अग्निपथ योजना
रक्षा मंत्रालय ह घोसना करे हे कि देश के थल सेना अउ नौसेना म अग्निपथ योजना म अग्निवीर मनके भर्ती बर पंजीकरण सुरू होगे हे। योजना म थल सेना, नौ सेना अउ वायु सेना म भर्ती चार बछर बर होही। चार बछर बाद एमा ले पच्चीस प्रतिशत अग्निवीर मन ल उंखर योग्यता, इच्छा अउ फिटनेस के आधार म नियमित करे जाही। बाकी पचहत्तर प्रतिशत अग्निवीर मन ग्यारह ले बारह लाख रूपिया के सेवा निधि पैकेज पाही। दूसर करियर सुरू करे बर ओमन ल योग्यता प्रमाण पत्र अउ बैंक के ऋण घलो दे जाही। भर्ती नब्बे दिन म सुरू हो जही अउ अग्निवीर मन पुरस्कार, पदक अउ बीमा के घलो हकदार होही। पहिली चार साल म सैनिक मन ल तीस ले चालीस हजार रूपिया के मासिक वेतन दे जाही।
छत्तीसगढ़ बंद
राजस्थान के उदयपुर म होय कन्हैयालाल के हत्या के विरोध म विश्व हिन्दू परिषद डहार ले करे गे छत्तीसगढ़ बंद के आह्वान के मिलाजुला असर राजधानी रईपुर संघरा प्रदेसभर म देखे गीस। ए बंद ल भारतीय जनता पार्टी अउ छत्तीसगढ़ चेम्बर ऑफ कॉमर्स ह अपन समर्थन दे रिहीस। उहें, व्यवसायिक अउ सामाजिक संगठन मन ह घलो बंद के आयोजन ल अपन समर्थन देवत दुकान ल बंद राखीन।
राजधानी रईपुर म बंद के व्यापक असर देखे गीस। उहें, बंद के दउरान कुछेक जघा म पुलिस अउ प्रदर्शनकारी मनके बीच हल्का झड़प होय के घलो समाचार मिले हे। अइसने, बिलासपुर, रायगढ़, राजनांदगांव, कोरिया, जांजगीर-चांपा अउ कोंडागांव संघरा दूसर जिला म घलो छत्तीसगढ़ बंद के असर देखे गीस।
कोरोना समाचार
प्रदेस म कोरोना संक्रमण के मामला म सरलग बढ़ोतरी होवत हे। काली प्रदेस म बारह हजार पांच सौ इक्यासी सैम्पल के जांच म एक सौ उनतीस लोगन कोरोना संक्रमित पाय गीन। रईपुर जिला म सबले जादा पैंतीस, बलौदाबाजार म सोलह अउ दुरूग जिला म पन्द्रह झिन मरीज मिलीन। एखरे संग राज्य म कोरोना के सक्रिय मरीज मनके संख्या बाढ़के नौ सौ तिरासी होगे हवय। वर्तमान म प्रदेस के पॉजिटीविटी दर एक दशमलव शून्य तीन प्रतिशत हे।
इही बीच, प्रदेस म कोरोना ले बाचे बर टीकाकरण अभियान घलो जारी हे। अभी तक चार करोड़ पन्द्रह लाख इक्यानवे हजार ले जादा कोविड रोधी टीका लगाय जा चुके हे। एमा ले दू करोड़ बीस लाख तीन हजार ले जादा लोगन ल टीका के पहिली खुराक अउ एक करोड़ अट्ठायासी लाख तिरपन हजार ले जादा लोगन ल दूनो खुराक दे गे हवय। एखर अलावा सात लाख चौंतीस हजार ले जादा लोगन ल ऐहतियाती डोज दे गे हवय।
भाजपा-बैठक
भारतीय जनता पार्टी के राष्ट्रीय कार्यकारिणी के दू दिवसीय बइठका आज हैदराबाद म सुरू होईस। कार्यकारी समिति के बइठका म प्रधानमंत्री नरेन्द्र मोदी, केन्द्रीय मंत्री अमित शाह, राजनाथ सिंह अउ नितिन गडकरी संघरा पार्टी के वरिष्ठ नेता, भाजपा सासित राज्य के मुख्यमंत्री अउ तीन सौ चालीस प्रतिनिधि मन भाग लेवत हे। पार्टी अध्यक्ष जगत प्रकाश नड्डा ह आज बिहनिया पार्टी पदाधिकारी मनके बइठका के उद्घाटन करीन। प्रधानमंत्री श्री मोदी दू दिन के बइठका के सबो सत्र म सामिल होही।
पार्टी के प्रमुख फइसला करइया निकाय के दू दिन के बइठका म पार्टी ल बिसेस रूप ले दक्षिणी राज्य म अउ मजबूत करे के रणनीति उपर ध्यान दे जाही।
रियल इस्टेट अपीलेट ट्रिब्यूनल-लोकार्पण
मुख्यमंत्री भूपेश बघेल ह राजधानी रईपुर म मौलश्री विहार कॉलोनी के रियल इस्टेट अपीलेट ट्रिब्यूनल के नवा बने भवन के आज वर्चुअल लोकार्पण करीन। कारीकरम म रियल इस्टेट अपीलेट ट्रिब्यूनल के अध्यक्ष जस्टिस शरद कुमार गुप्ता मौजूद रिहीन। ए मउका म मुख्यमंत्री ह किहीन कि उपभोक्ता मनके हित के संरक्षण बर ट्रिब्यूनल ह एक ठिन जरूरी फोरम साबित होही।
भाजपा महिला मोर्चा-प्रशिक्षण
भारतीय जनता पार्टी महिला मोर्चा के प्रदेस अध्यक्ष शालिनी राजपुत ह किहीन हे कि मोर्चा के कार्यकर्ता मन छत्तीसगढ़ सरकार के नाकामी ल घर-घर तक पहुंचाही। सुश्री राजपूत ह आरोप लगईन हे कि प्रदेस के कांग्रेस सरकार अपन वादा पूरा नइ कर पाय हे। ओमन किहीन कि कांग्रेस सरकार ह प्रदेस के जनता ल छले हे। चंपारण म राखे गे महिला मोर्चा के तीन दिवसीय प्रशिक्षण शिविर म कार्यकर्ता मन ह राज्य सरकार के असफलता ल घर-घर पहुंचाय के संकलप लीन हे।
कांग्रेस-पदयात्रा
प्रदेस कांग्रेस कमेटी डहार ले अवइया नौ अगस्त ले विधानसभा स्तरीय पचहत्तर किलोमीटर के पदयात्रा निकाले जाही। पदयात्रा के दउरान पार्टी कार्यकर्ता राज्य सरकार के उपलब्धि ल जनता तक पहुंचाही। पार्टी के रईपुर के प्रदेस कार्यालय राजीव भवन म राखे गे प्रदेस कार्यकारिणी के बइठका म ए फइसला ले गीस।
बइठका म यहू घलो तय करे गीस कि आजादी के अमृत महोत्सव के समापन मउका म पन्द्रह अगस्त के राजधानी रईपुर म प्रदेस स्तरीय कारीकरम के आयोजन करे जाही। संगेसंग दू अक्टूबर ले प्रस्तावित भारत जोड़ो यात्रा छत्तीसगढ़ ले जावय। एखर आग्रह अखिल भारतीय कांग्रेस कमेटी ले करे जाही।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत कृषि क्षेत्र म स्टार्टअप के संभावना उपर रईपुर के कृषि विश्वविद्यालय स्थित एग्री बिजनेस इन्क्यूबेशन सेंटर के प्रमुख डॉक्टर हुलास पाठक ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘सरगुजा‘‘ जिला के गतिविधि मनके बारे म जानकारी दे जाही।
क्रिप्टोकरेंसी-धोखाधड़ी मामला
क्रिप्टोकरेंसी धोखाधड़ी मामला म तीन झिन चीनी नागरिक मनके फ्रीज करे गे खाता म जमा करीबन चार करोड़ रूपिया के रासि ल जब्त करे म राजनांदगांव पुलिस ह जुट गे हवय। एखर बर पुलिस ह बायनेंस वेबसाइट ल पत्र लिखही। जांच अधिकारी अउ नगर पुलिस अधीक्षक गौरव राय ह बतईन कि फ्रीज कराय गे खाता म जमा रासि ल जब्त करे बर अउ ठग मन ल गिरफ्तार करे बर सीबीआई के मदद ले जाही।
अउ अब थोरकुन समाचार सार म-
– आज विश्व खेल पत्रकार दिवस हे। एला अंतर्राष्ट्रीय खेल पत्रकार दिवस के रूप म घलो जाने जाथे। ए दिन ल दुनियाभर के सबो खेल पत्रकार मन ल सम्मानित करे बर अउ लोगन म खेल पत्रकारिता के बारे म जागरूकता पैदा करे के उद्देश्य ले मनाय जाथे।
– बीजापुर जिला म गंगालूर एरिया कमेटी के प्लाटून नंबर बारह के एक झिन महिला माओवादी ह पुलिस के आगू आत्मसमर्पण करीन हे।
– नगरीय प्रसासन विभाग डहार ले चलत दाई-दीदी क्लीनिक योजना म रईपुर-बिलासपुर अउ भिलाई नगर निगम क्षेत्र के स्लम बस्ती मन म एक लाख ले जादा माईलोगिन मनके निःशुल्क इलाज करे गीस। उहें, अट्ठारह हजार ले जादा माईलोगिन मनके लैब टेस्ट अउ अंठानवे हजार ले जादा दवई बांटे गीस।
– ‘‘पौधा तुंहर द्वार‘‘ कारीकरम म दक्षिण कोंडागांव वनमंडल डहार ले कोंडागांव नगर पालिका क्षेत्र के सबो वार्ड म निःशुल्क पौधा वितरण सुरू करे गीस। ए कारीकरम म इकतीस जुलाई तक लोगन ल घर पहुंचा के पौधा दे जाही।
अउ
– रईपुर रेलमंडल म आरपीएफ के टीम ह अभियान चलाके आने-आने जघा ले करीबन एक सौ ग्यारह किलो गांजा के संग नौ झन आरोपी मन ल गिरफ्तार करीन हे। जब्त गांजा के कीमत करीब छह लाख रूपिया आंके गेहे।