आज दिनभर के खबर ल अपन गुरतुर छत्तीसगढ़ी भाखा म पढ़व

हरेली 01

हरेली तिहार आज प्रदेश भर म उछाह के संग मनाये जात हे। सावन महीना के अमावस्या के दिन ये परब म किसान मन अपन खेती किसानी के औजार के संग कुलदेवता ग्रामदेवता के पूजा-पाठ करीन। हरेली के ये तिहार पर्यावरण अउ प्रकृति बर जुड़ाव के संगेसंग लोक संस्कृति ल घलो बताथे। राज्य शासन कोति ले प्रदेशभर म जगह-जगह कतकोन आयोजन राखे गेहे, गेंड़ी दौड़ मुख्य हे।

मुख्यमंत्री भूपेश बघेल ह आज रायपुर म अपन निवास म कृषि यंत्र के पूजा-पाठ करीन । ओखर बाद मुख्यमंत्री निवास म राउत नाचा, कर्मा नृत्य, आदिवासी नृत्य के कलाकार मन ह अपन पारंपरिक वाद्य संग लोक नृत्य प्रस्तुत करीन। आज हरेली परब के मउका म मुख्यमंत्री ह प्रदेश के कुछएक गौठान मन म गौ-मूत्र खरीदी अउ गौ-मूत्र टेस्टिंग कीट के शुभारंभ करीन।

छत्तीसगढ़ देश के पहिली राज्य हे जिहां पशुपालक गांव के लोगन ले दू रूपिया किलो म गोबर बिसाय के बाद अब चार रूपिया लीटर के दर ले गौ-मूत्र बिसावत हे। मुख्यमंत्री ह ये मउका म राज्य के जैविक खाद उत्पादक करीबन साढ़े सात हजार महिला समूह ल सतरा करोड़ रूपिया के प्रोत्साहन राशि बांटीन।  आजे मुख्यमंत्री ह अपन आवास परिसर मुख्यमंत्री महतारी न्याय रथ ल हरिहर झंडी दिखाके रवाना करीन।

हरेली-02

महिला आयोग के पहल म प्रदेश के माइलोगिन मन ल उंखर अधिकार अउ कानून के जानकारी देके जागरूक करे अउ आत्मविश्वास बढ़ाय बर ये न्याय रथयात्रा शुरू करे गेहे। पहिली चरण म रथ प्रदेश के नौ ठिन जिला म जाही एखर शुरूआत दुर्ग जिला ले होही। ये अभियान म माइलोगिन मन ल मुफत म कानूनी सहायता दे जाही। न्याय रथ म माइलोगिन मन अपन समस्या ले जुड़े अर्जी दे सकत हे, जेखर निपटारा आयोग कोति ले करे जाही।
हरेली परब म काली दुर्ग के पुलिस लाइन म महिला पुलिस अधिकारी अउ कर्मचारी मन ह हरिहर रंग के कपड़ा पहिनके मानव श्रृंखला ले छत्तीसगढ़ राज्य के नक्शा बनाइन। ये बेरा म राज्यगीत के धुन के संग प्रदेश के खुशहाली अउ उन्नति बर प्रार्थना करे गीस।
ए आयोजन म पुलिस अधीक्षक डॅाक्टर अभिषेक पल्लव समेत आने बड़का अधिकारी शामिल होइन।

विस-अविश्वास प्रस्ताव

राज्य सरकार के खिलाफ विधानसभा म लाये गे अविश्वास प्रस्ताव करीबन तेरह घंटा के चर्चा के बाद ध्वनिमत ले नामंजूर होगे। छत्तीसगढ़ विधानसभा के मानसून सत्र के आखरी दिन काली ये अविश्वास प्रस्ताव म रतिहा डेढ़ बजे तक चर्चा होइस। ए बेरा विपक्ष कोति ले उठाय गे मुद्दा के जुआब देत मुख्यमंत्री भूपेश बघेल ह कीहिन कि राज्य सरकार ह किसान आदिवासी अउ माइलोगन के कल्याण बर विशेष रूप ले योजना शुरू करे हे। उंखर सरकार ह आखरी छोर के मनखे ल केंद्र म राखके योजना बनाये हे। ओमन स्कूल शिक्षा ल अउ बने बनाये बर स्वामी आत्मानंद अंग्रेजी विद्यालय योजना के चर्चा घलो करीन।
मुख्यमंत्री ह कीहिन कि राज्य सरकार के आने आने योजना के सेती होय नवाचार ले देश अउ दुनिया म प्रशंसा होवत हे। फेर विपक्ष ह जउन मुद्दा ल लेके राज्य सरकार के खिलाफ अविश्वास प्रस्ताव राखे हे ओखर कोनो आधार दिखाई नइ देवत हे। एखर पहिली अविश्वास प्रस्ताव म चर्चा करत नेता प्रतिपक्ष धरमलाल कौशिक ह कीहिन कि राज्य सरकार के कुछएक मंत्री अउ विधायक के ही अपन सरकार म भरोसा नइ रहि गेहे। श्री कौशिक ह आरोप लगाइन कि राज्य सरकार ह शराब बंदी के वादा करे रीहिन, फेर एखर बर कोनो किसम के प्रयास नइ करे गेहे। ओमन राज्य सरकार उपर भ्रष्टाचार अउ वादा खिलाफी के आरोप घलो लगाइन ।

माओवादी समर्पण

दंतेवाड़ा जिला म तीन झिन माओवादी मन ह आत्मसमर्पण करे हे। ये तीनो मिलिट्री दलम के सदस्य बताये जात हे। इंखर मन उपर अठारा लाख रूपिया के इनाम घोषित रीहिस। पुलिस अधीक्षक सिद्धार्थ तिवारी ह बताइन कि ये माओवादी मन ह लोन वर्राटू अभियान म अपन हथियार छोड़के समाज के मुख्यधारा म सामिल होय के संकलप लीन। ये अभियान म अभी तक एक सौ छत्तीस इनामी समेत करीबन साढ़े पांच सौ माओवादी समर्पण करे हे।
खबर के मुताबिक माओवादी मन ह आज ले शहीदी सप्ताह मनाये के        एलान करे हे। माओवादी मनके शहीदी सप्ताह के बेरा संगठन के प्रमुख सदस्य मन कोति ले करे गे आत्मसमर्पण ल पुलिस अधीक्षक ह बड़े कामयाबी बतात हे।

हरघर तिरंगा अभियान

आजादी के अमृत महोत्सव म देशभर म अवइया तेरह ले पंद्रह अगस्त तक हर घर तिरंगा अभियान चलाये जाही। ये दउरान विश्वविद्यालय अउ महाविद्यालय म राष्ट्रीय सेवा योजना एनएसएस के कैडेट जम्मों झन ल अपन घर म तिरंगा फहराय बर प्रेरित करही। एमा दुरूग के हेमचंद यादव विश्वविद्यालय के कुलपति डॅाक्टर अरूणा पल्टा ह विश्वविद्यालय म हर घर तिरंगा अभियान के शुरूआत करीन।
कार्यक्रम म बोलत ओमन कीहिन कि देशभक्ति के भावना कोनो विशेष दिन ये बेरा तक सीमित नइ हे। वो ह जीनगी के हर पल म हमला प्रेरित करथे। ए बेरा म विश्वविद्यालय म एनएसएस के संयोजक डॅाक्टर आर.पी. अग्रवाल ह कीहिन कि लोगन म देशभक्ति के भावना जगाय बर ये अभियान चलाये जात हे।

कर्मचारी अधिकारी हड़ताल

केंद्र सरकार के कर्मचारी मन असन चौंतीस प्रतिशत महंगाई अउ गृह भाड़ा भत्ता के मांग ल लेके प्रदेशभर के सरकारी कर्मचारी मनके हड़ताल आज चौथा  दिन घलो जारी रीहिस। इही बीच कर्मचारी मनके ये आंदोलन ल भारतीय जनता पार्टी ह अपन समर्थन देके एलान करीन हे।
प्रदेश भाजपा अध्यक्ष विष्णुदेव साय ह धरनास्थल म पहुंचके आंदोलन करइया मनले भेंट करीन अउ अपन समर्थन के भरोसा देवइन।

पुलिस वृक्षारोपण

बस्तर संभाग म पुलिस कोति ले आज ले वृक्षारोपण के विशेष अभियान शुरू करे गेहे। उंहा के बोली म एला पोदला उरस्कना के नाव दे गेहे। ए संबंध म बस्तर रेंज के पुलिस महानिरीक्षक सुंदरराज पी. ह बताइन कि ये अभियान म बस्तर के जम्मों थाना क्षेत्र म बड़ पैमाना म पौधा लगाये जाही। आज हरेली के मउका म कोंडागांव जिला के इरा गांव थाना परिसर म पौधा लगाये के संगेसंग उंखर जतन करे के संकलप ले गीस।
बस्तर पुलिस कोति ले शुरू करे गे पौधारोपण अभियान के ये दूसर बछर हे। एसो ये अभियान हरेली तिहार के दिन ले शुरू होके अवइया नौ अगस्त के आदिवासी दिवस म सिराही।

चुनाव आयोग युवा

चुनाव आयोग ह केहे हे कि सतरा बछर ले जादा आयु के युवा अपन नाव मतदाता सूची म दरज कराय बर पहिली ले अर्जी दे सकत हे। आयोग के मुताबिक युवा मन ल बछर के पहिली जनवरी के अठारा बछर के आयु पूरा होय ले जुड़े मापदंड के अगोरा करे के जरूरत नइ हे।
मुख्य निर्वाचन आयुक्त राजीव कुमार अउ निर्वाचन आयुक्त अनुपचंद पांडेय ह जम्मों राज्य के मुख्य निर्वाचन अधिकारी अउ चुनाव पंजीकरण अधिकारी मन ल ए संबंध म निर्देश देहे।

सिहावा विधायक-मामला दर्ज

दुर्ग पुलिस ह सिहावा के कांग्रेस विधायक डॅाक्टर लक्ष्मी धु्रव के खिलाफ धोखाधड़ी के मामला दर्ज करे हे। पुलिस के मुताबिक विधायक उपर दोहरा पद म रेहे अउ भिलाई के रहइया माइलोगन ल एक प्रायवेट शिक्षण संस्थान के डायरेक्टर बनाय के नाव म उंखर तीर ले करीबन चौबीस लाख रूपिया के ठगी करे के आरोप हे। ये मामला म आज दुर्ग के प्रथम श्रेणी न्यायिक दंडाधिकारी अमृता दिनेश मिश्रा के अदालत म सुनवाई होइस।
खबर के मुताबिक भिलाई निवासी महिला के सिकइत म अदालत ह संज्ञान लेत पुलिस ल धोखाधड़ी के मामला दर्ज करे के निर्देश दे रीहिस।

बस्तर दशहरा

हरेली अमावस्या के संग आजले पचहत्तर दिन तक चलइया विश्व प्रसिद्ध बस्तर दशहरा के परब शुरू होगे हे। ये परब के पहिली दिन आज पाट जात्रा के रसम करे गीस। बस्तर दशहरा बर रथ बनाये के लकड़ी ल आज बिरौली गांव ले जगदलपुर के दंतेश्वरी मंदिर लाके पूजापाठ करे गीस। ये पूजा म रथ बनइया कारीगर मांझी चालकी के संग स्थानीय जन प्रतिनिधि अउ जिला कलेक्टर चंदन कुमार मौजूद रीहिन।