प्रधानमंत्री-विशेष सप्ताह समारोह
प्रधानमंत्री नरेन्द्र मोदी ह किहीन हे कि पाछु आठ बछर म जन-कल्याण ही उंखर सरकार के विशेषता रेहे हे। नई दिल्ली म वित्त अउ कार्पारेट मामला के मंत्रालय के विशेष सप्ताह समारोह के उद्घाटन करत श्री मोदी ह किहीन कि देस म पाछु आठ बछर म हर दिन नया काम करे के परयास करे गीस। ओमन किहीन कि स्वच्छ भारत अभियान ह गरीब मन ल सुघ्घर जीवन जीये के मउका देहे।
ए मउका म प्रधानमंत्री ह ऋण ले जुड़े सरकारी योजना मन बर राष्ट्रीय पोर्टल ‘‘जनसमर्थ‘‘ के घलो सुरूवात करीन। ए पोर्टल ह लाभार्थी मन ल सीधा करजा देवइया मन ले जोड़थे। ‘‘जनसमर्थ‘‘ पोर्टल के उद्देश्य सरल डिजिटल प्रक्रिया के माध्यम ले आने-आने क्षेत्र म मार्गदर्शन करना अउ सरकारी फायदा देके विकास ल बढ़ावा देना हे।
प्रधानमंत्री ह आजादी के अमृत महोत्सव ल समर्पित ‘‘एक, दू, पांच, दस, अउ बीस‘‘ रूपिया मूल्य वर्ग के नवा सिक्का मनके बिसेस श्रृंखला जारी करीन। दृष्टिबाधित मनखे मन घलो ए सिक्का मन ल पहिचान सकही।
भाजपा पिछड़ा वर्ग-स्वच्छता अभियान
प्रधानमंत्री नरेन्द्र मोदी के अगुवई म केन्द्र सरकार के आठ बछर पूरा होय के मउका म भारतीय जनता पार्टी डहार ले छत्तीसगढ़ संघरा पूरा देस म ‘‘सेवा, सुशासन अउ गरीब कल्याण पखवाड़ा‘‘ मनाय जावत हे। इही कड़ी म भाजपा पिछड़ा वर्ग मोर्चा के रईपुर जिला इकाई ह सहर के सोलह ठन जघा म स्वच्छता अभियान कारीकरम करईस।
मुख्यमंत्री-भेंट-मुलाकात
भेंट-मुलाकात कारीकरम म मुख्यमंत्री भूपेश बघेल ह कांकेर विधानसभा क्षेत्र बर एक सौ चौबीस करोड़ रूपिया के विकास काम के लोकार्पण अउ सिलान्यास करीन। ए मउका म श्री बघेल ह गांधी ग्राम कुलगांव के उद्घाटन अउ राष्ट्रपिता महात्मा गांधी के प्रतिमा के अनावरण करीन। ए दउरान मुख्यमंत्री ह कतकोन विकास काम के घोसना घलो करीन। एमा आदर्श गौठान समिति के पचास लाख रूपिया के करजा माफी अउ ग्राम पंचायत के नवीन भवन के निर्माण काम सामिल हे। ओमन ह अलबेला पारा म मातृ अउ शिशु रोग अस्पताल के घलो सुरूवात करीन।
उहें, श्री बघेल ह कांकेर म नवनिर्मित सी-मार्ट के लोकार्पण करीन। ए सी-मार्ट करीबन पचास लाख रूपिया के लागत ले बने हे, जेखर संचालन एक ठन महिला स्व-सहायता समूह डहार ले करे जाही। ए सी-मार्ट म लघु, कुटीर अउ स्व-सहायता समूह मन डहार ले बनाय के आने-आने खाय-पीये के चीज अउ दूसर जिनीस होही।
एखर अलावा, मुख्यमंत्री ह कांकेर के मरीन ड्राईव कहे जाने वाला डड़िया तालाब म कतकोन विकास काम के लोकार्पण करीन। उहें, ओमन ह कांकेर म ‘‘हमर लैब‘‘ के सुरूवात घलो करीन।
भाजयुमो-मनरेगाकर्मी
भारतीय जनता युवा मोर्चा के प्रदेस इकाई ह मनरेगा के बारह हजार करमचारी मनके सामुहिक इस्तीफा ल राज्य सरकर के नाकामयाबी बताय हे। मोर्चा के प्रदेस अध्यक्ष अमित साहू ह किहीन कि अपन मांग ल लेके लंबा समय ले हड़ताल करत मनरेगाकर्मी मनके सुध सरकार ह नइ ले हवय। ओमन आरोप लगईन कि कांग्रेस ह चुनावी घोषणा पत्र म मनरेगा के अनियमित करमचारी मन ल नियमित करे के जो वादा करे रिहीस, ओला अभी तक पूरा नइ करे गेहे।
अमृत महोत्सव प्रश्नोत्तरी
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे।
इंडियन नेशनल कांग्रेस ह कोन बछर म पूर्ण स्वराज के मांग करे रिहीस ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
विश्व पर्यावरण दिवस
विश्व पर्यावरण दिवस के मउका म काली राज्य म कतकोन कारीकरम कराय गीस। इही कड़ी म राजधानी रईपुर म छत्तीसगढ़ पर्यावरण संरक्षण मंडल डहार ले ‘‘पृथ्वी अनमोल है प्रकृति संग संतुलन बनाए‘‘ बिसय म संगोष्ठी कराय गीस। ए मउका म पर्यावरण मंत्री मोहम्मद अकबर ह वर्तमान परिस्थिति मन ल देखत प्राकृतिक संपदा के जरूरत अनुसार उपयोग करे उपर जोर दीन।
उहें, बलौदाबाजार-भाटापारा जिला म पुलिस विभाग ह सबो थाना, चौकी अउ पुलिस कॉलोनी मन म वृक्षारोपण अभियान चलईन। ए मउका म पांच सौ ले जादा छायादार अउ फलदार पौधा लगाय गीस।
अइसने, बिलासपुर जिला म चलत वृक्षारोपण अभियान के काली लाल बहादुर शास्त्री मैदान म समापन होईस।
इही बीच, विश्व पर्यावरण दिवस म कवर्धा सहर ल गोल्डन बुक ऑफ वर्ल्ड रिकॉर्ड म सामिल होय के गौरव मिलीस। ए मउका म कवर्धा के मनखे मन हाथ म पौधा लेके चार किलोमीटर तक पदयात्रा करीन अउ मुख्य मार्ग ले होवत सकरी नदी के तट म तीन हजार पौधा लगाके रिकार्ड कायम करीन। गोल्डन बुक ऑफ वर्ल्ड के प्रतिनिधि सोनल राजेश शर्मा ह कवर्धा नगर पालिका अध्यक्ष ऋषि शर्मा ल ए उपलब्धि बर प्रमाण पत्र दीन।
ऐति, कोरबा जिला के हरियरपुर म हसदेव अभ्यारण्य के तीर कोल ब्लॉक ले प्रभावित ग्रामीण मन ह घलो विश्व पर्यावरण दिवस के मउका म आंदोलन के जघाच म संकल्प सम्मेलन करईन।
खेलो इंडिया यूथ गेम्स
हरियाणा के पंचकुला म राखे गे खेलो इंडिया यूथ गेमस म छत्तीसगढ़ के वेटलिफ्टर ज्ञानेश्वरी यादव ह स्वर्ण पदक अउ राजा भारती ह कांस्य पदक जीतीन हे। पदक हासिल करे म दूनों खिलाड़ी मन ल मुख्यमंत्री भूपेश बघेल ह सुभकामना दीन हे। ए स्पर्धा म ज्ञानेश्वरी यादव ह एक सौ चौसठ किलोग्राम वजन उठाके अपन पुराना रिकॉर्ड ल तोड़त स्वर्ण पदक हासिल करीन हे। उहें, राजा भारती ह दू सौ ग्यारह किलोग्राम वजन उठाके कांस्य पदक जीते हे। ए प्रतियोगिता म छत्तीसगढ़ ले तेरह ठन खेल बर एक सौ बाईस खिलाड़ी मन भाग लेवत हे।
मौसम
मौसम विभाग ह अवइया चौबीस घंटा के दउरान प्रदेस के बिलासपुर, रईपुर अउ दुरूग संभाग के कुछेक जघा म लू चले के चेतावनी दे हवय। काली राज्य म एक-दू जघा म गरज-चमक के संग आकाशीय बिजली गिरे के अउ तेज हवा चले के संभावना हे। उहें, एक-दू जघा म हल्का बरसा या गरज-चमक के संग बौछार पड़ सकत हे। तेज धूप अउ भीषण गर्मी ले परेसान प्रदेसवासी मन बर राहत भरे खबर हे कि काली ले राज्य के अधिकतम तापमान म गिरावट सुरू हो जही।
मौसम विभाग के मुताबिक पूर्वी उत्तरप्रदेस म एक ठिन चक्रवाती घेरा अउ पूर्वी मध्यप्रदेश ले छत्तीसगढ़ तक एक ठिन द्रोणिका बने हे, जेखर असर ले राज्य के मौसम म बदलाव देखे जा सकत हे।
संक्षिप्त समाचार
– जांजगीर-चांपा जिला के बिर्रा पुलिस ह थल सेना अउ वन विभाग म नौकरी लगाय के नाव म दस लाख रूपिया ले जादा के ठगी के मामला म सेमरिया गांव के एक झिन आरोपी ल गिरफ्तार करीस।
– सूरजपुर जिला के प्रतापपुर वन परिक्षेत्र के करसी गांव म जंगली हाथी के हमला म एक झिन सियान मनखे के मउत होगे।
– गरियाबंद के स्वास्थ्य विभाग के गोदाम म आगी लगे ले बड़े मात्रा म इलाज के सामान अउ दवई जल गीस।
– कोरिया जिला के रामगढ़ रेंज के सलगवांखुर्द म एक ठिन बाघ के मउत होगे हे। ए मामला म दू झिन आरोपी मन ल हिरासत म लेके पूछताछ करे जावत हे। उहें, मामला के जांच बर रईपुर ले घलो वन विभाग के एक ठन टीम भेजे गेहे।
अउ
– राजनांदगांव जिला के बोरतलाव पुलिस ह पशु तस्करी के मामला म तीन झन आरोपी मन ल गिरफ्तार करीन हे। ए आरोपी मन तैंतीस ठन मवेसी मन ल गाड़ी म भर के महाराष्ट्र कोति लेगत रिहीन।