प्रदेस के मछुआरा मन ल अब उत्पादकता बोनस घलो दे जाही। ए बोनस मतस्य महासंघ ल जलाशय निविदा ले प्राप्त होवइया पचास प्रतिशत राशि म ले दे जाही। प्रदेस के नवा मछलीपालन नीति म एखर बर प्रावधान करे गेहे। मुख्यमंत्री भूपेश बघेल के अध्यक्षता म आज उंखर रायपुर स्थित निवास कार्यालय म होय राज्य मंत्रिपरिषद के बइठका म ए संबंध म निर्णय ले गीस।
बइठका म राज्य म प्रचलित मछलीपालन नीति के जगा म नवा मछलीपालन नीति लागू करे के अनुमोदन घलो करे गीस। नवा नीति के तहत राज्य के अनुपयोगी खदान ल विकसित करके ओला मछलीपालन बर उपयोग म लाये जाही। एखर अलावा गौठान बर बनाये गे तरिया म मछलीपालन के काम गौठान समिति या ओमन के चुने गे समूह डहार ले करे जाही। नवा मछलीपालन नीति के अनुसार अनुसूचित क्षेत्र म आदिवासी मछुआ सहकारी समिति के अध्यक्ष के पद अनिवार्य रूप ले अनुसूचित जनजाति बर आरक्षित रीही।
केबिनेट के बइठका म प्रदेश म स्वीकृत सहायक आरक्षक के पद ल खतम करके डिस्ट्रिक्ट स्ट्राईक फोर्स संवंर्ग के सृजन के प्रस्ताव के घलो अनुमोदन करे गीस।
उंहें मंत्रिपरिषद के एक ठिन आने फैसला के अनुसार ए बछर के स्थानांतरण नीति के परिप्रेक्ष म ए निर्णय ले गेहे कि ए संबंध म मंत्रिमंडल उपसमिति के गठन करे जाही। समिति के सुझाव या अनुशंसा के आधार म स्थानांतरण बर मुख्यमंत्री ले अनुमोदन ले जाही।
आज के बइठका म चालू वित्त वर्ष के पहिली अनुपूरक अनुमान संबंधी छत्तीसगढ़ विनियोग विधेयक के प्रारूप के अनुमोदन करे गीस। संगेसंग राज्य के मंत्री मनके संग विधानसभा अध्यक्ष, उपाध्यक्ष, नेता प्रतिपक्ष अउ सदस्य मनके वेतन-भत्ता ले संबंधित संशोधन विधेयक छत्तीसगढ़ विद्युत शुल्क अधिनियम संबंधी संशोधन विधेयक के प्रारूप के अनुमोदन करे गीस।
देश के सोलहवां राष्ट्रपति चुनाव के तहत अठारा जुलाई के होवइया मतदान बर नई दिल्ली ले निर्वाचन सामग्री रायपुर पहुंच गेहे। सहायक रिटर्निंग अधिकारी दिनेश त्रिवेदी अउ उप मुख्य निर्वाचन पदाधिकारी विनय कुमार अग्रवाल मतपेटी, मतपत्र अउ आने सामग्री लेके काली संझा नियमित विमान ले रायपुर पहुंचीन। माना स्थित स्वामी विवेकानंद विमानतल म कड़ा सुरक्षा के बीच एमन ल छत्तीसगढ़ विधानसभा स्थित स्ट्रांग रूम पहुंचाये गीस।
राष्ट्रपति चुनाव बर छत्तीसगढ़ विधानसभा भवन परिसर म मतदान केंद्र बनाय गेहे। जिहां राज्य के नब्बे विधानसभा सदस्य बर मतदान के व्यवस्था करे गेहे। निर्वाचन आयोग के विशेष अनुमोदन ले आने राज्य के निर्वाचक घलो ए मतदान केंद्र म अपन मत डाल सकथे। मत के गिनती इक्कीस जुलाई के नई दिल्ली म करे जाही ।
इही बीच एनडीए के राष्ट्रपति पद बर उम्मीदवार द्रौपदी मुर्मू ह काली रायपुर अवइया हे। इंहा ओमन ह भाजपा विधायक दलके बइठका म सामिल होही।
केंद्रीय ग्रामीण विकास अउ पंचायती राज मंत्री गिरीराज सिंह ह आज वीडियो कॉन्फ्रेसिंग के माध्यम ले कोरबा म आयोजित राष्ट्रीय जलग्रहण सम्मेलन के शुभारंभ करीन। अपन कोरबा प्रवास के दउरान ओमन जिला कलेक्टोरेट ले ए कार्यक्रम म सामिल होइन।
ए सम्मेलन नई दिल्ली के विज्ञान भवन म आयोजित करे गे रीहिस। केंद्रीय मंत्री ह आज कोरबा के जिला पंचायत सभाकक्ष म अधिकारी मनके समीक्षा बइठका घलो लीन। बइठका म ओमन ह केंद्र सरकार डहार ले जिला म संचालित आने-आने योजना मनके प्रगति के जानकारी लीन।
छत्तीसगढ़ के रहइया मन बर अंबिकापुर ले निजामुद्दीन तक एक ठिन नवा ट्रेन आज ले शुरू होगे हे। रेलमंत्री अश्विनी वैष्णव ह रिमोट के माध्यम ले झंडा दिखाके अंबिकापुर हजरत निजामुद्दीन एक्सप्रेस ट्रेन ल रवाना करीन।
ए मउका म अंबिकापुर स्टेशन म आयोजित कार्यक्रम म केंद्रीय जनजाती कार्य राज्यमंत्री रेणुका सिंह अउ क्षेत्रीय विधायक पारसनाथ रजवाड़े उपस्थित रीहिन। ए ट्रेन के नियमित परिचालन उन्नीस जुलाई ले करे जाही।
खबर के मुताबिक साप्ताहिक ट्रेन हरएक गुरूवार के अंबिकापुर ले बीहनिया सवा सात बजे रवाना होके अवइया दिन सुबह साढ़े चार बजे निजामुद्दीन पहुंचही उंहें लहुटे बर हर मंगलवार के रतिहा ग्यारा बजे निजामुद्दीन ले रवाना होके अवइया दिन संझा साढ़े सात बजे अंबिकापुर पहुंचही।
केंदीय जलशक्ति अउ जनजातिय राज्य मंत्री विश्वेश्वर टुडू ह आज जगदलपुर म आजादी के अमृत महोत्सव म स्थानीय गोलबाजार स्थित जयस्तंभ म दीप प्रज्वलित करके शहीद मन ल श्रद्धांजलि अर्पित करीन। ओमन सेवाभारती मातृछाया शिशुगृह के भ्रमण करीन। इंहा ओमन ह नवजात शिशु ल गोद लेवइया आय दंपत्ति ले मुलाकात करीन। संगेसंग ओमन ह बकावंड म भाजपा कार्यकर्ता मनके बइठका घलो लीन।
प्रधानमंत्री फसल बीमा योजना के तहत प्रदेश के किसान िंसंचित अउ असिंचित धान के संगेसंग अरहर, मूंग, उड़द, मक्का अउ उद्यानिकी फसल मनके बीमा काली पंद्रह जुलाई तक करा सकही। ए बखत फसल बीमा म दस हजार रूपिया के अतिरिक्त लाभ दे जाही ।
ए योजना के लाभ लेबर किसान मन ल सिरिफ दू सौ रूपिया के अतिरिक्त प्रीमियम राशि जमा करना होही । ए बखत सिंचित क्षेत्र म धान बर प्रति हेक्टेयर बीमा राशि पचपन हजार रूपिया अउ प्रीमियम राशि ग्यारा सौ रूपिया राखे गेहे।
अठारा बछर ले जादा आयु के लोगन मन ल कोविड रोधी टीका के बूस्टर डोज निशुल्क लगाये जाही। केंद्र सरकार ह काली ए संबंध म एक ठिन जरूरी फैसला ले रीहिन।
केंद्रीय सूचना अउ प्रसारण मंत्री अनुराग ठाकुर ह बताइन कि देश के आजादी के पचहत्तर बछर पूरा होय के उपलक्ष्य म काली ले अवइया पचहत्तर दिन तक बूस्टर डोज निशुल्क दे जाही। केंद्र सरकार के ए पहल म प्रधानमंत्री नरेंद्र मोदी ह कीहिन कि कोरोना महामारी ले निपटे म ए टीकाकरण बहुत प्रभावी हे । ओमन ह अपन ट्वीट संदेस म कीहिन कि निशुल्क टीकाकरण के फैसला ले देश म टीकाकरण ल गति मिलही।
उंहें नीचे के बस्ती मन म घलो पानी भरे ले जनजीवन अस्त-व्यस्त होगे हे। बीजापुर जिला के भोपालपट्नम क्षेत्र के कोन्तूर, तरलागुड़ा अउ कांडला संग तीर-तखार के आने गांव जलमग्न होगे हे। जिला के बाढ़ नियंत्रण अधिकारी हेमंत भुआर्य ह बताइन कि इंहा करीबन दू सौ गांव म बाढ़ के पानी घुस गेहे। ए जम्मो जगा मन म राहत अउ बचाव के काम करे जात हे। ओति गरियाबंद जिला के राजिम इलाका म महानदी के बाढ़ म सात झिन मनखे मन फसगे रीहिस। राहत दल के कर्मचारी मन एमा ले चार झिन ल बाहर निकालिन अउ बांचे मन ल राहत दल ह बाहर निकाले के काम म जुटे हुए हे।
इही बीच केंद्रीय मौसम विज्ञान विभाग ह प्रदेश के सुकमा, राजनांदगांव, दुर्ग महासमुंद धमतरी, गरियाबंद, मुंगेली, बेमेतरा, कबीरधाम, दंतेवाड़ा अउ बीजापुर जिला के एक दू जगा मन म गरज-चमक अउ आकासीय बिजली गीरे के संग भारी ले अतिभारी बरसा होय के चेतावनी देहे।