द्रौपदी मुर्मू-शपथ
द्रौपदी मुर्मू ह आज देश के पन्द्रहवां राष्ट्रपति के रूप म शपथ लीन। संसद के केन्द्रीय कक्ष म एक ठिन समारोह म प्रधान न्यायाधीश एन.वी. रमण ह ओमन ल सपथ देवईन।
सपथ ग्रहण के बाद राष्ट्रपति ह अपन संबोधन म किहीन कि भारतीय लोकतंत्र के ए बड़का बात हरय कि देस के दूर-दराज के जघा ले घलो एक झिन गरीब महिला ह राष्ट्रपति बने हे। राष्ट्रपति ह किहीन कि संसदीय लोकतंत्र के रूप म पचहत्तर साल म भारत ह आम लोगन मनके सहमति ले प्रगति के संकलप ल आगू बढ़ाय हे। ओमन किहीन कि विविधता ले भरपूर देश के कतकोन भासा, धर्म, सम्प्रदाय, रीतिरिवाज ल अपना के एक भारत-श्रेष्ठ भारत बनाय म लगे हे।
श्रीमती मुर्मू ह किहीन कि अमृतकाल जउन स्वतंत्रता के पचहत्तरवां साल के संग सुरू होवत हे। भारत बर नवा संकल्प के बेरा हरय। ओमन किहीन कि ए पच्चीस बछर म अमृत काल के लक्ष्य ल अपनाय के रद्दा हे – ‘‘सबका प्रयास और सबका कर्तव्य‘‘।
कारगिल विजय दिवस के मउका म देसवासी मन ल बधाई देवत ओमन किहीन कि ए दिन ह सशस्त्र बल के शौर्य के प्रतीक हरय। कोविड महामारी के दउरान देस के प्रयास के प्रसंसा करत राष्ट्रपति ह किहीन कि दू सौ करोड़ कोविडरोधी टीका लगाना एक ठिन बड़का सफलता हरय। सपथ ग्रहण समारोह के समापन के बाद राष्ट्रपति भवन के प्रांगण म तीनों सेना कोति ले राष्ट्रपति गार्ड ऑफ ऑनर पेस करे गीस।
समारोह म राज्यसभा के सभापति एम. वेकैंया नायडू, प्रधानमंत्री नरेन्द्र मोदी, लोकसभा अध्यक्ष ओम बिरला, केन्द्रीय मंत्री, राज्य मनके राज्यपाल, मुख्यमंत्री, अउ आने बड़का लोगन मन आय रिहीन।
विधानसभा समाचार
छत्तीसगढ़ विधानसभा के मानसून सत्र के चौथा दिन आज सदन म वरिष्ठ विधायक बृजमोहन अग्रवाल ह राज्य सरकार उपर सरकारी कर्मचारी मनके संग वादाखिलाफी के आरोप लगावत काम रोको प्रस्ताव लईन अउ स्थगन ग्राह्य करा के एखर उपर चर्चा कराय के मांग करीन। ओमन किहीन कि प्रदेस के करमचारी मन ल केन्द्र सरकार के करमचारी मन जइसन चौंतीस प्रतिसत महंगाई भत्ता अउ गृह भाड़ा दे जाय।
विधानसभा म आज राजस्व मंत्री जयसिंह अग्रवाल ह कोरबा के राजस्व निरीक्षक अउ पटवारी ल निलंबित करे के घोसना करीन। प्रश्नकाल के बाद एक ठिन ध्यानाकर्षण सूचना के माध्यम ले जनता कांग्रेस छत्तीसगढ़ के धर्मजीत सिंह अउ भाजपा के बृजमोहन अग्रवाल ह प्रदेस म भू-माफिया डहार ले प्रदेस के सरकारी भूईंया मन ल कब्जा करे के बारे म जानबा मांगीन। एखर जवाब म राजस्व मंत्री ह मामला ल देखवाय के बात किहीन। श्री अग्रवाल ह किहीन कि कोरबा जिला के गांव बरबसपुर के मामला म अतिक्रमण पाय गेहे। ए बारे म पटवारी के प्रतिवेदन उपर छह सौ पांच ठिन प्रकरण दरज करे गेहे अउ ए मामला ह न्यायालय म लंबित हे। विपक्षी सदस्य मन ह राजस्व निरीक्षक अउ पटवारी उपर मिलीभगत करके सरकारी भूईंया म भू-माफिया मन ल कब्जा देवाय के आरोप लगईन। एखर बाद राजस्व मंत्री ह राजस्व निरीक्षक अउ पटवारी ल निलंबित करे के घोसना करीन।
सदन म आज शून्यकाल के दउरान भाजपा विधायक शिवरतन शर्मा ह प्रदेस म बिगड़त कानून व्यवस्था के मामला उठईन। उहें, भाजपा के बृजमोहन अग्रवाल ह कोयला चोरी अउ बाढ़त आपराधिक घटना उपर सदन म चर्चा कराय बर किहीन। एखर उपर आसंदी ह विपक्ष के मांग क खारिज कर दीन, जेखर बाद नाराज विपक्षी सदस्य मन ह नाराबाजी करीन अउ एखरे सेती सदन के कार्यवाही ल पांच मिनट बर स्थगित कर दे गीस।
कर्मचारी-अधिकारी-हड़ताल
केन्द्र सरकार के कर्मचारी मन जइसन चौंतीस प्रतिशत महंगाई अउ गृह भाड़ा भत्ता के मांग ल लेके प्रदेस के सरकारी करमचारी मन आज ले हड़ताल म चले गेहे। छत्तीसगढ़ कर्मचारी-अधिकारी फेडरेशन के बैनर म ए करमचारी मन ह उनतीस जुलाई तक हड़ताल करही। ए हड़ताल म अस्सी ले जादा करमचारी संगठन मन सामिल हे। ए करमचारी मन अपन-अपन ऑफिस के आगू धरना-प्रदर्शन करीन। ए प्रदर्सन म सिक्षक संगठन मन घलो सामिल होय हे, जेखर सेती सरकारी स्कूल मन म बंद रिहीस।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– ओ स्वतंत्रता सेनानी के नाम बतावव, जेखर खिलाफ ब्रिटिश शासन ह उन्नीस सौ अट्ठाईस म तत्कालीन साउथ इंडियन रेलवे म हड़ताल कराय के सेती मुकदमा चलाय रिहीन ? ए स्वतंत्रता सेनानी ह देस म पहिली घांव मई दिवस के आयोजन करे रिहीन।
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
हर घर तिरंगा अभियान
आजादी के अमृत महोत्सव म तेरह ले पन्द्रह अगस्त तक हर घर तिरंगा अभियान राखे जाही। इही कड़ी म आज दुरूग जिला म स्थित मरौदा सेक्टर के सशस्त्र सीमा बल-एसएसबी मुख्यालय ले एनसीसी अउ एनएसएस के कैडेट मनके संग स्कूल-कालेज के छात्र मन ह जागरूकता रैली निकालीन।
एसएसबी भिलाई के उप महानिरीक्षक थॉमस चाको ह बतईन कि प्रधानमंत्री के आह्वान उपर हर घर तिरंगा फहराय के जागरूकता अभियान के सुरूवात होगे हे। ओमन बतईन कि ए अभियान म अवइया बेरा म एसएसबी डहार ले साइकिल रैली अउ गाड़ी मनके रैली के माध्यम ले जागरूकता अभियान चलाके लोगन मन ले राष्ट्रध्वज फहराय के अपील करे जाही।
ऐति, मुंगेली जिला म घलो भारतीय जनता पार्टी के कार्यकर्ता मन ह लोगन मन ल एखर बारे म जागरूक करत हवय। ए दउरान ओमन अपन-अपन क्षेत्र म लगे महापुरूष मनके मूर्ति के साफ-सफई घलो करही।
उहें, राजनांदगांव जिला कलेक्टर ह घलो जम्मों अधिकारी मन ले केहे हे कि ओमन हर-घर झंडा अभियान के तहत ग्राम पंचायत मन म सरपंच अउ सचिव मन ल हर-घर झंडा लगाय बर काहय।
कोविड टीका
राष्ट्रव्यापी टीकाकरण अभियान के तहत अब तक दू सौ दू करोड़ सत्रह लाख ले जादा कोविडरोधी टीका लगाय जा चुके हे। केन्द्रीय स्वास्थ्य मंत्रालय ह बतईन कि काली सोलह लाख बयासी हजार ले जादा टीका लगाय गीस।
ऐति, छत्तीसगढ़ म घलो कोरोना टीकाकरण अभियान म तेजी आ गेहे। अब तक प्रदेस म चार करोड़ चालीस लाख निन्यानवे हजार ले जादा टीका लगाय जा चुके हे। उहें, दुरूग जिला म तीस जुलाई ले एक अगस्त तक प्रिकॉशन डोज लगाय बर विशेष अभियान चलाय जाही। ए तीन दिन म पांच लाख लोगन मन ल टीका लगाय के लक्ष्य राखे गेहे।
उहें, प्रदेस म काली कोरोना संक्रमण के एक सौ छियानवे नवा मामला आगू आय हे।
हरेली तिहार
प्रदेस म अट्ठाईस जुलाई के हरेली तिहार उछाह के संग मनाय जाही। ए मउका म मुख्यमंत्री ह अपन घर म कृषि यंत्र के पूजा करही। त उहें, छत्तीसगढ़ी लोक कलाकार मन सुआ, करमा, ददरिया अउ गेड़ी नृत्य के प्रस्तुति दीहीं।
इही दिन ले प्रदेस म गौ-मूत्र खरीदी के अभियान घलो सुरू हो जही। गौ-मूत्र खरीदी बर चार रूपिया प्रतिलीटर के भाव राखे गेहे। मुख्यमंत्री ह दुरूग जिला के पाटन विकासखंड के करसा गांव ले गौ-मूत्र खरीदी के सुभारंभ करही। ए मउका म करसा गांव म कृषि सम्मेलन के आयोजन करे जाही।
अउ अब थोरकुन समाचार सार म-
– मुख्यमंत्री ह कारगिल विजय दिवस के पूर्व संध्या म भारतीय जवान मनके वीरता ल नमन करत कारगिल युद्ध के सहीद मन ल अपन श्रद्धांजलि दे हवय।
– दुरूग रेलवे स्टेशन म चलत ट्रेन म चढ़े के परयास करत लोको पायलट के ट्रेन के चपेट आय ले मउत होगे।
– माओवादी मनके कोंटा एरिया कमेटी ह ए ठिन प्रेस नोट जारी करके सुकमा जिला के बीराभट्टी अउ पोलमपल्ली म पाछु दिन दू झिन ग्रामीण के हत्या करे के जिम्मेवारी लेहे।
अउ
– कबीरधाम जिला के बोड़ला पुलिस ह गांजा तस्करी के आरोप म दू झिन लोगन मन ल गिरफ्तार करके उंखर मन तीर ले करीबन इक्कीस किलोग्राम गांजा जब्त करे हे। गांजा के कीमत करीबन बीस लाख रूपिया बताय जात हे।