राज्यपाल-केन्द्रीय राज्यमंत्री
राज्यपाल अनुसुईया उइके ले राजभवन म केन्द्रीय सूक्ष्म, लघु अउ मध्यम उद्यम राज्यमंत्री भानुप्रताप सिंह वर्मा ह सौजन्य भेंट करीन। ए मउका म छत्तीसगढ़ म औद्योगिक गतिविधि अउ उद्योग के विकास ल लेके गोठबात करे गीस। राज्यपाल ह केन्द्रीय मंत्री ले औद्योगिक विकास ले जुड़े केन्द्रीय योजना मनके जानकारी लीन। संगेसंग सासन के सूक्ष्म, लघु अउ मध्यम उद्योग ले जुड़े योजना मन ले प्रदेस समेत जनजातीय क्षेत्र ल फायदा पहुंचाय के संबंध म गोठबात करे गीस। ए मउका म राज्यपाल ह जनजातीय उत्पाद के मार्केटिंग ल मजबूत करे के संबंध म चर्चा करीन। भेंट के दउरान सांसद संतोष पांडेय घलो मौजूद रिहीन।
स्कूल-निर्देश
प्रदेस म अवइया सोलह जून ले नवा सैक्षणिक सत्र के सुरूवात होही। ए बारे म सिक्षा विभाग ह निरदेस जारी कर देहे। जिला सिक्षा अधिकारी ए.एन. बंजारा ह सोलह जून ले पहिली जम्मों स्कूल मनके साफ-सफई अउ उंखर मरम्मत कराय बर केहे हे। संगेसंग ओमन संस्था प्रमुख मन ल इकतीस जुलाई के पहिली अध्यापन काम ल लेके रोडमैप तैयार करे के निरदेस दीन हे।
रोका-छेका कार्यक्रम
प्रदेस म खरीफ फसल के बोआई ले पहिली फसल मन ल पशु ले बचाय बर ए बछर घलो ‘‘रोका-छेका‘‘ कारीकरम के आयोजन करे जाही। ए बारे म कृषि उत्पादन आयुक्त ह कलेक्टर अउ जिला पंचायत के मुख्य कार्यपालन अधिकारी मन ल निरदेस जारी कर दे हे। आदेस म केहे गेहे कि रोका-छेका कारीकरम के बारे म बीस जून तक ग्राम स्तर म बइठका आयोजित करके गौठान मन म पशु मन ल राखे के उचित प्रबंध करे जाय। ए दउरान फसल मन ल पशु ले बचाय बर गांव मन म मुनादी घलो कराय जाय। कलेक्टर मन ले रोका-छेका कारीकरम के स्थानीय स्तर म प्रचार-प्रसार करके गांव वाले मनके मदद ले बर घलो केहे गेहे।
अंतर्राष्ट्रीय योग दिवस
आठवां अंतर्राष्ट्रीय योग दिवस इक्कीस जून के मनाय जाही। ए मउका म छत्तीसगढ़ के ऐतिहासिक, पर्यटन स्थल अउ धार्मिक स्थल मन म कारीकरम राखे जाही। ए बछर अंतर्राष्ट्रीय योग दिवस के आयोजन ‘‘योगा फॉर ह्यूमन‘‘ थीम म करे जाही।
कारीकरम के तैयारी ल लेके प्रदेस के अपर मुख्य सचिव रेणु पिल्ले ह काली मंत्रालय म बइठका लीस। बइठका म स्कूल सिक्षा विभाग, महिला अउ बाल विकास विभाग के संगेसंग स्वास्थ्य विभाग ल कारीकरम बर नोडल अधिकारी नियुक्त करके अंतर्राष्ट्रीय योग दिवस के आयोजन के तैयारी सुरू करे के निरदेस दे गीस। बइठका म राज्य अउ जिला स्तरीय आयोजन बर ऐतिहासिक, पर्यटन अउ धार्मिक जघा मनके चिन्हारी करे गीस।
अबुआ दिशुम अबुआ राज
केन्द्र सरकार के दक्षिण मध्य क्षेत्र सांस्कृतिक केन्द्र नागपुर के तत्वावधान म बस्तर जिला प्रसासन डहार ले काली जगदलपुर के टाउन हॉल म महान क्रांतिकारी बिरसा मुंडा के जीवन अउ संघर्ष म आधारित ‘अबुआ दिशुम अबुआ राज बिरसा मुण्डा‘ नाटक के आयोजन करे गीस। ए मउका म कलाकार मन ह बिरसा मुंडा के जीवनी, संघर्ष अउ उंखन योगदान के जीवंत प्रस्तुति दीन।
कारीकरम ल संबोधित करत संसदीय सचिव रेखचंद जैन ह किहीन कि बिरसा मुण्डा जनजाति समाज समेत पूरा देस के गौरव हरय। उहें, कलेक्टर रजत बंसल ह किहीन कि हमर महान सपूत अउ जनजाति समाज के नायक मनके स्वाधीनता आंदोलन अउ राष्ट्र के नवनिर्माण म योगदान ले नवा पीढ़ी मन ल परिचय कराना जरूरी हे।
माओवादी-गिरफ्तार
बेमेतरा पुलिस ह जिला मुख्यालय स्थित एक ठिन प्राईवेट अस्पताल म इलाज करावत एक झिन माओवादी अउ उंखर सहयोगी ल गिरफ्तार करे हे।
बेमेतरा पुलिस अधीक्षक धर्मेन्द्र कुमार छबई ह अपन टीम के संग अस्पताल म दबिस दीन। ए दउरान अपन नाम अउ पता बदल के इलाज करावत नारायणपुर निवासी अउ कांकेर म सक्रिय माओवादी अउ उंखर सहयोगी ल गिरफ्तार करे गीस। गिरफ्तार माओवादी कतनार एलओएस कमांडर बताय जावत हे, जेखर उपर पांच लाख रूपिया के इनाम घोसित रिहीस। माओवादी के गिरफ्तारी के बाद जिला प्रसासन ह अस्पताल ल सील कर देहे।
ओति, बीजापुर जिला म सुरक्षा बल मन ह गोरना-मनकेली रद्दा म माओवादी मन डहार ले लगाय गे टिफिन बम बरामद करे हे, जेला मउकाच म निष्क्रिय कर दे गीस।
बीएसपी हादसा-महाप्रबंधक निलंबित
भिलाई इस्पात संयंत्र-बीएसपी म सरलग होवत दुर्घटना ल देखत संयंत्र प्रबंधन ह दू महाप्रबंधक ए. राजकुमार अउ गौरव सिंघल ल निलंबित कर देहे। एखर संगेसंग एसएमएस-टू के सीजीएम सुशील कुमार के जगह सीजीएम शॉप्स सुशांता कुमार घोषाल ल जिम्मेदारी सौंपे गेहे। उहें, सीजीएम दिब्येंदु लाल मोइत्रा ल सीजीएम एमआरडी के उपरहा प्रभार दे गेहे।
खबर के मुताबिक बीएसपी के कन्वर्टर शॉप म काम के दउरान सिर म लोहा के चेन गिरे ले काली एक झिन ठेका मजदूर के मउत होगे रिहीस।
भाजपा किसान मोर्चा-आरोप
प्रदेस भाजपा किसान मोर्चा के प्रभारी संदीप शर्मा ह कृषि मंत्री रविन्द्र चौबे उपर खाद के आपूर्ति ल लेके गलत बयानबाजी करे के आरोप लगईन हे। ओमन किहीन कि अइसन बयानबाजी ले कालाबाजारी ल बढ़ावा मिलथे अउ किसान मनके सोसन होथे। ओमन किहीन कि किसान विरोधी कृषि मंत्री ल बर्खास्त करे जाना चाही।
श्री शर्मा ह किहीन कि पाछु बछर कृषि मंत्री ह केहे रिहीन कि खरीफ बर केन्द्र सरकार ह मात्र छै लाख टन खातू दे रिहीस। फेर, राज्य सरकार डहार ले जारी आंकड़ा म ग्यारह दशमलव आठ लाख टन खातू बांटे के बारे म बताय गीस। श्री शर्मा ह किहीन कि कृषि मंत्री अइसन बयान देके किसान मन म भरम फइला के केन्द्र सरकार ल बदनाम करना चाहत हे।
युवा कांग्रेस-कार्यकारिणी
भारतीय युवा कांग्रेस के नवा राष्ट्रीय कार्यकारिणी घोसित कर दे गेहे। नवा कार्यकारिणी म छत्तीसगढ़ ले पांच कार्यकर्ता मन ल सामिल करे गेहे। युवक कांग्रेस के प्रदेस अध्यक्ष कोको पाढ़ी राष्ट्रीय महासचिव बनाय गेहे। उहें, राष्ट्रीय सचिव के पद म मिलिंद गौतम, मोहम्मद शाहिद, लोकेश वशिष्ठ अउ शशि सिंह के नियुक्ति करे गेहे। कार्यकारिणी गठन बर देसभर के युवा मन के साक्षात्कार राजधानी दिल्ली म ले गे रिहीस।
दुर्घटना
मुंगेली जिला म होय एक ठिन सड़क दुर्घटना म तीन झिन युवक मनके मउत होगे। ए हादसा जिला के पथरिया जनपद पंचायत के तहत ग्राम सरगांव के तीर होईस। बताय जात हे कि फटफटी सवार तीन झिन युवक ट्रेलर के चपेट म आ गे, जेखर ले घटनास्थल म ही दू झिन युवक मनके मउत होगे। उहें, एक झिन आने युवक ह इलाज के दउरान अस्पताल म दम तोड़ दीस।
ओति, जांजगीर-चांपा जिला के बोड़ासागर गांव म ट्रक के चपेट म आय ले एक झिन सियान के मउत होगे।
तहसीलदार-तबादला
राज्य सरकार के राजस्व अउ आपदा प्रबंधन विभाग ह चार जिला के तहसीलदार मनके तबादला आदेस जारी करे हे। एमा सरगुजा, बेमेतरा, रईपुर अउ बिलासपुर के तहसीलदार सामिल हवय।
जारी आदेस के मुताबिक सुभाष शुक्ला ल सरगुजा ले बेमेतरा भेजे गेहे। उहें, चंद्रप्रकाश साहू के तबादला बेमेतरा ले सरगुजा, अभिषेक राठौड़ रईपुर ले बिलासपुर अउ अश्विनी कंवर के ट्रांसफर बिलासपुर ले रईपुर करे गेहे।