भाजयुमो आंदोलन/प्रदर्शन-01
भारतीय जनता युवा मोर्चा बेरोजगारी के मुद्दा ल लेके आज रायपुर म राज्य सरकार के खिलाफ घेराव अउ विरोध प्रदर्शन करीन। युवा मोर्चा के ये हल्लाबोल आंदोलन म प्रदेश के आने-आने जिला के पदाधिकारी अउ कार्यकर्ता मन बड़का संख्या म सामिल होइन। भाजयुमो के राष्ट्रीय अध्यक्ष तेजस्वी सूर्या ह ये आंदोलन के नेतृत्व करीन।
मुख्यमंत्री निवास ल घेरे बर निकले कार्यकर्ता अउ पुलिस के बीच कतकोन जगा म झड़प घलो होइस। कार्यकर्ता मन ह ओसीएम चौक अउ कालीबाड़ी चौक म लगाये गे पुलिस बेरिकेड ल तोड़ दीन। एखर बाद पुलिस डहार ले करे गे लाठीचार्ज म कई झिन भाजपा कार्यकर्ता मनके घायल होय के खबर हे। ए बेरा म पुलिस ह भाजपा कार्यकर्ता मन ल गिरप्तार घलो करीन। इंहा पुलिस ह कार्यकर्ता मन ल रोके के पूरा प्रयास करीन। फेर कई झिन कार्यकर्ता मनके संग युवा मोर्चा प्रदेश प्रभारी अनुराग सिंहदेव अउ अकलतरा विधायक सौरभ सिंह ह मुख्यमंत्री निवास तीर पहुंच गीन । जहां ले ओमन ल गिरप्तार कर ले गीस।
एखर ले पहिली रायपुर नगर निगम करा होय सभा म भाजयुमो के राष्ट्रीय अध्यक्ष तेजस्वी सूर्या ह राज्य सरकार ले दिसंबर तक सबो विभाग के रिक्त पद ल भरे के मांग करीन। संगे कीहिन कि अनियमित कर्मचारी मन ल नियमित करे जाय। ओमन ह चेतावनी दीन कि यदि तीन महीना म सबो रिक्त पद उपर भर्ती नइ करे गीस, त फेर आंदोलन करे जाही। सभा म प्रदेश प्रभारी डी. पुरंदेश्वरी, पूर्व मुख्यमंत्री डॅाक्टर रमनसिंह, पूर्व मंत्री अउ विधायक बृजमोहन अग्रवाल समेत जम्मों पदाधिकारी अउ बड़का संख्या म कार्यकर्ता मन मौजूद रीहिन।
भाजयुमो आंदोलन/प्रदर्शन-02
दूसर कोति, कृषि मंत्री रविंद्र चौबे ह रोजगार ल लेके भाजपा उपर हमला बोल दीन। प्रदेश कांग्रेस मुख्यालय राजीव भवम म पत्रकार वार्ता म मंत्री चौबे ह कीहिन कि छत्तीसगढ़ म जब भाजपा के सरकार रीहिस, तब बेरोजगारी दर बाईस प्रतिशत रीहिस जबकि अभी कांग्रेस के शासन म राज्य के बेरोजगारी दर ह शून्य दशमलव सात आठ प्रतिशत हे। ओमन ह बताइन कि छत्तीसगढ़ के युवा मन ल केंद्र सरकार रोजगार देवाय म देश म पहिली स्थान म हे। श्री चौबे ह कीहिन कि कांग्रेस के घोषणा पत्र म कहूं भी बेरोजगारी भत्ता के उल्लेख नइ हे। एखर नाव म भाजपा ह युवा मन म भ्रम फैलावत हे। ओमन ह कीहिन कि प्रदेश सरकार डहार ले सरकारी विभाग म नियमित भर्ती करे जात हे। पत्रकार वार्ता म नगरीय प्रशासन मंत्री डॅाक्टर शिवकुमार डहरिया ह घलो उपस्थित रीहिन।
थर्ड जेंडर स्वास्थ्य बीमा
केंद्रीय सामाजिक न्याय अउ अधिकारिता मंत्रालय ह किन्नर मन ल व्यापक चिकित्सा पैकेज देबर राष्ट्रीय स्वास्थ्य प्राधिकरण के संगेसंग आज एक समझौता ज्ञापन म हस्ताक्षर करे हे।
सामाजिक न्याय अउ अधिकारिता मंत्री डॅाक्टर वीरेंद्र कुमार अउ केंद्रीय स्वास्थ्य मंत्री मनसुख मांडविया ह कार्यक्रम म मौजूद रीहिन। ए बेरा म डॅाक्टर वीरेंद्र कुमार ह कीहिन कि हरएक किन्नर ल हर बछर पांच लाख रूपिया के चिकित्सा बीमा दे जाही। केंद्रीय स्वास्थ्य मंत्री ह कीहिन कि ए समुदाय के संग न्याय होना चाही। मोदी सरकार समाज के दलित अउ कमजोर वर्ग के कल्याण बर प्रतिबद्ध हे।
जानवर-विचरण
गौरेला-पेण्ड्रा-मरवाही जिला के मरवाही वन मंडल म ए बेरा म बीस ले जादा हाथी के दल वन परिक्षेत्र पेण्ड्रा के बीच, कोटमी, केशला, तिलोरा, देवरीकला, देवरीखुर्द के तीर तार म किंजरत हे। इही बीच पाछू रतिहा ए हाथी मन ह कुछु मकान के संगेसंग फसल ल घलो नुकसान पहुंचाइन। वन विभाग ह मुनादी करके गांव वाला मन ल हाथी ले दूर रेहे के चेतावनी देहे।
अइसने गौरेला रेंज के कोरजा गांव म आज बीहनिया एक भालू ह बस्ती म पहुंच गे रीहिस। ओखर बाद कुछु ग्रामीण मन ह भालू ल भगाइन। ओति बलरामपुर जिला के वाड्रफनगर वन परिक्षेत्र के ग्राम पंचायत अलका म बाघ ह पालतू पशु उपर हमला कर दीन। जेखर ले कतकोन जानवर के मउत होगे। सूचना के बाद जिला के वनमंडल अधिकारी विवेकानंद झा ह अपन टीम के संग घटना स्थल अउ तीर तार के जगा के दउरा करके निरीक्षण करीन। ए बारे म एसडीओ फारेस्ट अनिल कुमार पैकरा ह बताइन कि कर्मचारी मनके मउका म तैनाती करके गश्ती ल अउ बढ़ा दे गेहे। एखरे संगेसंग ग्रामीण मन ल जंगल कोति झन जाय अउ सावधान रेहे के सलाह दे गीस।
बेमेतरा अविश्वास
बेमेतरा जिला के थान खम्हरिया नगर पंचायत के अध्यक्ष अंजना राजेश ठाकुर के खिलाफ लाये गे अविश्वास प्रस्ताव पारित होगे हे। पीठासीन अधिकारी धनराज मरकाम के उपस्थिति म कराये गे मतदान म प्रस्ताव के पक्ष म ग्यारा अउ विपक्ष म सिरिफ चार ठिन वोट पड़ीस।
जानबा के अनुसार कांग्रेस के दस झिन पार्षद मन ह नगर पंचायत अध्यक्ष के खिलाफ कई आरोप लगात दस मई के कलेक्टर के आगू अविश्वास प्रस्ताव लाये बर आवेदन दे रीहिन। एखर उपर चर्चा अउ मतदान बर पच्चीस मई के तारीख तय करे गे रीहिस । फेर एखर एक दिन पहिली ही कोर्ट ह ए प्रस्ताव के खिलाफ स्थगन आदेश दे दे रीहिन। उंहें हाईकोर्ट डहार ले स्थगन हटाये जाय के बाद लगभग तीन महीना के बाद आज मतदान कराये गीस।
हेमचंद यादव प्रवेश तिथि
दुर्ग के हेमचंद यादव विश्वविद्यालय ले संबद्ध महाविद्यालय म प्राचार्य के अनुमति ले दस सितंबर तक प्रवेश ले जा सकत हे। विश्वविद्यालय के अधिष्ठाता डॅाक्टर प्रशांत श्रीवास्तव बताइन कि विश्वविद्यालय ले संबद्ध महाविद्यालय म अब तक लगभग साठ प्रतिशत पढ़इया लइका मन ह प्रवेश ले डरे हे। एखर अलावा अब उच्च शिक्षा विभाग डहार ले जारी एक ठिन पत्र के अनुसार महाविद्यालय म रिक्त स्थान होय म महाविद्यालय के प्राचार्य के अनुमति ले दस सितंबर तक अउ विश्वविद्यालय के कुलपति के अनुमति ले बीस सितंबर तक प्रवेश दे जा सकही।
अउ अब थोरकुन समाचार सार म –
– गरियाबंद जिला के मैनपुर थाना म पदस्थ एएसआई शंकरलाल सिदार ह आज थाना म फांसी लगाके आत्महत्या कर लीन। फेर एखर पाछू के कारण अब तक पता नइ चल पाय हे।
– कोंडागांव जिला के फरसगांव थाना क्षेत्र म रंधना गांव के रद्दा म पाछू इक्कीस अगस्त के पुल ल पार करत बेरा पासंगी नदिया म एक झिन जवान लईका बोहागे रीहिस, जेखर शव ल आज बरामद कर ले गेहे।
– कोरबा जिला के बांगो डेम के गेट म पाछू बाईस अगस्त के सेल्फी लेवत बेरा एक झिन जवान लइका गिर गे जेखर अब तक पता नइ चल पाय हे । पहिली कोरबा के रेस्क्यू टीम ह ओला खोजत रीहिस। एखर संगेसंग अब बिलासपुर के टीम ह घलो खोजे के कोसिस करत हे।
– राजनांदगांव जिला के चिचोला पुलिस ह एक सौ छियानबे किलो गांजा के संग कार सवार दू झिन आरोपी ल गिरप्तार करे हे। पुलिस के अनुसार ए आरोपी ह देवभोग ले गांजा लेके पुणे कोति जात रीहिस। जब्त गांजा के कीमत करीबन दस लाख रूपिया बताये जात हे ।
अउ
– उंहे धमतरी जिला के बोराई पुलिस ह एक ठिन गाड़ी ले पांच लाख रूपिया के गांजा ल जब्त करे हे। ए मामला म दू झिन आरोपी ल गिरप्तार करे गेहे।