केन्द्रीय मंत्री-छत्तीसगढ़
केन्द्रीय महिला अउ बाल विकास मंत्रालय डहार ले केन्द्र के एनडीए सरकार कोति ले प्रधानमंत्री नरेन्द्र मोदी के अगुवई म पाछु आठ बछर के दउरान हासिल करे उपलब्धि ल लेके काली चार जून ले नौ जुलाई तक देस के आने-आने राज्य मन म जोनल अउ सब जोनल बइठका आयोजित करे जाही। इही कड़ी म पहिली बइठका काली छत्तीसगढ़ के राजधानी रईपुर म होही। ए बइठका के पगरइति केन्द्रीय महिला अउ बाल विकास मंत्री स्मृति ईरानी करहीं।
रईपुर म काली होवइया सब जोनल मीटिंग म छत्तीसगढ़, पश्चिम बंगाल अउ ओड़िसा के सांसद अउ राज्य सरकार के महिला अउ बाल विकास मंत्री के संगेसंग विधायक अउ बड़का अधिकारी सामिल होही। खबर के मुताबिक काली चार जून ले नौ जुलाई तक केन्द्रीय महिला अउ बाल विकास मंत्रालय डहार ले केन्द्र सरकार के पाछु आठ बछर के दउरान हासिल करे गे उपलब्धि ल लेके देसभर म अइसन पन्द्रह बइठका के आयोजन करे जावत हे। एमा ले दस जोनल अउ सब जोनल बइठका होही। उहें, पांच बइठका अकांक्षी जिला म आयोजित करे जाही। ए बइठका के दउरान आने-आने योजना मनके लाभार्थी अपन अनुभव ल घलो साझा करही।
केन्द्रीय मंत्री स्मृति ईरामी अपन रईपुर प्रवास के दउरान काली उपरवारा म स्थित आंगनबाड़ी केन्द्र के घलो दउरा करही। संगेसंग ओमन भारतीय जनता पार्टी के प्रदेस कार्यालय म पार्टी कार्यकर्ता मनके एक ठिन बइठका लीहीं।
उहें, केन्द्रीय कानून मंत्री किरेन रिजिजू ह घलो काली छत्तीसगढ़ के एक दिवसीय प्रवास म पहुंचत हे। ओमन प्रवास के दउरान नवा रईपुर अटल नगर स्थित आयकर अपीलीय न्यायधिकरण केन्द्रीय सचिवालय भवन म आई.टी.ए.टी. रईपुर खंडपीठ के नवा कार्यालय परिसर के उद्घाटन करही।
राज्यसभा चुनाव
छत्तीसगढ़ ले राज्यसभा बर राजीव शुक्ला अउ रंजीत रंजन निर्विरोध निर्वाचित होय हे। निर्वाचन अधिकारी दिनेश शर्मा ह रंजीत रंजन ल निर्वाचन प्रमाण पत्र दीन। उहें, राजीव शुक्ला कोति ले सुधीर शुक्ला ह निर्वाचन प्रमाण पत्र लीन। ए मउका म संसदीय कार्य मंत्री रविन्द्र चौबे, विधायक कुलदीप जुनेजा अउ विकास उपाध्याय मौजूद रिहीन।
खबर के मुताबिक छत्तीसगढ़ म राज्यसभा के दू सीट म होवइया चुनाव बर कुल तीन उम्मीदवार मन ह नामांकन दाखिल करे रिहीन। एमा कांग्रेस के दू उम्मीदवार राजीव शुक्ला अउ रंजीत रंजन के संग जनता कांग्रेस छत्तीसगढ़ के डॉक्टर हरिदास भारद्वाज सामिल रिहीन। नामांकन पत्र के जांच के बाद डॉक्टर भारद्वाज के नामांकन रद्द होगे रिहीस।
शहीद पूर्णानंद साहू-शौर्य चक्र
राजनांदगांव जिला के ग्राम जंगलपुर निवासी सीआरपीएफ कोबरा बटालियन के आरक्षक शहीद पूर्णानंद साहू ल मरणोपरांत उंखर साहस अउ वीरता बर राष्ट्रपति रामनाथ कोविंद ह नई दिल्ली म सौर्य चक्र ले सम्मानित करीन। राष्ट्रपति के हाथ ले ए सम्मान शहीद पूर्णानंद साहू के बाबू लक्ष्मण साहू अउ मां उर्मिला बाई साहू ह लीन। सम्मान मिले के बाद गांव जंगलपुर लहुटे म उहां गौरव कारीकरम के आयोजन करे गीस, जेमा जिला प्रसासन अउ गांव वाले मन ह उंखर स्वागत करीन। ए मउका म शहीद पूर्णानंद साहू के मूर्ति म पुष्पचक्र चढ़ाके ओमन ल श्रद्धा-सुमन दे गीस।
खबर के मुताबिक दस फरवरी दू हजार बीस के बीजापुर जिला के पामेड़ थाना क्षेत्र के ईरापल्ली गांव म माओवादी मनके संग होय मुठभेड़ म सीआरपीएफ के दू सौ चार कोबरा बटालियन के आरक्षक पूर्णानंद साहू सहीद होगे रिहीस।
विश्व साइकिल दिवस-01
आज विश्व साइकिल दिवस हरय। पर्यावरण बर सुघ्घर जीवन शैली के अवधारणा के जिकर करत प्रधानमंत्री नरेन्द्र मोदी ह अपन ट्वीटर अकाउंट म साइकिल के सवारी करत महात्मा गांधी के एक ठिन फोटू साझा करे हे। ओमन लिखे हे कि एक स्थायी अउ स्वस्थ जीवनशैली के प्रेरणा बर महात्मा गांधी ले बने कोन हो सकत हे।
विश्व साइकिल दिवस के मउका म केन्द्रीय युवा कारीकरम अउ खेल मंत्री अनुराग सिंह ठाकुर ह आज नई दिल्ली के मेजर ध्यानचंद स्टेडियम ले राष्ट्रव्यापी फिट इंडिया फ्रीडम राइडर साइकिल रैली के सुभारंभ करीन। श्री ठाकुर ह रैली के दउरान साइकिल ले साढ़े सात किलोमीटर के दूरिहा तय करीन। आजादी के अमृत महोत्सव म युवा कारीकरम अउ खेल मंत्रालय डहार ले ए रैली म केन्द्रीय मंत्री मनसुख मांडविया अउ किरेन रिजिजू के संग सात सौ पचास युवा साइकिल चलात भाग लीन। ए मउका म श्री ठाकुर ह लोगन मन ले फिट इंडिया अभियान ल बढ़ावा दे बर साइकिल के उपयोग करे के आग्रह करीन।
विश्व साइकिल दिवस म आज छत्तीसगढ़ म घलो आने-आने जघा म साइकिल रैली निकाले गीस। राजधानी रईपुर म आज राज्यस्तरीय साइकिल रैली के आयोजन करे गीस। ए रैली रईपुर के कलेक्ट्रेट परिसर ले बिहनिया आठ बजे निकलीस अउ तेलीबांधा म सिरईस। ए रैली म आने-आने युवा मंडल के सदस्य, राष्ट्रीय सेवा योजना के स्वयंसेवक अउ आने-आने खेल संघ के खिलाड़ी के संगेसंग पदाधिकारी मन सामिल होईन।
विश्व साइकिल दिवस-02
नेहरू युवा केन्द्र बिलासपुर अउ राष्ट्रीय सेवा योजना के संयुक्त तत्वावधान म रतनपुर मंदिर परिसर म जागरूकता रैली के आयोजन करे गीस। रतनपुर के विविध यूथ क्लब के वॉलेंटियर्स मन ह साइकिल रैली निकालीन, जेला मुख्य अतिथि बिलासपुर सांसद अरूण साव ह झंडा दिखाके रवाना करीन। ए मउका म ओमन किहीन कि मनखे बर साइकिलिंग ले बढ़िया कोनों एक्सरसाइज नइ हे। ओमन लोगन मन ले साइकिल चलाना ल अपन आदत म सामिल करे के अपील करीन।
उहें, नेहरू युवा केन्द्र दुरूग म घलो आज सांसद विजय बघेल के अगुवई म महात्मा गांधी कला मंदिर सिविक सेंटर भिलाई ले साइकिल रैली निकाले गीस। एमा बड़ संख्या म लोगन मन भाग लीन। ए मउका म सांसद श्री बघेल ह किहीन कि स्वस्थ रेहे अउ पर्यावरण संरक्षण बर सस्ता अउ सरल उपाय साइकिल चलाना हवय, जेला युवा मन ल अपनाना चाही।
त्रिस्तरीय पंचायत-उपुचनाव
प्रदेस म त्रिस्तरीय पंचायत के खाली पद मन बर होवइया उपचुनाव बर आज ले नामांकन के काम सुरू होगे हे। नामांकन पत्र नौ जून तक भरे जा सकही। उहें, दस जून के नामांकन पत्र मनके जांच करे जाही। तेरह जून तक नाम वापस ले सकही। अट्ठाईस जून के बिहनिया सात बजे ले मंझनिया तीन बजे तक वोट डारे जाही। गिनती अट्ठाईस जून के वोटिंग खतम होय के बाद उही केन्द्र मन म करे जाही।
ओपन स्कूल
छत्तीसगढ़ राज्य ओपन स्कूल ह आज हाईस्कूल अउ हायर सेकेंडरी सर्टिफिकेट मुख्य अउ अवसर परीक्षा के रिजल्ट घोसित कर देहे। हाईस्कूल के परीक्षा म तिरपन दशमलव सात प्रतिशत अउ हायर सेकेंडरी के परीक्षा म चौंसठ दशमलव तीन प्रतिशत परीक्षार्थी पास होय हे।
मुख्यमंत्री भूपेश बघेल अउ स्कूल सिक्षा मंत्री डॉक्टर प्रेमसाय सिंह टेकाम ह परीक्षा म पास होय विद्यार्थी मन ल बधाई अउ सुभकामना दीन हे।
जवान घायल
बीजपुर जिला के तर्रेम थाना क्षेत्र म माओवादी मन डहार ले करे गे आईईडी विस्फोट म कोबरा बटालियन के एक झिन जवान घायल होगे।
जिला के अतिरिक्त पुलिस अधीक्षक पंकज शुक्ला ह बतईन कि कोबरा दू सौ दस बटालियन के जवान माओवाद विरोधी अभियान म निकले रिहीस। इही दउरान बुड़गीचेरू के जंगल म माओवादी मन ह आईईडी विस्फोट कर दीन। ए घटना म एक झिन जवान निरंजन पासवान घायल होगीन, जेला प्राथमिक उपचार बर बासागुड़ा अस्पताल लाय गीस। एखर बाद घायल जवान ल रईपुर रिफर करे गेहे।
मौसम
मौसम विभाग ह प्रदेस म काली एक-दू जघा म गरम हवा चले के संभावना जताय हे। उहें, अवइया अड़तालीस घंटा के दउरान बिलासपुर, दुर्ग अउ रईपुर संभाग के कई ठिन जघा म लू ल लेके यलो अलर्ट जारी करे हे। प्रदेस म काली अधिकतम तापमान म बिसेस बदलाव होय के संभावना नइ हे।