आज दिनभर के खबर ल अपन गुरतुर छत्तीसगढ़ी भाखा म पढ़व

विश्व आदिवासी दिवस

आज विश्व आदिवासी दिवस हरय। ए मउका म राजधानी रईपुर संग प्रदेसभर म कतकोन कारीकरम के आयोजन करे जात हे।
मुख्यमंत्री भूपेश बघेल ह आज रईपुर म आयोजित सर्व आदिवासी समाज के कारीकरम म सामिल होईन। अपन संबोधन म ओमन कहिन कि पेसा कानून पहिली ले अस्तित्व म रिहीस। फेर, एखर नियम नइ बने के सेती एखर फायदा आदिवासी मन ल नइ मिलत रिहीस। मुख्यमंत्री ह कहिन कि छत्तीसगढ़ म पेसा अधिनियम ल लेके नियम बन चुके हे अउ एखर बर आठ अगस्त के राजपत्र म प्रकासन घलो करे जा चुके हे। एखर ले आदिवासी अपन जल-जंगल-जमीन ल लेके खुद फइसला ले सकही। मुख्यमंत्री ह कहिन कि पेसा कानून लागू होय ले आदिवासी मनके ग्राम सभा म अधिकार बढ़ही। नवा नियम ले ग्राम सभा के पचास प्रतिसत सदस्य आदिवासी समुदाय ले होही, जेमा ले पच्चीस प्रतिशत माईलोगिन सदस्य होही। ए मउका म मुख्यमंत्री ह राज्य म आदिवासी मनके हित म चलावत आने-आने सासकीय योजना मन ल घलो बतईन।
उहें, मुख्यमंत्री ह आज वीडियो कान्फ्रेंसिंग के माध्यम ले विश्व आदिवासी दिवस के मउका म आयोजित कारीकरम ल संबोधित करत कहिन कि राज्य सरकार ह आदिवासी मनके संस्कृति ल सहेजे अउ संरक्षित करे के काम करत हे। ए मउका म मुख्यमंत्री ह आदिम जाति अनुसंधान प्रशिक्षण संस्थान डहार ले प्रकाशित ‘आदि विद्रोह अउ चवालीस आने पुस्तक के विमोचन करीन। ओमन ह वन अधिकार के प्रति ग्राम सभा जागरूकता अभियान के कैलेंडर, अभियान गीत अउ सामुदायिक वन संसाधन अधिकार के वीडियो संदेश के घलो विमोचन करीन।

भाजपा प्रदेश अध्यक्ष नियुक्ति

सांसद अरूण साव ल भारतीय जनता पार्टी के नवा अध्यक्ष बनाय गेहे। ए नियुक्ति तत्काल प्रभाव ले लागू कर दे गेहे। वर्तमान अध्यक्ष विष्णुदेव साय ल प्रदेस अध्यक्ष के पद ले हटा दे गेहे। पार्टी के राष्ट्रीय महासचिव अउ मुख्य प्रभारी अरूण सिंह ह एक ठिन बयान जारी करके बतईन कि पार्टी के राष्ट्रीय अध्यक्ष जगत प्रकाश नड्डा के निरदेस म श्री साव ल ए जिम्मेदारी सौंपे गेहे। श्री साव अखिल भारतीय विद्यार्थी परिषद अउ भाजपा म आने-आने पद म रेहे रिहीन।
उंखर नियुक्ति म पार्टी राष्ट्रीय उपाध्यक्ष डॉक्टर रमन सिंह अउ नेता प्रतिपक्ष धरमलाल कौशिक संग आने नेता मन खुसी जताय हे। श्री कौशिक ह उम्मीद जताय हे कि श्री साव सबला लेके चलही अउ उंखर म काम करे के क्षमता हे।

हर घर तिरंगा

आजादी के पचहत्तर साल पूरा होय म देसभर म हर घर तिरंगा अभियान चलाय जात हे। इही कड़ी म जशपुर नगर म जिला प्रसासन डहार ले काली बस स्टैंड ले स्वामी आत्मानंद हिन्दी माध्यम विद्यालय तक पचहत्तर मीटर के झंडा के संग तीन किलोमीटर लंबा तिरंगा यात्रा निकाले गीस।
उहें, राजनांदगांव म घलो ए अभियान ल लेके लोगन म भारी उछाह हे। डाकघर म बड़का संख्या म तिरंगा के बिक्री होवत हे। उहें, देशभक्ति के भावना जागृत करे खातिर इहां सेल्फी पाइंट घलो बनाय गेहे।
इही बीच, राजनांदगांव के गायत्री विद्यापीठ म आईटीबीपी के जवान डहार ले युद्धक हथियार के एक ठिन प्रदर्सनी लगाय गेहे। ए प्रदर्सनी म सबो हथियार के मारक क्षमता अउ उंखर विशेषता ल बिस्तर ले बताय गेहे। ए प्रदर्सनी ल लके लइका मन बिसेस आकर्षण देखे बर मिलत हे।

कांग्रेस-गौरव पदयात्रा

दूसर डहार, प्रदेस कांग्रेस के तिरंगा पदयात्रा आज ले राज्य के सबो नब्बे विधानसभा क्षेत्र ले सुरू होईस। पन्द्रह अगस्त क चलइया ए तिरंगा यात्रा के दउरान हर यात्रा म पचहत्तर किलोमीटर के दूरी तय करे जाही।
प्रदेस कांग्रेस अध्यक्ष मोहन मरकाम कोंडागांव ले निकाले गे तिरंगा यात्रा म सामिल होईन। यात्रा के समापन पन्द्रह अगस्त के होही। यात्रा के दउरान स्वतंत्रता संग्राम सेनानी मनके परिजन मन ल सम्मान करे जाही।
उहें, लोक निर्माण अउ गृह मंत्री ताम्रध्वज साहू के अगुवई म दुरूग ग्रामीण विधानसभा क्षेत्र ले ए यात्रा सुरू होईस। ए मउका म श्री साहू ह कहिन कि स्वतंत्रता संग्राम के सहीद मनके बलिदान ल सुरता करके अउ उंखर जीवन गाथा ल आम लोगन तक पहुंचाय बर ए यात्रा निकाले जात हे।
इही तरह, स्वास्थ्य मंत्री टी.एस. सिंहदेव ह आज सरगुजा जिला के उदयपुर ले आजादी गौरव पदयात्रा के सुरूवात करीन। ए पदयात्रा देवगढ़ मंदिर ले भदवाही, खमरीया, रीखी, सोनतराई, मिरगाडाड़ होवत बाईस किलोमीटर तक यात्रा करके उदयपुर पहुंचही।

अमृत महोत्सव प्रश्नोत्तरी

आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– सूरत नमक आंदोलन कोन बछर होय रिहीस ?

श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।

मुहर्रम

मुहर्रम आज देस के आने-आने भाग म श्रद्धा अउ आस्था के संग मनाय जात हे। करबला अउ सत्य अउ न्याय के रक्षा बर पैगम्बर मोहम्मद के नवासा हजरत इमाम हुसैन अउ उंखर साथी के सहादत के सुरता म मुहर्रम मनाय जाथे। ए मउका म ताजिया निकाले जाथे अउ करबला के सहीद मनके सर्वोच्च बलिदान के सुरता म मजलिस के आयोजन करे जाथे।
ऐति, छत्तीसगढ़ म घलो मुहर्रम के मउका म राजधानी रईपुर संग कतकोन सहर म ताजिया निकाले जात हे। रईपुर म करबला म हजरत हुसैन के बड़का कुर्बानी ल सुरता करत मजलिस माने धार्मिक बैठक के आयोजन आज रतिहा करे जाही। रईपुर म ए बेरा ताजिया के संगेसंग जुलूस निकाले जात हे, जेमा बड़का संख्या म मुस्लिम समाज के लोगन सामिल होवत हे।
प्रधानमंत्री नरेन्द्र मोदी ह कहिन कि अशूरा-ए-मुहर्रम हजरत इमाम हुसैन के कुर्बानी ल सुरता करे के दिन हरय। श्री मोदी ह अपन ट्वीट म कहिन कि हजरत इमाम हुसैन ल सच्चाई बर उंखर अटूट प्रतिबद्धता अउ अन्याय के खिलाफ लड़ाई बर सुरता करे जाथे।

माओवादी-गिरफ्तार

बीजापुर जिला म माओवादी मनके संग मुठभेड़ म जवान मन ल बड़का सफलता मिले हे। मुठभेड़ के बाद जवान मन ह सर्चिंग के दउरान एक झिन माओवादी ल गिरफ्तार करीन हे। उहें, मउका ले एक ठिन एसएलआर, एक इनसोस अउ एक ठिन तीन सौ तीन रायफल बरामद करे गेहे। बस्तर रेंज के पुलिस महानिरीक्षक पी. सुंदरराज अउ पुलिस के पुलिस अधीक्षक आंजनेय वार्ष्णेय ह एक ठिन प्रेसवार्ता म बतईन कि जवान मन डहार ले करे गे जवाबी कार्रवाई के बाद माओवादी मन अपन कैम्प छोड़के भाग निकलीन। जिला म भारी बारिस के सेती जवान मन ल ए अभियान ल पूरा करे म बहुत परेसानी के सामान करे बर पड़त हे। तभो ले जवान मन भागे माओवादी मनके खोज करत हे।

बारिश

मौसम विभाग ह अवइया चौबीस घंटा के दउरान प्रदेस के कतकोन जिला म भारी बारिश होय के चेतावनी देहे। बस्तर संभाग के संग धमतरी, महासमुंद, राजनांदगांव, बालोद, गरियाबंद अउ ओखर ले लगे जिला बर ऑरेंज अलर्ट जारी करे गेहे। उहें, रईपुर, दुरूग, कबीरधाम, बलौदाबाजार अउ जांजगीर अउ ओखर ले लगे जिला मन म यलो अलर्ट के चेतावनी देके भारी बरसा होय अउ आकाशीय बिजली गिरे के आसंका जताय गेहे।
इही बीच, तेज बरसा के सेती बीजापुर अउ जगदलपुर के बीच सड़क संपर्क आज घलो बंद हवय। बांगापाल इलाका म पुल के उपर ले पानी बहे के सेती इहां के सड़क कट गेहे, जेखर ले राष्ट्रीय राजमार्ग क्रमांग-तिरसठ म अवई-जवई बाधित होय हे अउ रद्दा के दूनों तरफ गाड़ी मनके लंबा लाइन लगे हे। उहें, राजनांदगांव जिला म घलो तेज बरसा होवत हे।
ऐति, राजधानी रईपुर म घलो पाछु दू दिन ले रूक-रूक पानी गिरत हे। आज दिनभर बरसा होवत हे, जेखर ले कतकोन निचला इलाका म पानी भर गेहे।