विस-मानसून सत्र
छत्तीसगढ़ विधानसभा के मानसून सत्र ह काली ले सुरू हो जही। ए सत्र ल सत्ताईस जुलाई तक चलाय जाही। ए दउरान कुल छह ठन बइठका राखे जाही। मानसून सत्र के दउरान वित्तीय कार्य के संगेसंग अउ दिगर सरकारी काम ल संपादित करे जाही।
मिले खबर के मुताबिक छह दिन तक चलइया ए सत्र बर कुल आठ सौ चौरानवे ठन सवाल लगाय गेहे। उहें, राज्य सरकार डहार ले अनुपूरक बजट पेस करे जाही। एखर अलावा अउ कुछ अन्य विधेयक मन ल पेस करे के संभावना हे।
राष्ट्रपति चुनाव-मतगणना
राष्ट्रपति चुनाव बर होय वोट के गिनती ल परन दिन बिरस्पत के करे जाही। ए गिनती ल नई दिल्ली के संसद भवन परिसर म मंझनिया ग्यारह बजे ले करे जाही। निर्वाचक मंडल के सूची म चार हजार सात सौ छियानवे झन मतदाता ले निन्यानवे प्रतिशत ले जादा सांसद अउ विधायक मन ह मतदान करे हे।
अप्रवासी भारतीय प्रकोष्ठ
दूसर देस म रहइया छत्तीसगढ़ के अप्रवासी भारतीय मन ल एक सूत्र म जोड़े अउ प्रदेस के कला संस्कृति अउ साहित्य ल संजो के राखे बर राज्य सरकार ह अप्रवासी भारतीय प्रकोष्ठ के गठन करे हे। भारतीय मूल के कोरबा के रहइया पल्लव शाह ल ए प्रकोष्ठ के समन्वयक बनाय गेहे। श्री शाह ए बेरा अमेरिका के बोस्टन म रहिथे। ए संस्था के माध्यम ले छत्तीसगढ़ी कला-संस्कृति अउ साहित्य के प्रचार-प्रसार, अप्रवासी भारतीय मन संग मेलजोल ल बना के राखे के उद्देश्य ले रचनात्मक प्रयास करे जाही।
खूबचंद बघेल-जयंती
डॉक्टर खूबचंद बघेल के आज जयंती हरय। ए मउका म प्रदेस के कई ठिन जघा म कारीकरम मनाके ओमन ल श्रद्धांजलि देवत हे। ए मउका म मुख्यमंत्री भूपेश बघेल ह राजधानी रईपुर के फूल चउक म डॉक्टर खूबचंद बघेल के मूर्ति म फूलमाला चढ़ईन। ए दउरान मुख्यमंत्री ह किहीन कि डॉक्टर खूबचंद बघेल ह छत्तीसगढ़िया मनके स्वाभिमान ल जगाय अउ छत्तीसगढ़ के संस्कृति ल आगू बढ़ाय म बहुतेच जादा योगदान दे रिहीस। मुख्यमंत्री ह किहीन कि खूबचंद बघेल ह जिनगीभर किसान, आदिवासी मनके हित के रक्षा अउ उंखर उत्थान करे खातिर आगू आय रिहीन। ओमन यहू किहीन कि डॉक्टर खूबचंद बघेल ह पहिली घांव अलग छत्तीसगढ़ राज्य के सपना देखे रिहीन।
नदी-हादसा
राज्य म कुछ दिन ले होवत सरलग बरसा के सेती कई ठन नदियां-नरवा मन म बाढ़ आ गेहे। बरसा ल देखत गंगरेल बांध के संगेसंग कई ठन बांध मन ले पानी छोड़े जात हे।
दुरूग जिला म शिवनाथ नदियां के छोटे पुलिया ल पार करत बेरा एक चरचकिया गाड़ी के बोहाय ले एमा बइठे मनखे मनके कोनो पता नइ चल पाय हे। बचाव दल डहार ले ए मनखे मनके खोजबीन करे जात हे। ए दउरान जिला के पुलिस अधीक्षक डॉक्टर अभिषेक पल्लव ह आज मंझनिया मउका म जाके जानकारी दीन। उहें, जिला के अतिरिक्त पुलिस अधीक्षक संजय धु्रव ह बतईन कि राष्ट्रीय आपदा अउ राहत दल के करीबन तीस झन सदस्य मन ल बचाव काम म लगाय गेहे।
ओति, राजनांदगांव जिला के मोंगरा जलाशय म जादा पानी भरे के सेती जलाशय ले पानी निकाले जात हे। सरलग बरसा ल देखत जिला कलेक्टर ह जम्मों अधिकारी-करमचारी मन ल दिसा-निरदेस जारी कर दे गेहे।
माओवादी समाचार
बीजापुर जिला म मिरतुर थाना क्षेत्र के केतुलनार चउक म होय प्रेसर बम के विस्फोट म एक झिन माईलोगिन घायल होगे। जिला के पुलिस अधीक्षक अंजनेय वार्ष्णेय ह बतईन कि ए प्रेसर बम ल माओवादी मन डहार ले लगाय गे रिहीस। घायल माईलोगिन ल नेलसनार के प्राथमिक स्वास्थ्य केन्द्र म भर्ती कराय गेहे।
इही जिला के बासागुड़ा थाना क्षेत्र के पुतकाल अउ तिमापुर के जंगल म तलाशी अभियान के दउरान सुरक्षा बल के जवान मन ह बारूद अउ दू झिन माओवादी मनके सहयोगी ल गिरफ्तार करे हे।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– भारतीय मजदूर मनके संग होय दुर्व्यवहार के खिलाफ पहिली बनाय गे कुछ मजदूर संघ मे ले एक ठन मद्रास मजदूर संघ के गठन कोन करीन?
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
कृषि विवि-सम्मान
इंदिरा गांधी कृषि विश्वविद्यालय ल बागवानी कारीकरम के अंतर्गत मसाला अउ सुंगध वाला फसल मनके विकास करे खातिर केन्द्र सरकार डहार ले सम्मानित करे गीस। ए सम्मान ल पाछु दिन तमिलनाडु के पेरियाकुलम म राखे गे एक ठिन कारीकरम म दे गीस।
सांख्यिकी-प्रशिक्षण
घरेलू उपभोग खरचा के सर्वेक्षण करे खातिर केन्द्रीय सांख्यिकी मंत्रालय के राष्ट्रीय सांख्यिकी कार्यालय डहार ले काली रईपुर म तीन दिवसीय प्रशिक्षण कार्यसाला के कारीकरम करे जाही। एमा छत्तीसगढ़ के सांख्यिकीय अधिकारी अउ करमचारी मन ल प्रसिक्षण दे जाही। राष्ट्रीय सांख्यिकीय कार्यालय के रईपुर म पदस्थ उप महानिदेशक रोशनलाल साहू ह ए कारीकरम के सुरूवात करही।
पोषण अभियान-कार्यशाला
प्रदेस म पोषण अभियान के देखरेख के संबंध म आज राजधानी रईपुर म एक दिन के कार्यसाला राखे गीस। ए दउरान राज्य के महिला अउ बाल विकास मंत्री अनिला भेंडिया ह ए राज्य स्तरीय कार्यसाला ‘‘उमंग‘‘ के सुरूवात करीन। ए मउका म छत्तीसगढ़ राज्य महिला आयोग के अध्यक्ष डॉक्टर किरणमयी नायक अउ यूनिसेफ के पदाधिकारी मन ह घलो सामिल होईन।
हरेली तिहार
राज्य म एसो ‘‘हरेली-तिहार‘‘ के दिन प्रदेस के स्कूल मन म ‘‘गेड़ी नाच प्रतियोगिता‘‘ के कारीकरम राखे जाही। स्कूल सिक्षा विभाग डहार ले ए संबंध म दिसा-निरदेस जारी कर दे गेहे। जारी निरदेस के मुताबिक जिला अउ विकासखंड मुख्यालय म ‘‘पर्यावरण संरक्षण अउ हरेली के महत्ता‘‘ बिसय म संगोष्ठी के कारीकरम घलो करे जाही। उहें, स्कूल प्रांगण म पेड़ लगा के घेरा करे जाही। ए कारीकरम म जीतइया मन ल इनाम के संगेसंग प्रसस्ति पत्र घलो दे जाही।
स्कूल शिक्षा सचिव डॉक्टर एस. भारतीदासन ह बतईन कि स्कूल के संगेसंग आश्रम साला अउ छात्रावास मन म घलो हरेली तिहार के कारीकरम करे जाही।
अउ अब थोरकुन समाचार सार म-
– छत्तीसगढ़ प्रदेश तृतीय कर्मचारी संघ के प्रांतीय अधिवेशन म बिलासपुर जिला शाखा के अध्यक्ष गणेश राम चंद्रा ल निर्विरोध प्रदेश अध्यक्ष बनाय गीस।
– राज्य सासन डहार ले एसो संघ लोक सेवा आयोग के सिविल सेवा परीक्षा म सफल होवइया अनुसूचित जाति अउ जनजाति के अभ्यर्थी मन ल एक लाख रूपिया प्रोत्साहन रासि दे जाही। एखर बर पात्र अभ्यर्थी मन ले अवइया छब्बीस जुलाई तक अरजी मंगाय गेहे।
– रईपुर जिला प्रसासन के महत्वाकांक्षी पहल ‘‘हर घर हरियाली अभियान‘‘ ल पहिलीच दिन ले लोगन मन ह पसंद करत हे। ए अभियान के दउरान काली कलेक्टर डॉक्टर सर्वेश्वर नरेन्द्र भूरे के अगुवई म साढ़े तीन लाख पौधा लगाय गीस।
– बेमेतरा जिला के राका गांव म एक ठन कारखाना ल नइ लगाय के विरोध म किसान मन ह कलेक्टर ऑफिस के आगू म प्रदर्सन करीन।
– सूरजपुर जिला के प्रतापपुर के जंगल म एक ठन जंगली हाथी ह पाछु रतिहा कुछ कच्चा घर मन ल नकसान पहुंचाय हे।
अउ
– बिलासपुर के कोपरा बांध के तीर एक ठन टरक अउ ट्रेलर गाड़ी के टक्कर म एक झन चालक के मउत होगे।