नीट परिणाम
राष्ट्रीय मेडिकल प्रवेश परीक्षा स्नातकोत्तर-नीट पीजी दू हजार बाइस के परिणाम घोषित कर दे गेहे। ए बखत राष्ट्रीय आयुर्विज्ञान परीक्षा बोर्ड ह सिरिफ दस दिन म रिजल्ट जारी करे हे। वेबसाइट म परीक्षा परिणाम देखे जा सकथे। ए परीक्षा ह पाछू महीना के इक्कीस तारीख के होय रीहिस।
बोर्ड के मुताबिक नीट पीजी म सामान्य श्रेणी अउ आर्थिक रूप ले कमजोर वर्ग मनके छात्र के कटऑफ स्कोर आठ सौ म दू सौ पचहत्तर अंक हे। त उंहें दिव्यांग मन के दू सौ आठ अउ अनुसूचित जाति अनुसूचित जनजाति के संगेसंग अन्य पिछड़ा वर्ग के छात्र मनके अंक दू सौ पैंतालिस हवय।
त्रि-स्तरीय पंचायत उपचुनाव
प्रदेस म त्रिस्तरीय पंचायत के खाली पद ल भरे बर उपचुनाव के काम काली ले नामांकन भरे के संग शुरू हो जाही। नामांकन पत्र नौ जून तक भरे जाही। उंहें दस जून के नामांकन पत्र के जांच करे जाही, तेरह जून तक नाव वापिस ले जा सकही अउ अठाईस जून के वोट डारे जाही। छत्तीसगढ़ राज्य निर्वाचन आयोग के मुताबिक प्रदेश म सात जनपद पंचायत सदस्य एक सौ अठारह सरपंच के संगेसंग छै सौ तीस पंच पद बर चुनई गैरदलीय आधार म कराय जाही।
मुख्य सचिव बैठक
प्रदेश म एसो सहकारी बैंक के पचास ठिन शाखा मन म एटीएम खोले जाही। मुख्य सचिव अमिताभ जैन के अगवई म होय बइठका म ये जानबा दे गीस। बइठका म प्रदेश म किसान मन बर जादा ले जादा बैंक शाखा अउ एटीएम खोले के संगेसंग किसान क्रेडिट कार्ड देबर बैंक मन ल लक्ष्य दे उपर विचार विमर्श करे गीस। ए मउका म मुख्य सचिव ह फसल चक्र परिवर्तन करइय किसान मन ल आगू लाय के संगेसंग वर्मी कम्पोस्ट के प्रयोग के बारे म घलो बताइन । बइठका म बेमेतरा जिला म पीपीपी मॉडल ले शक्कर कारखाना बनाये के बारे म घलो गोठबात करे गीस।
शैक्षणिक संस्था निरीक्षण
प्रदेश म स्कूल शिक्षा विभाग के राज्य स्तरीय अधिकारी मन डहार ले सोलह जून ले पंद्रह जुलाई तक जिला के स्कूल मन म हुरहा जाके निरीक्षण करे जाही। निरीक्षण के बाद राखे गे बेरा के भीतर अधिकारी मन ह अपन प्रतिवेदन घलो प्रस्तुत करही।
स्कूल शिक्षा सचिव डॅाक्टर एस. भारतीदासन ह नवा शैक्षणिक सत्र म शिक्षक अउ छात्र मनके उपस्थिति उपर विशेष ध्यान राखे के निर्देश दीन। निर्देश के मुताबिक जम्मों अधिकारी मन सोलह जून ले पंद्रह जुलाई तक निरीक्षण करही। अनुपस्थित अउ जेखर बाद गैर हाजिर पाये जाये स्कूल मन म शिक्षक मनके खिलाफ अनुशासनात्मक कार्रवाई करे जाही।
राष्ट्रीय स्वास्थ्य मिशन भर्ती
राष्ट्रीय स्वास्थ्य मिशन छत्तीसगढ़ के अधिकारी मन ह स्पष्ट करे हवय कि स्टाफ नर्स, शिशु रोग विशेषज्ञ, चिकित्सा अधिकारी अउ सचिवीय सहायक मनके भर्ती के काम ल नियम के मुताबिक अउ बिना गड़बड़ी के करे जाही। भर्ती प्रक्रिया म गड़बड़ी अउ एला एक महीना आगू बढ़ाय वाले वायरल होत खबर ह गलत हरय। प्रदेश म स्वास्थ्य सेवा ल मजबूत करे अउ बने ढंग ले मानव संसाधन देबर राष्ट्रीय स्वास्थ्य मिशन ह नौ सौ चौदा पद म भर्ती करत हे।
विशेष कार्यक्रम
प्रधानमंत्री नरेंद्र मोदी के अगवई म केंद्र सरकार ह आठ साल पूरा कर लेहे। ए विशेष मउका म आकाशवाणी समाचार ह विशेष कार्यक्रम के कड़ी म आठ साल- सेवा, सुशासन अउ गरीब कल्याण उपर प्रसारित करत हे। इही कड़ी म आज निर्धन अउ समाज ले दूरिहा करे के वर्ग उपर होय सफल योजना के कार्यक्रम प्रसारित होही। ए विशेष कार्यक्रम आज रतिहा साढ़े नौ बजे स्पॉट लाइट म प्रसारित करे जाही।
परिवहन संघ समझौता
रायपुर-बस्तर-कोरापुट अउ बस्तर परिवहन संघ के बीच चलत विवाद ह आज खतम होगे। दूनों संघ ह एक दूसर ल लदान देके बारे बर करार कर लेहे। परिवहन मंत्री मोहम्मद अकबर ह दूनों संघ के पदाधिकारी मन ल मिल बइठके शांतिपूर्ण ढंग ले समस्या ल निपटाय के सलाह दीन। बइठका म दूनों संघ के बीच सहमति बन गेहे। बिना पर्ची या बारी के वाहन भरइया ट्रांसपोर्टर मन ल ब्लैक लिस्ट करे के संग जुर्माना के कार्रवाई घलो करे जाही। विवाद के स्थिति म संयुक्त परिवहन आयुक्त के अगवई म समाधान निकाले जाही।
हज यात्रा प्रशिक्षण
छत्तीसगढ़ राज्य हज कमेटी डहार ले रायपुर संभाग के संगेसंग धमतरी अउ कांकेर जिला ले हज म जवइया यात्री मन बर एक दिन के हज प्रशिक्षण कार्यक्रम राखे गीस। जेमा हज यात्री मन ल यात्रा के जम्मों अराकानो के संगेसंग प्रशासनिक व्यवस्था, आपदा प्रबंधन, स्वास्थ्य अउ हज के दौरान बरते जाय विशेष सावधानी के संगेसंग सउदी सरकार के नियम कानून के बारे म प्रशिक्षण दे गीस।
राज्य हज कमेटी के कार्यपालन अधिकारी साजिद मेमन ह बताइन कि प्रदेश के हज यात्री मनके रवानगी अठारा जून ले तीन जुलाई तक अउ वापसी चौबीस जुलाई ले तेरह अगस्त तक होही।
वित्तीय साक्षरता अभियान
बालोद जिला के स्व सहायता समूह मनके शत प्रतिशत सदस्य मन बर वित्तीय साक्षरता अउ जागरूकता अभियान चलाये जात हे। वित्तीय साक्षरता अउ जागरूकता अभियान बर छत्तीसगढ़ के बालोद जिला के चयन करे गेहे।
ए अभियान के तहत अवइया छै महीना म जिला म काम करत अग्रणी जिला प्रबंधक अउ नाबार्ड बैंक मनके अधिकारी, डौंडीलोहारा स्थित वित्तीय साक्षरता केंद्र केसंगेसंग एनआरएलएम के प्रतिनिधि मन डहार ले कार्यक्रम राखके स्व सहायता समूह मनके सदस्य मन ल वित्तीय साक्षरता के संगेसंग जागरूक करे जाही।
विश्व सायकल दिवस
विश्व सायकल दिवस अउ आजादी के अमृत महोत्सव के तहत रायपुर म काली राज्य स्तरीय सायकल रैली के आयोजन करे जाही। ए रैली रायपुर के कलेक्ट्रेट परिसर ले बीहनिया आठ बजे रवाना होही, जउन ह तेलीबांधा म जाके सिराही। ए रैली के आयोजन नेहरू युवा केंद्र संगठन अउ केंद्रीय खेल युवा कार्यक्रम मंत्रालय डहार ले करे गेहे।
रायपुर के संगेसंग ये रैली दुर्ग जिला के भिलाई अउ बिलासपुर जिला के रतनपुर म घलो राखे जाही।
भूलन द मेज-टैक्स फ्री
जानबा के मुताबिक फिल्म भूलन द मेज संजीव बख्शी के उपन्यास भूलन कांदा उपर बने हे। ए फिल्म ल सड़सठवां राष्ट्रीय फिल्म पुरस्कार ले सम्मानित करे गेहे। राज्य सरकार ह घलो एला एक करोड़ रूपिया के राशि ले पुरस्कृत करे हे।
बीएसपी डीजीएम निलंबित
भिलाई ईस्पात संयंत्र के ब्लास्ट फर्नेस-सात म होय हादसा के बाद बीएसपी प्रबंधन ह डीजीएम मैकेनिकल के.एस.एन.आर. रमेश ल निलंबित कर देहे। उंहें ए घटना म मृत श्रमिक के पत्नि ल अनुकंपा नियुक्ति पत्र दे गीस। जानबा के मुताबिक फर्नेस म मरम्मत के दौरान आगी लगे ले दू झिन मजूर झुलस गे रीहिन। जेमा ले एक झिन के मउत हो गीस अउ एक झिन मजूर गंभीर रूप ले घायल होगे रीहिस।
बैडमिंटन स्पर्धा
अंतर्राष्ट्रीय बैडमिंटन संघ डहार ले प्रदेश म अवइया बाईस ले पच्चीस सितंबर तक बैडमिंटन के इंटरनेशनल चैलेंज स्पर्धा के आयोजन करे जाही। भारतीय बैडमिंटन संघ के सचिव संजय मिश्रा ह मुख्यमंत्री ले मिले के बाद ए जानबा दीन। ए मउका म थॉमस कप विजेता भारतीय टीम के खिलाड़ी मन ह उपहार के रूप म मुख्यमंत्री बर अपन हस्ताक्षर करे बैडमिंटन कीट भेजे हे।
संक्षिप्त समाचार
– रायपुर के वृंदावन हाल म जन संस्कृति मंच के रायपुर इकाई डहार ले चार जून के प्रसिद्ध विचारक रामजी राय के किताब – मुक्तिबोध स्वदेश की खोज – के लोकार्पण करे जाही।
– कांकेर जिला के कोयलीबेड़ा म खुरतरई समिति डहार ले राखे गे सात सौ अड़तीस बोरा तेंदूपत्ता म आगी लगे ले जम्मों तेंदूपत्ता जलके राखे होगे।
– जशपुर जिला म कुनकुरी पुलिस ह नौकरी देवाय के नाव म तीस लाख रूपिया के ठगी करे के मामला म तीन झिन आरोपी ल गिरप्तार करे हे।
अउ
– रायगढ़ जिला म पुसौर पुलिस ह फटफटी चोरी के मामला म एक झिन आरोपी ल गिरप्तार करे हे। एखर तीर ले चोरी करे गे बीस ठिन फटफटी बरामद करे हे।