राष्ट्रीय खेल दिवस
केन्द्रीय युवा कार्य अउ खेल मंत्रालय ह हॉकी के जादूगर मेजर ध्यानचंद के जयंती के मउका म आज राष्ट्रीय खेल दिवस मनावत हे। केन्द्रीय खेल मामला के सचिव सुजाता चतुर्वेदी ह आकाशवाणी ल बतईन कि आज देस के छब्बीस स्कूल मन म ‘‘मीट द चैंपियन‘‘ कारीकरम के आयोजन करे गेहे।
प्रधानमंत्री नरेन्द्र मोदी ह राष्ट्रीय खेल दिवस के मउका म लोगन मन ल बधाई दे हवय।
त उहें, छत्तीसगढ़ के मुख्यमंत्री भूपेश बघेल ह खेल दिवस के मउका म रईपुर स्थित अपन निवास कार्यालय म मेजर ध्यानचंद के फोटू म फुल चढ़ाके श्रद्धांजलि दीन। ए मउका म मुख्यमंत्री ह किहीन हिक मेचर ध्यानचंद ह अपन बढ़िया खेल के सेती पूरा देस ल गौरवन्वित करे हे।
ऐति, मेजर ध्यानचंद के जयंती अउ राष्ट्रीय खेल दिवस के मउका म जांजगीर-चांपा के मेजर ध्यानचंद हॉकी मैदान ले सद्भावना रैली निकाले गीस। ए रैली म पूर्व हॉकी खिलाड़ी दिनेश शर्मा के संगेसंग बड़ संख्या म हॉकी खिलाड़ी मन सामिल होईन। संगेसंग खिलाड़ी मन ल सम्मानित घलो करे गीस।
शाला भवन-राशि स्वीकृत
राज्य सरकार ह प्रदेस के अइसन स्कूल जउन म मरम्मत के जरूरत हे अउ ओखर रखरखाव बर पांच सौ करोड़ रूपिया के मंजूरी देहे। ए बारे मुख्यमंत्री ह मुख्य सचिव ल जम्मों स्कूल मनके मरम्मत के काम ल बरसात के बाद तुरते सुरू करे के निरदेस देहे।
जानबा के मुताबिक मुख्यमंत्री के प्रदेसव्यापी भेंट-मुलाकात अभियान के दउरान गांव के लोगन मन, जनप्रतिनिधि अउ मीडिया प्रतिनिधि मन ह स्कूल भवन मनके दसा के बारे बताय रिहीन।
कर्मचारी-हड़ताल
पाछु आठ दिन ले हड़ताल करत प्रदेस के सरकारी अधिकारी-करमचारी मन ह आज मुख्य सचिव अमिताभ जैन ले मिलके अपन बात राखीन। छत्तीसगढ़ अधिकारी-कर्मचारी फेडरेशन के संयोजक कमल वर्मा ह किहीन कि करमचारी संगठन मन चाहथे कि मांग ल लेके सरकार डहार ले कोनों बीच के रास्ता निकाले जाय, जेखर ले जउन कामकाज बंद हे अउ आम लोगन मन ल जउन परेसानी होवत हे, ओला ठीक करे जा सकय। गोठबात के दउरान मुख्य सचिव ह किहीन कि करमचारी मनके मांग ल सासन तक पहुंचा दे जाही।
जानबा के मुताबिक प्रदेस के अधिकारी-करमचारी मन ह केन्द्र सरकार के करमचारी मन जइसन महंगाई अउ आवास भत्ता देके मांग ल लेके पाछु बाईस अगस्त ले अनिश्चितकालीन हड़ताल करत हे।
अग्निपथ योजना भर्ती
छत्तीसगढ़ अउ मध्यप्रदेश के जम्मों जिला बर अग्निपथ योजना म महिला सैन्य पुलिस रैली उन्नीस ले बाईस अक्टूबर तक जबलपुर म राखे जाही। ए रैली म संगरे बर अभ्यर्थी मन ल सात सितंबर तक ज्वाइन इंडियन आर्मी वेबसाईट म ऑनलाईन पंजीयन कराय बर पड़ही। ए बारे म अउ जादा जानबा बर फोन नंबर – शून्य सात छह एक दू छह शून्य सात छह तीन सात म संपर्क करे जा सकथे।
उंहें, भारतीय थल सेना कोति ले अग्निपथ योजना म युवा मनके भर्ती बर तेरह ले बाईस नवंबर तक रायपुर म रैली राखे जाही। एमा संगरे बर अर्जी देवइया मन ल ज्वाइन इंडियन आर्मी वेबसाइट म तीन सिंतबर तक पंजीयन कराना जरूरी हे। एमा आने-आने पद म भर्ती बर आठवीं ले बारहवीं पास के शैक्षणिक योग्यता तय करे गेहे। ये रैली म भाग लेबर एक अक्टूबर उन्नीस सौ निन्यानबे ले एक अप्रैल दू हजार पांच के बीच जनम लेवइया अभ्यर्थी पात्र होही। ये रैली ले सामान्य ड्यूटी सैनिक के संगेसंग कलर्क, स्टोर कीपर अउ ट्रेड मैन के पद म भर्ती करे जाही।
पुल-निर्माण
मुख्यमंत्री ह राज्य म पुल-पुलिया के बनत काम म अउ जादा तेजी लाय के संगेसंग बने मटेरियल लगाके सुघ्घर ढंग ले बनाय बर केहे हे। एखर बर प्रदेस के सात जिला मन म करीबन उनचालीस ठिन पुलिया ल बनाय बर नौ सौ सत्ताईस करोड़ रूपिया ले जादा के पइसा मंजूर करे गेहे। ए जिला म जगदलपुर, अंबिकापुर, रायगढ़, बिलासपुर, दुरूग, रईपुर अउ कांकेर जिला सामिल हे।
भाजपा-आरोप
भारतीय जनता पार्टी के प्रदेस अध्यक्ष अरूण साव ह आरोप लगाय हे कि राज्य के कांग्रेस सरकार ह प्रदेस के हर वर्ग ल ठगे हे। आज दुरूग के सर्किट हाउस म पत्रकार मन ले गोठबात करत ओमन किहीन कि कांग्रेस ह अपन जन-घोषणा पत्र म जउन वादा करे रिहीन, ओला पूरा करे म सफल नइ होय हे।
उहें, छत्तीसगढ़ विधानसभा के नेता प्रतिपक्ष नारायण चंदेल ह किहीन हे कि राज्य के कांग्रेस सरकार के गैर-जिम्मेदारना आर्थिक कुप्रबंधन के सेती प्रदेस ह आर्थिक बदहाली के दउर ले गुजरत हे। ओमन किहीन कि देस के कतकोन राज्य म केन्द्र सरकार के जइसन महंगाई भत्ता दे जात हे, फेर राज्य सरकार के गलत नीति के सेती करमचारी अउ अधिकारी मन ल महंगाई अउ आवास भत्ता बने ढंग ले नइ मिल पात हे। ओमन बतईन कि प्रदेस म करमचारी-अधिकारी मन ल तीन ले चार महीना तक के तनखा नइ मिले हे अउ पेंसन पवइया मन ल पेंसन घलो बेरा म नइ मिलत हे। ओमन किहीन कि करमचारी-अधिकारी मनके हड़ताल म जाय ले कामकाज ठप्प पड़ गेहे।
त उहें, भाजपा प्रवक्ता ओ.पी. चौधरी ह किहीन कि प्रदेस के सरपंच मन घलो हड़ताल म बइठे बर मजबूर हे। ओमन किहीन कि केन्द्र सरकार ले ग्राम पंचायत मन ल पन्द्रहवां वित्त के रासि ह सोझे दे जाथे। फेर राज्य सरकार ह पंचायत मनके जरूरत के मुताबिक रासि के परयोग ग्राम पंचायत मन ल नइ करन देत हे।
रमदहा जलप्रपात-हादसा
कोरिया जिला के रमदहा जलप्रपात म बुड़े ले छै झिन लोगन के मउत होगे हे। ए जम्मों झिन के सव ल बरामद कर ले गेहे। मृतक म एकेच परिवार के दू झिन नोनी के संग तीन झन लोगन सामिल हे।
जानबा के मुताबिक ए जम्मों झिन मन काली कोटाडोल थाना क्षेत्र के रमदहा जलप्रपात म पिकनिक मनाय बर गे रिहीन। इही दउरान नहावत बेरा पानी के बाढ़े ले एमन बुढ़ गे। ए जम्मों लोगन मन मध्यप्रदेश के सिंगरौली जिला के बैढ़न के रहइया हरय। मामला के गंभीरता ल देखत क्षेत्रीय विधायक अउ जिला कलेक्टर ह खुदे घटना वाले जघा म गे रिहीन।
ऐति, रईपुर के खारून नंदियां म काली नहाय के दउरान दू झिन किशोर बुड़ गीन, जेमा ले एक झिन के सव ल बरामद कर ले गेहे। बताय जात हे कि टिकरापारा, संतोषीनगर अउ बुरियाखुर्द के रहइया ए छै झिन लइका मन काली खारून नंदियां म नहाय बर गे रिहीन। इही दउरान ए घटना घट गे।
तीज
सुहागिन मनके पवित्र तिहार हरितालिका माने तीजा काली प्रदेस म श्रद्धा अउ भक्ति के संग मनाय जाही। ए दिन सुहागिन मन ह निर्जला उपास रहि के पति के लंबा उमर के कामना करथे। आज रात सुहागिन माईलोगिन मन ह करू भात खाके तीजा परब के सुरूवात करही।
राज्यपाल, मुख्यमंत्री अउ विधानसभा अध्यक्ष ह प्रदेस के माईलोगिन मन तीजा परब के बधाई अउ सुभकामना दे हवय।
अउ अब पेस हे मौसम के हाल…
अवइया चौबीस घंटा के दउरान प्रदेस के कोनों-कोनो जघा म गरज-चमक के संग हल्का ले मध्यम बरसा होय के संभावना हे। मौसम विभाग के मुताबिक मानसून द्रोणिका हिमालय के तराई म बने हे। त उहें, एक ठिन चक्रीय चक्रवाती घेरा उत्तर झारखंड अउ ओखर तीर-तखार म हवय। ऐति, एक ठिन द्रोणिका दक्षिण पूर्व बंगाल के खाड़ी ले दक्षिण तटीय आंध्रप्रदेश तक बने हे, जेखर सेती प्रदेस के कोनो-कोनो जघा म बरसा के संग गाज गिरे के संभावना घलो बताय गेहे।
अउ अब थोरकुन समाचार सार म –
– छत्तीसगढ़ विधानसभा अध्यक्ष डॉक्टर चरणदास महंत ह अपन लंदन प्रवास के दउरान आज किंग हेनरी रोड स्थित डॉक्टर बाबा साहेब भीमराव अंबेडकर के मूर्ति म फुलमाला चढ़ाके ओमन ल सुरता करीन।
– महाराष्ट्र के गढ़चिरौली पुलिस ह तीन झिन इनामी माओवादी मन ल गिरफ्तार करे हे। एखर मन उपर दस लाख रूपिया के इनाम राखे गे रिहीस।
– भिलाई सहर म पाछु रतिहा दुरूग के पुलिस अधीक्षक डॉक्टर अभिषेक पल्लव के अगुवई म दू सौ ले जादा जवान मन ह बाईक म पेट्रोलिंग करीन।
अउ
– रईपुर पुलिस ह डीडी नगर थाना क्षेत्र के सरोना चउक म एक ठिन गाड़ी ले देशी कट्टा, जिंदा कारतूस अउ आने हथियार बरामद करे हे। ए मामला म तीन झिन आरोपी मन ल गिरफ्तार करे गेहे। पुलिस के मुताबिक ए तीनों झन राजस्थान के रहइया हरय।