फग्गन सिंह कुलस्ते-दुर्ग
केन्द्रीय इस्पात अउ ग्रामीण विकास राज्यमंत्री फग्गन सिंह कुलस्ते ह काली छत्तीसगढ़ के एक दिन के दउरा म दुरूग आही। श्री सिंह ह प्रधानमंत्री नरेन्द्र मोदी के अगुवई म केन्द्र के एनडीए सरकार के आठ बछर पूरा होय के मउका म राखे गे कारीकरम सेवा, सुशासन अउ गरीब कल्याण के श्रृंखला म दुरूग म सामिल होही। सम्मेलन म भाजपा संगठन दुरूग, भिलाई, राजनांदगांव, बेमेतरा अउ कवर्धा जिला के कार्यकर्ता मनके संग केन्द्र सरकार के योजना ले फायदा लेवइया लाभार्थी मन घलो सामिल होही।
केन्द्रीय राज्यमंत्री-राजनांदगांव
केन्द्रीय सूक्ष्म, लघु अउ मध्यम उद्यम राज्यमंत्री भानुप्रताप सिंह वर्मा ह अपन दू दिन के छत्तीसगढ़ दउरा म काली राजनांदगांव के लखौली म लोक सेवा केन्द्र के निरीक्षण करीन। केन्द्रीय राज्यमंत्री ह खुटेरी ग्राम पंचायत म महात्मा गांधी राष्ट्रीय ग्रामीण रोजगार गारंटी योजना-मनरेगा म चलत नवा तालाब निर्माण सह वृक्षारोपण कार्य के अवलोकन करीन।
मुख्यमंत्री-पत्रकारवार्ता/समी
मुख्यमंत्री भूपेश बघेल ह किहीन हे कि जशपुर जिला के पत्थलगांव म गाड़ी मनके फिटनेस के जांच बर कैम्प खोले जाही, जेखर ले ट्रांसपोर्टर मन ल घेरी-बेरी जिला मुख्यालय जशपुर झन जाना पड़य। श्री बघेल ह आज पत्रकार मन ले बात करत किहीन कि राज्य सरकार तीर डीएपी खाद के कमी हे। फेर, इहे खाद बनाके रासायनिक खाद उपर निर्भरता ल कम करे जावत हे। ओमन किहीन कि राज्य सरकार ह इनपुट सब्सिडी म कोनों कमी नइ करय, आगू घलो ए जारी रइही।
मुख्यमंत्री ह अधिकारी मन ल निरदेस दीन कि कृषि अउ लघु वनोपज के संग जिला म मछली पालन, बकरी पालन, सुकर पालन ल आमदनी के प्रमुख जरिया बनाय ल बढ़ावा दे जाय। ओमन किहीन कि बस्तर के जइसन जशपुर म घलो आदिवासी मनके सरना स्थल ल सुंदर बनाय के काम करे जाय। मुख्यमंत्री ह अधिकारी मन ल अभियान चलाके लइका मनके जाति प्रमाण पत्र बनाय के निरदेस दीन।
भेंट-मुलाकात कारीकरम म मुख्यमंत्री ह आज पत्थलगांव म चौरानवे करोड़ पैंतीस लाख रूपिया के डेढ़ सौ ले जादा विकास काम के लोकार्पण अउ भूमिपूजन करीन।
मुख्यमंत्री-निर्देश
मुख्यमंत्री भूपेश बघेल ह मानसून ले पहिली शहर म जलभराव ले बचाव अउ आपदा प्रबंधन के संबंध म अधिकारी मन ल जरूरी व्यवस्था करे के निरदेस दीन हे। ए सिलसिला म नगरीय प्रशासन सचिव ह निगम आयुक्त मनके बइठका लीन। ओमन किहीन कि मानसून ल देखत बाढ़ नियंत्रण कक्ष चौबीस घंटा काम करय। संगेसंग निगम आयुक्त ह हर दिन फील्ड म जाके जायजा लेवय।
बोरवेल-हादसा
जांजगीर-चांपा जिला के ग्राम पिहरीद म बोरवेल म फंसे ग्यारह बछर के लइका ल बाहिर निकाले बर पचास घंटा ले रेस्क्यू जारी हे। मउका म कुसमुंडा के एसईसीएल खदान अउ मनेन्द्रगढ़ के मानिकपुर ले रेस्क्यू टीम ह पहुंच गे हवय। लइका ल निकाले बर साठ फीट के खुदाई करे जा चुके हे। मउका म एनडीआरएफ अउ एसडीआरएफ के टीम के अलावा सेना के विशेषज्ञ मन घलो मौजूद हे। राहुल ल बोरवेल के अंदर ही ऑक्सीजन देवाय जात हे।
इही बीच, राज्यपाल अनुसुईया उइके ह जिला कलेक्टर अउ पुलिस अधीक्षक ल फोन करके राहुल ल बाहिर निकाले बर चलत काम के जानकारी लीन अउ लइका के परिवार वाला मन ले धीरज धरे के आग्रह करीन।
उहें, मुख्यमंत्री भूपेश बघेल ह आज एक घांव फेर राहुल के घर वाला मन ले फोन म बात करीन अउ ओमन ल विश्वास देवईन कि लइका ल सुरक्षित बाहिर निकाल ले जाही।
इही बीच, जांजगीर-चांपा जिला म होय बोरवेल के घटना के बाद राज्य के कतकोन जिला म खुल्ला अउ अनुपयोगी ट्यूबवेल ल बंद करे के संबंध म जरूरी कदम उठाय जावत हे।
कुकर बम-बरामद
बीजापुर जिला म सुरक्षा बल ह पांच अउ तीन किलो के दू ठन कुकर बम बरामद करीन हे। माओवादी मन ह ए विस्फोटक ल जवान मन ल नकसान पहुंचाय खातिर नैमेड़ थाना क्षेत्र के पेद्दाकोड़ेपाल अउ कैका रद्दा म लगाय रिहीन। सीआरपीएफ अउ डीआरजी के संयुक्त टीम ह ए विस्फोटक ल बरामद करीन अउ एला मउकाच म निष्क्रिय कर दीन।
विश्व बाल मजदूरी उन्मूलन दिवस
आज विश्व बाल मजदूरी उन्मूलन दिवस हे। ए मउका म राष्ट्रीय बाल अधिकार संरक्षण आयोग डहार ले आज ले देसभर के पचहत्तर जघा म ए सप्ताह के सुरूवात करे गेहे। ए दउरान इहां बाल मजदूरी रोके बर अभियान चलाय जाही। ए काम म राज्य आयोग, जिला प्राधिकरण, बाल कल्याण समिति अउ दूसर संगठन के घलो मदद ले जाही।
ए मउका म छत्तीसगढ़ के मुख्यमंत्री भूपेश बघेल ह किहीन कि बाल मजदूरी ले समाज अपन सुनहरा भविष्य ल खतम करे बर आगू बढ़थे। बने देखभाल, पोषण, सुरक्षा, शिक्षा अउ स्वास्थ्य उपर हरेक लइका के सामान अधिकार हे।
शाला प्रवेश उत्सव
प्रदेस के स्कूल मन म ए बछर घलो नवा भर्ती होवइया लइका मनके स्वागत बर सोलह जून के शाला प्रवेश उत्सव मनाय जाही, जउन ह पन्द्रह जुलाई तक चलही। एखर संबंध म स्कूल शिक्षा विभाग के प्रमुख सचिव ह जिला कलेक्टर, मुख्य कार्यपालन अधिकारी अउ जिला शिक्षा अधिकारी मन संग प्राचार्य मनके बइठका लीन। ओमन ह शाला प्रवेश उत्सव ल जन-जन के अभियान उपर जोर दीन।
हाईटेंशन तार-ट्रक जला
छत्तीसगढ़-तेलगांना राज्य के सीमा म चेरला थाना क्षेत्र म काली रतिहा सीआरपीएफ के एक ठन ट्रक ह हाईटेंशन तार के चपेट म आके जल गीस। ए ट्रक म सीआरपीएफ कैम्प के सामान रिहीस, जउन ह पूरा जल गे। बताय जात हे कि ट्रक ह कैम्प म सामान छोड़े बर जात रिहीस। इही दउरान तिप्पापुरम अउ चेलीमेला के बीच सड़क के उपर हाईटेंशन तार ह ट्रक ले छुआ गे। आग लगते साथ ड्राईवर ह नीचे कुद के अपन जान बचईस।
मौसम
पूर्व पश्चिम द्रोणिका ह उत्तर-पश्चिम उत्तरप्रदेश ले पश्चिम असम तक फैले हे। एखर परभाव ले राज्य म ठंडा हवा चलत हे अउ प्रदेस के अधिकतम तापमान म गिरावट होवत हे। पाछु रतिहा राजधानी रईपुर संघरा प्रदेस के कतकोन जघा म तेज बरसा होय के समाचार मिले हे।
अवइया चौबीस घंटा के दउरान प्रदेस के कोनों-कोनों जघा म हल्का ले मध्यम बरसा होय के या गरज-चमक के संग छिंटा पड़े के संभावना हे। उहें, एक-दू जघा म आकाशीय बिजली गिरे के अउ अंधड़ चले के चेतावनी घलो दे गेहे।
संक्षिप्त समाचार
– छत्तीसगढ़ राज्य निर्वाचन आयोग के निरदेस म रेडक्रास सोसायटी डहार ले धमतरी जिला के आने-आने ग्राम पंचायत म जागव वोटर कारीकरम चलाय जात हे।
– भाजपा के प्रदेस मंत्री ओ.पी. चौधरी के सोशल मीडिया म दे गे एक ठन बयान के सेती उंखर खिलाफ दर्ज मामला के विरोध म आज भाजपा कार्यकर्ता मन ह रायगढ़ के सुभाष चौक म विरोध-प्रदर्शन करीन।
– राजधानी रईपुर म नारद जयंती समारोह म वरिष्ठ पत्रकार शंकर पांडेय ल नारद सम्मान ले सम्मानित करे गीस।
– राजनांदगांव जिला म मलेरिया रोधी माह मनाय जावत हे। ए दउरान तीन जून तक एखर ले जुड़े जागरूकता कारीकरम कराय जाही।
– रईपुर रेलवे स्टेशन तीर रेलवे सुरक्षा बल के जवान मन ह चौदह किलो ले जादा के गांजा बरामद करीन हे। ए मामला म एक झिन आरोपी ल गिरफ्तार करे गेहे।
अउ
– बीजापुर जिला के आवापल्ली थाना क्षेत्र म पुलिस ह आठ नग हिरण के सिंग बरामद करे गेहे। ए मामला म दू झन आरोपी मन ल गिरफ्तार करे गेहे।