उपराष्ट्रपति चुनाव-अधिसूचना
भारत निर्वाचन आयोग ह उपराष्ट्रपति चुनाव बर अधिसूचना जारी कर देहे। उन्नीस जुलाई तक नामांकन पत्र भरे जा सकत हे। मतदान छह अगस्त के होही। उपराष्ट्रपति के चुनाव संसद के दूनों सदन के सदस्य मन करही। दूनों सदन के सदस्य के कुल संख्या सात सौ अट्ठायासी हवय। उपराष्ट्रपति एम. वेंकैया नायडू के कार्यकाल दस अगस्त के सिरावत हे।
मुख्यमंत्री-समीक्षा
मुख्यमंत्री भूपेश बघेल ह किहीन हे कि सुराजी गांव योजना म नरवा संवर्धन ल पहिली प्राथमिकता म राखे गेहे। नरवा संवर्धन ले वाटर रिचार्ज होही अउ भू-जल स्त्रोत पुनजीर्वित होही। ए बात मुख्यमंत्री ह आज गौरेला-पेण्ड्रा-मरवाही जिला के गौरेला म राखे गे अधिकारी मनके समीक्षा बइठका म किहीन। ओमन किहीन कि सिंचाई ल बढ़ावा दे जाही। मुख्यमंत्री ह अधिकारी मन ले किहीन कि आम जनता के आय बढ़ाय बर कार्ययोजना बनाके राज्य सरकार ल प्रस्ताव भेजय।
बइठका म मुख्यमंत्री ह किहीन कि अनुसूचित जाति, अनुसूचित जनजाति अउ अन्य पिछड़ा वर्ग ले जुड़े लइका मनके जादा ले जादा संख्या म जाति प्रमाण स्कूल म ही बनाय जाय। एखर बर शिक्षा विभाग अउ राजस्व विभाग आपसी समन्वय ले काम करय। उहें, राजस्व प्रकरण के बेराच म निराकरण करे जाय।
मुख्यमंत्री-भेंट मुलाकात
प्रदेसव्यापी भेंट-मुलाकात कारीकरम म मुख्यमंत्री भूपेश बघेल ह आज गौरेला-पेंड्रा-मरवाही जिला के गौरेला म एक सौ इंक्यावन करोड़ रूपिया ले जादा के लागत के अटहत्तर निर्माण काम के लोकार्पण अउ भूमिपूजन करीन।
अपन दउरा के दउरान मुख्यमंत्री ह जिला म दू ठिन नवाचार कारीकरम ‘‘मोर आखर अउ स्पोर्ट्स फॉर डेव्हलमेंट‘‘ के सुरूवात करीन। मोर आखर कारीकरम गौरेला अउ पेण्ड्रा विकासखंड के दू सौ निन्यानवे प्राथमिक साला म चलाय जाही। एखर ले प्राथमिक साला के लइका मनके प्रारंभिक भाषा शिक्षा म सुधार लाय के संगेसंग लइका मनके पढ़े-लिखे के क्षमता ल अउ जादा प्रभावी बनाय के प्रयास करे जाही। उहें स्पोर्ट्स ऑफ डेव्हलपमेंट जिला के जम्मों पांच सौ तिरालीस प्राइमरी स्कूल म सुरू करे गेहे। एखर उद्देश्य सारीरिक अउ मानसिक विकास करे के संगेसंग खेले-खेल म लइका मन ल सीखाना हवय। ए दूनों कारीकरम यूनिसेफ के मदद ले चलाय जाही।
भाजपा-पत्रकारवार्ता
भारतीय जनता पार्टी के छत्तीसगढ़ इकाई ह आरोप लगाय हे कि प्रदेस के कांग्रेस सरकार भ्रष्टाचार म लिप्त हे। भाजपा ह आज एक ठिन पत्रकारवार्ता म केन्द्रीय जांच एजेंसी अउ आयकर विभाग डहार ले हालेच म राज्य सरकार के एक झिन अधिकारी समेत राजनीतिक दल के पदाधिकारी के ठिकाना म करे गे छापा के कार्रवाई ल देखत अपन विचार राखे हे। भाजपा ह राज्य सरकार उपर निसाना साधत किहीन कि छापा के ए कार्रवाई म आयकर विभाग ह संबंधित अधिकारी के ठिकाना ले करोड़ों रूपिया के अवैध संपत्ति के खुलासा करे हे। विभाग के दावा हे कि जांच के दउरान कर चोरी के कतकोन पुख्ता दस्तावेज घलो मिले हे। फेर, राज्य के कांग्रेस सरकार ह ए भ्रष्ट अधिकारी मन ल बचाय के पूरा कोसिस करत हे।
ट्रेन रद्द
दक्षिण पूर्व मध्य रेलवे बिलासपुर रेलमंडल के अमलाई-बुढ़ार सेक्शन म तीसरइया रेललाइन म विद्युतीकरण के काम सात ले बीस जुलाई तक करे जाही। एखर सेती कुछेक गाड़ी मनके अवई-जवई रद्द रइही। एमा बिलासपुर-चिरमरी-बिलासपुर एक्सप्रेस, उदयपुर-शालीमार-उदयपुर एक्सप्रेस, पुरी-वलसाड एक्सप्रेस, बीकानेर-पुरी-बीकानेर एक्सप्रेस, दुरूग-निजामुद्दीन-दुरूग एक्सप्रेस अउ दुरूग-कानपुर-दुरूग एक्सप्रेस सामिल हवय। एखर अलावा दुरूग-नौतनवा-दुरूग एक्सप्रेस, दुरूग-जम्मूतवी-दुरूग एक्सप्रेस अउ बरौनी-गोंदिया-बरौनी एक्सप्रेस के अवई-जवई रद्द रइही।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे-
– ओ स्वतंत्रता सेनानी के नाम बतावव, जउन भारतीय सहकारिता आंदोलन के प्रणेता के रूप म जाने जाथे। ओमन स्वतंत्र पार्टी अउ अंतर्राष्ट्रीय कृषि उत्पादक परिसंघ के संस्थापक सदस्य म घलो सामिल रिहीन।
श्रोता मन अपन उत्तर वाट्सअप नंबर – आठ आठ दू छै पांच चार छै दू छै दू – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
होटल/रेस्तरां-सर्विस चार्ज
केन्द्रीय उपभोक्ता मामला के मंत्रालय ह स्पष्ट करे हे कि कोनों होटल या रेस्टोरेंट खाना के बिल म कइसनो सर्विस चार्ज यानि सेवा प्रभार नइ जोड़ सकही। केन्द्रीय उपभोक्ता संरक्षण अधिकरण ह अनुचित व्यापार प्रचलन अउ उपभोक्ता अधिकार के उल्लंघन रोके बर दिसा-निरदेस जारी करे हे। एमा केहे गेहे कि आने-आने नाव ले सेवा प्रभार नइ वसूले जाही। होटल या रेस्टोरेंट ह उपभोक्ता मन ल सर्विस चार्ज के भुगतान बर बाध्य नइ कर सकही, ओमन ल ए स्पष्ट रूप ले बताना होही कि ए प्रभार ह उपभोक्ता मनके स्वेच्छा के उपर हवय।
मंत्रालय ह केहे हे कि ए नियम के उल्लंघन करइया होटल या रेस्टोरेंट के खिलाफ राष्ट्रीय उपभोक्ता हेल्पलाइन नंबर एक नौ एक पांच म सिकायत दर्ज करा सकथे।
राष्ट्रीय परीक्षा एजेंसी-कार्यक्रम
राष्ट्रीय परीक्षा एजेंसी-एनटीए ह विश्वविद्यालय अनुदान आयोग नेट-दू हजार बाईस परीक्षा के दिसंबर दू हजार इक्कीस अउ जून दू हजार बाईस के एकीकृत कारीकरम जारी कर देहे। परीक्षा नौ जुलाई ले सुरू होही। एनटीए ह नौ जुलाई के परीक्षा-कारीकरम बर काली यूजीसी नेट परीक्षा स्लिप जारी करीन। परीक्षा के आने तिथि बर परीक्षा केन्द्र स्लिप अभी जारी नइ करे गेहे। एनटीए ह नौ तारीख, ग्यारह तारीख अउ बारह जुलाई के होवइया परीक्षा के यूजीसी नेट कारीकरम जारी कर देहे।
आंगनबाड़ी कार्यकर्ता-आंदोलन
मुंगेली म आंगनबाड़ी कार्यकर्ता अउ सहायिका मन ह अपन आने-आने मांग ल लेके सात ले नौ जुलाई तक आंदोलन करे के ऐलान करे हे। जिला अध्यक्ष प्रमिला ठाकुर ह बतईन कि एखर पहिली घलो संगठन डहार ले बेरा-बेरा म आंदोलन करके सासन ल अवगत कराय गे रिहीस, जेखर बाद सासन डहार ले ए आश्वस्त करे गे रिहीस कि आंगनबाड़ी कार्यकर्ता अउ सहायिका ल कलेक्टर दर म राखे जाही। फेर, तीन बछर ले जादा बेरा होय के बाद घलो ओमन ल सरकारी कमरचारी घोसित नइ करे गेहे। आंगनबाड़ी कार्यकर्ता मन ह किहीन हे कि जिला स्तर म कहूं उंखर मांग पूरा नइ करे गीस, त ओमन प्रांतीय स्तर म आंदोलन करही।
अउ अब थोरकुन समाचार सार म-
– जांजगीर-चांपा जिला के पनगांव म नरवा म बोहाय युवक के सव बरामद कर ले गेहे। काली दू झिन युवक नहात बेरा नाला म बोहा गे रिहीस, जेमा ले एक झिन युवक ल बचा ले गे रिहीस।
– राजनांदगांव पुलिस ह ऑनलाइन ठगी मामला के एक झिन आरोपी ल गिरफ्तार करे हे।
अउ
– राजनांदगांव जिला के गातापार-लांजी रद्दा म दू ठिन फटफटी के बीच आपस म होय टक्कर ले एक झिन मनखे के मउत होगे। उहें, दू झिन आने मनखे ल गंभीर रूप ले चोट आय हे, जेखर इलाज राजनांदगांव मेडिकल कॉलेज म चलत हे।