उप राष्ट्रपति-शपथ
भारत के चौदहवां उप राष्ट्रपति के रूप म जगदीप धनखड़ ह आज शपथ लीन। राष्ट्रपति द्रौपदी मूर्मू ह ओनला ल राष्ट्रपति भवन म शपथ देवईन। ए मउका म प्रधानमंत्री नरेन्द्र मोदी, पूर्व राष्ट्रपति रामनाथ कोविंद, लोकसभा अध्यक्ष ओम बिड़ला, रक्षा मंत्री राजनाथ सिंह अउ कतकोन केन्द्रीय मंत्री मन ह राष्ट्रपति भवन म उपस्थित रिहीन। शपथ ग्रहण ले पहिली आज बिहनिया श्री धनखड़ ह राजघाट म राष्ट्रपिता महात्मा गांधी ल अपन श्रद्धांजलि अर्पित करीन। ओमन गांधी स्मारक म फूलमाला चढ़ाके समाधि ल नमन करीन।
बारिश
प्रदेस के कतकोन जिला म पाछु दू-तीन दिन ले होवत सरलग बरसा ले ज्यादातर नदी-नाला उफान म हवय। दुरूग जिला म सरलग बारिस होय ले शिवनाथ नदी के पानी के बहाव अब्बड़ बाड़ गे हवय, जेखर ले दुरूग-धमधा, दुरूग-गंडई, दुरूग-जालबांधा अउ दुरूग-बेरला मार्ग म अवई-जवई परभावित होय हवय। उहें, आने-आने क्षेत्र मन म बाढ़ के स्थिति घलो बन गे हवय। कोनारी भरदा गांव के बाढ़ म फंसे तीन झिन लोगन मन ल एस.डी.आर.एफ. के रेस्क्यू टीम ह बचाव करके ओमन ल सुरक्षित स्थान म पहुंचईन। एखर अलावा डंडेसरा गांव म घलो बाढ़ म फंसे दू झिन लोगन मन ल बचाके सुरक्षित जघा म पहुंचा दे गे हवय।
अइसनेच, राजनांदगांव-डोंगरगांव ले लगे रूद्रगांव के एकेच परिवार के छै झिन मनखे मन पाछु रतिहा बाढ़ म फंस गे रिहीन, जेखर सूचना मिले के बाद डोंगरगांव पुलिस ह जम्मों मनखे मन ल बचाव करके निकाल लीन।
ऐति, बेमेतरा जिला म पाछु 24 घंटा ले होवत सरलग बारिस होय ले मोंगरा बैराज समेत आने-आने बांध मनके गेट खोल दे गे हवय, जेखर ले शिवनाथ, खारून नदी अउ हाफ, सुरही, करूवा नाला के जलस्तर तेजी ले बाढ़त हवय, जेला देखत जिला प्रसासन ह नदी के किनारे म बसे गांव मनके रहइया मन ल अलर्ट जारी कर लोगन मन ले सुरक्षित स्थान म जाय के अपील करीन हे।
ओति, जांजगीर-चांपा जिला म महानदी के पानी बाढ़े ले शिवनीनारायण म शबरी सेतू ले एक फीट नीचे पानी बोहावत हे। प्रसासन ह खतरा ल देखत तटीय क्षेत्र म मुनादी करा के लोगन मन ल बच के रेहे बर किहीन हे।
हर घर तिरंगा-डाकघर
जम्मों देस म डाकघर ह हर घर तिरंगा अभियान के तहत मनखे मन ल आसानी ले हमर राष्ट्र के झंडा देवाय के बेवस्था करे हे। डाकघर मन ले सिरिफ पच्चीस रूपिया म तिरंगा ले जा सकत हवय। संचार मंत्रालय ह बतईन कि बड़ संख्या म लोगन मन ई-डाकघर के जरिया ले ऑनलाइन तिरंगा मंगावत हवय। डाक विभाग जम्मों देस म कोन्हों भी पता म बिना कोनों सुल्क लेके तिरंगा पहुंचावत हवय। मंत्रालय ह सही बेरा म झंडा प्राप्त करे खातिर 12 अगस्त के रतिहा ले पहिली ऑनलाइन ऑर्डर दे खातिर अनुरोध करे हे।
हर घर तिरंगा अभियान
आजादी के 75 बछर पूरा होय म जम्मों देस म 13 ले 15 अगस्त तक हर घर तिरंगा अभियान चलाय जाही, जेखर बारे म जागरूकता लाय खातिर छत्तीसगढ़ म कतकोन कारीकरम आयोजित करे जावत हे।
प्रदेस के महिला अउ बाल विकास मंत्री अनिला भेंडिया ह आज ले 17 अगस्त तक स्वतंत्रता सप्ताह के चलत अपन-अपन घर, संस्थान अउ दुकान मन म राष्ट्रीय झंडा फहरा के हमर तिरंगा अभियान ल सफल बनाय के अपील करीन हे। ओमन लोगन मन ले स्वतंत्रता सप्ताह सेती बनाय गे बिसेस तिरंगा के डीपी फ्रेम ल अपन-अपन प्रोफाइल फोटो लगाय के आग्रह घलो करीन।
मिनीमाता-पुण्यतिथि
छत्तीसगढ़ के प्रथम महिला सांसद मिनीमाता के आज पुण्यतिथि हवय। ए मउका म मुख्यमंत्री भूपेश बघेल ह अपन निवास कार्यालय म उंखर तैलचित्र म फूलमाला चढ़ाके ओनला नमन करीन। मुख्यमंत्री ह कहिन कि मिनीमाता के सेवाभावी अउ प्रेरणादायी व्यक्तित्व ल हमेसा याद राखे जाही। ओमन किहीन कि सरल अउ सहज स्वभाव के मिनीमाता ह अपन पूरा जिनगी मनखे मनके सेवा करे म लगा दे रिहीन।
ए मउका म मुख्यमंत्री ह रईपुर जिला के अछोली-आरंग गांव के आदर्श सहायता समूह ल नशामुक्ति अभियान म बिसेस योगदान दे खातिर सम्मानित करीन।
प्रधानमंत्री शहरी आवास योजना
केन्द्रीय मंत्रिमंडल ह प्रधानमंत्री शहरी आवास योजना के तहत सबो मन खातिर आवास मिशन 31 दिसंबर 2024 तक जारी राखे के स्वीकृति दे दीन हे। ए योजना म ए बछर 31 मार्च तक स्वीकृत 122 लाख ले जादा आवास मन ल पूरा करे खातिर वित्तीय सहायता उपलब्ध कराय जावत हे। देस के सहरी क्षेत्र मन म जम्मों पात्र लाभार्थी मन ल पक्का मकान देवाय खातिर ए योजना केन्द्र सरकार के परमुख योजना म एक हवय। राज्य अउ केन्द्रसासित प्रदेस मन ह ए योजना ल जारी राखे के अनुरोध करे रिहीन।
रोहित मिंज-चयन
एनसीसी कैडेट रोहित मिंज 15 अगस्त के नई दिल्ली म आयोजित होवइया स्वतंत्रता दिवस समारोह म छत्तीसगढ़ के प्रतिनिधित्व करही। बलरामपुर शासकीय महाविद्यालय के रोहित मिंज ह बी.ए. अंतिम बछर म पढ़त हवय। लइका मिंज ह राज्य के बिसेस पिछड़ा मुरिया जनजाति के , जीवन-शैली, कला अउ वेशभूषा के प्रदर्सन करही। रोहित मिंच के चुनई 6 जुलाई ले चलत एक भारत-श्रेष्ठ भारत स्वतंत्रता दिवस सिविर ले होय हवय।
माओवादी-समाचार
बीजापुर जिला म एक झिन इनामी माओवादी ह पुलिस अधीक्षक के आगू आत्मसमर्पण करीस हे। ए माओवादी उपर 1 लाख रूपिया के इनाम घोसित रिहीस। एखर उपर बछर 2017 म होय बुरकापाल माओवादी समेत 19 ठिन माओवादी घटना मन म सामिल रेहे के आरोप हवय।
उहें, इही जिला के कोतवाली थाना क्षेत्र म एक झिन गोपनीय सैनिक के हत्या करे जाय के मामला आगू आय हवय। जिला के पुलिस अधीक्षक ह बतईन कि गोपनीय सैनिक लक्ष्मण पोट्टम किराये के मकान म राहत रिहीस।
बीजापुर जिला केहीच बांगापाल थाना क्षेत्र के कवरगांव म माओवादी मन ह नेलासनार रहइया एक झिन गांव के मनखे के गला रेतके हत्या कर दीन। जानबा के मुताबिक पाछु 8 अगस्त के माओवादी मन ह ए गांव के मनखे ल अगुवा कर ले रिहीन।
रक्षाबंधन
भाई बहिनी के पवित्र स्नेह के प्रतीक रक्षाबंधन के तिहार आज छत्तीसगढ़ समेत जम्मों देस म बड़ उछाह के संग मनाय जावत हे। राखी तिहार, अपन बहिनी खातिर भाई के प्रेम अउ कर्तव्य के प्रतीक हवय। आज के दिन बहिनी मन ह अपन भाई मनके हाथ म रक्षासूत्र बांधते अउ मिठाई खवाथे। भाईमन घलो अपन-अपन बहिनी मन के रक्षा करे के संकल्प लेके ओमन ल उपहार देथे। राष्ट्रपति द्रौपदी मुर्मू, प्रधानमंत्री नरेन्द्र मोदी, राज्यपाल अनुसुईया उइके अउ मुख्यमंत्री भूपेश बघेल ह रक्षाबंधन के मउका म लोगन मन ल अपन बधाई दीन हे।
रक्षाबंधन के तिहार के मउका म दुरूग जिला के शिवजी अर्पण सेवा समिति डहार ले ए बछर घलो बी.एस.एफ. बटालियन के जवान मन संग रक्षाबंधन तिहार मनाय जावत हे। ए मउका म समिति के बहिनी मन बटालियन के जवान मनके माथा म तिलक लगा के राखी बांधीन अउ उंखर मनके अशीर्वाद-उपहार लीन।
उहें, कोंडागांव म आने-आने स्कूल मनके लइका अउ शिक्षिका मन ह पुलिस जवान अउ अधिकारी मन ल राखी बांधीन। ए मउका म पुलिस अधीक्षक दिव्यांग पटेल ह जिला के बहिनी मनके सुरक्षा के वादा करीन।
ऐति, बीजापुर जिला म महेश्वरी समाज के महिला मन ह सी.आर.पी.एफ. के जवान मन ल राखी बांध के उंखर मन ले रक्षा के वचन मांगीन।
रक्षाबंधन
भाई बहिनी के पवित्र स्नेह के प्रतीक रक्षाबंधन के तिहार आज छत्तीसगढ़ समेत जम्मों देस म बड़ उछाह के संग मनाय जावत हे। राखी तिहार, अपन बहिनी खातिर भाई के प्रेम अउ कर्तव्य के प्रतीक हवय। आज के दिन बहिनी मन ह अपन भाई मनके हाथ म रक्षासूत्र बांधते अउ मिठाई खवाथे। भाईमन घलो अपन-अपन बहिनी मन के रक्षा करे के संकल्प लेके ओमन ल उपहार देथे। राष्ट्रपति द्रौपदी मुर्मू, प्रधानमंत्री नरेन्द्र मोदी, राज्यपाल अनुसुईया उइके अउ मुख्यमंत्री भूपेश बघेल ह रक्षाबंधन के मउका म लोगन मन ल अपन बधाई दीन हे।
रक्षाबंधन के तिहार के मउका म दुरूग जिला के शिवजी अर्पण सेवा समिति डहार ले ए बछर घलो बी.एस.एफ. बटालियन के जवान मन संग रक्षाबंधन तिहार मनाय जावत हे। ए मउका म समिति के बहिनी मन बटालियन के जवान मनके माथा म तिलक लगा के राखी बांधीन अउ उंखर मनके अशीर्वाद-उपहार लीन।
उहें, कोंडागांव म आने-आने स्कूल मनके लइका अउ शिक्षिका मन ह पुलिस जवान अउ अधिकारी मन ल राखी बांधीन। ए मउका म पुलिस अधीक्षक दिव्यांग पटेल ह जिला के बहिनी मनके सुरक्षा के वादा करीन।
ऐति, बीजापुर जिला म महेश्वरी समाज के महिला मन ह सी.आर.पी.एफ. के जवान मन ल राखी बांध के उंखर मन ले रक्षा के वचन मांगीन।