विधानसभा-अनुपूरक बजट
प्रदेस म दस हजार नवा सिक्षक मनके भर्ती प्रक्रिया जल्दी सुरू होही। मुख्यमंत्री भूपेश बघेल ह काली छत्तीसगढ़ विधानसभा म चालू वित्तीय वर्ष के प्रथम अनुपूरक बजट के चर्चा के जवाब देवत हुए ये घोसना करीन। ओमन किहीन कि बछर उन्नीस सौ अंठानवे के बाद राज्य सरकार डहार ले चौदह हजार शिक्षक मनके भर्ती करे गेहे, जेखर दस्तावेज मनके परीक्षण के बाद नियुक्ति दे जात हे। मुख्यमंत्री ह किहीन कि प्रदेस म हरेली तिहार ले गौमूत्र के खरीदी करे जाही। एखर ले राज्य म जैविक खेती ल मदद मिलही। संगेसंग गरवा मनके उपचार बर एक सौ तिरसठ मोबाइल वेटनरी यूनिट ल घलो जल्द आरंभ करे जाही। एखर बर अनुपूरक बजट म रासि के प्रावधान करे गेहे।
चर्चा के बाद सदन म वित्तीय बछर दू हजार बाईस-तेईस बर करीब दू हजार नौ सौ चार करोड़ रूपिया के पहलइया अनुपूरक बजट ध्वनिमत ले पारित कर दे गीस।
ट्रेन परिचालन
रेलवे डहार ले अवइया महीना यानि अगस्त ले रद्द करे गे कुछ ट्रेन मनके परिचालन फेर सुरू करे जात हे। एमा रायपुर ले कोरबा के बीच चलने वाला हसदेव एक्सप्रेस के अलावा रायपुर ले दुर्ग, बिलासपुर ले रायपुर के बीच चलइया मेमू पैसेंजर स्पेशल के संगेसंग कुल सोलह गाड़ी मनके परिचालन फेर सुरू करे जाही।
इही बीच, दक्षिण पूर्व मध्य रेलवे के अंतर्गत नागपुर रेलमंडल के राजनांदगांव-कलमना रेलखंड के बीच म खत रेलवे स्टेशन ल जोड़े अउ आटो सिगनलिंग सहित नॉन इंटरलॉकिंग के काम पच्चीस जुलाई के बिहनिया दस बजे ले सत्ताईस जुलाई के बिहनिया दस बजे तक करे जाही। ए दउरान ए रेलमार्ग म बीस ठन ट्रेन मनके परिचालन रद्द कर दे गेहे। उहें, चार ठन ट्रेन मन ल गंतव्य से पहिली समाप्त अउ रवाना करे जाही।
विवेकानंद राष्ट्रीय युवा सम्मेलन
आजादी के अमृत महोत्सव के तहत रायपुर स्थित विवेकानंद विद्यापीठ म विवेकानंद राष्ट्रीय युवा सम्मेलन के आयोजन करे गीस। मुख्यमंत्री ह स्वामी विवेकानंद के चित्र के समक्ष दीप प्रज्जवलित करके ए सम्मेलन के सुभारंभ करीन। ये मउका म मुख्यमंत्री ह किहीन कि स्वामी विवेकानंद ह जीवनभर युवा मन ल अच्छा स्वास्थ्य अउ अच्छा चरित्र निर्माण के संग लक्ष्य निर्धारित करके आगू बढ़े बर प्रेरित करीन। ओमन किहीन कि स्वामी विवेकानंद युवा मनके आदर्श हवय। मुख्यमंत्री ह किहीन कि रायपुर म स्वामी विवेकानंद के स्मृति म राष्ट्रीय स्मारक के स्थापना करे जाही।
कोविड टीका
प्रदेस म कोरोना टीकाकरण अभियान जोरसोर से जारी हे। अब तक प्रदेस म 4 करोड़ 36 लाख 60 हजार ले ज्यादा कोविडरोधी टीका लगाय जा चुके हे। एमा 21 लाख 31 हजार ले जादा प्रिकॉशन डोज सामिल हे।
इही बीच, इंदिरा गांधी कृषि विश्वविद्यालय रायपुर के राष्ट्रीय सेवा योजना इकाई अउ मुख्य चिकित्सा स्वास्थ्य अधिकारी जिला रायपुर डहार ले आजादी के अमृत महोत्सव के तहत विश्वविद्यालय के सामुदायिक भवन म आज निःशुल्क प्रिकॉशन डोज टीकाकरण शिविर के आयोजन करे गीस। ये सिविर म तीन सौ अट्ठाईस लोगन मन बूस्टर डोज लगवईन।
उहें, बलौदाबाजार कलेक्टर रजत बंसल ह विशेष टीकाकरण अभियान के तहत टीकाकरण के प्रति जन-जागरूकता के संदेस दे बर स्वयं लवन स्थित टीकाकरण केन्द्र पहुंचीन अउ बूस्टर डोज लगवइन। ये दौरान ओमन आम जनता ले कोरोना से बचाव बर कोविड के टीका अवश्य लगवाय के आग्रह करीन।
राष्ट्रीय प्रसारण दिवस
आज राष्ट्रीय प्रसारण दिवस आय। उन्नीस सौ सत्ताईस म आजे के दिन इंडियन ब्रॉडकास्टिंग नाम के एक ठिन निजी कंपनी ह देस म पहलइया रेडियो प्रसारण बंबई केन्द्र ले करे रिहीन। आठ जून उन्नीस सौ छत्तीस म इंडियन स्टेट ब्रॉडकास्टिंग सर्विस ल ऑल इंडिया रेडियो के नाम दे गे रिहीस। उन्नीस सौ सत्ताईस ले रेडियो प्रसारण भारत के लोगन मनके जीवन म महत्वपूर्ण हिस्सा रेहे हे। आकाशवाणी ह जन-जन तक सूचना पहुंचाय, शिक्षा अउ मनोरंजन प्रदान करे के महत्वपूर्ण काम करत हे। एखर लक्ष्य हरय ‘‘बहुजन हिताय-बहुजन सुखाय‘‘।
हर घर-तिरंगा अभियान
आजादी के अमृत महोत्सव के अंतर्गत ग्यारह ले सत्रह अगस्त तक हर घर तिरंगा अभियान के तहत छत्तीसगढ़ के कबीरधाम जिला म घलो हर घर झंडा कार्यक्रम के आयोजन करे जाही। ए कार्यक्रम के मॉनिटरिंग बर कलेक्टर ह जिला स्तरीय समिति के गठन करे हे।
उहें, राजनांदगांव म सामाजिक न्याय अउ अधिकारिता मंत्रालय के अंतर्गत संचालित सीआरसी डहार ले हर घर तिरंगा कार्यक्रम के प्रचार-प्रसार करे जात हे। लोगन मन ल एखर बर प्रेरित करे बर आस्था विद्यालय अउ समर्थ शासकीय विशेष मानसिक विद्यालय म कार्यक्रम के आयोजन करे गीस।
बारिश
अंदरूनी ओड़िशा के उपर चक्रीय चक्रवाती घेरा अउ ज्यादा प्रबल होय के कारण छत्तीसगढ़ म घलो राजधानी रायपुर सहित कई इलाका मन म रूक-रूक के लगातार बरसा होवत हे। एखर से कई नदी-नाला मन म उफान आगे हे। उहें, निचला इलाका मन म बाढ़ के स्थिति निर्मित होगे हे। निचली बस्ती मन म बारिस के पानी घुसे ले सामान्य जन-जीवन प्रभावित होवत हे।
बीजापुर जिला म भारी बरसा के चलत इंद्रावती सहित दूसर नदी-नाला मनके जलस्तर लगातार बढ़त हे। गंगालूर, फरसेगढ़, मिरतुर अउ सपनापल्ली मार्ग म आवागमन बाधित होगे हे। अइसने, रायपुर-दुरूग अउ बिलासपुर संभाग म घलो कई जिला मन म लगातार बरसा होवत हे।
उहें, मौसम विभाग के मुताबिक अंदरूनी ओड़िशा के उपर चक्रीय चक्रवात के घेरा अउ प्रबल होय के कारण अवइया चौबीस घंटा के दौरान प्रदेस म सरगुजा संभाग ल छोड़ के बाकी सबो संभाग के जिला मन म कुछ स्थान म भारी बरसा अउ एक-दू स्थान मन म अति भारी बरसा होय के संभावना हे।
एला देखत हुए मुख्यमंत्री भूपेश बघेल ह सबो जिला कलेक्टर, पुलिस अधीक्षक अउ नगरीय निकाय मन ल सतर्क रेहे के निरदेस देहे अउ बाढ़ जइसे कोनो भी स्थित ले निपटे बर आपदा प्रबंधन संबंधी सबो उपाय सुनिश्चित करे बर केहे हे।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत छत्तीसगढ़ म पर्यटन ल बढ़ावा दे बर आई.आर.सी.टी.सी. डहार ले करे जात प्रयास उपर संस्था के एरिया मैनेजर राजीव कुमार संग करे गे भेंटवार्ता के प्रसारण करे जाही।
एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम ह आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संगरा रिले करही। ए हफ्ता के अंक म ‘‘जांजगीर-चांपा‘‘ जिला के गतिविधि मनके बारे म जानकारी दे जाही।
अउ अब थोरकुन समाचार सार म-
– केन्द्रीय महिला अउ बाल विकास मंत्रालय ह नारी शक्ति पुरस्कार दू हजार बाईस बर आवेदन आमंत्रित करे हे। एखर सिर्फ आधारिक वेबसाइट उपर इकतीस अक्टूबर तक आवेदन स्वीकार करे जाही।
– मुख्यमंत्री भूपेश बघेल ह आज अपन निवास कार्यालय म स्वतंत्रता संग्राम सेनानी स्वर्गीय बिसाहू दास महंत के पुण्यतिथि के अवसर म उंखर चित्र म पुष्पांजलि अर्पित कर ओमन ल नमन करीन।
– भिलाई के छात्र रोहित पंडा ह आर्मेनिया के येरेवन शहर म आयोजित तैंतीसवां अंतर्राष्ट्रीय जीव विज्ञान ओलंपियाड म भारत के प्रतिनिधित्व करत हुए रजत पदक अपन नाम करीन।
– भारतीय जनता युवा मोर्चा के कार्यकर्ता मन ह राज्य सरकार उपर युवा मनके संग वादाखिलाफी के आरोप लगावत हुए कबीरधाम जिला म पंडरिया एसडीएम कार्यालय के घेराव करीन।
अउ
– बिलासपुर पुलिस ह मोटर साइकिल चोरी के मामला म आठ झिन आरोपी मन ल गिरफ्तार करीन।