गृह मंत्री-बैठक
प्रदेस के गृहमंत्री ताम्रध्वज साहू ह आज पुलिस नियंत्रण कक्ष म रईपुर पुलिस के कामकाज के समीक्षा करीन। बइठका म गृहमंत्री ह साइबर सेल अउ सूचना तंत्र ल अउ जादा मजबूत करे बर किहीन, जेखर ले अपराध ल रोके जा सकय। गृहमंत्री ह जम्मों थाना प्रभारी मन ल किहीन कि पीड़ित लोगन मन के रिपोर्ट थाना म जरूरी रूप ले दर्ज करे जाय अउ अपराध ल रोके खातिर रतिहा म जादा गश्त बढ़ाय जाय। ओमन यहू घलो किहीन कि पुलिस ल नगर निगम के संग मिलजुल के अइसन गैरेज संचालक मनके खिलाफ कार्रवाई करना चाही, जउन मन सड़क किनारे अपन गाड़ी मन ल खड़ा कर देथे। एखर संगेसंग गृहमंत्री ह सीसीटीवी कैमरा के संख्या बढ़ाय के बात घलो किहीन, जेखर ले अपराध ल रोके जा सकय। श्री साहू ह पुलिस अधिकारी मन ल स्कूल अउ कॉलेज म जाके पढ़ईया लइका मन ल कानून अउ यातायात के बारे म बता के ओमन ल जागरूक करे के बात घलो किहीन।
राजीव गांधी-जयंती
राष्ट्र आज पूर्व प्रधानमंत्री स्वर्गीय राजीव गांधी के जयंती म श्रद्धांजलि देवत हवय। ए मउका म प्रधानमंत्री नरेन्द्र मोदी ह पूर्व प्रधानमंत्री राजीव गांधी ल अपन श्रद्धांजलि दीन।
ऐति, छत्तीसगढ़ म घलो स्वर्गीय राजीव गांधी के जयंती ल सद्भावना दिवस के रूप म मनाय जावत हे। मुख्यमंत्री भूपेश बघेल ह रईपुर के अपन निवास कार्यालय म पूर्व प्रधानमंत्री स्वर्गीय राजीव गांधी के चित्र म माला पहिना के ओनला नमन करीन। ए मउका म ओमन जम्मों लोगन मन ल सद्भावना दिवस के सपथ घलो दिलईन।
राजीव गांधी न्याय योजना-राशि
पूर्व प्रधानमंत्री स्वर्गीय राजीव गांधी के जयंती के मउका म आज मुख्यमंत्री भूपेश बघेल ह राज्य के किसान, पशुपालक, गौठान समिति अउ महिला स्व-सहायता समूह मनके खाता म 17 सौ 50 करोड़ रूपिया ले जादा के रासि ऑनलाइन जमा करीन। एमा राजीव गांधी किसान न्याय योजना म 26 लाख ले जादा किसान मनके खाता म इनपुट सब्सिडी के रूप म दूसर किस्त 1 हजार 7 सौ 45 करोड़ रूपिया के रासि ट्रांसफर करे गीस। उहें, मुख्यमंत्री ह गोधन न्याय योजना के हितग्राही मन ल करीबन 5 करोड़ 25 लाख रूपिया के रासि के भुगतान करीन, जेमा गोबर बेचइया मन ल दू करोड़ 64 लाख रूपिया, गौठान समिति अउ स्व-सहायता समूह मन ल दू करोड़ 60 लाख रूपिया सामिल हवय।
ए मउका म मुख्यमंत्री ह किहीन कि किसान मनके खुसहाली राज्य सरकार खातिर बड़ संतोष के बिसय हवय। ओमन घोसना करीन कि प्रदेस म सबले जादा वर्मी कम्पोस्ट उपयोग करइया किसान मन ल राज्योत्सव म सम्मानित घलो करे जाही।
स्मार्ट क्लास
प्रदेस के स्कूल मन म अब ले पढ़ईया लइका मन ह स्मार्ट क्लास म पढ़ाई करही, जेखर सेती टीवी डिवाइस के उपयोग करे जाही। ए कारीकरम, न सिरिफ लइका मन ल गणित अउ अंग्रेजी जइसन कठिन बिसय ल समझे म मदद करही बल्कि, एखर ले प्राथमिक स्तर के लइका मनके पढे़ म रूचि घलो बाढ़ही।
प्राथमिक स्कूल मन म ए नवाचार म तकनीकी सहयोग खातिर छत्तीसगढ़ राज्य शैक्षिक अनुसंधान अउ प्रशिक्षण परिषद के संगेसंग संपर्क फाउंडेशन के बीच तीन साल बर समझौता ज्ञापन म दस्तखत करे गीस। ए कारीकरम के उद्देश्य गणित अउ अंग्रेजी विषय खातिर 21 हजार ले जादा सरकारी स्कूल मन म पहिली ले पांचवीं कक्षा तक लइका मनके पढ़ई-सिखई ल बढ़ाना हे।
स्कूल शिक्षा मंत्री डॉक्टर प्रेमसाय सिंह टेकाम ह किहीन हे कि एस.सी.ई.आर.टी. अउ संपर्क फाउंडेशन के बीच होय साझेदारी प्राथमिक स्कूल के पढ़ईया लइका मन खातिर सीखे म मददगार साबित होही। संगेसंग एखर दूसर सुघ्घर परिणाम घलो देखे ल मिलही।
हमर तिरंगा अभियान
देस के आजादी के 75 बछर पूरा होय म राज्य के सबो सासकीय, निजी अउ अनुदान प्राप्त स्कूल मन म आज ले ‘‘हमर तिरंगा कारीकरम‘‘ आयोजित करे जावत हे। 30 अगस्त तक चलइया ए कारीकरम के उद्देश्य ‘‘हमर तिरंगा‘‘ कारीकरम के नाव ले पढ़ईया लइका अउ लोगन मनके बीच देशभक्ति के भावना अउ संविधान बर आस्था जगाना हवय। एखर तहत स्कूल मन म आने-आने कारीकरम के आयोजन करे जावत हे।
महतारी न्याय रथ
माईलोगिन मन ल अपन अधिकार के प्रति जागरूक करे सेती ‘‘मुख्यमंत्री महतारी न्याय रथ‘‘ ह रईपुर सहर के आने-आने जघा मन म किंजरत हवय। न्याय रथ ह काली नारी निकेतन शासकीय बालिका गृह पहुंचीस।
छत्तीसगढ़ राज्य महिला आयोग के अध्यक्ष डॉक्टर किरणमयी नायक ह बतईन कि ए न्याय रथ म एलईडी स्क्रीन के जरिया लघु फिल्म दिखाय जावत हे। रथ के संग वकील अउ आयोग के अधिकारी-करमचारी घलो रहिथे। ए दउरान पीड़ित माईलोगिन मनके सिकायत ल सुन के ओला तुरते-तुरत दूर करे जावत हवय।
रेडियो श्रोता दिवस
रेडियो श्रोता दिवस के मउका म आज ओल्ड लिसनर्स ग्रुप ऑफ छत्तीसगढ़ जोन डहार ले रईपुर के सिविल लाईन के वृंदावन हॉल म एक ठिन बिसेस कारीकरम के आयोजन करे गीस, जेमा मुख्य अतिथि आकाशवाणी केन्द्र रईपुर के कार्यालय प्रमुख अउ सहायक निदेशक लखनलाल भौर्य रिहीन। कारीकरम के अध्यक्षता पूर्व जिला पंचायत अध्यक्ष अशोक बजाज ह करीन। ए मउका म रेडियो सुनइया अउ कलाकार मन ल प्रशस्ति पत्र अउ स्मृति चिन्ह देके सम्मानित घलो करे गीस। उहें, रेडियो कारीकरम मन म रूचि रखइया श्रोता मन ल रेडियो के सेट प्रदान करे गीस।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत ‘‘बारिस के मौसम म स्वास्थ्य बर अनुकूल उपाय उपर रईपुर के शासकीय आयुर्वेदिक कालेज के सह प्राध्यापक अउ रजिस्ट्रार डॉक्टर संजय शुक्ला के भेंटवार्ता प्रसारित करे जाही। एखर प्रसारण आकाशवाणी केन्द्र रायपुर डहार ले काली बिहनिया 9 बजके 30 मिनट म करे जाही। एला छत्तीसगढ़ के जम्मों आकाशवाणी केन्द्र एके संघरा रिले करही।
जिले की चिट्ठी
सुनइया मन ल बतादन कि आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘धमतरी‘‘ जिला के गतिविधि मनके बारे म जानकारी दे जाही।
गणेश प्रतिमा
प्रदेस म गणेश उत्सव के तियारी सुरू होगे हवय। पंडाल अउ घर मन म स्थापित होवइया भगवान गणेश के मूर्ति ल बनाय म कलाकार मन जुटे हवय।
ए दारी घलो पर्यावरण ल देखत गणेश मूर्ति ल मिट्टी ले ही बनाय जावत हे। उहें, राज्य सासन डहार ले प्लास्टर ऑफ पेरिस के मूर्ति मनके बनाय म रोक लगाय गे हवय।
इही कड़ी म राजनांदगांव नगर निगम प्रसासन डहार ले घलो मूर्ति बनइया मनखे मन ल गणेश मूर्ति ल माटी ले बनाय के बात केहे गे हवय।
अउ अब थोरकुन समाचार सार म –
– जांजगीर-चांपा जिला म केरा रोड के पास ट्रेलर के जोरदरहा टक्कर ले सड़क किनारे खड़े एक मनखे के मउत होगीस। मृतक एस.ई.सी.एल. के रिटायर कर्मचारी रिहीस।
– इही जिला के हसौद थाना क्षेत्र म मुख्य मार्ग म तालाब के तीर बोर म पानी भरे बर गीस एक झिन बस चालक के करेंट लगे ले मउत होगीस।
अउ
– भिलाई नगर पावर पाउस के तीर पाछु रतिहा तारकोल ले भरे एक ठिन टैंकर म आग लग गीस। बाद म फायद बिग्रेड के मदद ले आग म काबू पा ले गीस।