राष्ट्रपति चुनाव
देस के सोलहवां राष्ट्रपति पद बर आज मतदान होईस। नई दिल्ली म संसद भवन अउ राज्य मनके विधानसभा परिसर म बिहनिया दस बजे ले मतदान के प्रक्रिया सुरू होईस। वर्तमान राष्ट्रपति रामनाथ कोविंद के कार्यकाल इही महीना चौबीस तारीख के समाप्त होवत हे।
छत्तीसगढ़ म घलो विधानसभा परिसर म आज विधायक मन ह अपन-अपन वोट डालीन। मतदान बर विधानसभा के समिति कक्ष म मतदान केन्द्र बनाय गे रिहीस। विपक्ष ले सबले पहिली वोट कुरूद विधायक अजय चंद्राकर डालीन। उहें, सत्तापक्ष डहार ले पहिली मत प्रदेस कांग्रेस अध्यक्ष मोहन मरकाम ह दीन।
एखर पहिली, मुख्य निर्वाचन पदाधिकारी पी. दयानंद के मौजूदगी म निर्वाचन अधिकारी मन ह आज बिहनिया स्ट्रांग रूम ले मतपेटी ल कड़ा सुरक्षा म मतदान केन्द्र पहुंचईन। ए दउरान सत्तापक्ष के विधायक मोहित केरकेट्टा अउ विपक्ष के विधायक डॉक्टर कृष्णमूर्ति बांधी घलो मौजूद रिहीन। मत के गिनती इक्कीस जुलाई के करे जाही।
जानबा के मुताबिक राष्ट्रपति पद बर एनडीए ह द्रौपदी मुर्मू अउ यूपीए ह यशवंत सिन्हा ल उम्मीदवार बनाय हे।
संसद-मानसून सत्र
संसद के मानसून सत्र आज ले सुरू होगे हे। ए सत्र बारह अगस्त तक चलही। छब्बीस दिन के ए सत्र म अट्ठारह बइठका होही। ए दउरान चर्चा अउ विचार बर बत्तीस विधायी काम तय करे गेहे। बढ़त कीमत अउ आने-आने मुद्दा उपर विपक्ष के हंगामा के कारण संसद के दूनों सदन के कार्यवाही आज दिनभर स्थगित कर दे गीस।
प्रधानमंत्री नरेन्द्र मोदी ह विश्वास जतात हुए किहीन कि संसद के मानसून सत्र उपयोगी अउ सार्थक होही। ओमन ह सबो सांसद ले सब बिसय म गहराई ले चर्चा करे के आग्रह करीन।
इही बीच, छत्तीसगढ़ विधानसभा के मानसून सत्र बीस जुलाई ले सुरू होही। सत्ताईस जुलाई तक चलने वाला ए सत्र के दउरान कुल छह बइठका होही।
जीएसटी-नई दर
आने-आने सामान म माल अउ सेवा कर-जीएसटी के नवा दर आज ले लागू होगे हे। चेक जारी करे के सुल्क के रूप म बैंक अब अट्ठारह प्रतिशत जीएसटी लीहीं। रोज एक हजार रूपिया तक होटल के कमरा बर बारह प्रतिशत कर ले जाही। ई-कचरा बर जीएसटी पांच प्रतिशत ले बढ़ाके अट्ठारह प्रतिशत कर दे गेहे। वित्त मंत्रालय ह किहीन कि बिना ब्रांड वाला खाद्य पदार्थ जेमा अनाज, दाल अउ पच्चीस किलोग्राम आटा बर कोई जीएसटी नइ लगही।
सिंहदेव-प्रेसवार्ता
प्रदेस के स्वास्थ्य मंत्री टी.एस. सिंहदेव ह नई दिल्ली म कांग्रेस पार्टी प्रमुख ले मिले बर समय मांगे हे। आज राष्ट्रपति चुनाव म वोट डाले बर विधानसभा पहुंचे श्री सिंहदेव ह पंचायत अउ ग्रामीण विकास विभाग के मंत्री पद ले इस्तीफा ल अपन दिल्ली दउरा ले अलग बतईन। ओमन किहीन कि उंखर दिल्ली प्रवास पहिली ले निर्धारित हे। ए दउरान ओमन ह गुजरात चुनाव के मुख्य ऑब्जर्वर अशोक गहलोत डहार ले बीस जुलाई के बुलाय गे बइठका म भाग लीहीं। श्री सिंहदेव ह किहीन कि ओमन विधानसभा सत्र म घलो भाग लीही। फेर, इक्कीस जुलाई के ओमन सदन म उपस्थित नइ हो पाही।
नदी-हादसा
दुरूग म काली रतिहा पानी ले भरे छोटा पुल ल पार करे के दउरान एक कार शिवनाथ नदी बह गीस। अतिरिक्त पुलिस अधीक्षक संजय धु्रव ह बतईन कि घटना के जानकारी मिलत ही पुलिस अउ एसडीआरएफ के टीम कार म सवार लोगन के तलाश म जुट गीस। जानबा के मुताबिक कार म करीब पांच लोगन सवार रिहीन। ए सबो झन अंजोरा ले दुरूग आवत रिहीन। रेस्क्यू ऑपरेशन म तीन बोट नदी म उतारे गेहे अउ कार के संगेसंग ओमा सवार लोगन मनके तलाश करे जावत हे। नदी म तेज बहाव होय के कारण रेस्क्यू ऑपरेशन म लगे जवान मन ल काफी दिक्कत आवत हे।
उहें, राजनांदगांव जिला म छुईखदान के छिंदारी बांध म नहाय के दउरान लापता एक युवक के सव काली बरामद करे ले गीस। छुईखदान पुलिस अउ गोताखोर मनके संग दुरूग के एसडीआरएफ के टीम दू दिन ले बांध म डूबे युवक के तलाश म जुटे रिहीन। पुलिस ह बतईन कि मृतक अपन दोस्त मन संग सनिवार के बांध म नहाय बर गे रिहीस, इही दउरान ओ ह डूब गे रिहीस।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– कोन स्वतंत्रता सेनानी ह ब्रिटिश राज के खिलाफ भारतीय मनके आक्रोश अउ सिकायत ल स्वर देने वाला अंग्रेजी साप्ताहिक ‘‘द क्रीसेंट‘‘ के सुरूवात करे रिहीन ?
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
सावन-सोमवार
सावन के पहिली सोमवार के आज शिव मंदिर म भक्त मनके सैलाब उमड़ पड़ीस। श्रद्धालु मन ह भगवान शिव के जल अउ दूध ले अभिषेक करके विशेष पूजा-अर्चना करीन। राजधानी रईपुर म कांवड़िया मन ह महादेवघाट स्थित हटकेश्वर महादेव म जल चढ़ईन। उहें, बूढ़ेश्वर महादेव के संगेसंग आने-आने शिव मंदिर मन म घलो बिहनिया ले भक्त मनके भीड़ लगे रिहीस।
जगदलपुर के इंद्रावती तट म स्थित महादेव मंदिर, झाड़ेश्वर मंदिर, बोधघाट कॉलोनी के शिवमंदिर संग कतकोन शिवमंदिर मन म पानी गिरे के बाद भी श्रद्धालु मनके भारी भीड़ देखे गीस।
उहें, कबीरधाम जिला के भोरमदेव मंदिर म जल अभिषेक करे बर आज कवर्धा ले अट्ठारह किलोमीटर के पदयात्रा निकाले गीस, जेमा कांवड़िया मनके संग बड़ संख्या म श्रद्धालु सामिल होईन। उहें, राजिम के कुलेश्वर महादेव, चंपारण के चम्पेश्वर महादेव, बम्हनी के ब्रम्हेश्वर महादेव, सिरपुर के गंधेश्वर महादेव अउ जांजगीर-चांपा जिला के खरौद स्थित लक्ष्मणेश्वर महादेव मंदिर के संग प्राचीन शिव मंदिर मन म घलो आज बिसेस पूजा-अर्चना करे गीस।
हर घर हरियाली-अभियान
रायपुर जिला म हरियाली बढ़ाय बर सावन के पहिली सोमवार ले आज वृक्षारोपण के महाभियान ‘‘हर घर हरियाली‘‘ सुरू करे गीस। मुख्यमंत्री भूपेश बघेल ह ए मउका म अपन रईपुर स्थित निवास म रूद्राक्ष के पौधा लगईन।
जानबा के मुताबिक ए अभियान के अंतर्गत घर-घर म पौधा के निःशुल्क वितरण करे जावत हे। जिला प्रसासन ह लोगन ले अपील करे हे कि ओमन ह जादा से जादा संख्या म ए अभियान म भाग लेवय अउ एक पौधा जरूर लगावय। संगेसंग ओ पौधा के सुरक्षा के जिम्मेदारी घलो लें। ए दउरान वन अउ उद्यानिकी विभाग डहार ले ग्राम पंचायत, नगरीय निकाय कार्यालय म पौधा उपलब्ध कराय जावत हे। एखर बर सासकीय कार्यालय मन म स्टॉल घलो बनाय गेहे।
अउ अब थोरकुन समाचार सार म-
– स्वतंत्रता संग्राम सेनानी अउ छत्तीसगढ़ म किसान सत्याग्रह के प्रणेता बाबू छोटेलाल श्रीवास्तव के आज पुण्यतिथि हे। मुख्यमंत्री भूपेश बघेल ह बाबू छोटेलाल श्रीवास्तव के योगदान ल याद करत हुए किहीन कि उंखर नेतृत्व म शोषण अउ न्याय के खिलाफ किसान मन ह ‘कंडेल नहर सत्याग्रह‘ करे रिहीन।
– सुप्रीम कोर्ट के कॉलेजियम ह छत्तीसगढ़ हाईकोर्ट म दू अउ जज के नियुक्ति मंजूरी दे दीन हे। एमा एडवोकेट राकेश मोहन पांडेय अउ न्यायिक सेवा ले जुड़े राधाकृष्ण अग्रवाल के नाम सामिल हे। कॉलेजियम के मंजूरी के बाद सासन डहार ले एखर नियुक्ति के आदेस जारी करे जाही।
अउ
– जी.आर. चन्द्रा, छत्तीसगढ़ प्रदेस तृतीय वर्ग सासकीय कर्मचारी संघ के नवा प्रदेस अध्यक्ष निर्वाचित होय हे। उहें, विजय लहरे ग्रामीण कृषि विस्तार अधिकारी संघ के प्रांताध्यक्ष चुने गेहे।