द्रौपदी मुर्मू छत्तीसगढ़
राष्ट्रपति पद बर एनडीए के उम्मीदवार द्रौपदी मुर्मू ह चुनाव म समर्थन हासिल करे बर आज छत्तीसगढ़ के दउरा करीन। ओमन सांसद, विधायक, मन ले भेंट करके उंखर समर्थन मांगीन। ए दउरान केंद्रीय राज्यमंत्री रेणुका सिंह, भाजपाके राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह, प्रदेश भाजपा अध्यक्ष विष्णुदेव साय समेत बहुजन समाजवादी पार्टी अउ जनता कांग्रेस छत्तीसगढ़ के विधायक घलो मौजूद रीहिन। अपन प्रवास के दउरान ओमन रायपुर स्थित रानी दुर्गावती के प्रतिमा म माला अर्पित करीन। एखर बाद ओमन भोपाल बर रवाना होगीन।
बतादन कि भारत के सोलहंवा राष्ट्रपति बर होवइया चुनाव के तहत अठारा जुलाई के मतदान होही। वोट मनके गिनती इक्कीस जुलाई के नई दिल्ली म करे जाही। भारत के वर्तमान राष्ट्रपति रामनाथ कोविंद के कार्यकाल चौबीस जुलाई के सिरावत हे।
कोरोना बूस्टर डोज
अठारा ले उनसठ साल के आयु वर्ग के लोगन मन ल कोविड के निशुल्क एहतियात डोज देबर आज ले राष्ट्रव्यापी अभियान शुरू होगे हे। ये अभियान अवइया पचहत्तर दिन तक चलही। केंद्रीय स्वास्थ्य मंत्री मनसुख मांडविया ह जम्मों पात्र लोगन मनले एहतियाती डोज लेके आग्रह करीन। ओमन कीहिन कि प्रधानमंत्री नरेंद्र मोदी के सरकार स्वस्थ अउ सुरक्षित भारत बनाये बर संकल्पबद्ध हवय। ए विशेष टीकाकरण अभियान आजादी के अमृत महोत्सव उत्सव के एक हिस्सा हरय।
एति छत्तीसगढ़ म घलो अठारा साल ले जादा आयु वर्ग के लोगन मन ल आज ले जम्मों सरकारी कोविड टीकाकरण केंद्र मन म निशुल्क बूस्टर डोज लगाये जात हे। कोरोना टीकाकरण के राज्य नोडल अधिकारी अउ राष्ट्रीय स्वास्थ्य मिशन के संचालक भोसकर विलास संदीपान ह बताइन कि पचहत्तर दिन तक चलइया ए अभियान के तहत प्रदेश म करीबन एक करोड़ सत्तर लाख मनखे मनल बूस्टर डोज लगाये के लक्ष्य राखे गेहे। एखर बर जम्मों पात्र व्यक्ति कोविन एप म अपन पंजीयन करा सकत हे। ओमन बताइन कि ए आयु वर्ग के अइसे मनखे मन जेमन ल कोविड वैक्सिन के दूसरा टीका लगाये छै माह या छब्बीस सप्ताह पूरा हो चुके हे, ओमन शासकीय कोविड टीकाकरण केंद्र म जाके बूस्टर डोज लगवा सकत हवय।
ए विशेष टीकाकरण अभियान तीस सितंबर तक चलही। पहिली अउ दूसरा डोज के रूप म पात्र लोगन मन ल जेन टीका लगाये गेहे, बूस्टर डोज के रूप म घलो उही टीका लगाये जाही। गरियाबंद जिला म शासकीय अस्पताल, कलेक्टोरेट अउ जिला पंचायत म घलो विशेष टीकाकरण अभियान शुरू होगे हे। जिला चिकित्सालय म नगर पालिका अध्यक्ष के उपस्थिति म बूस्टर डोज लगाये के शुरूआत करे गीस।
बारिश
बस्तर संभाग समेत प्रदेश के कई जिला मन म पाछू हफ्ता भर ले सरलग बारिश होवत हे। एखर सेती नदी-नाला उफान म हे उंहें खेत खलिहान म घलो पानी भर गेहे।
सुकमा जिला म कुछ दिन ले जारी लगातार बारिश के सेती सामान्य जनजीवन प्रभावित होगे हे। राष्ट्रीय राजमार्ग तीस म वाहन मनके अवई जवई बंद होगे हे। उंहें कोंटा नगर के आने-आने रद्दा ले सड़क संपर्क टूट गेहे। जोरदरहा बरसा के सेती गोदावरी नदी के जलस्तर करीबन सत्तर फीट के उपर पहुंच गेहे। उंहें शबरी नदी म पानी के बहाव कम होय ले कोंटा इलाका के गांव मन म पानी बाढ़त हे। हमर संवाददाता ले मिले जानकारी अनुसार कोंटा नगर के कई ठिन वार्ड के घर मन म बारिश के पानी घूस गेहे। राहत अउ बचाव दल डहार ले प्रभावित मन ल राहत शिविर म ठहराय गेहे। अइसने ऐटापाका स्थित सीआरपीएफ दू सौ बारहवीं बटालियन के मुख्यालय म घलो लगभग चार फीट तक पानी भर गेहे। एला देखत सीआरपीएफ मुख्यालय ल खाली कराय जात हे।
उंहें बीजापुर जिला म घलो सरलग बारिश के सेती कई ठिन जगा मन म बाढ़ के स्थ्ति बन गेहे। भारी बरसा के सेती ग्राम मिरतुर म एक मकान ढहे ले एक ग्रामीण घायल होगे, जेला भैरमगढ़ स्वास्थ्य केंद्र म भर्ती कराय गेहे ।इही बीच मौसम विभाग ह अवइया चौबीस घंटा के दउरान प्रदेश के अधिकांश जगा मन म हल्का ले मध्यम बरसा होय या गरज चमक के संग छींटा पड़े के संभावना जताय हे। उंहें दुर्ग रायपुर बिलासपुर अउ बस्तर संभाग के एक दू जगा मन म गरज चमक के संग भारी ले अतिभारी बरसा होय के चेतावनी दे गेहे।
मन की बात
प्रधानमंत्री नरेंद्र मोदी ए महीना के इकतीस तारीख इतवार के आकाशवाणी ले प्रसारित होवइया मन की बात कार्यक्रम बर सुझाव आमंत्रित करीन हे। ट्वीट संदेस म श्री मोदी ह कीहिन कि लोगन मन अपन सुझाव टोलफ्री नंबर- एक आठ शून्य शून्य एक एक सात आठ शून्य शून्य म घलो रिकॉर्ड करा सकत हे । फोनलाईन अठाइस जुलाई तक खुला रही।
शतरंज ओलंपियाड
शतरंज ओलंपियाड टार्च रिले काली सोला जुलाई के रायपुर पहुंचही। शतरंज ग्रैण्ड मास्टर प्रवीण थिप्से चेस ओलंपियाड टार्च लेके आही। ओमन ए टार्च पंडित दीनदयाल ऑडिटोरियम म राखे गे मुख्य समारोह म मुख्यमंत्री भूपेश बघेल ल सौंपही। ए मशाल रिले के अगवई खेल अउ युवा कल्याण विभाग छत्तीसगढ़ ओलंपिक एसोसिएशन अउ राज्य शतरंज संघ मिलके करहीं।
स्कूल निरीक्षण
प्रदेश के जम्मों स्कूल मनके अठारा ले तीस जुलाई तक आकस्मिक निरीक्षण करे जाही। एखर बर शिक्षा विभाग के अधिकारी मन ल जिला बांटके जिम्मेदारी सौंपे गेहे। ए दउरान स्कूल मन म शिक्षक अउ विद्यार्थी मनके उपस्थिति, प्रार्थना के क्रियान्वयन, शिक्षक मन डहार ले कराए पढ़ाई के काम, बैगलेस-डे पालन,मध्यान्ह भोजन योजना समेत दूसर काम मनके क्रियान्वयन के मूल्यांकन करे जाही। एखरे संग विद्यार्थी मनके शैक्षणिक स्तर, ओमनके पढ़ई-लिखई समझ, अभिव्यक्ति अउ विज्ञान अउ गणित म दक्षता ल परखे जाही।
स्कूल शिक्षा विभाग के सचिव एस.भारतीदासन ह जम्मों निरीक्षणकर्ता अधिकारी ल अनुपस्थित अउ देर ले स्कूल अवइया शिक्षक, प्रधानपाठक अउ प्राचार्य मनके विरूद्ध तुरते अनुशासनात्क कार्रवाई सुनिश्चित करे बर कीहिन हे।
मालगाड़ी-डी रेल
जांजगीर चांपा जिला के नैला रेलवे फाटक करा मालगाड़ी के चार ठिन डिब्बा पटरी ले उतर गीस। मिले जानकारी अनुसार ए ट्रक म कोयला गिरे रीहिस, जेखर सेती ओति ले जावत मालगाड़ी के चार डिब्बा पटरी ले उतर गीस। एखर सेती मुंबई-हावड़ा डाउन लाइन प्रभावित होय हे। बिलासपुर ले पहुंचे रेलवे के टीम ह डिब्बा मन ल ट्रैक ले हटावत हे।
श्रम मित्र संयोजक
प्रदेश के सब्बो जनपद पंचायत अउ नगरीय निकाय मन म श्रम मित्र संयोजक मनोनीत करे गेहे। ए संयोजक श्रम विभाग के अंतर्गत असंगठित श्रमिक मनके पंजीयन अउ पंजीकृत श्रमिक मन ल मंडल डहार ले संचालित योजना के जानकारी दीही। संगरा राज्य शासन डहार ले समय-समय म श्रमिक हित म लेगे निर्णय ल ओमन ल बताही।
सीयूइटी परीक्षा
संयुक्त विश्वविद्यालय प्रवेश परीक्षा-सीयूईटी अंडर ग्रेजुएट 2022 देश के पांच सौ शहर अउ विदेश के दस शहर म आजले शुरू होगे हे। ए परीक्षा पंद्रह, सोला, उन्नीस अउ बीस जुलाई के होही। राष्ट्रीय परीक्षा एजेंसी ह परीक्षा के आयोजन बर जम्मों केंद्र मन म सीसीटीवी कैमरा लगाये हे।
ए परीक्षा दू चरण म राखे जात हे। करीबन चौदा लाख नब्बे हजार छात्र मन ए दारी सीयूईटी परीक्षा म पंजीयन कराय हे, जेमा ले आठ लाख दस हजार विद्यार्थी पहिली चरण म अउ छै लाख अस्सी हजार विद्यार्थी दूसरा चरण म परीक्षा दीहीं। अगला चरण अवइया महीना के चार अउ दस तारीख के आयोजित करे जाही।
दिव्यांग छात्र पुरस्कार
सुकमा जिला म आकार संस्था के कक्षा दसवीं के दिव्यांग छात्र रघुनाथ नाग ह झारखंड के जमशेदपुर म आयोजित दिव्यांग लईका मनके राष्ट्रीय प्रतियोगिता सबल अवार्ड म तीसरा पुरस्कार प्राप्त करे हे। ए प्रतियोगिता म सतरा राज्य के प्रतिभागी मन हिस्सा लीन। पूरा तरीका ले दृष्टिबाधित रघुनाथ ह प्रतियोगिता म हारमोनियम बजावत- एैसी लागी लगन गाके – ए पुरस्कार जीतिन। रघुनाथ ल पुरस्कार के रूप म प्रशस्ति पत्र अउ दस हजार रूपिया के चेक दे गीस।