प्रधानमंत्री-संवाद-01
प्रधानमंत्री नरेन्द्र मोदी ह कहिन कि सेवा, सुशासन अउ गरीब कल्याण ह लोगन बर सरकार के अर्थ बदल देहे। आज शिमला म गरीब कल्याण सम्मेलन म प्रधानमंत्री ह कहिन कि केन्द्र सरकार ह पहिली दिन ले ही गरीब मन ल सशक्त बनाय के काम करे हे अउ नवा भारत बर काम करत हे। प्रधानमंत्री ह कहिन कि सत-प्रतिशत सशक्तिकरण के अर्थ भेदभाव अउ तुष्टिकरण खतम करना अउ सबो गरीब ल सरकारी योजना मनके पूरा लाभ देवाना हरय।
श्री मोदी ह प्रधानमंत्री सम्मान निधि योजना के तहत वित्तीय लाभ के ग्यारहवां किश्त घलो जारी करीन। एखर ले दस करोड़ ले जादा लाभार्थी किसान परिवार बर लगभग इक्कीस हजार करोड़ रूपिया के रासि अंतरित होही।
गरीब कल्याण सम्मेलन, प्रधानमंत्री नरेन्द्र मोदी के नेतृत्व म आठ बछर पूरा होय के अवसर म आयोजित करे गेहे। एखर संगेसंग एला देसभर म राज्य के राजधानी, जिला मुख्यालय अउ कृषि विज्ञान केन्द्र म घलो आयोजित करे गीस। सम्मेलन म देसभर के निर्वाचित जनप्रतिनिधि मन ल जनता ले सीधा गोठबात करे के अवसर मिलीस अउ सरकार के आने-आने कल्याण योजना के बारे म सुझाव घलो मिलीस।
प्रधानमंत्री-संवाद-02
छत्तीसगढ़ के सबो आने-आने जिला मन म ए मउका म कारीकरम आयोजित करे गीस। केन्द्रीय खाद्य प्रसंस्करण, उद्योग अउ जलशक्ति राज्यमंत्री प्रहलाद सिंह पटेल रईपुर के बरौंदा स्थित नेशनल इंस्टीट्यूट बायोटिक स्ट्रैस मैनेजमेंट संस्थान म आयोजित गरीब कल्याण सम्मेलन म सामिल होईन। ए मउका म ओमन कहिन कि सेवा, सुशासन अउ गरीब कल्याण ही मोदी सरकार के मूल मंत्र हरय। ए मउका म रईपुर लोकसभा सांसद सुनील सोनी अउ बड़का संख्या म जिला के किसान संग आने-आने योजना मनके लाभार्थी घलो मौजूद रिहीन। कारीकरम के दउरान केन्द्रीय राज्यमंत्री ह केन्द्र सरकार के आठ बछर के उपलब्धि उपर आधारित पत्रिका सेवा सुशासन अउ गरीब कल्याण के विमोचन करीन। संगेसंग परिसर म लगाय गे चित्र प्रदर्शनी के अवलोकन करीन।
उहें, अंबिकापुर के राजमोहिनी देवी कृषि महाविद्यालय म आयोजित कारीकरम म केन्द्रीय जनजातीय कार्य राज्यमंत्री रेणुका सिंह सामिल होईन। ए मउका म केन्द्रीय राज्यमंत्री ह आने-आने योजना मनके लाभार्थी के संग प्रधानमंत्री के संवाद सुनीन। कारीकरम ल संबोधित करत रेणुका सिंह ह कहिन कि पाछु बछर के दउरान देस के आने-आने वर्ग ल कल्याणकारी योजना मनके लाभ मिले हे। केन्द्रीय राज्यमंत्री ह ए मउका म योजना मनके लाभार्थी ले चरचा करीन अउ उंखर अनुभव ल जानीन। इही तरह के कारीकरम राज्य के आने जिला मन म घलो आयोजित करे गीस।
राज्यसभा चुनाव-नामांकन
राज्यसभा चुनाव के तहत छत्तीसगढ़ म दू सीट बर नामांकन भरे के आखिरी दिन आज कांग्रेस उम्मीदवार राजीव शुक्ला अउ रंजीता रंजन ह अपन नामांकन दाखिल करीन। ए अवसर म मुख्यमंत्री भूपेश बघेल, प्रदेश कांग्रेस प्रभारी पी.एल. पुनिया अउ मंत्रिमंडल के सदस्य मौजूद रिहीन। नामांकन दाखिल करे के बाद दूनों उम्मीदवार ह विधानसभा अध्यक्ष डॉक्टर चरणदास महंत ले विधानसभा स्थित उंखर कक्ष म सौजन्य भेंट करीन। भारतीय जनता पार्टी ह ए चुनाव म प्रत्यासी नइ उतारे हे। उहें, जनता कांग्रेस छत्तीसगढ़ ह पूर्व कैबिनेट मंत्री डॉक्टर हरिदास भारद्वाज ल अपन उम्मीदवार बनाय हे। ओमन ह आज अपन पार्टी के विधायक मनके संग विधानसभा पहुंच के राज्यसभा बर नामांकन दाखिल करीन।
काली नामांकन पत्र के जांच होही। उहें, तीन जून तक उम्मीदवार अपन नाम वापस ले सकही। जरूरत पड़े म दस जून के मतदान कराय जाही। इही दिन मतगणना के बाद जीते उम्मीदवार के घोसना करे जाही।
अमृत महोत्सव प्रष्नोत्तरी
आजादी के अमृत महोत्सव उपर आकाषवाणी समाचार डहार ले राष्ट्रीय स्तर म राखे जात प्रष्नोत्तरी के तहत आज के प्रष्न हे-
– स्काउट लैंड के मिशनरी विलियम एडम के रिपोर्ट के अनुसार 1930 के दशक म बंगाल अउ बिहार म कतका पाठसाला संचालित रिहीस ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यषाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
विश्व तम्बाकू-निषेध दिवस
आज विश्व तम्बाकू निषेध दिवस हरय। ए दिवस तम्बाकू ले होवइया नुकसान के बारे म जागरूकता बर हर बछर इकतीस मई के मनाय जाथे। ए बछर विश्व तम्बाकू निषेध दिवस के थीम हरय – ‘‘पर्यावरण के रक्षा‘‘।
ए मउका म आज छत्तीसगढ़ म घलो तम्बाकू के प्रति जन-जागरूकता लाय के उद्देश्य ले रैली, गीत-संगीत अउ परिचर्चा आयोजित करे गीस अउ जागरूकता रथ निकाले गीस। आज भारतमाता वाहिनी ह नसा ले होवइया नुकसान के बारे म लोगन ल सचेत करीन। रईपुर म समाज कल्याण विभाग डहार ले आयोजित ए कारीकरम म चिकित्सा विशेषज्ञ मन ह नशा छोड़े बर योग ल अपनाय उपर जोर दीन।
इही बीच, तम्बाकू नियंत्रण कारीकरम के राज्य नोडल अधिकारी डॉक्टर कमलेश जैन ह बतईन कि तम्बाकू के सेवन ले कतकोन बीमारी हो सकथे। एमा फेफड़ा ले संबंधित बीमारी, फेफड़ा के कैंसर, ह्दयघात, स्ट्रोक, दिल की बीमारी, लिवर कैंसर, मुंह के कैंसर, कोलन कैंसर अउ गर्भाशय के कैंसर जइसन बीमारी सामिल हे। डॉक्टर जैन ह बतईन कि तम्बाकू के नशा ले मुक्ति बर प्रदेस के पच्चीस जिला अस्पताल मन म टौबेको सिसेंशन सेंटर के स्थापना करे गेहे। ए केन्द्र मन म नशामुक्ति बर निःशुल्क काउंसलिंग अउ उपचार के सुविधा हे। पाछु वित्तीय बछर म ए केन्द्र मन म करीबन एक हजार नौ सौ छियालीस लोगन ह नशा ले मुक्ति पाय हे।
उच्च शिक्षा मंत्री-बैठक
उच्च शिक्षा मंत्री उमेश पटेल ह कहिन कि प्रदेस के बस्तर अउ सरगुजा संभाग के दूरस्थ इलाका मन म नवा कॉलेज खोलना राज्य सरकार के प्राथमिकता हरय। एखर ले अनुसूचित जनजाति वर्ग के विद्यार्थी मन ल उंखर क्षेत्र म ही उच्च सिक्षा हासिल करे म आसानी होही। नवा रईपुर म आयोजित उच्च शिक्षा परिषद के बइठका ल संबोधित करत श्री पटेल ल कहिन कि विश्वविद्यालय मन म रोजगार मूलक पाठ्यक्रम सुरू कराय जाय। ओमन ह सबो स्नातक अउ स्नातकोत्तर कक्षा मन म विद्यार्थी मन ल कम्प्यूटर प्रसिक्षण देके घलो निरदेस दीन। बइठका म उच्च सिक्षा मंत्री ह सरकारी कॉलेज मन म नैक के मूल्यांकन कार्य के प्रगति के घलो समीक्षा करीन।
आईइएस-फेरबदल
राज्य सासन ह आज कुछ आईएएस अउ आईपीएस अधिकारी मनके प्रभार म फेरबदल करे हे। एखर संगेसंग गरियाबंद के कलेक्टर ल घलो बदले गेहे। प्रभात मलिक अब गरियाबंद जिला के नवा कलेक्टर होही।
राज्य सासन ह आईएएस अंकित आनंद ल वर्तमान दायित्व के संगेसंग मुख्यमंत्री सचिवालय म सचिव के अतिरिक्त प्रभार सौंपे हे। एखर अलावा बालोद जिला के पुलिस अधीक्षक ल घलो बदले गेहे। अब जितेन्द्र कुमार यादव बालोद जिला के नवा पुलिस अधीक्षक होही।
मौसम
प्रदेस म काली एक-दू जघा म हल्का बरसा होय या गरज-चमक के संग छींटा पड़े के संभावना हे। उहें, कुछेक जघा म गरज-चमक के संग हवा-गरेर घलो चले के आसार हे।
मौसम विभाग के अनुसार पूर्व-पश्चिम द्रोणिका हरियाणा ले बांग्लादेश तक बने हे। एखर असर ले प्रदेस के मौसम म बदलाव होवत हे। उहें, प्रदेस म काली अधिकतम तापमान म वृद्धि होय के संभावना हे।
इही बीच, राजनांदगांव म आज गरज-चमक अउ तेज हवा के संग बरसा होईस। एखर ले लोगन ल गर्मी ले थोरकिन राहत मिलीस।