सिंगल यूज प्लास्टिक यानि एक घांव उपयोग म अवइया प्लास्टिक बर रोक आज ले लागू होगे हे। आज ले पूरा देश म सिंगल यूज प्लास्टिक जीनिस के उत्पादन, आयात, भंडारण, वितरण, बिक्री अउ उपयोग म पाबंदी रीही।
प्रतिबंध के दायरा म जउन चीज ल शामिल करे गेहे। ओमा प्लास्टिक के तिल्ली के कान के मैल निकालने वाला बड्स, कैंडी स्टिक्स, आईस्क्रीम स्टिक्स, थर्माकॉल, प्लास्टिक बर्तन शामिल हे।
प्रदेस के सबो शासकीय कार्यालय म अब छत्तीसगढ़ महतारी के चित्र लगाना जरूरी होही। सामान्य प्रशासन विभाग ह ए बारे म निर्देश जारी कर देहे। एखरे संग सबो कार्यक्रम के शुरूआत छत्तीसगढ़ महतारी के पूजा-पाठ के संग करे के निर्देश दीन हे।
सामान्य प्रशासन विभाग के संयुक्त सचिव संजय अग्रवाल ह ए संबंध म सबो विभागाध्यक्ष, कमिश्नर, कलेक्टर, अउ जिला पंचायत सीईओ ल चिट्ठी लिखीन हे। एमा केहे गेहे कि छत्तीसगढ़ महतारी के चित्र सबो शासकीय कार्यालय, कार्यक्रम, शैक्षणिक अउ प्रशिक्षण संस्थान, पंचायत अउ स्थानीय निकाय के भवन म लगाये जाये।
राज्यपाल अनुसूइया उइके ह आज रायपुर के गायत्री नगर के प्रसिद्ध जगन्नाथ मंदिर म भगवान जगन्नाथ के पूजा अर्चना करके देश अउ प्रदेशवासी मनके सुख-समृद्धि के कामना करीन। राज्यपाल महाआरती म सामिल होइन अउ रथ खींचके यात्रा के शुरूआत करीन। ए मउका म विधानसभा अध्यक्ष डॅाक्टर चरणदास महंत अउ सांसद ज्योत्सना महंत संग बड़ संख्या म श्रद्धालु मन मौजूद रीहिन।
उंहें मुख्यमंत्री भूपेश बघेल ह रायपुर के गायत्री नगर के जगन्नाथ मंदिर म छेरापहरा के रसम पूरा करके सोना के झाडू ले सफई करके रथयात्रा के शुरूआत करीन।
आज नेशनल डॅाक्टर्स डे हे। ए मउका म मुख्यमंत्री भूपेश बघेल ह देश अउ प्रदेश के सबो डॅाक्टर मन ल बधाई दीन हे। मुख्यमंत्री ह आज रायपुर के देवेंद्र नगर के नारायणा हॉस्पिटल म मेगा ऑर्थोपेडिक अउ स्पाइन सर्जरी के संग तीन दिन के स्पाइन अउ ऑर्थोपेडिक कॉन्फ्रेन्स के शुरूआत करीन।
प्रदेस म कोरोना संक्रमण के मामला म सरलग बढ़ोत्तरी होवत हे। काली प्रदेश म तेरह हजार तीन सौ चौरासी सेंपल के जांच करे गीस, जेमा एक सौ सड़सठ लोगन कोरोना संक्रमित पाये गीन। रायपुर जिला म सबले जादा पचपन, दुर्ग म तैंतीस अउ बिलासपुर, बेमेतरा म बारा-बारा मरीज पाये गीस। राज्य म कोरोना के सक्रिय मरीज के संख्या बाढ़के नौ सौ तैंतीस पहुंच गे हवय।
दक्षिण पूर्व मध्य रेलवे के नागपुर रेलमंडल के राजनांदगांव-रसमड़ा रेल खंड के बच तीन जुलाई के बीहनिया दस बजे ले छै जुलाई के बीहनिया दस बजे तक इंटरलॉकिंग के काम करे जाही। एखर सेती ए रद्दा म चलइया कोनो-कोनो गाड़ी के अवई जवई ल रद्द करे गेहे।
एमा दुर्ग-गोंदिया-दुर्ग स्पेशल, गोंदिया-इतवारी-गोंदिया मेमू, रायगढ़-गोंदिया-रायगढ़ जनशताब्दी एक्सप्रेस अउ गेवरारोड-इतवारी एक्सप्रेस, इतवारी-बिलासपुर एक्सप्रेस, अउ बिलासपुर-इतवारी इंटरसिटी एक्सप्रेस रद्द रीही। उंहें टाटानगर-इतवारी टाटानगर, सिंकदराबाद-रायपुर-सिंकदराबाद एक्सप्रेस, पूरी-सूरत-पूरी एक्सप्रेस अउ तिरूनेलवेली-बिलासपुर-तिरूनेलवे
एखर अलावा बरौनी ले चलइया बरौनी-गोंदिया एक्सप्रेस ल दुर्ग स्टेशन म ही रोके जाही। उंहें गोंदिया ले चलइया गोंदिया-बरौनी एक्सप्रेस गोंदिया के जगा दुर्ग ले चलही।
प्रदेश म त्रि-स्तरीय पंचायत उपचुनाव म राज्य के अठाईस जिला म सात सौ पैंतालिस पद म उपनिर्वाचन के सारिणीकरण अउ परिणाम के घोषणा के संग संबंधित निर्वाचन क्षेत्र म लागू आदर्श आचार संहिता सिरा गीस।
राज्य निर्वाचन आयुक्त ठाकुर रामसिंह ह उपचुनाव ल शांतिपूर्ण ढंग ले कराय म सबो अधिकारी, कर्मचारी अउ मतदाता मनके आभार व्यक्त करीन हे। खबर के मुताबिक राज्य निर्वाचन आयोग डहार ले अठाईस ठन जिला म पंच के छै सौ इकतीस, सरपंच के एक सौ आठ, अउ जनपद सदस्य के छै पद बर उप निर्वाचन बर प्रक्रिया करे गीस। एमा ले तीन जनपद सदस्य, बाईस सरपंच अउ चार सौ छै पंच निर्विरोध चुने गीन। एखर बाद इक्कीस ठन जिला म पंच के बावन, सरपंच के बांसठ अउ जनपद पंचायत सदस्य के तीन ठन पद बर अठाइस जून के मतदान होइस।
सुकमा जिला के मनकापाल म पुलिस संग होय मुठभेड़ म एक झिन माओवादी मारे गीस, जेखर शव ल बरामद कर ले गेहे। एखर उपर पांच लाख रूपिया के इनाम रीहिस।
मिले जानकारी के अनुसार आज बीहनिया डीआरजी के टीम ह सर्चिंग म निकले रीहिस। इही दउरान गादीरास थाना क्षेत्र के बोरापारा के जंगल माओवादी मन संग पुलिस के मुठभेड़ होगे। पुलिस के जवाबी कार्रवाई के बाद माओवादी मन भाग गीन । मउका के तलाशी म माओवादी के शव ल बरामद करे गीस, जेखर पहचान डिवीजन के मलांगीर एरिया कमेटी सदस्य के रूप म होय हे ।
उंहें बस्तर जिला के बास्तानार-काकलूर रद्दा म जांच के दउरान पुलिस ह नौ झिन संदिग्ध लोगन ल गिरफ्तार करे हे। एमा ले पांच आरोपी बीजापुर-जांगला क्षेत्र के माओवादी मनके सक्रिय सहयोगी बताय जात हवय। आरोपी मनके तीर ले बूस्टर, तेरा नग डेटोनेटर, दू बंडल कार्डेक्स वायर, एक चार पहिया वाहन अउ एक दू पहिया वाहन बरामद करे गेहे।
राजनांदगांव जिला म होय सड़क दुर्घटना म पिता-पुत्र के मउत होगे। पुलिस के अनुसार खैरागढ़ विकासखंड के प्रकाशपुर निवासी पिता-पुत्र पाछू रतिहा नागपुर महाराष्ट्र ले अपन गांव लहुटत रीहिन। इही दउरान गुमानपुर के तीर अज्ञात वाहन के चपेट म आय ले उंखर मौत हो गीस।
ओति जांजगीर-चांपा जिला के भदरा गांव म दू पहिया गाड़ी के भिडंत म स्कूटी म बइठे एक झन नोनी के मउत होगे अउ फटफटी म बइठे दू झन लोगन गंभीर रूप ले घायल होगे, जउन मन ल बिलासपुर अस्पताल भेजे गे हवय।
नीति आयोग ह आकांक्षी जिला राजनांदगांव ल महिला सशक्तिकरण के दिशा म करे जावत सुघ्घर काम बर अग्रणी जिला म सामिल करे हे। केंद्रीय महिला अउ बाल विकास मंत्रालय डहार ले होवइया बइठका म राजनांदगांव कलेक्टर ल बुलाये हे।
मुख्यमंत्री भूपेश बघेल अउ महिला तथा बाल विकास मंत्री अनिला भेडिया ह जिला प्रशासन ल एखर बर बधाई दीन हे ।
– जशपुर जिला के दुलदुला विकासखंड म हाथी के हमला ले एक झन माइलोगिन के मउत हो गीस।
और
– जांजगीर चांपा जिला के चंद्रपुर पुलिस ह समूह के माइलोगिन मनले दस लाख रूपिया लेके फाइनेंस कंपनी म राशि जमा नही करे के आरोप म एक झन कर्मचारी ल गिरप्तार करीन हे ।