केन्द्र जइसन महंगाई भत्ता के संगेसंग आने मांग ल लेके राज्य के चार लाख ले जादा सरकारी कर्मचारी मन ह आज ले अनिश्चितकालिन हड़ताल करत हे। कर्मचारी मन केंद्र सरकार के बरोबर महंगाई अउ आवास भत्ता बढ़ाय के मांग करत हे। अधिकारी कर्मचारी फेडरेशन के हड़ताल म प्रदेश के तहसीलदार, नायब तहसीलदार, जिला न्यायालय अउ अधिनस्थ न्यायालय के कर्मचारी मनके संगेसंग करीबन अस्सी ठिन संगठन सामिल हे। हड़ताल ले राज्य के करीबन बावन ठिन विभाग म कामकाज प्रभावित होय हे।
राज्य सरकार ह जिला कलेक्टर मन ल अउ दूसर व्यवस्था करे बर केहे हे। एति मुख्यमंत्री ह ए बारे म कीहिन हे कि राज्य सरकार ह सरलग कर्मचारी मनके हित म काम करत हे। ओमन कीहिन कि अधिकारी कर्मचारी के मांग ल धियान म राखत ओखर मनले गोठबात करे के बादेच छै प्रतिशत महंगाई भत्ता बढ़ाय गीस। जेला कतकेन संगठन मन ह समर्थन घलो करे हे। मुख्यमंत्री ह यहू कीहिन कि कर्मचारी मनके सुविधा ल धियान म राखत राज्य सरकार डहार ले हप्ता म पांच दिन के कामकाज राखे गीस, फेर एखर बाद घलो कर्मचारी मन ह संतुष्ट नइ हे।
जानबा के मुताबिक छत्तीसगढ़ कर्मचारी अधिकारी फेडरेशन के बैनर म राज्य के कर्मचारी मन ह केंद्र सरकार के बरोबर चौंतीस प्रतिशत महंगाई भत्ता, मकान किराया भत्ता अउ सातवां वेतनमान के मांग करत हे । ए बेरा राज्य के कर्मचारी मन ल बाईस फीसदी महंगाई भत्ता मिलत हे।
एति भारतीय जनता पार्टी के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह कीहिन हे कि राज्य सरकार ह ताकत लगाके कर्मचारी मनके आंदोलन ल दबावत हे। ओमन कहिन कि आखिर राज्य सरकार ह प्रदेश के कर्मचारी मन ल केंद्र जइसन महंगाई भत्ता काबर नइ देवत हे ।
केन्द्रीय गृह मंत्री अमित शाह ह आज भोपाल म मध्य क्षेत्रीय परिषद के बइठका के अगवई करीन। छत्तीसगढ़ के मुख्यमंत्री ह घलो वचुअर्ल रूप ल ये बइठका म शामिल होइन। बइठका म राजधानी रायपुर स्थ्ति स्वामी विवेकानंद हवाई अड्डा ल कार्गो हब के रूप म विकसित करे के फैसला ले गीस अउ संगेसंग बइठका म कोदो, कुटकी के न्यूनतम समर्थन मूल्य ल केंद्र सरकार डहार ले घोषित करे उपर सहमति जताय गीस। एखर अलावा गोधन न्याय योजना के तहत बनाये गे वर्मी कम्पोस्ट ल रासायनिक खाद के जइसन न्यूट्रीशन बेस्ड सब्सिडी दे जाही।
बइठका म कुल उन्नीस एजेंडा सामिल करे गे रीहिस। जेमा ले आठ एजेंडा छत्तीसगढ़ डहार ले देगे रीहिस। बइठका म मुख्य सचिव अमिताभ जैन अपर मुख्य सचिव सुब्रत साहू अउ मुख्यमंत्री के सचिव सिद्धार्थ कोमल परदेशी ह सामिल होइन।
राज्य शासन ह सरकारी कर्मचारी मनके तिहार वाले अग्रिम पइसा म बढ़ोत्तरी करत दस हजार रूपिया कर देहे। पहिली ये राशि आठ हजार रूपिया रीहिस । राज्य शासन ह ए फैसला कर्मचारी मनके मांग ल धियान म राखत लेहे।
एमा तिहार अग्रिम के ए राशि ल स्वतंत्रता दिवस, गणतंत्र दिवस, दसरहा, देवारी, होली, रक्षाबंधन, इद-उल-जुहा, इद-उल-फितर अउ क्रिसमस जइसन तिहार के मउका म दे जाही ।
केन्द्र सरकार ह आने-आने मंत्रालय, विभाग अउ सरकारी एजेंसी मनके जम्मों पुरस्कार ल एके मंच म लाये बर राष्ट्रीय पुरस्कार पोर्टल के शुरूआत करे हे। पुरस्कार बांटे म पारदर्शिता लाये अउ जन भागीदारी ल बने करे बर ए बेवस्था करे गेहे। केंद्रीय गृह मंत्रालय ह आज बताइन कि ए साझा पोर्टल पुरस्कार बर मनखे या संगठन मन ल नामित करे के सुविधा दे जाही। पद्म पुरस्कार बर अवइया महीना के पंद्रह तारीख अउ जीवन रक्षा पदक बर नामांकन तीस सितंबर तक ऑनलाइन भेजे जा सकथे।
बस्तर के युवराज सिंह राजपूत ह आई.एफ.एम.ए. विश्व म्यूथाई चैंपियनशिप म कांस्य पदक पाय हे। ए चैंपियनशिप मलेशिया के क्वालालम्पुर म नौ ले इक्कीस अगस्त तक होइस। जानबा के मुताबिक युवराज सिंह राजपूत ह जगदलपुर के रहइया हरय अउ छत्तीसगढ़ ले इकलौता खिलाड़ी प्रतियोगिता म भाग लेबर गे रीहिन। युवराज सिंह राजपूत ह भारत के प्रतिनिधित्व करत कांस्य पदक जीते हे।
भारतीय जनता पार्टी डहार ले चौबीस अगस्त के राजधानी रायपुर म बेरोजगारी भत्ता, अपराध अउ नशाखोरी जइसन कतकोन मुद्दा ल लेके राज्य सरकार के खिलाफ प्रदर्शन करही। ए बारे म आज भाजपा के बड़का नेता अउ विधायक बृजमोहन अग्रवाल ह रायपुर दक्षिण विधानसभा के लाखेनगर, पुरानी बस्ती, सिविल लाईन अउ सदर बाजार मंडल के मैराथन बइठका लीन। ओमन कहिन कि शहर के दक्षिण विधानसभा ले दस हजार ले जादा युवा बेरोजगार मन ये आंदोलन म भाग लीहीं।
एति भाजपा के प्रदर्शन ल देखत राजधानी रायपुर म यातायात म परसानी झन होवय एखर बर गाड़ी मनके अवई जवई के रद्दा ल बदले गेहे।
राजधानी रायपुर के इंडोर स्टेडियम म काली ले शुरू होय तीन दिन के निशुल्क स्वास्थ्य शिविर काली सिराही। शिविर म हैदराबाद अउ रायपुर के बड़का अस्पताल के जाने माने डॅाक्टर मन अपन सेवा देवत हे। शिविर म छब्बीस ठिन ओपीडी चलाये जात हे ।
जेमा कैंसर, ह्दय रोग, अस्थि, किडनी रोग जइसन बीमारी के इलाज के संगेसंग दवई दे जात हे। ए शिविर म मुख्यमंत्री ह घलो शामिल होइन। शिविर म रायपुर के पचास ले जादा डॅाक्टर अउ उंखर टीम के संगेसंग स्वयंसेवी संगठन मन ल सम्मानित करे गीस।
भारतीय थल सेना कोति ले अग्निवीर योजना म युवा मनके भर्ती बर अवइया तेरह ले बाईस नवंबर तक रईपुर म रैली राखे जाही। ए आयोजन म संघरे बर आवेदक मन ल ‘‘ज्वाइन इंडियन आर्मी‘‘ वेबसाइट म तीन सितंबर तक पंजीयन कराना जरूरी हे। एमा आने-आने पद म भर्ती बर आठवीं ले बारहवीं कक्षा पास के सैक्षणिक योग्यता तय करे गेहे। रैली म एक अक्टूबर उन्नीस सौ निन्यानवे ले एक अप्रैल दू हजार पांच के बीच जनम लेवइया अभ्यर्थी पात्र होही।
माओवादी गिरप्तार
सुकमा पुलिस अउ सीआरपीएफ के संयुक्त टीम ह एक झिन इनामी महिला माओवादी ल गिरप्तार करे हे। एखर उपर एक लाख रूपिया के इनाम रीहिस। हमर संवाददाता ले मिले जानबा के मुताबिक सीआरपीएफ के दू सौ छब्बीस बटालियन अउ जिला पुलिस बल के संयुक्त कार्रवाई के दउरान ए महिला माओवादी ल गिरप्तार करे गीस। पुलिस के मुताबिक ये माओवादी संगठन के अध्यक्ष रीहिस अउ एखर उपर ग्यारा ठिन माओवादी घटना म सामिल रेहे के आरोप हे।
– मुख्यमंत्री भूपेश बघेल के जनमदिन के मउका म जन प्रतिनिधि अधिकारी कर्मचारी अउ जनता के मांग उपर काली तेईस अगस्त के मुख्यमंत्री निवास म ग्यारा ले मंझनियां एक बजे तक ओपन हाउस के कार्यक्रम राखे गेहे।
– छत्तीसगढ़ राज्य शैक्षिक अनुसंधान अउ प्रशिक्षण परिषद ह बी.एड. अउ डी.एल.एड. पाठ्यक्रम म प्रवेश बर पहिली चरण के मेरिट सूची जारी कर देहे। दूसरा सूची पांच सितंबर के जारी होही। प्रवेश के प्रक्रिया नौ सितंबर तक चलही।
– परिवहन मंत्री मोहम्मद अकबर के निर्देश उपर विभाग डहार ले विशेष अभियान चलाके पंद्रह दिन म छै ठिन ड्रायविंग स्कूल के खिलाफ परिवहन विभाग के नियम के पालन नइ करे के सेती तुरते प्रभाव ले निलंबित कर देहे।
अउ
– राजनांदगांव म नेशनल हाइवे के डिवाइडर ले टकरा के एक ठिन कार ह अंते-तंते होके पलट गे। ए घटना म कार म बइठे मनखे के मउत होगे।