आज दिनभर के खबर ल अपन गुरतुर छत्तीसगढ़ी भाखा म पढ़व

विधानसभा समाचार

छत्तीसगढ़ विधानसभा के मानसून सत्र के पांचवां दिन आज सदन म चौदह हजार ले जादा सिक्षक मनके भर्ती प्रक्रिया ल लेके विपक्ष ह हंगामा करीन। प्रश्नकाल म भाजपा विधायक अजय चंद्राकर ह सिक्षा विभाग के कार्यप्रणाली म सवाल उठावत किहीन कि ए पद म बेरोजगार मनके भर्ती कर दे गेहे। फेर, तीन साल म दस्तावेज के सत्यापन तक नइ हो पाय हे। इही बेरा म स्कूल शिक्षा मंत्री डॉक्टर प्रेमसाय सिंह टेकाम संग श्री चंद्राकर के नोंकझोक होगे अउ सही जुवाब नइ मिले म पूरक सवाल पूछे ले मना कर दीन। पाछु ए मामला म विधानसभा अध्यक्ष डॉक्टर चरणदास महंत ह हस्तक्षेप करत निरदेस दीन कि समय सीमा म बेरोजगार मनके भर्ती सुनिश्चित करय।
उहें, सदन म आज बहुजन समाज पार्टी के सदस्य इंदु बंजारे ह सीमांकन अउ नामांतरण बर पटवारी मन कोति ले पइसा मांगे जाय के आरोप लगईन। ओमन किहीन कि पटवारी मनके खिलाफ गजब सिकईत आवत हे। बेरा म काम नइ होवत हे। एमा सत्तापक्ष के सदस्य मन ह आपत्ति जतात किहीन कि बिन परमाण के आरोप लगाना गलत हे। विपक्षी सदस्य मन संग ए संबंध म नोंकझोंक घलो होईस।

द्रौपदी मुर्मू-राज्यपाल मुलाकात

राष्ट्रपति द्रौपदी मुर्मू ले छत्तीसगढ़ के राज्यपाल अनुसुईया उइके ह राष्ट्रपति भवन म भेंट करके सुभकामना दीन। ए बेरा म सुश्री उइके ह श्रीमती मुर्मू ल छत्तीसगढ़ ले जुड़े कतकोन महत्वपूर्ण विषय अउ समस्या ल बतईन। राज्यपाल ह पेसा कानून ले जुड़े नियम के क्रियान्वयन बर राष्ट्रपति ले आग्रह करीन। संगेसंग नगरीय क्षेत्र बर संसद म लंबित मेसा कानून ले जुड़े विधेयक ल जल्दी पारित कराय के आग्रह करीन। मेसा कानून के बने ले नगरीय क्षेत्र म आरक्षण संबंधी नियम विधिवत लागू हो जही।

बिजली महोत्सव

आजादी के अमृत महोत्सव म ‘‘उज्जवल भारत, उज्जवल भविष्य ऊर्जा-दू हजार सैंतालीस‘‘ बिजली महोत्सव के काली प्रदेस के ठिन ठन जिला धमतरी, गरियाबंद अउ बलरामपुर ले सुरू होईस। अवइया तीस जुलाई तक हरेक जिला के दू जघा म बिजली महोत्सव के आयोजन करे जाही, जेमा म बिजली ले लोगन के जिनगी म आय बदलाव ल बताय म जोर दे जाही। महोत्सव के बेरा छत्तीसगढ़ शासन के योजना के संगेसंग केन्द्र सरकार के सौभाग्य योजना, दीनदयाल उपाध्याय ग्राम ज्योति योजना, कुसुम योजना अउ उपभोक्ता मनके अधिकार समेत आने योजना मनके संबंध म लोगन ल जानकारी दे जावत हे।
रईपुर जिला म ए महोत्सव काली सत्ताईस जुलाई के इंजीनियरिंग कालेज सेजबहार अउ अट्ठाईस जुलाई के मंगलभवन धरसीवां म मनाय जाही। महोत्सव म नुक्कड़ नाटक, फिल्म के स्क्रीनिंग, प्रदर्शनी जइसन कतकोन कारीकरम होही।
तीस जुलाई के बिजली महोत्सव के समापन कारीकरम म प्रधानमंत्री नरेन्द्र मोदी देश के सौ ठन जिला म वीडियो कान्फ्रेंसिंग ले सोझे जुड़ही। एमा छत्तीसगढ़ के पांच जिला रईपुर, बिलासपुर, अंबिकापुर, जगदलपुर अउ धमतरी ल सामिल करे गेहे।

एक भारत-श्रेष्ठ भारत

आजादी के अमृत महोत्सव एक भारत-श्रेष्ठ भारत कार्यक्रम म छत्तीसगढ़ ले पचास झिन विद्यार्थी समेत चौव्वन झिन प्रतिभागी मनके एक दल गुजरात घूमे बर गे हे। अपन पांच दिवसीय दौरा के बाद ए दल के सदस्य मन ल गुजरात के संस्कृति, परंपरा जाने के मउका मिलही।
खबर के मुताबिक एक भारत-श्रेष्ठ भारत कारीकरम म मानव संसाधन विकास मंत्रालय, स्कूल शिक्षा अउ साक्षरता विभाग कोति ले दूनों राज्य के बीच सुरू करे गे ए योजना के उद्देश्य सांस्कृतिक संबंध ले देस के आने-आने हिस्सा म एकता ल बढ़ावा देना हे।

अमृत महोत्सव-भाजपा

भारतीय जनता पार्टी के छत्तीसगढ़ इकाई कोति ले आजादी के अमृत महोत्सव म कतकोन कारीकरम होवत हे। अवइया अट्ठाईस जुलाई के मंडल स्तर म कारीकरम होही। एखर बर प्रभारी तय कर दे गेहे। एमा घुमका मंडल म राखे गे बइठका म आजादी के अमृत महोत्सव के संबंध म जागरूकता कारीकरम के आयोजन करे जाही।

संबित पात्रा-पत्रकारवार्ता

आजादी के अमृत महोत्सव म हर-घर तिरंगा अभियान म सामिल होय बर भारतीय जनता पार्टी के राष्ट्रीय प्रवक्ता संबित पात्रा आज रईपुर पहुंचीन। ए बेरा म ओमन पार्टी कार्यालय म एक बइठका लीन। पाछु पत्रकार मन ले गोठबात करत श्री पात्रा ह कांग्रेस उपर निसाना साधीन। ओमन नेशनल हेराल्ड मामला म कांग्रेस के सत्याग्रह ल देखावा बतईन। श्री पात्रा ह सोनिया गांधी ले ईडी के पूछताछ म किहीन कि कहूं भ्रष्टाचार होही त ओखर जांच करे जाही, फेर विपक्ष भ्रष्टाचार के जांच नइ चाहत हे। ओमन किहीन कि जउन किसम के माहौल कांग्रेस पार्टी ए बिसय ल लेके बनात हे, ओला पूरा देस देखत हे। श्री पात्रा ह यहू किहीन कि विपक्ष तीर आज मुद्दा के कमी हे।

अमृत महोत्सव प्रश्नोत्तरी

आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– कोन क्रांतिकारी ह चटगांव शस्त्रागार हमलावर – ‘‘संस्मरण‘‘ किताब लिखे रिहीन।

श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।

माओवादी-मुठभेड़

दंतेवाड़ा जिला म पुलिस संग होय मुठभेड़ म एक माओवादी मारे गीस। एखर उपर पांच लाख रूपिया के इनाम घोसित रिहीस हे अउ थाना म एखर खिलाफ उन्नीस ठन मामला दरज रिहीस।
खबर के मुताबिक कटेकल्याण थाना क्षेत्र के जबरामेटा के जंगल म पाछु रतिहा गश्त म निकले पुलिस जवान अउ माओवादी मनके बीच मुठभेड़ होईस। क्षेत्र के तलाशी के बेरा पुलिस ह माओवादी के सव बरामद कर लेहे, जेखर पहिचान बुधराम मरकाम के रूप म करे गेहे।
ऐति, अवइया अट्ठाईस जुलाई ले दू अगस्त के बीच माओवादी मनके शहीदी सप्ताह ल देखत राजनांदगांव जिला के सीमावर्ती क्षेत्र म पुलिस ह सर्च ऑपरेशन तेज कर देहे। पुलिस अधीक्षक प्रफुल्ल ठाकुर ह जिला के माओवाद प्रभावित मानपुर, खड़गांव, सीतागांव अउ मदनवाड़ा के संगेसंग गातापार, बोरतलाव जइसन सरहदी क्षेत्र गश्त बढ़ाय के निरदेस दीन हे। ए संबंध म ओमन थाना, चौकी अउ कैम्प प्रभारी मनके बइठका लीन।

करगिल विजय दिवस

करगिल विजय दिवस म राष्ट्र आज शहीद मन ल श्रद्धांजलि देवत हे। बछर उन्नीस सौ निन्यानवे म ऑपरेशन विजय म भारतीय सशस्त्र बल के जीत के सुरता म ए दिवस मनाय जाथे।
राष्ट्रपति द्रौपदी मुर्मू, उप राष्ट्रपति एम. वेकैंया नायडू, प्रधानमंत्री नरेन्द्र मोदी अउ रक्षा मंत्री राजनाथ सिंह ह करगिल दिवस म शहीद जवान मन ल सुरता करीन।
उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो करगिल विजय दिवस म सहीद मन ल श्रद्धांजलि दीन।

हाईकोर्ट-विवि नोटिस

छत्तीसगढ़ उच्च न्यायालय ह मैट्स अउ आई.एस.बी.एम. प्राईवेट विश्वविद्यालय के फर्जी डिग्री मामला म राज्य सासन अउ दूनों विश्वविद्यालय के प्रबंधन समेत छह झिन पक्षकार मन ल नोटिस जारी करत जुवाब दे बर केहे हे। न्यायालय ह ए संबंध म दायर एक जनहित याचिका म सुनवाई करत नोटिस जारी करे हे।
खबर के मुताबिक ए याचिका म प्रदेस म उच्च सिक्षा के नाव म विश्वविद्यालय कोति ले होवत गड़बड़ी के हवाला देवत आरोप लगाय रिहीस कि दूनों विश्वविद्यालय ह कई गुना जादा मार्कसीट बांटे हे। संगेसंग ए दूनों संस्थान ओमन ल डिग्री बांटत हे, जउन मन कभू ए संस्थान म भर्ती नइ लेहे।