ऑपरेशन राहुल
जांजगीर-चांपा जिला के मालखरौदा विकासखंड के पिहरीद गांव म बोरवेल म फंसे ग्यारा बछर के लईका राहुल साहू ल काली देर रतिहा सुरक्षित बाहिर निकाल ले गेहे। एनडीआरएफ, एसडीआरएफ, जिला प्रशासन अउ सेना के मदद ले एक सौ चार घंटा के ऑपरेशन के बाद राहुल ल साठ फीट गड्ढा ले बाहिर निकाले गीस।
बाहिर आतेच राहुल ल तुरते एंबुलेंस के मदद ले बिलासपुर के अपोलो अस्पताल म भर्ती कराय गीस। एखर बर पहिली ले ही ग्रीन कारिडोर बना लेगे रीहिस। मुख्यमंत्री भूपेश बघेल ह आज नई दिल्ली ले रायपुर लहुटीन अउ सीधा हेलिकॉप्टर ले राहुल के हाल जाने बर बिलासपुर के अपोलो अस्पताल बर रवाना होइन। ओमन ह राहुल के परिजन ले भेंट करीन अउ डॅाक्टर ले राहुल के स्थिति के जानकारी लीन। ओमन ह डॅाक्टर ल बने इलाज करे के निर्देश दीन। एखर ले पहिली बिलासपुर संभागायुक्त डॅाक्टर संजय अलंग अउ आईजी रतनलाल डांगी ह अपोलो अस्पताल पहुंच के राहुल के स्वास्थ्य के जायजा लीन। उंहें बिलासपुर कलेक्टर डॅाक्टर सारांश मित्तल ह आज बीहनिया जानकारी दीन कि राहुल स्वस्थ हे अउ ओहा बिहनिया नाश्ता घलो करे हे। हालाकि ओला हल्का बुखार घलो हे। उंहें राहुल के इलाज करत बालरोग विशेषज्ञ डॅाक्टर सुशील कुमार ह बताइन कि राहुल के स्थिति अभी स्थिर हे अउ ओहा खाना खावत हे।
ऑपरेशन राहुल प्रतिक्रिया
राज्यपाल अनुसुइया उइके ह बोरवेल ल राहुल ल सुरक्षित बाहिर निकाले म एनडीआरएफ, एसडीआरएफ, जिला प्रशासन, पुलिस प्रशासन अउ सेना समेत सबो सहयोगी के सफल प्रयास बर ओखर हार्दिक अभिनंदन करीन।
उंहे पूर्व मुख्यमंत्री डॅाक्टर रमनसिंह ह राहुल ल सुरक्षित बोरवेल ले बाहिर निकाले बर रेस्क्यू टीम के सदस्य एनडीआरएफ अउ जिला प्रशासन ल बधाई देहे।
कोरोना समाचार
प्रदेश म कोरोना संक्रमण के मामला एक घांव फेर बाढ़त हे। काली अड़तीस ठिन नवा मामला आगू आय हे। एला मिलाके राज्य म कोरोना के सक्रिय मरीज मनके संख्या बाढ़के एक सौ पंचानबे पहुंच गेहे। रायपुर जिला म काली सबले जादा अठारा झिन मरीज मिलिस। स्वास्थ्य विभाग डहार ले जारी बुलेटिन के अनुसार राज्य के आठ जिला म कोरोना के एक भी सक्रिय मरीज नइ हे।
इही बीच स्वास्थ्य मंत्री टी.एस. सिंहदेव ह एक ठिन बयान जारी करके कीहिन हे कि राज्य म कुछ दिन ले कोरोना संक्रमण बाढ़त दिखाई देत हे। ओमन ह चिंता जतावत कीहिन कि लोगन म कोरोना के प्रति सजगता म कमी आय हे अउ सार्वजनिक जगा म सावधानी नइ बरते जात हे। श्री सिंहदेव ह कीहिन कि अभी प्रदेश म संक्रमण के संख्या कम हे, फेर चौथा लहर के संभावना ल धियान म राखत जादा सावधानी बरते के जरूरत हे। ओमन ह कहिन कि कोरोना के नवा वेरिएंट घलो आवत हे। हालांकि ये ह जादा खतरनाक नइ हे। स्वास्थ्य मंत्री ह लोगन ले कोरोना रोधी टीका जरूर लगवाय के अपील करीन हे।
त्रिस्तरीय पंचायत उपचुनाव
त्रिस्तरीय पंचायत उपचुनई म प्रत्याशी मनके नाव वापसी के बाद अब राज्य म जनपद सदस्य के तीन, सरपंच के बाईस अउ पंच के चार सौ छै पद म निर्विरोध निर्वाचन के स्थिति बन गेहे। उंहें जनपद पंचायत सदस्य के तीन, सरपंच के बासठ अउ पंच के बावन ठिन पद बर अठाईस जून के बीहनिया सात बजे ले मंझनियां तीन बजे तक मतदान होना हे। जनपद सदस्य के नौ सरपंच पद बर दू सौ छै अउ पंच पद बर एक सौ चौदह प्रत्याशी चुनई मैदान म हे।
खेलो इंडिया यूथ गेम्स
खेलो इंडिया यूथ गेम्स म छत्तीसगढ़ के खिलाड़ी मन ह अच्छा प्रदर्शन करत ग्यारा ठिन पदक पाय हे। एमा दू ठिन स्वर्ण, तीन रजत, अउ छै कांस्य पदक शिमल हे। ए उपलब्धि बर मुख्यमंत्री भूपेश बघेल ह सबो खिलाड़ी मन ल बधाई अउ शुभकामना दीन।
जानबा के अनुसार हरियाणा के पंचकूला म आयोजित खेलो इंडिया यूथ गेम्स म छत्तीसगढ़ राज्य ले तेरह ठिन खेल म एक सौ बाईस झिन खिलाड़ी मन भाग लीन। छत्तीसगढ़ ल पहिली स्वर्ण पदक वेट लिफ्टिंग म मिलिस। एमा ज्ञानेश्वरी यादव ह एक सौ चौसठ किलोग्राम वजन उठाके अपन पुराना रिकार्ड ल तोड़के स्वर्ण पदक हासिल करीन। अइसने दूसर स्वर्ण पदक मल्लखंभ म छत्तीसगढ़ ल सरिता पोयाम ह दिलाइन।
अग्निवीर भर्ती रैली
भारतीय सेना ह कीहिन हे कि तीन महीना बाद अग्निवीर मनके पहिली भर्ती रैली आयोजित करे जाही। थलसेना के उपप्रमुख लेप्टिनेंट जनरल पी.एस. राजू ह नई दिल्ली म संवाददाता मन ल बताइन कि अग्निवीर जवान मन छै महीना के प्रशिक्षण के बाद सेना म साढ़े तीन बछर तक अपन सेवा दे सकही।
थलसेना उपप्रमुख ह कीहिन कि चार साल के अंत म सेना ह पच्चीस प्रतिशत अग्निवीर ल सेना म बनाये रखे उपर विचार करही। जेखर करा सेना म रेहे बर पर्याप्त योग्यता होही। सेना उप प्रमुख ह बताइन कि सेना म लगभग चालीस हजार अग्निवीर मनके भर्ती करे जाही।
नया शैक्षणिक सत्र
प्रदेश के सबो सरकारी स्कूल म काली ले नवा शैक्षणिक सत्र शुरू होवत हे। एखरे संग काली ले स्कूल म शाला प्रवेश उत्सव घलो शुरू हो जाही, जउन अवइया पंद्रह जुलाई तक चलही । एक पाली म लगइया स्कूल बीहनिया दस बजे ले खुलही। उंहे दू पाली वाले स्कूल बीहिनया साढ़े सात बजे ले अउ मंझनियां साढ़े ग्यारा बजे ले शुरू होही। रायपुर जिला म कई ठिन निजी स्कूल ल गर्मी ल देखत छुट्टी ल बीस जून तक बढ़ा देहे। इही बीच सरकारी स्कूल म पढ़ईया लईका मन ल पुस्तक अउ यूनिफॅार्म बांटे जात हे। उंहें सायकिल घलो जल्दीच बाटे जाही।
पुलिस महानिदेशक समीक्षा
राज्य के पुलिस महानिदेशक अशोक जुनेजा ह आज वीडियो कॉन्फ्रेसिंग के माध्यम ले प्रदेश म कानून व्यवस्था अउ अपराध म नियंत्रण ल लेके पुलिस महानिरीक्षक अउ पुलिस अधीक्षक मनके एक ठिन बइठका लीन। बइठक म ओमन ह चिटफंड कंपनी के संचालक मनके खिलाफ होवत कार्रवाई के समीक्षा करीन अउ एमा तेजी लाय के निर्देश दीन। एखर अलावा श्री जुनेजा ह नशीला पदार्थ के कारोबार, चोरी जइसे अपराध म प्रभावी नियंत्रण बर दोषी मनके खिलाफ कड़ा कार्रवाई करे बर घलो कीहिन।
मौसम
आज राजधानी रायपुर समेत प्रदेश के कई ठिन जिला म बादल छाये हे। उंहें बस्तर संभाग के कुछु जगा म गरज चमक के संग बारिश होय हे। मौसम विभाग ह रायगढ़, बिलासपुर, महासमुंद, दुर्ग, बस्तर समेत प्रदेश के उन्नीस ठिन जिला बर अलर्ट जारी करे हे। ए जिला म अवइया चौबीस घंटा के भीतरी गरज चमक के संग आकाशीय बिजली गिरे के संभावना हे संगेसंग कुछु जगा म बारिश घलो हो सकत हे।
संक्षिप्त समाचार
– अनियमित वित्तीय कंपनी देव्यानी प्रापर्टी लिमिटेड के निवेशक मनके डहार ले जमा करे गे पइसा ल सतरह जून के बांटे जाही। सबो निवेशक मन ल रायपुर के मेडिकल कॉलेज ऑडिटोरियम म मंझनिया एक बजे तक उपस्थित रेहे के निर्देश दे गेहे।
– बेमेतरा जिला के देवकर म ग्राहक सेवा केंद्र के माध्यम ले छब्बीस लाख रूपिया के धोखाधड़ी करे के आरोप म एक झिन माइलोगिन समेत तीन झिन संचालक ल साजा पुलिस ह गिरप्तार करे हे।
– विश्व बुजुर्ग दुर्व्यवहार जागरूकता दिवस के अवसर म समाज कल्याण मंत्री अनिला भेडिया ह आज रायपुर समेत देशभर के बाईस शहर म सर्वेक्षण म आधारित राष्ट्रीय सर्वे रिपोर्ट के विमोचन करीन।
– धमतरी जिला म बरसा ल देखत सोला जून ले पंद्रह अगस्त तक मछली पकड़े म रोक लगाय हे।
– बालोद जिला के सुरेगांव म डायरिया ले एक झिन माइलोगिन के मउत होगे, उंहें दू परिवार के सात झिन बीमार हे। ए सबो ल प्राथमिक उपचार के बाद अस्पताल म भर्ती कराय गेहे।
अउ
– सरगुजा जिला के रामगढ़ म आषाढ़ के पहिली दिन के मउका म दू दिन बर काव्यपाठ के आयोजन करे गीस।