प्रधानमंत्री नरेंद्र मोदी के नेतृत्व म केंद्र सरकार आज सेवा, सुशासन अउ गरीब कल्याण के आठ बछर पूरा करत हे। ए दउरान राष्ट्र के संकल्प रेहे हे कि सबो योजना के लाभ शत-प्रतिशत पात्र मनखे तक पहुंचे । प्रधानमंत्री ह पहिली केहे रीहिन कि वोमन देश के करोड़ो मनखे के परिवारिक सदस्य के रूप म काम करत हे। ताकि कोनो भी पात्र मनखे गरीब कल्याण योजना ले झन छूटय।
तीन बछर पहिली आजे के दिन नरेंद्र मोदी ह दूसर घांव प्रधानमंत्री पद के शपथ ले रीहिन। श्री मोदी के नेतृत्व वाले एनडीए सरकार ह आज आठ बछर पूरा कर लेहे। ए दउरान सरकार ह नागरिक के हित बर कतकोन कदम उठाय हे।
प्रधानमंत्री नरेंद्र मोदी ह कीहिन कि कोविड के सेती जउन लइका मन अपन माता-पिता ल गंवाय हे, ओमन ल स्कूल अउ उच्च शिक्षा बर पूरा सहायता दे जाही।
आज बीहनिया वीडियो कॉन्फ्रेंस के माध्यम ले लइका मन बर पीएम केयर्स योजना के तहत दे जाने वाला लाभ के जानकारी देवत श्री मोदी ह कीहिन कि ए योजना ले अठारा ले तेइस बछर के आयुवर्ग के लइका मन ल एक निश्चित छात्रवृत्ति दे जाही। लइका के तेइस बछर पूरा होय म ओमन ल दस लाख रूपिया दे जाही।
श्री मोदी ह कीहिन कि ए योजना के तहत व्यावसायिक पाठ्यक्रम अउ उच्च शिक्षा बर शिक्षा ऋण घलो दे जाही। प्रधानमंत्री ह कीहिन कि ए योजना के माध्यम ले सरकार लइका मन ल हर माह चार हजार रूपिया के सहायता राशि देवत हे। ओमन ह सबो लइका ले फिट इंडिया अउ खेलो इंडिया पहल म भाग लेके आग्रह करे हे।
प्रधानमंत्री नरेंद्र मोदी आजादी के अमृत महोत्सव के अंतर्गत काली इकतीस मई के नौ ठिन मंत्रालय अउ विभाग ले जुड़े सोलह योजना मनके संगेसंग कार्यक्रम के लाभार्थी के संग गोठबात करही। गरीब कल्याण सम्मेलन नाव ले ये आयोजन शिमला म राखे गेहे, जिहां लाभार्थी मन वीडियो कॉन्फं्रेस के माध्यम ले जुड़ही।
ए मउका म प्रधानमंत्री किसान सम्मान निधि के ग्यारहवां किस्त के रूप म इक्कीस हजार करोड़ रूपिया ले जादा के राशि जारी करही। ए कार्यक्रम राज्य के राजधानी जिला मुख्यालय अउ किसान विकास केंद्र म घलो एके संग आयोजित करे जाही।
केंद्रीय राज्यमंत्री प्रहलाद सिंह पटेल रायपुर म अउ केंद्रीय राज्यमंत्री रेणुका सिंह मैनपाट म आयोजित कार्यक्रम म लाभार्थी मनले गोठबात करही। प्रधानमंत्री के ए कार्यक्रम के सोझे प्रसारण दूरदर्शन के माध्यम ले राष्ट्रीय अउ क्षेत्रीय चैनल म करे जाही। ए कार्यक्रम ल सोशल मीडिया चैनल जइसे यू-ट्यूब, फेसबुक, ट्वीटर, इंस्टाग्राम के माध्यम ले घलो देखे जा सकथे।
प्रधानमंत्री के संवाद कार्यक्रम म शामिल होय बर केंद्रीय मंत्री प्रहलाद सिंह पटेल काली बीहनिया आठ बजके चालीस मिनट म विमान ले रायपुर आही। एखर बाद वोमन राष्ट्रीय जैविक स्ट्रेस प्रबंधन संस्थान, बरौंदा म भारत सरकार के कल्याणकारी योजना के लाभार्थी ले गोठबात करही।
संघ लोक सेवा आयोग-यूपीएससी ह सिविल सेवा मुख्य परीक्षा दू हजार इक्कीस के परिणाम के घोषणा कर देहे। श्रुति शर्मा पहिली स्थान म हे उंहें अंकिता अग्रवाल अउ गामिनी सिंगला ल तीसरा जगा बनाय हे।
ए परीक्षा म छत्तीसगढ़ ले श्रद्धा शर्मा, अक्षय पिल्ले, प्रखर चंद्राकर अउ अभिषेक अग्रवाल ह सफलता पाय हे। परीक्षा परिणाम यूपीएससी के अधिकारिक वेबसाइट म देखे जा सकथे। प्रधानमंत्री नरेंद्र मोदी ह सिविल सेवा मुख्य परीक्षा पास करइया उम्मीदवार मन ल बधाई देहे। ट्वीट संदेश म श्री मोदी ह कीहिन कि ए युवा मन भारत के विकास यात्रा के अइसे महत्वपूर्ण बेरा म अपन कैरियर के शुरूआत करत हे, जब देश ह आजादी के अमृत महोत्सव मनावत हे।
आजादी के अमृत महोत्सव उपर आकाशवाणी समाचार डहार ले राष्ट्रीय स्तर म राखे जात प्रश्नोत्तरी के तहत आज के प्रश्न हे।
आज के प्रश्न हे – कोन स्वतंत्रता सेनानी अउ सामाजिक कार्यकर्ता ह जनजातीय लोगन के उत्थान बर भील सेवा मंडल के स्थापना करे रीहिन ?
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो – या ई-मेल आई डी – अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकथे।
भाग्यशाली प्रतिभागी ल विजेता के रूप म चुने जाही अउ काली के समाचार प्रभात म विजेता के नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
राज्यसभा चुनाव बर कांग्रेस अउ भारतीय जनता पार्टी ह अपन-अपन उम्मीदवार घोषित कर देहे। कांग्रेस अउ छत्तीसगढ़ ले वरिष्ठ कांग्रेस नेता अउ पत्रकार राजीव शुक्ला अउ बिहार के पूर्व लोकसभा सांसद रंजीता रंजन ल अपन उम्मीदवार बनाय हे। उंहें भाजपा ह छत्तीसगढ़ ले कोनो भी उम्मीदवार नइ उतारे हे।
इही बीच भाजपा के प्रदेश अध्यक्ष विष्णुदेव साय ह राज्यसभा के दू सीट म कांग्रेस डहार ले बाहरी उम्मीदवार के नाम तय करे म केहे हे कि कांग्रेस ह छत्तीसगढ़ के लोगन के अपमान करे हे।
नेता प्रतिपक्ष धरमलाल कौशिक ह कीहिन कि प्रदेश के कोनो भी कांग्रेस कार्यकर्ता ल उम्मीदवार नही बनाये जाना इंहा के लोगन के संग छलावा हरय।
उंहें जनता कांग्रेस छत्तीसगढ़ के अध्यक्ष अमित जोगी ह घलो ट्वीट करके कांग्रेस के सबो विधायक ले छत्तीसगढ़ के मान के खातिर दस जून के ए प्रत्याशी मन बर वोट नइ करे के अपील करे हे।
खबर के मुताबिक राज्यसभा चुनाव के तहत छत्तीसगढ़ म खाली होवइया दू सीट बर दस जून के मतदान होही। छत्तीसगढ़ बर राज्यसभा के कुल पांच सीट म ले दू राज्यसभा सदस्य भाजपा के सांसद रामविचार नेताम अउ कांग्रेस के छाया वर्मा के कार्यकाल इही साल उनतीस जून के सिरात हे।
निर्वाचन आयोग डहार ले जारी कार्यक्रम के अनुसार काली इकतीस मई तक नामांकन दाखिल करे जा सकही। एक जून के नामांकन पत्र के जांच अउ तीन जून तक उम्मीदवार ल नामांकन पत्र वापस लेके मउका दे जाही। जरूरत पड़े म दस जून के मतदान कराये जाही। इही दिन मतगणना के बाद जीते उम्मीदवार के घोषणा कर दे जाही।
अंतर्राष्ट्रीय योग दिवस के उपलक्ष्य म भारतीय सेना के छत्तीसगढ़ अउ ओडिशा सब एरिया मुख्यालय डहार ले आज नवा रायपुर स्थित सत्य सांई संजीवनी अस्पताल म योग के लाभ विषय म एक ठिन वार्ता के आयोजन करे गीस। एखर तहत योग के आने-आने आसन के प्रदर्शन करे गीस। एमा प्रदेश के लगभग सौ अधिकारी जवान नागरिक सुरक्षा कर्मचारी अउ ओखर परिजन मन भाग लीन।
ए मउका म मोरारजी देसाई योग संस्थान दिल्ली के योग विशेषज्ञ कीर्ती गुप्ता ह कीहिन कि योग के सरल आसन ल कोनो भी मनखे घर म आसानी ले कर सकथे। अइसने कार्यक्रम ओडिशा के सबो सैन्य स्टेशन भुवनेश्वर आर्मी कैम्प, बालासोर अउ गोपालपुर मिलिट्री स्टेशन म घलो आयोजित करे गीस।
छत्तीसगढ़ उच्च न्यायालय म काली इतवार के छुट्टी होय के बावजूद डिवीजन बेंच म रतिहा के बेरा वचुअर्ल सुनवाई करे गीस। करीबन एक घंटा के सुनवाई के बाद बेंच ह जांजगीर-चांपा कलेक्टर जितेंद्र शुक्ला के ओ आदेश उपर रोक लगा देहे, जेमा ओमन ह नगर पंचायत राहोद के अध्यक्ष के खिलाफ अविश्वास प्रस्ताव बर बइठका बुलाये के आदेश दे रीहिन।
खबर के मुताबिक नगर पंचायत राहोद के अध्यक्ष सत्या राजेंद्र गुप्ता के खिलाफ उपाध्यक्ष अउ पार्षद ह भ्रष्टाचार के आरोप लगात अविश्वास प्रस्ताव लाये के मांग कलेक्टर ले करे रेहिन। एमा कलेक्टर जितेंद्र शुक्ला ह अध्यक्षल नोटिस जारी करके पार्षद के बइठका बुलाके मतदान करे के निर्देश दे रीहिन। कलेक्टर के ए निर्देश ल नगर पंचायत अध्यक्ष ह हाइकोर्ट म चुनौती दे रीहिस।
जशपुर जिला के सन्ना क्षेत्र म आकाशीय बिजली गिरे ले एक झिन नोनी संग तीन लोगन के मउत होगे। उंहें सात आने लोगन मन झुलस गे। जेखर इलाज बलरामपुर जिला अस्पताल म चलत हे।
मुख्यमंत्री भूपेश बघेल ह ए घटना उपर गहरा दुख जताय हे। ओमन ह मृतक के परिवार वाले मन ल चार-चार लाख रूपिया के सहायता राशि देके घोषणा करे हे। संगेसंग प्रभावित लोगन के बने इलाज बर अधिकारी मन ल निर्देश देहे।