मुख्यमंत्री-भेंट मुलाकात
मुख्यमंत्री भूपेश बघेल ह आज भेंट-मुलाकात कार्यक्रम म जशपुर जिला के फरसाबहार विकासखंड के दउरा करीन। ए मउका म ओमन ह ईब नदी के तीर आयोजित कार्यक्रम म ग्राम कोलहेजहारिया म प्री अउ पोस्ट मैट्रिक छात्रावास, पुलिस चौकी अउ तपकरा म नायब तहसीलदार कोर्ट के स्थापना के घोसना करीन। मुख्यमंत्री ह तपकरा म स्वामी आत्मानंद स्कूल, फरसाबहार म सहकारी बैंक, पमशाला म हाईस्कूल के हायर सेकेंडरी म बदले के अउ फरसाबहार म सड़सठ जघा म देवगुड़ी के सौंदर्यीकरण बर दू करोड़ रूपिया के स्वीकृति दीन। श्री बघेल ह फरसाबहार हाथी प्रभावित क्षेत्र म हाई मास्क लाईट लगाय के निरदेस घलो दीन।
आत्मानंद-स्कूल
प्रदेस म स्कूल शिक्षा विभाग डहार ले छिहत्तर नवा स्वामी आत्मानंद अंग्रेजी माध्यम विद्यालय इही सैक्षणिक सत्र ले सुरू करे जात हे। ए नवा स्कूल म पढ़ईया लइका मन ल एक जुलाई ले प्रवेस दे जाही। संबंधित जिला कलेक्टर मन ल नवा स्कूल म शैक्षिक अउ गैर-शैक्षिक पद मनके पूर्ति के संगेसंग आने-आने व्यवस्था घलो सुनिश्चित करे के निरदेस दे गेहे। ए नवा स्कूल खुले ले अब तक प्रदेस म स्वामी आत्मानंद उत्कृष्ट अंग्रेजी माध्यम विद्यालय मनके संख्या ह एक सौ इकहत्तर ले बाढ़ के दू सौ सैंतालीस हो जही। उहें, प्रदेस म बत्तीस स्वामी आत्मानंद उत्कृष्ट हिन्दी माध्यम विद्यालय ह घलो संचालित होवत हे।
विश्व आदिवासी दिवस
विश्व आदिवासी दिवस के मउका म अवइया नौ अगस्त के व्यक्तिगत वन अधिकार, सामुदायिक वन अधिकार, सामुदायिक वन अधिकार संसाधन अउ डेयरी पालन के हितग्राही मन ल सम्मानित करे जाही।
आदिम जाति विकास मंत्री डॉक्टर प्रेमसाय सिंह टेकाम ह काली मंत्रालय म आयोजित बस्तर संभाग के समीक्षा बइठका के दउरान अधिकारी मन ल ए बारे म जरूरी तैयारी करे के निरदेस दीन। ओमन किहीन कि वन अधिकार मान्यता पत्र के प्रकरण मनके समीक्षा अउ पात्र लोगन मन ल वन अधिकार पत्र दिये जाना सासन के पहिली प्राथमिकता हवय। एमा कोनों प्रकार के ढील-ढाल बर्दास्त नइ करे जाही।
नरवा विकास योजना
नरवा विकास योजना के अंतर्गत प्रदेस म लगभग तीस हजार बरसाती नाला ल चिन्हांकित करे गेहे। आठ हजार नाला प्रदेस के वन क्षेत्र म स्थित हे, जेमा ले छह हजार तीन सौ पंचानवे नाला के मरम्मत कराय जावत हे। एमा करीब बारह सौ करोड़ रूपिया ले जादा के खरचा आय हे।
मुख्यमंत्री भूपेश बघेल के अध्यक्षता म राखे गे समीक्षा बइठका म ए जानकारी दे गीस। बइठका म मुख्यमंत्री ह किहीन कि नरवा विकास योजना के अंतर्गत नाला म जल संरक्षण अउ संवर्धन बर करे जावत काम ल वैज्ञानिक पद्धति ले करे जाय अउ एखर ले होवइया जलस्तर म सुधार के आंकलन ल घलो वैज्ञानिक पद्धति ले रिमोट सेंसिंग सैटेलाइट के माध्यम ले करे जाय। ओमन बतईन कि ए योजना ले वन क्षेत्र म भू-जल के स्तर म बीस से तीस सेंटीमीटर अउ मैदानी क्षेत्र म सात सेंटीमीटर के बढ़ोतरी होय हे।
राहुल-अस्पताल छुट्टी
जांजगीर-चांपा जिला के मालखरौदा विकासखंड के पिहरीद गांव म बोरवेल ले सकुशल निकाले गे लइका राहुल साहू ल बिलासपुर के एक ठिन निजी अस्पताल ले आज छुट्टी दे दे गीस।
मुख्यमंत्री भूपेश बघेल ह राहुल के घर लहुटे म खुसी जाहिर करत किहीन कि सबो झन के प्रार्थना अउ मेहनत ले राहुल ह आज अस्पताल ले बने-बने होके डिस्चार्ज होगे हे। मुख्यमंत्री ह किहीन कि अब राहुल के स्पीच थैरेपी कराय जाही, जेखर ले ओ ह बोल सकही।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी से ‘‘मन की बात‘‘ कार्यक्रम म अपन विचार साझा करही। ए कारीकरम आकाशवाणी अउ दूरदर्शन के जम्मो नेटवर्क म प्रसारित होही। ए आकाशवाणी समाचार के वेबसाइट अउ न्यूज ऑन एआईआर मोबाइल ऐप म घलो उपलब्ध रइही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल म घलो कार्यक्रम ह सीधा प्रसारित होही।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत संघ लोक सेवा आयोग के सिविल सर्विस परीक्षा म देसभर म पैतालीसवां अउ छत्तीसगढ़ म पहिली स्थान प्राप्त करइया श्रद्धा शुक्ला ले करे गे गोठबात के प्रसारण होही। एखर प्रसारण आकाशवाणी के रायपुर केन्द्र डहार ले काली बिहनिया नौ बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र रिले करही।
जिले की चिट्ठी
आकाशवाणी समाचार डहार ले काली संझा छह बजके तीस मिनट म ‘‘जिले की चिट्ठी‘‘ कार्यक्रम के प्रसारण करे जाही। ए कार्यक्रम आकाशवाणी के रायपुर केंद्र डहार ले प्रसारित होही। जेला जम्मों केंद्र मन ह एके संग रिले करही। ए बखत के अंक म ‘‘बालोद‘‘ जिला के गतिविधि मनके बारे म जानकारी दे जाही।
एवरेस्ट बेस कैम्प-फतह
बुलंद हौसला के संग एवरेस्ट बेस कैम्प तक पहुंचे प्रतिभागी मन ह काली मुख्यमंत्री भूपेश बघेल ले भेंट करीन। ए अभियान म आने-आने उमर के चार दिव्यांग अउ एक झिन ट्रांसजेंडर ह एके संग ट्रैकिंग करीन। एवरेस्ट बेस कैम्प के ऊंचाई पांच हजार तीन सौ चौसठ मीटर हवय। मिशन इन्क्लूशन नाम ले पाछु तेईस अप्रैल के सुरू होय ए मिशन ह तीन मई के पूरा होईस। मुख्यमंत्री ह जम्मों टीम के हौसला ल सराहिस अउ किहीन कि ओमन के सफलता आने मनखे मन बर प्रेरणा के काम करही।
सुनइया मन ल बतादन कि ए अभियान म टीम के अगुवई करत रिहीस दिव्यांग पर्वतारोही चित्रसेन साहू, चंचल सोनी, रजनी जोशी, अनवर अली अउ निक्की बजाज के अलावा गुंजन सिन्हा, पेमेंद्र चंद्राकर, राघवेन्द्र चंद्राकर अउ आशुतोष पांडेय ह घलो सामिल रिहीस।
हज यात्रा
छत्तीसगढ़ के तीन सौ बयासी हज यात्री मन काली मक्का-मदीना बर रवाना होईस। ए जत्था म दो सौ दो पुरूष अउ एक सौ अस्सी माईलोगिन सामिल हे।
राज्य हज कमेटी के चेयरमैन मोहम्मद असलम खान ह बतईन कि हज-दो हजार बाईस बर राज्य के हज यात्री मन ह मुंबई अंतर्राष्ट्रीय विमानतल ले जेद्दाह जाय बर रवाना होईस, जेमन के वापसी दू अगस्त के होही। ओमन बतईन कि पाछु दू बछर ले कोरोना महामारी के सेतीर सऊदी सरकार ह आने देस ले अवइया हज यात्री मन बर पाबंदी लगाय रिहीस।
नशा निवारण दिवस
काली छब्बीस जून के अंतर्राष्ट्रीय नशा निवारण दिवस हवय। ए मउका म नशापान के विरूद्ध जन-जागरूकता बर प्रदेस के सबो जिला म आने-आने विभाग के सहयोग ले अब्बड़ प्रचार-प्रसार अउ जन-जागरूकता अभियान चलाय जाही।
समाज कल्याण विभाग कोति ले ए बारे म सबो कलेक्टर मन ल निरदेस जारी करे गेहे। उहें, भारत माता वाहिनी के माध्यम ले पंचायत मन म नशामुक्ति बर विशेष कार्यक्रम घलो आयोजित करे जाही।
अउ अब पेस हे मौसम के हाल
प्रदेस म मानसून के गतिविधि तेज होगे हे। मौसम विभाग ह अवइया चौबीस घंटा म प्रदेस म आने-आने जघा म हल्का ले मध्यम बरसा होय के संभावना जताय हे। उहें, एक-दू जघा म गरज-चमक के संग गाज गिरे अउ भारी बरसा होय के चेतावनी दे गेहे।
इही बीच, प्रदेस म अब तक एक सौ एक दमशलव दू मिलीमीटर औसत बरसा दर्ज करे जा चुके हे। राजस्व विभाग के आंकड़ा के मुताबिक गौरेला-पेण्ड्रा-मरवाही जिला म सबले जादा एक सौ बयानवे दशमलव आठ मिलीमीटर अउ जशपुर जिला म सबले कम तिरपन मिलीमीटर औसत वर्षा दर्ज करे गेहे।