राष्ट्रपति चुनाव
देस के सोलहवां राष्ट्रपति बर काली मतदान होही। वोट के गिनती इक्कीस जुलाई के नई दिल्ली म करे जाही। एनडीए डहार ले राष्ट्रपति पद बर द्रौपदी मुर्मू अउ यूपीए डहार ले यशवंत सिन्हा ल उम्मीदवार बनाय गेहे। वर्तमान राष्ट्रपति रामनाथ कोविंद के कार्यकाल चौबीस जुलाई के सिरावत हे।
ऐति, राष्ट्रपति चुनाव बर छत्तीसगढ़ विधानसभा भवन ल मतदान केन्द्र बनाय गेहे, जिहां राज्य के नब्बे विधानसभा सदस्य मन बर मतदान के व्यवस्था करे गेहे। निर्वाचन आयोग के विशेष अनुमोदन ले आने राज्य के निर्वाचक घलो ए मतदान केन्द्र म अपन मत डाले सकथे।
इही बीच, भारत निर्वाचन आयोग डहार ले छत्तीसगढ़ बर नियुक्त ऑर्ब्जवर राकेश रंजन ह काली रईपुर पहुंचीन। ए बेरा ओमन विधानसभा पहुंच के मतदान के तैयारी के जायजा लीन। ओमन मतदान बर करे जात जम्मों व्यवस्था ल देखीन अउ जरूरी निरदेस दीन।
सिंहदेव-इस्तीफा
प्रदेस के कैबिनेट मंत्री टी.एस. सिंहदेव ह पंचायत अउ ग्रामीण विकास विभाग ले इस्तीफा दे देहे। फेर ओमन ह स्वास्थ्य अउ परिवार कल्याण, चिकित्सा शिक्षा, बीस सूत्रीय कार्यान्वयन अउ वाणिज्यिक कर, जीएसटी विभाग के मंत्री बने रइही।
श्री सिंहदेव ह मुख्यमंत्री भूपेश बघेल ल चार पन्ना के त्याग पत्र म आने-आने कारण के हवाला देवत किहीन कि ओमन चुनाव घोषणा पत्र के अनुसार विभाग के लक्ष्य ल पूरा करे म असमर्थ हे। ओमन अपन पत्र म केहे हे कि प्रदेस म राज्य सरकार के कार्यकाल म प्रधानमंत्री आवास योजना के तहत आवासहीन लोगन मन बर एक भी घर नइ बन पाय हे। ओमन ए बात के दुख जताय हे कि राज्य के जनता ल ए योजना के लाभ नइ मिल सकीस।
श्री सिंहदेव ह अपन पत्र म यहू किहीन कि मुख्यमंत्री समग्र ग्रामीण विकास योजना के अंतर्गत होवइया कार्य के अंतिम स्वीकृति बर मुख्य सचिव के अध्यक्षता म समिति गठित करके निर्णय लेके बेवस्था बनाय गेहे। श्री सिंहदेव ह लिखे हे कि उंखर आपत्ति के बावजूद घलो ए व्यवस्था नइ बदले गीस। ओमन ह पत्र म मनरेगा के घलो जिकर करत हुए किहीन कि मनरेगा के कार्य करइया मन ल वेतन वृद्धि के पंचायत विभाग के प्रस्ताव म वित्त विभाग ह एको ठन फइसला नइ लीस।
इही बीच, आज मुख्यमंत्री भूपेश बघेल ह किहीन कि श्री सिंहदेव के इस्तीफा के जानकारी ओमन ल नइ हे, मीडिया के माध्यम ले पता चले हे। ओमन किहीन कि श्री सिंहदेव के पत्र मिले के बाद ओमन ओखर परीक्षण करही।
दूसर डहार, प्रदेस भाजपा अध्यक्ष विष्णुदेव साय ह किहीन कि पंचायत मंत्री के इस्तीफा मुख्यमंत्री के तानाशाही के प्रमाण हे। मुख्यमंत्री ल स्पष्ट करना चाहिए कि ऐसे स्थिति काबर बनीस।
बारिश-01
बस्तर संभाग समेत प्रदेस के कई जिला म पाछु हफ्ताभर ले सरलग होवत बरसा के सेती अधिकांश नदी-नाला उफान म हवय। कई निचला इलाका म बाढ़ के स्थिति बने ले सामान्य जनजीवन अस्त-व्यस्त होगे हे। चारामा घाट म भू-स्खलन होय ले रईपुर-जगदलपुर रद्दा बंद होगे हे।
सुकमा जिला के कोंटा म बाढ़ के पानी ले दस ले जादा लोगन मन फंस गेहे। ए लोगन मन ऊंचाई वाला इलाका म ठहरे रिहीन, तभे अचानक बाढ़ के पानी बढ़ गे। एखर जानकारी मिलते ही जिला प्रसासन के टीम मउका म पहुंच के लोगन मन ल सुरक्षित स्थान म पहुंचाय म जुटे हवय।
इही बीच, काली उद्योग मंत्री कवासी लखमा ह बस्तर संभाग के बाढ़ग्रस्त क्षेत्र के जायजा लीन। ए दउरान ओमन कलेक्टर अउ पुलिस अधीक्षक ले बाढ़ रातह बर करे गे व्यवस्था के जानकारी लीन। ओमन किहीन कि बाढ़ ले प्रभावित लोगन मन ल जरूरी मदद पहुंचाय जाय। संगेसंग ओमन ल सुरक्षित जगह म ठहराय जाय। राहत केन्द्र मन म लोगन मन ल कोनों परकार के परेसानी झन होवय, एखर ध्यान राखय जाय।
बारिश-02
ऐति, बीजापुर जिला म होवत सरलग बरसा के सेती नदी पार नइ कर पाय एक झिन माईलोगिन के नदिया के तीर म सुरक्षित डिलीवरी कराय गीस। मिले जानकारी के मुताबिक गंगालूर के झारगोया इलाका म एक गर्भवती महिला ल प्रसव पीड़ा होय म अस्पताल ले जाय जावत रिहीस। ए दउरान नदी म पानी बाढ़े ले महिला नदी पार नइ कर पईस। एखर सूचना उच्च अधिकारी मन ल दे गीस। एखर बाद नगर सेना के टीम ह प्रसव पीड़ा ज्यादा होय म अस्पताल ले पहिली ही नदी किनारे महिला के सुरक्षित डिलवरी करईन। बाद म ओमन ल मोटरबोट के माध्यम ले नदी पार कराके ग्राम रेड्डी के उप स्वास्थ्य केन्द्र लाय गीस, जिहां महतारी अउ लइका दूनो स्वस्थ हवय।
ओति, जांजगीर-चांपा जिला के लीलागर नदी म बने एनीकट म काली चार साल के एक झिन लइका बोहा गे रिहीस, जेखर सव ल आज एसडीआरएफ के टीम ह बरामद कर लेहे।
ऐति, राजनांदगांव जिला म घलो रूक-रूक के तेज बरसा होवत हे। जिला के अंबागढ़ चौकी के मोंगरा बैराज म जलभराव तेजी ले बाढ़त हे, जेखर सेती बैराज के दू ठिन गेट खोल दे गेहे।
उहें, महासमुंद जिला के राष्ट्रीय राजमार्ग-तीन सौ तिरपन म पानी भर गेहे, जेखर सेती अवई-जवई परभावित होय हे। महासमुंद-तुमगांव रद्दा पूरा बंद होगे हे।
ओति, धमतरी जिला के गंगरेल बांध ले पानी छोड़े जाय के सूचना के बाद महानदी के किनारे बसे गांव मन म हाईअलर्ट घोसित कर दे गेहे।
इही बीच, मौसम विभाग ह काली प्रदेस के एक-दू जघा म भारी बरसा होय के चेतावनी देहे।
कोविड टीका-उपलब्धि
भारत ह अट्ठारह महीना के भीतर दू सौ करोड़ कोविड टीका लगाय के ऐतिहासिक उपलब्धि हासिल कर लेहे। प्रधानमंत्री नरेन्द्र मोदी ह ए उपलब्धि म जम्मों नागरिक मन ल बधाई दीन हे। ट्वीट संदेस म श्री मोदी ह किहीन कि भारत ह एक घांव फेर इतिहास रच देहे। ओमन किहीन कि ओमन ल भारत के टीकाकरण अभियान ल सफल बनाय म योगदान करइया मन उपर गर्व हे।
संसद-मानसून सत्र
संसद के मानूसन सत्र काली ले सुरू होही। ए सत्र बारह अगस्त तक चलही। ए दउरान कुल अट्ठारह बइठका होही। सत्र के पहिली आज नई दिल्ली म सर्वदलीय बैठक आयोजित करे गीस।
प्राथमिक शाला-स्थानीय भाषा
प्रदेस के प्राथमिक शाला मन म पढ़ईया स्कूली लइका मन ल उंखर स्थानीय भासा म सिक्षा दे जाही। एखर बर जम्मों जरूरी इंतजाम करे जात हे। स्कूल सिक्षा विभाग डहार ले स्कूल मन म पदस्थ अइसन सिक्षक जउन मन ल स्थानीय भासा के जानकारी नइ हे, ओमन ल बिसेस रूप ले प्रसिक्षण देके व्यवस्था करे गेहे।
स्कूल शिक्षा विभाग के सचिव डॉक्टर एस. भारतीरदासन ह जम्मों जिला सिक्षा अधिकारी मन ल अइसन सिक्षक जउन मन ल स्थानीय भासा के ज्ञान नइ हे, ओमन प्रसिक्षण बर स्थानीय स्तर म प्रसिक्षण मॉडयूल अउ कोर ग्रुप गठन करे के निरदेस देहे। कोर ग्रुप म हरेक जिला अउ विकासखंड ले पांच-पांच अधिकारी मन ल चुने जाही।
निबंध-प्रतियोगिता
आजादी के अमृत महोत्सव म भिलाई इस्पात संयंत्र के राजभासा विभाग डहार ले काली ‘‘राष्ट्र निर्माण में सेल का योगदान‘‘ बिसय म निबंध प्रतियोगिता के आयोजन करे गीस। प्रतियोगिता म रिचा अवस्थी ह पहिली अउ स्वराज झोड़े ल दूसरा स्थान मिलीस। उहें, किशोर कुमार नशीने ल तीसरा संगेसंग नगीना यादव, जया तिवारी अउ विटेश्वर नाथ ल सांत्वना पुरस्कार दे गीस। कारीकरम म बीएसपी के मुख्य महाप्रबंधक अजय बेदी मुख्य अतिथि के रूप म मौजूद रिहीन।
दुर्घटना
दुरूग जिला म पाटन के तीर अरसनारा चौक म काली रतिहा सड़क दुर्घटना म दू झिन युवक मनके घटनास्थल म मउत होगे। ए दूनों युवक मोटरसाइकिल ले पाटन कोति जावत रिहीस। इही दउरान मोटरसाइकिल अनियंत्रित होके हाईवा ले टकरा गे।
ओति, कोरबा जिला के आमाखेखरा गांव म खेत जोताई के दउरान ट्रेक्टर अनियंत्रित होके पलट गे। ए घटना म ट्रेक्टर चालक के मउका म ही मउत होगे।