पुणे आजाद हिन्द एक्सप्रेस, पुणे-हटिया एक्सप्रेस, संतरागाछी-पुणे एक्सप्रेस, बिलासपुर-तिरूनेलवेली एक्सप्रेस, सांईनगर शिरडी-हावड़ा एक्सप्रेस, गांधीधाम-पुरी एक्सप्रेस सामिल हे । अइसने गोंदिया-मुंबई विदर्भ एक्सप्रेस, छत्रपति महाराज टर्मिनल-गोंदिया एक्सप्रेस के समय म बदलाव करे गेहे।
राज्यपाल विधेयक हस्ताक्षर
राज्यपाल अनुसुइया उइके ह छत्तीसगढ़ विधानसभा म अध्यक्ष, उपाध्यक्ष, नेता प्रतिपक्ष, मंत्री अउ सदस्य मनके वेतन संशोधन संबंधी विधेयक के अनुमोदन कर देहे। संशोधन के बाद ये अधिनियम छत्तीसगढ़ अध्यक्ष अउ उपाध्यक्ष वेतन-भत्ता अधिनियम, मंत्री वेतन-भत्ता अधिनियम, नेता प्रतिपक्ष वेतन-भत्ता अधिनियम अउ सदस्य वेतन-पेंशन अधिनियम, केहे जाही।
अइसने राज्यपाल ह आदिम जनजाति मनके संरक्षण अधिनियम म संशोधन बर प्रस्तुत विधेयक उपर हस्ताक्षर कर देहे। संशोधन के बाद ये अधिनियम छत्तीसगढ़ आदिम जनजाति मनके संरक्षण अधिनियम केहे जाही। संशोधन अधिनियम के अनुसार आदिम जनजाति के भू स्वामी ल अपन जमीन म लगे पेड़ ल काटे बर अनुमति कलेक्टर के जगा अनुविभागीय अधिकारी ले लेबर पड़ही।
गृहमंत्री माओवादी समर्पण
गृहमंत्री ताम्रध्वज साहू ह कीहिन कि प्रदेस म पाछू साढ़े तीन बछर म सबले जादा माओवादी मन ह आत्मसमर्पण करे हे। संगेसंग ओमन के गिरफ्तारी घलो करे जात हे। श्री साहू ह कीहिन कि अब बस्तर के विकास बर सरलग प्रयास करे जात हे।
एक निजी चैनल ले गोठबात करत गृहमंत्री ह कीहिन कि प्रदेस म अपराध मनके रोकथाम बर पुलिसिंग ल लेके घलो नवा नीति अपनाय गेहे अउ लोगन मन ल साइबर अपराध ले बांचे बर जागरूक करे जात हे। ओमन कीहिन कि नवा पर्यटन नीति लागू होय ले प्रदेस के संस्कृति अउ पर्यटन ल बढ़ावा मिले के संगेसंग बेरोजगार मन ल रोजगार घलो मिलत हे। राम वनगमन पथ के गोठ करत गृहमंत्री ह कीहिन कि ट्रायबल टूरिज्म म छत्तीसगढ़ के अलग पहिचान बनत हे।
अग्निपथ योजना भर्ती
छत्तीसगढ़ अउ मध्यप्रदेश के जम्मों जिला बर अग्निपथ योजना म महिला सैन्य पुलिस रैली अवइया 19 ले 22 अक्टूबर तक जबलपुर म राखे जाही। ए रैली म सामिल होय बर अभ्यर्थी मन ल सात सितंबर तक ज्वाइन इंडियन आर्मी वेबसाईट म ऑनलाईन पंजीयन कराय बर पड़ही। ए संबंध म अउ जादा जानकारी नवा रायपुर के सेना भर्ती कार्यालय ले ले जा सकत हे।
उंहें भारतीय थल सेना डहार ले अग्निपथ योजना म युवा मनके भर्ती बर अवइया 13 ले 22 नवंबर तक रायपुर म रैली राखे जाही। एमा सामिल होय बर अर्जी देवइया मन ल ज्वाइन इंडियन आर्मी वेबसाइट म तीन सिंतबर तक पंजीयन कराना जरूरी हे। एमा आने-आने पद म भर्ती बर आठवीं ले बारहवीं पास के शैक्षणिक योग्यता तय करे गेहे। ये रैली म भाग लेबर 1 अक्टूबर 1999 ले 1 अप्रैल 2005 के बीच जनम लेवइया अभ्यर्थी पात्र होही। ये रैली ले सामान्य ड्यूटी सैनिक के संगेसंग र्क्ल्क, स्टोर कीपर अउ ट्रेड मैन के पद म भर्ती करे जाही।
कृष्ण कुंज
प्रदेस के सबो नगरीय निकाय मन म लोगन मन ल वृक्षारोपण करे बर अउ वृक्षारोपण के धार्मिक अउ सांस्कृतिक महत्ता ल बढ़ावा देबर कृष्ण कुंज योजना के शुरूआत करे गेहे। ए योजना के निगरानी बर सबो जिला के नोडल अधिकारी मन ल नियुक्त करे गेहे। कृष्ण कुंज योजना के अंतर्गत ऑक्सीजन देवइया पेड़ लगाये जात हे।
जन्माष्टमी के मउका म शुरू होय ए योजना के माध्यम ले प्रदेस भर म दो करोड़ बीस लाख ले जादा पौधा लगाये जाही। एमा चंदन, रूद्राक्ष, बर, पीपल, कदम के संगे-संग फलदार पेड़ सामिल हे।
जापान दूतावास मुलाकात
जापान के वाणिज्यिक दूतावास के प्रतिनिधि मंडल ह राज्यपाल अनुसुइया उइके अउ मुख्यमंत्री भूपेश बघेल ले रायपुर स्थित उंखर निवास कार्यालय म सौजन्य मुलाकात करीन। मुबंई स्थित जापान के कॉन्सुलेट जनरल डॅाक्टर फुकाहोरी यसुकाटा के नेतृत्व म आए प्रतिनिधि मंडल ल राज्यपाल ह छत्तीसगढ़ ले जुड़े विसय मनके जानकारी दीन अउ पारंपरिक विसय मन उपर चर्चा करीन। संगेसंग राज्यपाल ह प्रदेस के बौद्ध धर्म ले जुड़े जगा, जनजातिय संस्कृति अउ उंखर संरक्षण ल बढ़ावा देबर करे जात प्रयास के बारे म जानकारी दीन।
उंह,ें मुख्यमंत्री भूपेश बघेल ह राज्य सरकार के विकास योजना, पर्यटन अउ उद्योग ले जुड़े मामला मनके बारे म बताइन। ए दउरान जापानी प्रतिनिधि मंडल ह छत्तीसगढ़ म जनजाति मनके कौशल, मोनो रेल, सड़क अउ पुल मनके निर्माण म अपन भागीदारी निभाये के इच्छा जताइन।
तीज-गणेश चतुर्थी
सुहागिन मनके पवित्र तिहार तीजा आज प्रदेसभर म श्रद्धा अउ भक्ति ले मनाये जात हे। ए दिन सुहागिन मन निर्जला व्रत राखके अपन पति के लंबा उमर के कामना करथे। राज्यपाल अनुसुइया उइके अउ मुख्यमंत्री भूपेश बघेल ह तीजा के बधाई अउ शुभकामना देहे।
काली गणेश चतुर्थी हे। विघ्नहर्ता भगवान श्री गणेश के स्थापना काली करे जाही। ग्यारा दिन तक चलइया गणेश उत्सव के तैयारी जोर सोर ले चलत हे। इही बीच राज्यपाल अनुसुइया उइके, मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह प्रदेसवासी मन ल गणेश चतुर्थी के बधाई अउ शुभकामना देहे।
अउ अब थोरकुन समाचार सार म –
– राज्य सरकार ह तीन सितंबर शनिचर के जगा एक सितंबर के नवाखाई के एच्छिक अवकाश के घोषणा करे हे।
– एक जड़ी बूटी एक मानक ल प्रोत्साहन देबर भारतीय चिकित्सा अउ होम्यापैथी फार्माकोपिया आयोग अउ भारतीय फार्माकोपिया आयोग के बीच आज एक ठिन समझौता ज्ञापन म हस्ताक्षर करे गीस।
– रायपुर पुलिस ह अवैध रूप ले हथियार राखे के मामला म 14 लोगन मन ल गिरफ्तार करे हे।
अउ
– आज अंतर्राष्ट्रीय व्हेल शार्क दिवस हरय। व्हेल शार्क के महत्ता अउ एखर संरक्षण बर जागरूकता फैलाये के उद्देश्य ले ए दिन ल मनाये जाथे।