केंद्रीय मंत्रिमंडल ह आज खरीफ फसल दू हजार बाईस-तेईस बर न्यूनतम समर्थन मूल्य ल मंजूरी दे देहे। केंद्रीय सूचना अउ प्रसारण मंत्री अनुराग सिंह ठाकुर ह नई दिल्ली म बताइन कि स्वीकृत दर उत्पादन के अखिल भारतीय औसत लागत ले कम से कम डेढ़ गुना जादा हरय।
ओमन बताइन कि धान के समर्थन मूल्य म सौ रूपिया के बढ़ोत्तरी करे गेहे। अब सामान्य धान के समर्थन मूल्य दू हजार चालीस रूपिया अउ धान ग्रेड-ए दू हजार साठ रूपिया प्रति कुंटल होगे हे। उंहें मक्का के समर्थन मूल्य म ब्यानबे रूपिया, अरहर, उरद अउ मूंगफली म तीन सौ रूपिया अउ सोयाबीन के समर्थन मूल्य म तीन सौ पचास रूपिया के बढ़ोत्तरी करे हे।
एखर अलावा तिल बर न्यूनतम समर्थन मूल्य पांच सौ तीस रूपिया, मूंग बर चार सौ अस्सी अउ सूरजमुखी के बीज के तीन सौ पच्यासी रूपिया प्रति कुंटल राखे गेहे। ए दर मन पाछू साल के तुलना म जादा हवय। श्री ठाकुर ह बताइन कि एखर ले निवेश अउ उत्पादन म बढ़ोत्तरी होही अउ किसान मन ल लाभ मिलही। एखरे संग आत्मनिर्भर भारत के लक्ष्य ल प्राप्त करे म मदद मिलही अउ आयात म निर्भरता घलो कम होही।
बायोटेक स्टार्टअप प्रदर्शनी
प्रधानमंत्री नरेंद्र मोदी काली नई दिल्ली के प्रगति मैदान म बायोटेक स्टार्टअप प्रदर्शनी के उद्घाटन करही। श्री मोदी ए मउका म जनसभा ल घलो संबोधित करही। जैव प्रौद्योगिकी विभाग अउ जैव प्रौद्योगिकी अनुसंधान सहायता परिषद दू दिन के प्रदर्शनी के आयोजन करत हे। परिषद के दस साल पूरा होय म राखे गे प्रदर्शनी के थीम हे – बायोटेक स्टार्टअप नवाचार : आत्मनिर्भर भारत-
त्रिस्तरीय पंचायत चुनाव
प्रदेश के आने आने जिला मन म खाली त्रिस्तरीय पंचायत के उपचुनाव बर नामांकन पत्र दाखिल करे के काली आखरी दिन हे। अब तक सरपंच पद बर तेरह अउ पंच पद बर बहत्तर उम्मीदवार मन नामांकन दाखिल करे हे। नामांकन पत्र के जांच दस जून ले करे जाही। उंहें उम्मीदवार तेरह जून तक अपन नाम वापिस ले सकही। इही दिन उम्मीदवार मनके सूची जारी करे जाही अउ ओमन ल चुनाव चिन्ह बांटे जाही। जरूरत होय म अठाईस जून के बीहनिया सात बजे ले मतदान अउ उनतीस जून के मतगणना कराये जाही।
उंहें परिणाम के घोषणा तीस जून के करे जाही । त्रिस्तरीय पंचायत के निर्वाचन गैरदलीय आधार म होही। मतदान मतपत्र ले कराये जाही। बतादन कि प्रदेश के अठाईस जिला मन म त्रिस्तरीय पंचायत उपचुनाव के तहत जनपद सदस्य के छै, सरपंच के एक सौ आठ अउ पंच के छै सौ इकतीस रिक्त पद बर नामांकन दाखिला के प्रक्रिया चलत हे।
इही बीच राज्य निर्वाचन आयोग डहार ले त्रिस्तरीय पंचायत उपचुनाव संचालन बर जम्मों जिला मन म सामान्य प्रेक्षक नियुक्त करे गेहे। जेमन ल प्रशिक्षण दे गीस। ए दउरान राज्य निर्वाचन आयुक्त ठाकुर रामसिंह ह प्रेक्षक मनले कीहिन कि ओमन स्वतंत्र, निष्पक्ष अउ शांतिपूर्ण चुनाव संपन्न कराय म अपन जिम्मेदारी निभावय।
मनरेगा बायो गैस संयंत्र
महात्मा गांधी राष्ट्रीय ग्रामीण रोजगार गांरटी अधिनियम-मनरेगा के तहत अब ले गांव मन म बायो गैस संयंत्र स्थापित करे जाही। केंद्र सरकार ह हितग्राही मनके निजी भूमि उपर बनने वाला बायोगैस संयंत्र के पूरा लागत अउ सामुदायिक उपयोग बर स्थापित करे जाने वाला संयंत्र म मजदूरी लागत ल मनरेगा काम म शामिल कर लेहे। ए संबंध म केंद्रीय ग्रामीण विकास मंत्रालय ह राजपत्र म अधिसूचना प्रकाशित करे हे।
एनडीए सरकार आठ साल
प्रधानमंत्री नरेंद्र मोदी के अगवई म केंद्र सरकार के आठ साल पूरा होय म मुंगेली जिला के भाजपा कार्यालय म आज सम्मान समारोह राखे गीस। ए दउरान लोकगायन, साहित्य अउ पर्यावरण के क्षेत्र म अच्छा काम करइया युवा मनके सम्मान करे गीस। कार्यक्रम म बिलासपुर सांसद अरूण साव अउ विधायक पुन्नूलाल मोहिले समत बड़का संख्या म गणमान्य नागरिक शामिल होइन।
कार्यक्रम ल संबोधित करत श्री साव ह कीहिन कि प्रधानमंत्री के अगवई म भाजपा सरकार ह अपन महत्वपूर्ण भूमिका निभाय हे। देश म सुशासन के संगेसंग गरीब कल्याण बर घलो आने-आने काम करे गेहे। खिलाड़ी अउ युवा मन म जोश भरे के संगेसंग जम्मों वर्ग के विकास बर काम करे जात हे।
रोका-छेका कार्यक्रम
प्रदेश म खरीफ फसल के बोआई के पहिली फसल मन ल मवेशी ले बचाये खातिर ए साल भी रोका-छेका कार्यक्रम के आयोजन करे जाही। ए संबंध म कृषि उत्पादन आयुक्त ह कलेक्टर अउ जिला पंचायत के मुख्य कार्यपालन अधिकारी मन ल निर्देश जारी कर देहे। आदेश म केहे गेहे कि रोका-छेका कार्यक्रम के बारे म बीस जून तक ग्राम स्तर म बइठका राखके गौठान मन म पशु मन ल राखे के प्रबंध करे जाए। ए दउरान फसल मन ल पशु मन ले बचाये बर गांव मन म मुनादी घलो कराय जाए।
मीडिल स्कूल विशेष कार्यक्रम
प्रदेश के मीडिल स्कूल मन म लइका मन म जेण्डर असमानता दूर करे अउ उंखर आत्मसम्मान बढ़ाय बर एक विशेष कार्यक्रम चलाये जाही। राज्य शैक्षिक अनुसंधान अउ प्रशिक्षण परिषद अउ यूनिसेफ के मदद ले एखर बारे म कार्य योजना बनाय गेहे। शुरू म ये कार्यक्रम ल राजनांदगांव अउ दंतेवाड़ा जिला म चलाये जाही।
सेल्फ ईस्टीम एण्ड बॉडी कॉन्फिडेंस ऑफ स्टूडेंट नाम ले चलइया ए कार्यक्रम म मीडिल स्कूल के कक्षा छठवीं ले आठवीं तक के लइका मन ल शारीरिक क्षमता अउ जेण्डर भेद के आने-आने मुद्दा उपर समझ विकसित करे के संगेसंग ओमन म आत्मविश्वास विकसित करे के बारे म जानकारी दे जाही। ए विषय उपर मास्टर ट्रेनर्स मन ल रायपुर म प्रशिक्षण दे जात हे।
दुर्घटना
गरियाबंद जिला के केरगांव म ट्रैक्टर पलटे ले दू मनखे के मउत होगे, जबकि दू झन दूसर मन गंभीर रूप ले घायल होगे, जेमन ल अच्छा इलाज खातिर रायपुर लाये गेहे।
मिले जानकारी अनुसार पीपरछेड़ी, थानाक्षेत्र के रहइया ए लोगन मन खेत के जुताई करे के बाद ट्रैक्टर म बइठके घर लहुटत रीहिन। ए दउरान ट्रैक्टर अनियंत्रित होके पलट गीस अउ ए मनखे मन ओखर नीचे दबगे, जेखर ले दू मनखे मनके मउकाच म मउत होगे।
एति जांजगीर चांपा जिला के कैथा गांव म तेज रफ्तार ट्रक के चपेट म आय ले एक मनखे के मउत होगे । घटना के बाद गुस्साये लोगन मन सड़क म चक्काजाम कर दीन। बाद म प्रशासनिक अधिकारी मनके समझाये के बाद ग्रामीण मन चक्काजाम खतम करीन।
ठगी आरोपी गिरप्तार
भिलाई ईस्पात संयंत्र के एक रिटायर कर्मचारी ले करोड़ो रूपिया के ठगी के मामला म दुर्ग पुलिस ह एक दंपत्ति ल दिल्ली ले गिरप्तार करे हे। एखर करा ले मोबाइल फोन, सिम कार्ड अउ आने-आने बैंक के पासबुक जब्त करे गेहे। जिला के पुलिस अधीक्षक अभिषेक पल्लव ह बताइन कि ए दंपत्ति बीमा पॉलिसी म निवेश अउ दुगुना रकम के झांसा देके लोगन मनल ठगत रीहिन।
उंहें बेमेतरा पुलिस ह चिटफंड कंपनी के एक संचालक ल पंजाब ले गिरप्तार करे हे। कंपनी के ए संचालक ह साल दू हजार सतरा म कई मनखे मन ेले निवेश के नाम म पइसा जमा करवाय रीहिस।
एति रायपुर पुलिस ह बीमा पॉलिसी म बोनस दिलाय के नाम म करोड़ो रूपिया के ठगी के मामला म चार झिन आरोपी मन ल गाजियाबाद ले गिरप्तार करे हे।
संक्षिप्त समाचार
– केंद्र सरकार के राष्ट्रीय सांख्यिकी मंत्रालय के क्षेत्रीय कार्यालय डहार ले सामाजिक आर्थिक सर्वेक्षण के तीन दिन के राज्य स्तरीय प्रशिक्षण कार्यक्रम काली ले रायपुर म राखे जाही।
– प्रदेश म अब तक पंद्रह लाख अठहत्तर हजार मानक बोरा तेंदूपत्ता के संग्रहण करे गेहे। जेन ह लक्ष्य के करीबन चौरानबे प्रतिशत हरय। एसंग्रहण पाछू साल के तुलना म लगभग इक्कीस प्रतिशत जादा हरय।
– जांजगीर चांपा जिला के अकलतरा म बहुजन समाज पार्टी डहार ले कार्यकर्ता सम्मेलन के आयोजन करे गीस।
अउ
– कोरिया जिला के गुरू घासीदास राष्ट्रीय उद्यान म एक बाघ के मउत के मामला म वन विभाग के टीम ह चार झिन आरोपी मन ल रामगढ़ रेंज स्थित सलगवाखुर्द ले गिरप्तार करे हे।